Kubjikamatatantra · અધ્યાય 19

રૂપં તુ દ્વિવિધં પ્રોક્તં સ્થૂલસૂક્ષ્મં પ્રકીર્તિતમ્
સ્થૂલમ્ એકવિધં ભદ્રે સૂક્ષ્મરૂપમ્ અનન્તગમ્ ॥

કણ્ઠકૂપાદિતઃ કૃત્વા નિરોધ્યાન્તમ્ અપશ્ચિમમ્
રૂપોપલબ્ધિસંસ્થાનં વિજ્ઞાનાનન્દપૂરિતમ્ ॥

પ્રમાણં રૂપમાર્ગસ્ય વિંશત્કોટ્યેકસંસ્થિતમ્
માયાવધિસ્ તુ કૂપાદૌ અત્ર વિજ્ઞાનસમ્ભવઃ ॥

એતદ્ રૂપપદૈર્ વ્યાપ્તં રૂપચક્રસમન્વિતમ્
કોટિશઃ કોટિશશ્ ચક્રં ચક્રે ચક્રે ચતુષ્ટયમ્ ॥

વિજ્ઞાનાનાં વરારોહે પ્રભાવો ઽસ્યાનુશીલય
ચતુરાશીતિ-મ્-એકત્ર ક્રમાત્ સ્થૂલં પૃથક્ પૃથક્ ॥

કથયામિ યથાન્યાયં ચિત્રભાન્વાદિતઃ પ્રિયે
દ્વિતીયં વારુણં રૂપં તૃતીયં દણ્ડપાણિકમ્ ॥

પ્રાણરૂપં ચતુર્થં તુ હંસરૂપં તુ પઞ્ચમમ્
ષષ્ઠમ્ આત્મવતં રૂપં સપ્તમં શક્તિપૂર્વકમ્ ॥

અષ્ટમં બ્રહ્મણો રૂપં નવમં કેશવાત્મકમ્
દસમં તુ ભવેદ્ રુદ્રં ચન્દ્રમ્ એકાદશં વિધુઃ ॥

દ્વાદશં ભાસ્કરં રૂપમ્ ઈશ્વરાખ્યં ત્રયોદશમ્
કોદણ્ડદ્વયમધ્યસ્થં દેદીપ્યન્તં સુવર્ચસમ્ ॥

કોદણ્ડતિર્યગૌ દ્વૌ તુ વામનૌ કુબ્જિકાત્મકૌ
કોદણ્ડાન્તર્ગતૌ ચાન્યૌ કર્ણકુબ્જાન્તરે સ્થિતૌ ॥

શઙ્ખરૂપધરૌ દ્વૌ તુ સાઙ્ખ્યયોગસ્ય દાયકૌ
અષ્ટાદશમ્ અનન્તાખ્યં પિઙ્ગલૈકોનવિંશમમ્ ॥

વિંશમં સકલીશાનં નિરોધી ચૈકવિંશમમ્
વડવાનલમ્ આસીનમ્ એકૈકં ચક્રરૂપિણમ્ ॥

ચિન્તયન્તઃ સ્વભાવેન અભાવપદમ્ આશ્રિતઃ
અકુલેશ્વરરૂપેણ વિજ્ઞાનપ્રભવો ભવેત્ ॥

યસ્ય યદ્ યાદૃશં રૂપં તદ્ રૂપં ધરતે તુ સઃ
અવાન્તરપદસ્થસ્ય પારમ્પર્યોજ્ઝિતસ્ય ચ ॥

તસ્ય ચાભ્યાસયોગેન ન સર્વજ્ઞપદાનુગમ્
યસ્ય યદ્ યાદૃશી વ્યાપ્તિસ્ તત્રસ્થસ્ તત્ફલં લભેત્ ॥

કારણાન્તે મહાદેવો વિભાતિ કિરણોજ્જ્વલઃ
સતતાભ્યાસયોગેન ત્રિરબ્દાત્ તત્પદં વ્રજેત્ ॥

નિરોધિનીપદાર્થાનાં મહાગ્રન્થિપદે સ્થિતા
તારયેદ્ વિદિતા સન્તી અવિજ્ઞાતા પ્રપાતયેત્ ॥

મહામાયાર્ણવં ઘોરં તારયેદ્ વિદિતા સતી
મહાન્તારીતિ સા પ્રોક્તા સર્વરૂપોપરિસ્થિતા ॥

તસ્યા રૂપમ્ અજાનન્તઃ સ્થૂલસૂક્ષ્મસુસૂક્ષ્મગમ્
ન પશ્યન્તિ ગુણં રૂપં યાવદ્ એષાં ન સઙ્ક્રમેત્ ॥

પૂજિતા ધ્યાયિતા માતા પૂર્વોક્તે ક્રમમણ્ડલે
અષ્ટકોટિસુવિસ્તીર્ણે ત્રિકોટ્યોર્ધ્વગુણોજ્જ્વલે ॥

તત્રસ્થોચ્ચારિતા ધ્યાતા પૂજિતા તુ ફલપ્રદા
સાધયેત્ સર્વરૂપાણિ વટેન્દીકુસુમાર્ચિતા ॥

રૂપં દેવ્યાસ્ તુ પૂર્વોક્તમ્ અશેષગુણશાલિનમ્
કિં તુ નોચ્ચારિતં તસ્ય સ્થૂલદેહં યથા સ્થિતમ્ ॥

તસ્ય ચોચ્ચારણાદ્ દેવિ પ્રબુદ્ધકિરણોજ્જ્વલા
યષ્ટીહતા ભુજઙ્ગીવ પાતયેદ્ અવલોકનાત્ ॥

તદ્વદ્ એષા મહાવીર્યા મહાન્તારી મહાબલા
વિદ્યાયષ્ટિહતા સન્તી સૃષ્ટિચક્રે હ્ય્ અનેકધા ॥

ષટ્પ્રકારોપરિસ્થા સા ષડ્વક્ત્રા બૃહદોદરા
ભુજૈર્ દ્વાદશકોપેતા કોટરાક્ષા સુભીષણા ॥

વજ્રહસ્તા તુ વજ્રસ્થા ષડ્યોગિકુલમધ્યગા
ષષ્ટ્ઃઈશાનસમાયુક્તા સિદ્ધપઙ્ક્તૌ નિવેશિતા ॥

વિદ્યાદણ્ડસમાયુક્તા તસ્યોચ્ચારં શૃણુષ્વ મે
યોગિનીનાં કુલેશા તુ ગોપિતાન્યત્ર શાસને ॥

હા સ્વા યૈ પ્રથમં પદં ણ્ડા ક ડુ કુ દ્વિતીયકમ્
ડુ કુ ટી ઙ્ગ તૃતીયં તુ પિ ટી ઙ્ગ રિ ચતુર્થકમ્ ॥

પઞ્ચ પઞ્ચ તથા પઞ્ચ સ્વરૂપાક્ષરમાલિકા
એષા સાઙ્કેતિકા પ્રોક્તા સંસ્ફુટા ગુરુવાનને ॥

એષોપાયો મહાન્તાર્યા દુર્લભઃ પ્રકટીકૃતઃ
તસ્યૈવોચ્ચારણાત્ સર્વં કમ્પતે ડામરીગણમ્ ॥

સંહારક્રમષટ્કસ્ય વૃદ્ધાજ્ઞેયં પ્રકીર્તિતા
આજ્ઞા ક્રમતિ ભક્તાનામ્ અભક્તાનાં ન સઙ્ક્રમેત્ ॥

કિં તુ ચારાધિતા કિઞ્ચિત્ પારમ્પર્યૌઘમ્ આગતા
ઉચ્ચરન્તો હનેચ્ છૈલાન્ ક્રુદ્ધસ્યાન્યેષુ કા કથા ॥

અસ્યા દેવ્યાર્ચને ધ્યાને જપે હવનતત્પરઃ
સ્થૂલં સંસાધયેત્ સર્વં મહામાયાન્તકાવધિમ્ ॥

યત્ સઞ્ચિન્તયતે રૂપં તત્ સર્વમ્ ઇચ્છયા ભવેત્
મહામાયાવિના યોગી માયૈવ ગુણકૃદ્ ભવેત્ ॥

ભૂગુણો ભૂચરે માર્ગે જલરૂપો જલેશ્વરઃ
તેજસ્વી તેજસો માર્ગે વાયોર્ વાયુભૃતેશ્વરઃ ॥

વ્યોમ્નિ વ્યોમાધિપો યોગી પઞ્ચાન્તગુણયોગતઃ
ત્રિપઞ્ચવર્ષાદ્ ઊર્ધ્વં ચ સર્વજ્ઞો ગુણ-મ્-ઈશ્વરઃ ॥

વટેન્દીવરમાલાભિઃ પૂજયન્તૌઘસન્તતિમ્
સાધયેન્ નિખિલં રૂપં સ્થૂલસૂક્ષ્મમ્ અતીન્દ્રિયમ્ ॥

તત્પ્રસાદેન માયોર્ધ્વં ભિત્ત્વા શક્તિત્રયં વ્રજેત્
તત્રૈવ સા મહામાયા સૂક્ષ્મરૂપા સુસૂક્ષ્મગા ॥

ખેચરે ઽનેકરૂપા સા સૂક્ષ્મસૂક્ષ્મતરા પરા
દૃશ્યતે મૃગતૃષ્ણેવ ગુર્વાજ્ઞાતોપદેશતઃ ॥

અકુલેશ્વરદેવસ્ય પદાન્તમ્ અનુવર્તિની
વિશુદ્ધમાલિની હ્ય્ એષા તદાભ્યાસેન સર્વવિત્ ॥

અભ્યાસો ઽપ્ય્ અસ્ય કર્તવ્યઃ પૃષ્ઠે દત્ત્વા તુ ભાસ્કરમ્
પ્રાસાદગૃહવૃક્ષાણાં સન્ધ્યાકાલાન્તરે સ્થિતઃ ॥

અથ ચેદ્ વૃક્ષમૂલાધો મધ્યાહ્ને સમુપસ્થિતે
પસ્યતે રૂપભૃત્ સર્વં સૂક્ષ્મસૂક્ષ્માણવો હ્રદમ્ ॥

રૂપમ્ અન્યદ્ વરારોહે શૃણુષ્વ કરણાત્મકમ્
યેન સાધયતે રૂપં ખેચરાદિમ્ અનુક્રમાત્ ॥

સર્વસાધારણં દેવિ ન ભવત્ય્ અફલપ્રદમ્
યાવન્ ન તત્પ્રસાદેન ગુર્વાજ્ઞાતઃ પ્રવર્તતે ॥

શુભે ઽહનિ મુહૂર્તે વા શિષ્યમ્ એકાન્તતો નયેત્
આજ્ઞાં દત્ત્વા પ્રપૂજિત્વા કૃત્વા મણ્ડલકાદિકમ્ ॥

તતોપરિ ચ સંસ્થાપ્ય નિર્મલે ગગનાન્તરે
છાયાં નિરીક્ષયિત્વા તુ કણ્ઠકૂપોપદેશતઃ ॥

તતો નિરીક્ષયેદ્ વ્યોમં સાકારં રૂપદર્શનમ્
પશ્યતે ભાસ્કરં બિમ્બં શિવરૂપં સદાશિવમ્ ॥

તં દૃષ્ટ્વા પાતકાનાં ચ અવસાનં ભવિષ્યતિ
ષણ્માસાભ્યાસયોગેન ભૂચરીણાં પતિર્ ભવેત્ ॥

ત્રિરબ્દેન તુ ભૂનાથો હર્તા કર્તા સ્વયં પ્રભુઃ
અવસ્થાં ત્યજતે સર્વાં પઞ્ચાવસ્થાપરં વ્રજેત્ ॥

નિરાચારેણ યોગેન તન્ નાસ્તિ યન્ ન સાધયેત્
ઉક્તાનુક્તં તુ દેવેશિ સર્વમ્ અસ્માત્ પ્રસાધયેત્ ॥

સકૃદભ્યાસયોગેન માસે વા ત્વ્ અયને ઽપિ વા
વિન્દતે હ્ય્ આગતં કાલમ્ આપદો વાત્મનઃ પરે ॥

કૃષ્ણવર્ણેન દેવેન ષણ્માસાન્ મ્રિયતે ધ્રુવમ્
વક્ત્રમૂર્ધ્નિ ભયં વિન્દ્યાન્ મૂર્ધ્નિ પાતાન્ મ્રિયેદ્ ધ્રુવમ્ ॥

લોહિતે બ્રહ્મહત્યા તુ પીતે વ્યાધિભયં ભવેત્
પાદૌ યત્ર ન દૃશ્યેતે વિદેશગમનં ભવેત્ ॥

ઊરુમાર્ગે ભવેદ્ રોગં ગુહ્યે વૈ નશ્યતે પ્રિયા
ઉદરે અર્થનાશં તુ હૃદયે મૃત્યુભાગ્ ભવેત્ ॥

ભુજહીને પતેદ્ બન્ધુર્ વામે ભાર્યાભયં ભવેત્
ષણ્માસાલ્લક્ષયેત્ સર્વમ્ આત્મનશ્ ચ પરસ્ય વા ॥

ઉપદેશેન દેવેશિ શેષં ચ ગુરવાનનાત્
રૂપપૂર્ણહ્રદાન્તસ્થો રૂપસ્થો નિરપેક્ષધીઃ ॥

સૂક્ષ્મસૂક્ષ્માન્તરૂપેણ રૂપાતીતપદં વ્રજેત્
યોગસિદ્ધા મહાદેવિ દૃશ્યન્તે વ્યોમગાગણાઃ ॥

બિન્દુરૂપાસ્ તુ તે સર્વે ક્વચિદ્ દૃશ્યન્તિ ન ક્વચિત્
ઘટાધારગતં પ્રાણં કૂર્મયન્ત્રેણ પીડયેત્ ॥

નોચ્છ્વસેન્ માસમ્ એકં તુ તથ્યં ભૈરવ-મ્-અબ્રવીત્
ભૈરવોવાચ કલ્યાણિ કુલરૂપં પ્રકાશિતમ્ ॥

અકુલં વ્યાપકં રૂપં સુસૂક્ષ્મં શૃણુ સામ્પ્રતમ્
એકાનેકવિભાગેન સંસ્થિતા વ્યોમમાલિની ॥

અમૃતામ્ભોધિમધ્યસ્થા ચારસ્થા ચારવાહિની
ઇચ્છારૂપધરા દેવી કુબ્જિનીતિ કુજામ્બિકા ॥

દ્વિભુજૈકમુખી દેવી અથાનેકભુજાનના
ચારસ્થા ચારમધ્યસ્થા ચારદેહા ચલેશ્વરી ॥

ચન્દ્રગર્ભસ્ય ચર્યેયં ચારવી ચણ્ડચણ્ડિકા
પીઠમધ્યગતા પૂજ્યા ચન્દ્રગર્ભસમન્વિતા ॥

ષોડશારકમધ્યસ્થા ચતુર્વર્ગફલોદયા
પીઠપીઠાધિપૈર્ યુક્તા સર્વજ્ઞા સર્વદાયિકા ॥

આજ્ઞાવબોધજનની દિવ્યરૂપપ્રકાશિની
અસ્યાઃ પ્રગોપિતં રૂપં યોગિનીભિર્ વરાનને ॥

તેન રૂપવતાનાં તુ રૂપવ્યાપ્તિર્ ન સિધ્યતિ
દેદીપ્યન્તી મહાનન્દા સહસ્રાદિત્યવર્ચસા ॥

સ્ફુરન્તી માલિકા દિવ્યા આજ્ઞાતઃ સમ્પ્રવર્તતે
સદોદિતં સદાનન્દં પરાનન્દપ્રદાયકમ્ ॥

કલાતીતં તુ કાલાન્તમ્ આજ્ઞારૂપોજ્જ્વલં પરમ્
અનન્તં સકલં જ્ઞાનં દિવ્યાજ્ઞાપરમોજ્જ્વલમ્ ॥

ઉત્તરસ્ય ચ ષટ્કસ્ય રૂપેદં પરસમ્ભવમ્
દક્ષિણસ્યાપિ ષટ્કસ્ય શક્તિયુક્તસ્ય વર્ણિતમ્ ॥

સ્થૂલરૂપં વરારોહે સર્વત્રૈવ પ્રકાશિતમ્
ઉત્તરં ગોપિતં રૂપં દેવતાભિઃ સુસિદ્ધિદમ્ ॥

કસ્માત્ સિધ્યતિ શીઘ્રેદમ્ અન્યત્ર ક્ષપણાકુલમ્
ભૈરવેણ તુ રૂપેણ ભૈરવત્વં પ્રસાધયેત્ ॥

વિઘ્નજાલોજ્ઝિતં હ્ય્ એતત્ તેનેદં શીઘ્રસિદ્ધિદમ્
અત્ર રૂપસમાલબ્ધઃ પૂર્વોક્તં લભતે ફલમ્ ॥

અકુલક્રમમાર્ગેણ આજ્ઞાયોગેન સર્વથા
અકુલીનક્રમાન્તસ્થઃ કુબ્જીશપદમ્ આશ્રિતઃ ॥

પ્રાપ્યતે ભૈરવાનન્દં સમસ્તાનન્દપૂર્વકમ્
તોષિતો ઽહં ત્વયા દેવિ તેનેદં સંસ્ફુટં મયા ॥

કીર્તિતં તવ કલ્યાણિ સુગોપ્યં રૂપસાધનમ્
સર્વતન્ત્રેષુ લુપ્તેદમ્ ઈષદ્ યોગિમતે સ્ફુટમ્ ॥

મૌક્તિકાવલિસાદૃશ્યં સિતરક્તં તુ પીતગમ્
ગ્રીવા કુણ્ડલિની તસ્ય વિયોગં તુ તદા ભવેત્ ॥

ચઞ્ચુપ્રસારણે વર્ષં દુર્ભિક્ષં ચઞ્ચુસમ્પુટે
કૃષ્ણવર્ણે ભવેન્ મૃત્યુઃ ષણ્માસાત્ તુ ન સંશયઃ ॥

સર્વમ્ એવ ન પશ્યેત સદ્યમ્ એવ વિનશ્યતિ
ભ્રૂમધ્યગતમ્ આત્માનં ષડઙ્ગેન મહામતે ॥

દૃશ્યતે સૂર્યવદ્ બિમ્બં પ્રત્યક્ષં ચાગ્રતઃ સ્થિતમ્
હ્રસ્વે નીલે ભયં વિન્દ્યાદ્ દીર્ઘે સ્થૂલે હ્ય્ અરોગતા ॥

ધૂમ્રે ઉચ્ચાટનં પ્રોક્તં રક્તે રોગં વરાનને
કૃષ્ણે બ્રહ્મવિનાશં વા મૃત્યુર્ એવાભિજાયતે ॥

સમલે તુ તથા હાનિર્ નીલમાલે તથાપદઃ
વાયવ્યાં તુ યદા ધૂમ્રાં માલાં પસ્યતિ યોગવિત્ ॥

તદા ઉચ્ચાટનં દેવિ નૈરૃત્યાં દંષ્ટ્રિણો ભયમ્
આગ્નેય્યાં તુ યદા ભિન્નાં માલાં પશ્યતિ યોગવિત્ ॥

દેશભ્રંશો ઽ ગ્નિદાહશ્ ચ રાજા ચૈવ વિનશ્યતિ
મધ્યે તસ્ય યદા છિદ્રં પશ્યતે યોગચિન્તકઃ ॥

મૃત્યુસ્ તસ્ય વરારોહે દિવસૈર્ દશભિર્ ભવેત્
ઈશાને સ્થાવરભયં કૌબેર્યામ્ અર્થસિદ્ધિદમ્ ॥

ઐન્દ્ર્યાં વૈ સ્થાનલાભં ચ વારુણ્યાં સુખમ્ એધતે
યામ્યાયાં મ્રિયતે દેવિ નાત્ર કાર્યવિચારણાત્ ॥

સમ્પૂર્ણં સુસમં પીતં સ્નિગ્ધં રૂક્ષત્વવર્જિતમ્
સામલં સિદ્ધિદં પ્રોક્તં જીવાદિત્યં વરાનને ॥

શ્રીમત્કુબ્જિમતે સર્વં સંસ્ફુટં કથિતં તવ
માલિની વ્યોમસંસ્થા ચ બિન્દુર્ વ્યોમે તથૈવ ચ ॥

કુલાખ્યં પુરુષં વ્યોમે રૂપાતીતમ્ અતઃ શૃણુ ॥

ઊચુસ્ ત્વ્ એવં પુનર્ ભદ્રે રૂપાતીતસ્ય નિર્ણયમ્
શૃણુષ્વ સર્વભાવેન અવજ્ઞારહિતા સતી ॥

અમનસ્કં મનોઽતીતં ભાવાભાવવિવર્જિતમ્
લયોચ્ચારવિનિર્મુક્તં હેતુતર્કવિવર્જિતમ્ ॥

હેયોપાયવિનિર્મુક્તં શ્રુતિદૃષ્ટાન્તવર્જિતમ્
નાસ્તિક્યભાવસમ્પન્નં શૂન્યભૂતમ્ અનામયમ્ ॥

પ્રમેયાવલિયોગસ્ય અતીતં કારણેશ્વરમ્
અતીન્દ્રિયમ્ અનાભાષં પરાકાશં તુ તદ્ વિદુઃ ॥

તસ્યોપાયમ્ ઇદં સર્વં યોગમાર્ગક્રિયાધ્વરમ્
સાધ્યતે યેન માર્ગેણ રૂપાતીતં તુ તચ્ છૃણુ ॥

વ્યોમં કૃત્વા સમાકાશે સ સંસ્મૃત્ય વિલાપયેત્
અસ્મિન્ તં તુ ચિદાકાશે બાહ્યાકાશે સ એવ હિ ॥

પરાકાશે પરે સ્થાને યાનાકાશમ્ અતોર્ધ્વતઃ
રૂપાતીતં તતશ્ ચોર્ધ્વે નિઃસન્દિગ્ધં પદં પરે ॥

બહુનોક્તેન કિં દેવિ પૂર્વં વ્યાવર્ણિતં મય
ગુરોર્ અસ્ય પ્રસાદેન લભ્યતે પરમં પદમ્ ॥

પૂર્વં વ્યાવર્ણિતં તુભ્યમ્ અદૃષ્ટગુણલક્ષણમ્
એતત્ સર્વં સમાખ્યાતં શામ્ભવસ્ય ગુણાસ્પદમ્ ॥

નિરાચારેણ માર્ગેણ શામ્ભવં તુ સમભ્યસેત્
કિમ્ અભ્યાસઃ પુનસ્ તસ્ય યસ્ય સર્વં પુરઃસરમ્ ॥

યસ્ય સમ્ભવિતં શમ્ભુમ્ અનન્તગુણદાયકમ્
યોગાત્મા વૈ સ સર્વત્ર પૂજ્યતે યોગિનીકુલે ॥

યદિ શમ્ભુવિધેર્ ભક્તઃ સંસારે વિરતાત્મનઃ
સ સાધયતિ સર્વજ્ઞો દેહેનાનેન સર્વગઃ ॥

ન ધ્યાનં ન જપઃ પૂજા મણ્ડલાદિપ્રપૂજનમ્
નિરાચારવિધાનેન દેહેનાનેન ભૈરવિ ॥

આત્માનં પૂજયેન્ નિત્યં યથાલબ્ધોપજીવકઃ
અગ્નિવત્ સર્વવર્ણેષુ સ શીઘ્રં ફલભાગ્ ભવેત્ ॥

પ્રાકૃતામ્ અધમાં સિદ્ધિં મધ્યમાં ચોત્તમાં ચ યામ્
ઉત્તમોત્તમતાં યાન્તિ ષડ્ભિર્ માસૈઃ ક્રમાત્ ક્રમાત્ ॥

અધિકારપદસ્થેન કર્તવ્યં વિધિપૂર્વકમ્
ગુરુમણ્ડલકાદ્યં ચ પૂર્વામ્નાયપ્રપૂજનમ્ ॥

શ્રુતં સર્વં ચ દેવેશ પદાર્થાનાં ચ નિર્ણયમ્
કિમ્ આમ્નાયં કથં પૂજા એતદ્ આચક્ષ્વ ભૈરવ ॥

દેવ્યુક્તં ચ વચઃ શ્રુત્વા ભૈરવો હસિતાનનઃ
પૂજામ્નાયમ્ ઇદં સર્વં કથ્યમાનં ન બુધ્યસિ ॥

દ્વીપામ્નાયસ્ તુ પ્રથમો દેવ્યામ્નાયો દ્વિતીયકઃ
પીઠામ્નાયસ્ તૃતીયસ્ તુ સિદ્ધામ્નાયશ્ ચતુર્થકઃ ॥

અસ્યોદ્ધારણમ્ એકત્ર પૂજનં તત્ પ્રકીર્તિર્તમ્
ગુપ્તદેશે સુગન્ધાઢ્યે વિવિક્તોપદ્રવોજ્ઝિતે ॥

પીઠાઃ પીઠાધિપાઃ સિદ્ધાઃ પીઠામ્બાસ્ તત્સમીપતઃ
પીઠમધ્યગતાં દેવીં ચતુઃસિદ્ધસમન્વિતામ્ ॥

મણ્ડલોત્તરદિગ્ભાગે ગુરુપઙ્ક્તિં પ્રપૂજયેત્
એતદ્ આમ્નાયમ્ આખ્યાતં કિં તુ મણ્ડલકાન્વિતમ્ ॥

તલહસ્તપ્રમાણેન યોન્યગ્રે મણ્ડલાદિકમ્
પૂજ્યો ઽહં મણ્ડલે તત્ર નવાત્માનપદાક્ષરૈઃ ॥

આનન્દપદસંયુક્તં શક્તિભૈરવપૂર્વકમ્
ભૈરવેતિ પદં પશ્ચાદ્ વીરાધિપતયેતિ ચ ॥

સષોડશપદૈર્ યુક્તઃ પૂજનીયો ઽત્ર મણ્ડલે
આમ્નાયમણ્ડલં હ્ય્ એતત્ સમેખલચતુષ્કલમ્ ॥

સર્વમ્ એતત્ ક્રમામ્નાયં મણ્ડલોપરિ મણ્ડલમ્
પૂજિતેન ભવત્ય્ આસુ તત્ સર્વમ્ ઉદિતં મયા ॥

અલિના પૂરિતં પાત્રં સમયાલબ્ધોદકં પૃથક્
કર્મકાલે પ્રકર્તવ્યં પૂજાન્તે ઽર્ઘનિવેદનમ્ ॥

ચન્દનૈર્ ધૂપનૈવેદ્યૈર્ દદ્યાદ્ આચમનં પૃથક્
તસ્માત્ ક્રિયાકલાપેન આરાધનવિધિં યજેત્ ॥

દીપોત્સવં સનૈવેદ્યમ્ અલિપાત્રં સફલ્ગુષમ્
ચક્રપૂજાવિધિર્ હ્ય્ એવં કુર્યાદ્ આરાધને વિધૌ ॥

અથવામ્નાયમ્ આધારં દિવ્યૌઘાગમપદ્ધતિમ્
પૂજયેત્ સર્વભાવેન સર્વામ્નાયં સ ગોપયેત્ ॥

અથાદ્યમણ્ડલં યોનેસ્ તદ્વદ્ અસ્ય દિને દિને
કુર્વન્તસ્ય પરા વ્યાપ્તિઃ ક્રમોઘં સમ્પ્રવર્તતે ॥

ઓઘાધારમ્ ઇદં દિવ્યમ્ આગમં યઃ પઠેદ્ ઇદમ્
પાદુકૌ પૂજયિત્વા તુ ચતુર્દશ્યાષ્ટમીષુ ચ ॥

પુષ્પાવરણકે દિવ્યે વસ્ત્રમાલ્યોપશોભિતે
દિવ્યગન્ધસુગન્ધાઢ્યે દીપમાલોપશોભિતે ॥

સૌવર્ણરજતાદીભિસ્ તામ્રલોહશિલામૃદા
ભક્ત્યા-દેવં સ્વશક્ત્યા ચ પિષ્ટદીપાન્ ઘૃતાન્વિતાન્ ॥

નૈવેદ્યફલ્ગુષાલિભ્યાં પુષ્પધૂપૈર્ અનેકધા
એવં કૃત્વા તતઃ પશ્ચાદ્ વ્યાખ્યાને વાચને ઽપિ વા ॥

ગુરુમણ્ડલકં કુર્યાત્ ત્રિષ્કાલં પુસ્તકાગ્રતઃ
અહં વૈ ગુરવસ્ તસ્ય યત્રાસ્તે ચાગમઃ સ્વયમ્ ॥

ગુરુવચ્ ચ પ્રમન્તવ્યં વિદ્યાબોધપરં ગુરુમ્
ન વિના ચ ગુરોર્ વિદ્યા ન વિદ્યારહિતો ગુરુઃ ॥

યથા ગુરુસ્ તથા વિદ્યા યથા વિદ્યા તથા ગુરુઃ
પ્રાપ્તવિદ્યા ગુરોઃ પાર્શ્વે વિદ્યાપ્રાપ્તે ગુરુત્વતા ॥

એવં ચામ્નાયિકો માર્ગઃ સર્વથા ગ્રન્થતો ઽર્થતઃ
વેત્તિ સિદ્ધઃ સ મે તુલ્યઃ સામાન્યસ્ તત્સમો ન હિ ॥

એષ તે કૌલિકો માર્ગઃ પરમાર્થોપદેશતઃ
કુલં ચ કુલવિદ્યાં ચ કુલમાર્ગં કુલક્રમમ્ ॥

ચતુષ્કં યો વિજાનાતિ સ ભવેત્ કુલનન્દનઃ
ચતુષ્ટયં સમાખ્યાતં પૃચ્છ-મ્-અન્યં યથારુચિ ॥