Kubjikamatatantra · અધ્યાય 2

જય ત્વં માલિની દેવી નિર્મલે મલનાશિની
જ્ઞાનશક્તિઃ પ્રભુર્ દેવી બુદ્ધિસ્ ત્વં તેજવર્ધની ॥

જનની સર્વભૂતાનાં સંસારે ઽસ્મિન્ વ્યવસ્થિતા
માતા વીરાવલી દેવી કારુણ્યં કુરુ વત્સલે ॥

એવં સ્તુતા મહાદેવી ભૈરવેણ મહાત્મના
તતો લિઙ્ગં વિનિર્ભિદ્ય નિર્ગતા પરમેશ્વરી ॥

નીલાઞ્જનસમપ્રખ્યા કુબ્જરૂપા વૃકોદરા
ઈષત્કરાલવદના બર્બરોર્ધ્વશિરોરુહા ॥

સુરૂપા ચ વિરૂપા ચ અનેકાકારરૂપિણી
વામપ્રસારિતકરા વામદેવી-મ્-ઉવાચ હ ॥

આજ્ઞાનન્દસમાવિષ્ટા સ્તુત્યાનન્દાકુલીકૃતા
ન વેદ્મિ કો ઽત્ર માં સ્તૌતિ કાહં કસ્ય વરપ્રદા ॥

ઉવાચૈવં મહાસત્ત્વા દૃષ્ટિપાતો મદીયકઃ
આશીવિષેવ દુષ્પ્રેક્ષ્યઃ સ કથં ધારિતસ્ ત્વયા ॥

પ્રાર્થયસ્વ તદા કિઞ્ચિદ્ યત્ તે મનસિ રોચતે ॥

પ્રસાદાય મહાદેવિ દદાજ્ઞાનુગ્રહં મમ
તપસા તવ ચોગ્રેણ મમ હાનિઃ કુજામ્બિકે ॥

સઞ્જાતા તેન મે દેવિ પૂર્વમ્ ઉક્તમ્ ઇદં મયા
એવં શ્રુત્વા મહાદેવી સલજ્જા ગદ્ગદેક્ષના ॥

કિં તે સિદ્ધં મહાદેવ યેન લજ્જાપિતા વયમ્ ॥

પૂર્વમ્ ઉક્તં મયા તુભ્યમ્ આજ્ઞાસમયગોચરે
મત્તુલ્યાનુગૃહીત્વા તુ પશ્ચાદ્ ભવ ગણામ્બિકા ॥

કસ્યેદં સિદ્ધસન્તાનં પારમ્પર્યક્રમાગતમ્
મત્સકાશાત્ પુનસ્ તુભ્યં ત્વત્સકાશાત્ પુનર્ મમ ॥

એવં તદ્ ભૈરવં વાક્યં શ્રુત્વા દેવી પરાઙ્મુખી
સઞ્જાતા કુબ્જિકારૂપા લજ્જાતો રભસોદિતા ॥

કિં તુ લજ્જાયસે દેવિ પૂર્વમ્ આજ્ઞા મયા તવ
ઇદાનીં દદ મે શીઘ્રં મા શઙ્કા મા વિલમ્બય ॥

અપ્રબુદ્ધપ્રમત્તેન યદા તદ્ રભસોદિતમ્
તત્ કિં નિગ્રહબુદ્ધ્યા વા યુક્તં ત્વેદં કુજેશ્વર ॥

સર્વાનુગ્રહકે દેવિ કિં ન બુધ્યસિ ચાત્મનિ
ન મયા રહિતં કિઞ્ચિન્ ન ત્વયા રહિતં ક્વચિત્ ॥

અન્યોન્યગુણયોગેન કાર્યકારણયોગતઃ
ત્વં ગુરુર્ મમ દેવેશિ અહં તે ન વિચારણાત્ ॥

રુદ્રભૈરવવીરાણામ્ એષા ચાજ્ઞા ન કસ્યચિત્
યદિ શિષ્યં ન મન્યેથ મિત્રત્વેન તદા દદ ॥

એવં બ્રૂતે તદા દેવ્યા સર્વમ્ એતદ્ ભવિષ્યતિ
પશ્ચિમેદં કૃતં દેવ પૂર્વભાગવિવર્જિતમ્ ॥

ચન્દ્રદ્વીપં મનોરમ્યં દેવ ત્યક્તું ન મે મનઃ
પશ્ચિમં સર્વમાર્ગાણાં ત્વં તાવદ્ અનુશીલય ॥

પશ્ચિમામ્નાયમાર્ગો ઽયં સિદ્ધાનામ્ અખિલં દદ
ગચ્છામ્ય્ અહં પુનસ્ તત્ર ભારતે કુલપર્વતમ્ ॥

અનાદિયુગપર્યન્તં કીર્તયામાસ તદ્વિદામ્
શ્રીપર્વતં કુમારાખ્યં છાયાછત્રવિભૂષિતમ્ ॥

એવમ્ ઉક્ત્વા ગતા તૂર્ણં શ્રીમત્કૌમારપર્વતમ્
તત્ર છાયાત્મિકા દેવી અવ્યક્તા વ્યક્તરૂપિણી ॥

ક્ષપિત્વા કાલપર્યાયં યાવદ્ આલોકયેદ્ દિશામ્
ઉત્તરાં તાવત્ તત્ સર્વં લિઙ્ગપૂર્ણં મહાવનમ્ ॥

અશીતિયોજનાયામં સમન્તાત્ પરિમણ્ડલમ્
ચતુર્દ્વારસમોપેતં તીર્થકોટિભિર્ આવૃતમ્ ॥

અનેકસિદ્ધસંછન્નં મનોરમ્યમ્ અનોપમમ્
તમોગુણગણાકીર્ણમ્ અનેકાશ્ચર્યસંકુલમ્ ॥

દેવ્યાદૃષ્ટિનિપાતેન અકસ્માચ્ છ્રીર્ ઉપસ્થિતા
તેન શ્રીશૈલમ્ ઉદ્દિષ્ટં દેવ્યાનામપ્રતિષ્ઠિતમ્ ॥

અઙ્ગુષ્ઠેન કૃતા રેખા સ્વસ્થાનસ્ય ચ તસ્ય વૈ
તત્ર જાતા નદી દિવ્યા સાસીમા ઉભયોર્ અપિ ॥

તચ્છાયાં નિશ્ચલાં કૃત્વા આજ્ઞાં દત્ત્વા તુ શામ્ભવીમ્
અત્ર યો વિશતે કશ્ચિત્ સ મે તુલ્યો ભવિષ્યતિ ॥

હર્તા કર્તા સ્વતન્ત્રો ઽસૌ ભ્રષ્ટજ્ઞાનપ્રકાશકઃ
આજ્ઞાતો ગુણમ્ ઐશ્વર્યં ત્રૈલોક્યે સચરાચરે ॥

એવમ્ આક્ષેપયિત્વા તુ ગતા ત્રિકૂટપર્વતમ્
તત્ર કાલં ક્ષપિત્વા તુ કિષ્કિન્ધાખ્યમ્ અનુગ્રહેત્ ॥

તસ્ય ચાજ્ઞાવિભૂતિં તુ દત્ત્વાનુગૃહ્ય રાક્ષસાન્
યેન તિષ્ઠામ્ય્ અહં તીરે સમુદ્રસ્ય ત્વ્ અશઙ્કિતા ॥

તત્ર કન્યાકુમારી ત્વં ગત્વા કાલસ્ય પર્યયમ્
સમુદ્રમ્ અનુગૃહીત્વા દરદણ્ડીં ગતા પુનઃ ॥

તત્ર છાયાધરી દેવી અવ્યક્તગુણચેતસા
લોકાનુગ્રહહેત્વર્થં તત્રાજ્ઞાં મોચયેત્ પુનઃ ॥

પૂર્વસ્થાને તુ યા વાચા સા ત્વ્ અત્રૈવ ભવિષ્યતિ
એવમ્ ઉક્ત્વા ગતા દૂરં પશ્ચિમં હિમગહ્વરમ્ ॥

યત્ર ઓલમ્બિકા નામ તિષ્ઠતે વનપલ્લિકા
રક્તામ્બરધરા રક્તા રક્તસ્થા રતિલાલસા ॥

તત્રસ્થા ગહ્વરાન્તસ્થા ગુહાગહનવાસિની
યાવત્ સન્તિષ્ઠતે કાલં તાવદ્ યોગિમયં ખિલમ્ ॥

તૈસ્ તુ સન્તોષિતા દેવી નયોપાયૈર્ અનેકધા
તતઃ પ્રસન્નગમ્ભીરા ઉવાચેદં કુજેશ્વરી ॥

અનેકોપાયરચના વિવેકગુણશાલિની
ઓડ્ડિતા યેન અઙ્ઘ્રિભ્યાં તેનેદમ્ ઓડ્ડિયાનકમ્ ॥

ભવિષ્યતિ પુરાવસ્થમ્ અષ્ટકોટિગુણાશ્રયમ્
આગત્ય ખેચરીચક્રાત્ ત્વ્ અમોઘાજ્ઞાપ્રસાદતઃ ॥

અષ્ટૌ તે માનસાઃ પુત્રા ભવિષ્યન્તિ ચ ષડ્ગુણાઃ
શાકિન્યષ્ટકમાતા ત્વમ્ અષ્ટસિંહાસનાધિપાઃ ॥

રુદ્રાણી રુદ્રશાકી ચ ગોમુખી સુમુખી તથા
વાનરી કેકરી ચૈવ કાલરાત્રી ચ ભટ્ટિકા ॥

વામનો હર્ષણશ્ ચૈવ સિંહવક્ત્રો મહાબલઃ
મહાકાલૈકવીરશ્ ચ ભૈરવશ્ ચ પ્રચણ્ડકઃ ॥

ચતુર્ભુજો ગણાધ્યક્ષો ગજવક્ત્રો મહોત્કટઃ
ઐરાવતો વિનાયક્ષઃ ષડ્ એતે પ્રાતિચારકાઃ ॥

પુત્રીપુત્રાષ્ટકોપેતા નિવૃત્તિસ્થા નિયામિકા
અનેકસૃષ્ટિકર્તા ચ સુસમ્પૂર્ણગુણોજ્જ્વલઃ ॥

કૃતે ચોડ્ડમહેશાનો મિત્રાનન્દઃ પતિસ્ તવ
અષ્ટૌ પુત્રાઃ કરિષ્યન્તિ અધિકારં પશ્ચિમાન્વયે ॥

અધિકારં કરિષ્યન્તિ ષટ્ કુલાધિપતીશ્વરાઃ
યુગે યુગે ભવિષ્યન્તિ પૃથક્સંજ્ઞાક્રમોદયાઃ ॥

એવં તે સૂચિતં સર્વં ક્રમૌઘઃ કુલપદ્ધતિઃ
ભવિષ્યદ્રક્તચામુણ્ડે ગમિષ્યામો યથેપ્સિતમ્ ॥

એવં દત્ત્વા વરં તેભ્યઃ કરાલં ચ સમાગતા
મહાજ્વાલાલિસન્દીપ્તં દીપ્તતેજાનલપ્રભમ્ ॥

મહાજ્વાલાવલીટોપં દેવ્યાસ્ તેજો મહાદ્ભુતમ્
ધૃતં યેન પ્રતાપો ઽસ્યાસ્ તેન તજ્ જાલસંજ્ઞકમ્ ॥

કિઞ્ચિત્કાલસ્ય પર્યાયે પ્રબુદ્ધકિરણોજ્જ્વલા
વિચિત્રરચનાનેકં પશ્યત્ય્ અગ્રેન્દ્રજાલવત્ ॥

કસ્યૈષા રચના દિવ્યા પૂર્વમ્ આસીદ્ ઇહાધ્વરે
મત્તેજસઃ પ્રતાપેન ભ્રષ્ટા ત્વં ન પલાયિતા ॥

કરાલવદને તુભ્યં માયાજાલપ્રસારિકે
જાલન્ધરાધિપત્યત્વં ભવિષ્યત્ય્ અચિરેણ તુ ॥

આગત્ય ખેચરીચક્રાચ્ છ્રીસિદ્ધકૌણ્ડલીશ્વરઃ
અશેષાર્થવિદો નાથઃ સ તે નાથો ભવિષ્યતિ ॥

ભવિષ્યન્તિ કરાલિન્યો દશૈવ દુહિતા તવ
ભવિષ્યન્ત્ય્ ઉત્તરાનન્દા દશૈતે ગુણવત્તરાઃ ॥

પ્રાતિચારાસ્ તુ ષડ્ ભદ્રે ભવિષ્યન્ત્ય્ અનુગોચરે
આજ્ઞાનન્દસમેકત્વં કરાલીદુહિતાજનમ્ ॥

માલા શિવા તથા દુર્ગા પાવની હર્ષણી તથા
જયા તુ સુપ્રભા ચૈવ પ્રભા ચણ્ડા ચ રુગ્મિની ॥

શકુનિઃ સુમતિર્ નન્દો ગોપાલશ્ ચ પિતામહઃ
પલ્લવો મેઘનિર્ઘોષઃ શિખિવક્ત્રો મહાધ્વજઃ ॥

કાલકૂટો દશૈવૈતે પુત્રાઃ સિંહાસનાધિપાઃ
ભવિષ્યન્તિ ભવે તુભ્યં મેઘવર્ણાદિતો ગણાઃ ॥

બૃહત્કુક્ષૈકદંષ્ટ્રશ્ ચ ગણેશો વિઘ્નરાટ્ પ્રભુઃ
મહાનન્દઃ ષડ્ એવૈતે ભવિષ્યન્તિ ગણેશ્વરાઃ ॥

ઉત્તરાનન્દમ્ ઈશાનાઃ કરિષ્યન્તિ યુગે યુગે
જ્ઞાનભ્રંશાવસાને તુ સંજ્ઞાભેદાન્ પુનઃ પુનઃ ॥

કરાલી તવ સન્તાને ભવિષ્યન્તિ મમાજ્ઞયા
એવમ્ ઉક્ત્વા મહેશાની ગતા સહ્યં મહાવનમ્ ॥

સમ્પૂર્ણમણ્ડલાર્ચીભિઃ પૂરયન્તી જગત્ત્રયમ્
નિઃશેષં નિખિલં વિશ્વં લોકાલોકાન્તસંસ્થિતમ્ ॥

યાવત્ સન્તિષ્ઠતે તત્સ્થા નયોપાદૈર્ અનેકધા
તાવચ્ ચણ્ડાક્ષી બલવત્ પરિચર્યામ્ અનેકધા ॥

કુર્વન્તી વિવિધોપાયૈઃ સૌકર્યરચનાન્ બહૂન્
તેજોભાભિઃ પ્રદીપ્યન્તે ચણ્ડાક્ષીગુણપૂરિતાઃ ॥

યસ્મિન્ન્ અદ્રૌ સ્થિતા દેવી દેદીપ્યાર્ચિર્ ઘનોજ્જ્વલા
તત્ પ્રદેશં સ્થિરં જાતમ્ અન્યદ્ દગ્ધં ચરાચરમ્ ॥

આપૂરિતમ્ ઇદં સર્વમ્ અનેકરચનાદિભિઃ
પશ્યતે પર્વતં માતા કાલાન્તે મુદિતેક્ષણા ॥

તાવચ્ ચણ્ડાક્ષિણીત્ય્ અગ્રે પશ્યત્ય્ અમિતતેજસા
વિશ્વામૃતૈઃ પૂરયન્તી દિવ્યૌઘગુણલાલસા ॥

ઉવાચેદં મહાદેવી સાધુ પૂર્ણમનોરથે
યેનેદં પૂરિતં સ્થાનં તેન ત્વં પૂર્ણરૂપિણી ॥

ભવિષ્યત્ય્ આધિપત્યત્વં પર્વતો ઽયં તવોદ્ભવઃ
વિષુવેન તુ યોગેન યેનેદં સંસ્કૃતં ત્વયા ॥

તેન પીઠેશ્વરી ત્વં વૈ ભવિષ્યસિ યુગે યુગે
તેજસ્કન્ધાસનં તુભ્યં દ્વાપરાન્તાધિકારિણી ॥

ભવિષ્યતિ ભવે ઽવશ્યં ચક્રાનન્દઃ પતિસ્ તવ
સમ્પૂર્ણમણ્ડલાકારો ગ્રન્થાધારઃ કુલેશ્વરઃ ॥

દ્વાદશૈવ ભવે તુભ્યં ભવિષ્યન્તિ કુમારિકાઃ
તાભ્યસ્ ત્વ્ એકૈકકોટિશ્ ચ આધિપત્યાધિકારિકાઃ ॥

ભવિષ્યન્તિ તથા પુત્રાઃ પ્રાતિચારાસ્ તદર્ધતઃ
આગન્તું ખેચરીચક્રાત્ પ્રેરિતાસ્ તુ મમાજ્ઞયા ॥

યેન તે નામતો બ્રૂમિ યથા તે ઽહં પ્રસાદિતા
હંસાવલી સુતારા ચ હર્ષા વાણી સુલોચના ॥

મહાનન્દા સુનન્દા ચ કોટરાક્ષી વૃકાનના
યશોવતી વિશાલાક્ષી સુન્દરી દ્વાદશી તથા ॥

સિંહાસનાધિપત્યે તાઃ પૂર્ણાદ્રૌ કુલકન્યકાઃ
વલિર્ નન્દો દશગ્રીવો હયગ્રીવો હયસ્ તથા ॥

સુગ્રીવો ગોપતિર્ ભીષ્મઃ શિખણ્ડી ખણ્ડલસ્ તથા
શક્રશ્ ચણ્ડાધિપઃ સિદ્ધાઃ સર્વાનુગ્રહકારકાઃ ॥

હંસભેદાદિમાર્ગસ્ય ભવિષ્યન્તિ પ્રકાશકાઃ
આમોદશ્ ચ પ્રમોદશ્ ચ સુમુખો દુર્મુખસ્ તથા ॥

અવિઘ્નો વિઘ્નકર્તા ચ તવ માર્ગેષુ રક્ષકાઃ
એતત્ સર્વં યથાન્યાયં ચણ્ડાક્ષી પુરતસ્ તવ ॥

ભવિષ્યતિ મમાજ્ઞાતો ગચ્છામઃ કામિકં યથા
એવમ્ ઉક્ત્વા ગતા શીઘ્રં યત્રોચ્છુષ્મા નદી શુભા ॥

મહોચ્છુષ્મવનાન્તસ્થા દિવ્યાદિવ્યૌઘવાહિની
મહોચ્છુષ્મહ્રદં યત્ર યત્ર નીલો મહાહ્રદઃ ॥

તત્ર સા રમ્ અતે દેવી દિવ્યાજ્ઞાગુણશાલિની
ઉભયોસ્ તટયોસ્ તસ્થા રમિત્વા કાલપર્યયમ્ ॥

યાવત્ પશ્યતિ વિશ્વાઙ્ગી તત્ત્વાઙ્ગી તાવત્ પશ્યતિ
કામભોગકૃતાટોપાં વસન્તતિલકોજ્જ્વલામ્ ॥

દ્રવયન્તીં દ્રવન્તીં તામ્ ઇચ્છયા ભુવનત્રયમ્
તાં દૃષ્ટ્વા પ્રહસિતા માતા કા ત્વં કસ્માદ્ ઇહાગતા ॥

તાં દૃષ્ટ્વા મોહિતા માતા જાનન્ત્ય્ અપિ ન જાનતી
વિશ્રમ્ય ચ મુહૂર્તૈકં યાવદ્ આલોકયેત્ પુનઃ ॥

તાવોચ્છુષ્મ ઇહાયાતા મમાગ્રે શોકવાહિની
સાધુ કામિનિ સર્વત્ર યત્ ત્વયા દર્શિતં મમ ॥

કામાનન્દફલાવાપ્તિસ્ તેન કામેશ્વરી ભવ
કારુણ્યાત્ કામરૂપં તુ મમાગ્રે વિવિધં કૃતમ્ ॥

તેનેદં કામરૂપં તુ મહત્ પીઠં તવાધ્વરમ્
ભવિષ્યતિ કલૌ પ્રાપ્તે ચન્દ્રાનન્દઃ પતિસ્ તવ ॥

વાયુસ્કન્ધોપવિષ્ટો ઽસૌ આત્મભેદપ્રકાશકઃ
અશેષાર્થવિદો નાથઃ સર્વજ્ઞઃ પરમેશ્વરઃ ॥

કામિકે કામુકસ્ તુભ્યં કામદેવો ભવિષ્યતિ
ભવિષ્યન્તિ મહાનન્દાસ્ ત્રયોદશ ગુણાન્વિતાઃ ॥

યોગિન્યો યોગસમ્પન્નાસ્ તવ ડિક્કરિકાઃ શુભાઃ
પુત્રાસ્ ત્રયોદશા હ્ય્ એવં સપ્તૈતે પ્રાતિચારકાઃ ॥

ભવિષ્યન્તિ જગદ્દીપા જગદાનન્દકારકાઃ
પ્રભા પ્રસૂતિઃ શાન્તાભા ભાનુવત્યા ચ શ્રીબલા ॥

હારી ચ હારિણી ચૈવ શાલિની કન્દુકી તથા
મુક્તાવલી તથા ચાન્યા ગૌતમી કૌશિકી તથા ॥

શાકોદરી ચ વિખ્યાતા રાજ્ઞાઃ સિંહાસનાધિપાઃ
ભાનુર્ અનન્તહેતુશ્ ચ સુરાજઃ સુન્દરસ્ તથા ॥

મહાવક્ત્રાર્જુનો ભીમો દ્રોણકો ભસ્મકો ઽન્તકઃ
કેતુધ્વજો વિશાલાક્ષઃ કલ્યાણશ્ ચતુરાનનઃ ॥

એષોઽવતારો વિવિધઃ કલૌ પ્રાપ્તે ભવિષ્યતિ
લમ્પટો ઘણ્ટકર્ણશ્ ચ સ્થૂલદન્તો ગજાનનઃ ॥

બૃહત્કુક્ષિઃ સુરાનન્દઃ સપ્તમસ્ તુ બલોત્કટઃ
સપ્તૈતે વિષમાઃ ક્રુદ્ધાઃ સર્વસન્તાનપાલકાઃ ॥

પીઠોપપીઠસન્દોહે ક્ષેત્રે ક્ષેત્રે મહાબલાઃ
સર્વસાધારણા હ્ય્ એતે ભવિષ્યન્તિ કલૌ યુગે ॥

અન્યત્ કામામ્બિકે કિઞ્ચિદ્ ભણિષ્યામઃ કરિષ્યથ
સર્વસાધારણં તચ્ ચ ચતુર્ણાં તુ વિજાનથ ॥

ભવિષ્યતિ કલાચક્રં મચ્છરીરસમુદ્ભવમ્
પરાપરવિભાગજ્ઞં માતઙ્ગકુલસમ્ભવમ્ ॥

નીલસ્યોત્તરભાગે તુ મહોચ્છુષ્મવનાન્તગમ્
પરાપરં તુ તેનેદં પઞ્ચમં પીઠનાયકમ્ ॥

માતઙ્ગિનીકુલાન્તસ્થમ્ આદ્યં ચૈવાથ પઞ્ચમમ્
તેન જાતં જગત્ સર્વં તત્ સઞ્જાતં કુલાકુલમ્ ॥

મચ્છરીરાઙ્ગસમ્ભૂતં ભવિષ્યન્તિ તવાધ્વરે
કાર્યદૃષ્ટૌ પ્રશસ્તં તુ અપ્રશસ્તમ્ ઇતરે જને ॥

મધ્યદેશસ્થિતં તચ્ ચ મત્સમીપે વ્યવસ્થિતમ્
સિદ્ધપાલકસંયુક્તં ભવિષ્યત્ય્ અવતારકમ્ ॥

નિરાચારં જગત્ સર્વં નિરાચારવિવર્જિતમ્
નિરાચારેણ યોગેન કરિષ્યન્તિ નિરાકુલમ્ ॥

હારિકા હારિ ગાન્ધારી વીરા ચૈવ નખી તથા
જ્વાલિની સુમુખી ચૈવ પિઙ્ગલી ચ સુકેશિની ॥

શ્રીફલઃ કષ્મલશ્ ચણ્ડશ્ ચણ્ડાલશ્ ચેટકસ્ તથા
માતઙ્ગો બાહુકો વીરો અવ્યક્તો નવમઃ સ્મૃતઃ ॥

હેરમ્બો ધૂલિસંજ્ઞસ્ તુ પિશાચઃ કુબ્જવામનઃ
પરાપરં તુ તત્ પીઠં કામપીઠોર્ધ્વમધ્યગમ્ ॥

ત્રિશ્રોત્રં પૂરિતં યસ્માત્ ત્રિશ્રોત્રા ત્વં તથા ભવ
નદીરૂપાસિ માઙ્ગલ્યે ભવ ત્વં કામરૂપિણી ॥

માતઙ્ગાનાં કુલોત્પન્ને યસ્ ત્વાં નિત્યાભિવાદયેત્
તેષુ ક્ષેમકરી નિત્યં ન મન્યન્તે ક્ષયઙ્કરી ॥

ત્વાં મુક્ત્વા યો ઽન્યવર્ણસ્ તુ યો ઽત્ર પીઠે ભવિષ્યતિ
તસ્યાપદકરી નિત્યં ભવિષ્યસિ કુલામ્બિકે ॥

એવં તિષ્ઠ મમાનન્દે જગાનન્દકરી ચિરમ્
ભવિષ્યતિ પુરાવસ્થમ્ અમોઘાજ્ઞાપ્રસાદતઃ ॥

એવમ્ ઉક્ત્વા ગતા શીઘ્રં દેવીકોટં કૃતક્ષણાત્
આલોકનેન મહતા અટ્ટહાસો ઽટ્ટહાસતઃ ॥

કોલાગિર્યાં તથોજ્જેની પ્રયાગવરણાદિકમ્
વિરજેકામ્રકાદ્યં ચ અન્યચ્ ચાન્યં ચરાચરમ્ ॥

યત્ર યત્ર ગતા દેવી યત્ર યત્રાવલોકયેત્
તત્ર સન્દોહતીર્થં ચ ઉપક્ષેત્રાણ્ય્ અનેકધા ॥

કૃતં તુ ભારતે વર્ષે આત્મકીર્તિકુમારિકા
તેન કૌમારિકાખણ્ડં સઞ્જાતં પુણ્યપાવનમ્ ॥

પૂર્વસન્તાનદેવેન યદ્ ઉક્તં ભારતં વ્રજ
તદાવસાને કુબ્જેશિ ઉભાભ્યાં મેલકં ત્વ્ ઇહ ॥

તત્ કૃતં સકલં દેવ્યા આજ્ઞાનન્દાવબોધકમ્
આગતા તુ પુનસ્ તત્ર પૂર્વરૂપાનુયાયિની ॥

દેવો ઽપિ પૂર્વસન્તાને શિષ્યઃ સુરવરાર્ચિતે
શ્રીમદોડ્રમહેશાનં કૃત્વા ચાજ્ઞાં પુનર્ દદેત્ ॥

વ્રજ ત્વં ભારતે વર્ષે ઇતઃ પ્રભૃત્ય્ અનુગ્રહઃ
ઉડ્ડપીઠે પુનઃ સ્થાતું કુરુ સૃષ્ટિમ્ અનેકધા ॥

એવમ્ ઉક્ત્વા પુનસ્ તત્ર ત્રિકૂટશિખરાન્તગઃ
અદૃષ્ટવિગ્રહેશાનશ્ ચાન્તર્ધાનમ્ અભૂત્ ક્ષણાત્ ॥