Kubjikamatatantra · અધ્યાય 1

સંવર્તામણ્ડલાન્તે ક્રમપદનિહિતાનન્દશક્તિઃ સુભીમા સંસૃજ્યાદ્યં ચતુષ્કમ્ અકુલકુલગતં પઞ્ચકં ચાન્યષટ્કમ્
ચત્વારઃ પઞ્ચકો ઽન્યઃ પુનર્ અપિ ચતુરસ્ તત્ત્વતો મણ્ડલેદં સંસૃષ્ટં યેન તસ્મૈ નમત ગુરુવરં ભૈરવં શ્રીકુજેશમ્ ॥

શ્રીમદ્ધિમવતઃ પૃષ્ઠે ત્રિકૂટશિખરાન્તગમ્
સન્તાનપુરમધ્યગમ્ અનેકાકારરૂપિણમ્ ॥

ત્ર્યસ્રં વૈ ત્રિપ્રકારં તુ ત્રિશક્તિત્રિગુણોજ્જ્વલમ્
ચન્દ્રસૂર્યકૃતાલોકં વહ્નિદેદીપ્યવર્ચસમ્ ॥

ત્રિસન્ધ્યાવેષ્ટિતં દિવ્યં પ્રાકારત્રિપથાન્વિતમ્
દ્વારપાલત્રયોપેતં ત્રિકપાટાર્ગલાન્વિતમ્ ॥

અનેકરત્નસન્દીપ્તમ્ ઉદ્યાનવનમણ્ડિતમ્
વસન્તગુણસમ્પન્નં સતતાનન્દપૂરિતમ્ ॥

સન્તાનભુવનં દિવ્યં દિવ્યાદિવ્યૈર્ નિષેવિતમ્
તત્ર તં ભુવનેશાનં વ્યક્તાવ્યક્તં સનાતનમ્ ॥

કાર્યકારણભાવેન કિઞ્ચિત્ કાલમ્ અપેક્ષયા
તિષ્ઠતે ભૈરવીશાનો મૌનમ્ આદાય નિશ્ચલમ્ ॥

તત્ર દેવગણાઃ સર્વે સકિન્નરમહોરગાઃ
કુર્વન્તિ કલકલારાવં સમાગત્ય સમીપતઃ ॥

શ્રુત્વા કલકલારાવં કો ભવાન્ કિમ્ ઇહાગતઃ
હિમવાન્ તુ પ્રસન્નાત્મા ગચ્છામો ઽન્વેષણં પ્રતિ ॥

યાવત્ સ પશ્યતે તત્સ્થં શિવજ્ઞાનાવલોકનાત્
તાવત્ પશ્યતિ શ્રીનાથમ્ આગતં તુ મમાશ્રમે ॥

ગતસ્ તૂર્ણં પ્રયત્નેન યત્રાસ્તે ભગવાન્ પ્રભુઃ
સકુટુમ્બઃ સ્તુતિં દિવ્યાં હિમવાન્ વાક્યમ્ અબ્રવીત્ ॥

અદ્ય મે સફલં જન્મ અદ્ય મે સફલં તપઃ
અદ્ય મે સફલં સ્થાનં જીવિતં સફલં મમ ॥

અદ્ય ધન્યઃ કૃતાર્થો ઽહમ્ અદ્ય મે સફલા ગતિઃ
અદ્ય મે સફલં સર્વં ત્રૈલોક્યં સચરાચરમ્ ॥

યન્ નાથ ભવદઙ્ઘ્રિભ્યામ્ અઙ્કિતં મસ્તકં મમ
તેન વિખ્યાતકીર્તિસ્ તુ ભવિષ્યામિ જગત્ત્રયે ॥

ત્વત્પ્રસાદેન દેવેશ સર્વજ્ઞત્વં લભામ્ય્ અહમ્
કિમ્ અનેન ન પર્યાપ્તં યદ્ આયાત-મ્-ઇહ પ્રભુઃ ॥

કિં કુર્મઃ કા ગતિર્ મહ્યમ્ આદેશો દીયતાં પ્રભો
હિમવન્તવિલાપો ઽયં શ્રુત્વૈવં સકુટુમ્બિનઃ ॥

ઉવાચ ભગવાન્ નાથઃ પ્રહસ્યેમાં ગિરં શુભામ્
હિમવન્ત ગિરે સાધુ તુષ્ટો ઽહં તવ ક્લિન્નયા ॥

પ્રાર્થયસ્વ વરં કિઞ્ચિદ્ દાસ્યામો મનસેપ્સિતમ્
હિમવન્ત મહાપ્રાજ્ઞ તુષ્ટો ઽહં પરમાર્થતઃ ॥

કિં કૃતં મે મહેશાન સ્વકીયદયયા પ્રભો
રુચિતં કુરુ દેવેશ હિમવાન્ અબ્રવીદ્ ઇદમ્ ॥

પર્વતોલ્લપિતં શ્રુત્વા ઉવાચેદં સુરેશ્વરઃ
પ્રસન્નગિરયા દિવ્યં વરં દાતું સમુદ્યતઃ ॥

પ્રથમં તાવત્ તુભ્યં હિ પઞ્ચ શ્લોકાન્ પઠેત્ તુ યઃ
સન્નિધાનઃ પ્રયત્નેન ભવિષ્યામો હ્ય્ અવશ્યતઃ ॥

દ્વિતીયં સન્નિધાનો ઽહં ભવિષ્યામિ તવાધ્વરે
તૃતીયં સર્વશૈલાનાં રાજત્વં ચક્રધારિણઃ ॥

ચતુર્થં મમ તુલ્યત્વં પઞ્ચમં મોક્ષદં નૃણામ્
એવં પઞ્ચ વરાસ્ તુભ્યં હિમવન્ત પુનર્ વદ ॥

કિમ્ અન્યેન મહાદેવ આત્મતુલ્યસ્ ત્વયા કિલ
કૃતો ઽહં તત્ કિમ્ અન્યેન કિં તુ દેવાભયં દદ ॥

એવં બ્રૂથ પુનઃ કિઞ્ચિદ્ યત્ તે મનસિ રોચતે
તદ્ અર્પયામ્ય્ અહં સર્વં પૂર્વમ્ એવોદિતં મયા ॥

આશ્રમે સતિ સર્વત્ર પ્રાતિચારં વિના ન હિ
તત્ર ડિક્કરિકા મહ્યં કરિષ્યત્ય્ ઉપલેપનમ્ ॥

સા ચ ધર્મપ્રવૃત્તા ચ યેન તત્ ક્રિયતાં પ્રભો
ઇષ્ટા સા મમ દેવેશ કાલિકા ચ કુમારિકા ॥

એવં બભૂવ તસ્માદ્ વૈ તત્રસ્થા ગુણશાલિની
પ્રસાદયતિ દેવેશં વિનયાદ્યૈર્ અનેકધા ॥

વિનયેનોપસઙ્ગમ્ય સ્તુતિસ્તોત્રૈર્ અનેકધા
કાલેન બહુના કાલીમ્ ઉવાચેદં કુલેશ્વરઃ ॥

તુષ્ટો ઽહં કાલિકે તુભ્યં બ્રૂહિ કિઞ્ચિન્ મનેપ્સિતમ્
યત્ ત્વયા ધારિતં ચિત્તે તત્ પ્રાર્થય હ્ય્ અશઙ્કિતા ॥

લબ્ધ્[વ્]આ પ્રણયસદ્ભાવં ત્યક્તલજ્જા મનોત્સુકા
વદતે નાથ નાથસ્ ત્વં ભવાસ્માકં સુરાર્ચિતઃ ॥

એવં શ્રુત્વા મહેશાનો વાક્યમ્ આનન્દસમ્ભવમ્
તતઃ સમ્પાદિતં શીઘ્રમ્ આજ્ઞાનન્દગુણોજ્જ્વલમ્ ॥

આજ્ઞાસનસમારૂઢં પ્રેરિતાનન્તશમ્ભુના
દર્શિતં નિખિલં સર્વં પૂર્વસન્તાનગોચરમ્ ॥

તતઃ પ્રબુદ્ધભાવાત્મા વદત્ય્ એવં કુલેશ્વરી
દર્શિતં નિખિલં મહ્યં કિમ્ આશ્ચર્યં કુજેશ્વર ॥

વિદિતં નાથ મે સર્વં ક્રિયાકારણગોચરમ્
યસ્માત્ સમ્પદ્યતે હ્ય્ એવં તદ્ આચક્ષ્વ કુજેશ્વર ॥

આજ્ઞાતો ગુણમ્ ઐશ્વર્યં સઞ્જાતં પરમેશ્વર
અસ્ય તન્ત્રાર્થસદ્ભાવં બ્રૂહિ મે પરમાર્થતઃ ॥

દૃષ્ટં સમસ્તપર્યન્તં ભવદાજ્ઞાષડધ્વરમ્
બ્રૂહિ નિર્દેશતઃ સર્વં યદિ તુષ્ટઃ કુજેશ્વર ॥

આજ્ઞાતો ગુણસદ્ભાવં બ્રૂહિ દેવ ગુણોદયમ્
યથા દ્રક્ષ્યાપિતં સર્વમ્ આજ્ઞાદ્વારેણ મે ઽખિલમ્ ॥

પૂર્વવૃત્તાન્તસદ્ભાવં પૂર્વપાઠશ્રુતં ચ યત્
પૂર્વકલ્પાર્થનિર્દેશમ્ આજ્ઞાતો જ્ઞાપિતં ત્વયા ॥

પૂર્વસન્દર્શિતં દેવ આજ્ઞાગુણમહોદયમ્
તદ્ભ્રંશાદ્ ભ્રંશમ્ ઉત્પન્નમ્ અતો ઽર્થં કથય સ્ફુટમ્ ॥

કલ્પે કલ્પે ત્વયા દેવ સંહિતાર્થમ્ અનેકધા
મન્ત્રતન્ત્રક્રિયાયોગાઃ કથિતા નાવધારિતાઃ ॥

ઇદાનીં સંસ્ફુટં સર્વમ્ આજ્ઞાગુણમહોદયમ્
યસ્માત્ સઞ્જાયતે સર્વં તત્પ્રભાવં વદ પ્રભો ॥

આનન્દશ્ ચાવલિશ્ ચૈવ પ્રભુર્ યોગી તથૈવ ચ
અતીતશ્ ચૈવ પાદશ્ ચ ષટ્ પ્રકારાઃ કથં સ્થિતાઃ ॥

સાધુ સાધુ મહાભાગે મહાનન્દવિધાયિનિ
પૃચ્છિતં યત્ ત્વયા વાક્યમ્ અત્યદ્ભુતમ્ અનામયમ્ ॥

ગોપિતં સર્વરુદ્રાણાં વીરાણાં ભૈરવેષુ ચ
સિદ્ધક્રમં નિરાચારં તથાપિ કથયામિ તે ॥

સિદ્ધમાર્ગક્રમાયાતં સિદ્ધપઙ્ક્તિવ્યવસ્થિતં
ગોપિતં સર્વમાર્ગેષુ તવાદ્ય પ્રકટીકૃતમ્ ॥

પૂર્વસઞ્ચોદિતો દેવિ ત્વયાહં ત્વં મયા પુનઃ
અત્ર કલ્પે મયા તુભ્યં ત્વં પુનર્ મમ દાસ્યસિ ॥

આરાધયન્તં દેવેશં ન જાનાતિ તપોત્કટા
તતઃ સ્તવેન દિવ્યેન દેવેનાનન્દભૃદ્ગિરા
દિવ્યસ્તોત્રં સમારબ્ધમ્ અશેષાર્થપ્રબોધકમ્ ॥

એવં સમ્યગ્વિધાનેન રુદ્રશક્તિઃ સ્વયમ્ભુના
નિર્મિતા સ્વાઙ્ગજૈર્ વર્ણૈર્ નાદિફાન્તસ્વરૂપિણી ॥

સર્વાક્ષરમયી દેવી સર્વલક્ષણલક્ષિતા
ઉત્પન્ના સુમહાતેજા ભૈરવાભિમુખે સ્થિતા ॥

વદતે માલિની કસ્ ત્વં દેવો ઽહં કિમ્ ઉપાગતઃ
માં ત્વં કથં ન જાનાસિ દેવિ ત્વં કેન નિર્મિતા ॥

સૃષ્ટિક્રીડાવતારાર્થે મયા ઉત્પાદિતા પ્રિયે
ત્વમ્ એવોત્પાદિતઃ કેન બ્રૂહિ વાક્યં તુ ભૈરવ ॥

વર્ણરાશિર્ અહં ભદ્રે સ્વયમ્ભૂર્ જગતઃ પતિઃ
મમાઙ્ગસમ્ભવૈર્ બીજૈસ્ ત્વમ્ એવોત્પાદિતા મયા ॥

વીરાવલીતિ તેન ત્વં રુદ્રશક્તિઃ પ્રશસ્યસે
વદતે માલિની ક્રુદ્ધા ત્વત્સ્વકીયૈઃ શરીરજૈઃ ॥

વર્ણૈર્ ઉત્પાદિતાહં તે ગૃહ્ણ વર્ણાન્ સ્વકાન્ ઇહ
પ્રસાર્ય વર્ણમાલાં તુ તત્ત્વાકારં સ્વરૂપિણમ્ ॥

પૂર્વબીજતનુર્ ભૂત્વા પ્રસુપ્તામૃતકુણ્ડલી
કુતઃ સર્વે ગતા વર્ણા ભ્રાન્તચિત્તઃ સુરેશ્વરઃ ॥

પરં વિસ્મયમ્ આપન્નઃ ક્ષણમ્ એકં વિતર્કિતઃ
લોલીભૂતાસ્ તુ તે સર્વે જીવતત્ત્વે લયં ગતાઃ ॥

અહો દેવ્યાઃ પ્રભાવસ્ તુ ઇતિ ચિન્તા જગત્પતેઃ
સ્તુનોતિ વિવિધૈઃ સ્તોત્રૈર્ દેવો ભુવનમાલિનીમ્ ॥

કાવર્ણા કામરૂપે પુર્ એવ પુરિગતા જાલપીઠે જિકા યા ષડ્ભિન્ના મધ્યપીઠે ત્રિપથપદગતા ત્વં ચ શૃઙ્ગાતકારા
સિદ્ધૈર્ યા વેષ્ટિતાઙ્ગી પરિવૃતચતુરૈઃ ષષ્ટિભિર્ યોગિવૃન્દૈર્ યુક્તા હૃત્પઙ્કજેન ડરલકસહજા પાતુ માં રુદ્રશક્તિઃ ॥