Kubjikamatatantra · અધ્યાય 18

પદગ્રન્થિસમાલબ્ધસ્ તત્ત્વગ્રન્થિસમાશ્રિતઃ
કુબ્જિગ્રન્થિપદાન્તસ્થો હંસભેદપદં વ્રજેત્ ॥

હંસભેદે પરા શક્તિઃ સહજા શિવતત્ત્વગા
સા વિદ્યા પ્રથમા જ્ઞેયા દ્વિતીયા તુ પરાપરા ॥

ચત્વારિંશત્પદા જ્ઞેયા વિદ્યાતત્ત્વે નિવેશિતા
હંસગ્રન્થિસમારૂઢાં પ્રકટાર્થં વદામિ તે ॥

સોમેશ્વરં સમુદ્ધૃત્ય પતિતં સુરનાયિકે
શિખીશં કેવલં પશ્ચાલ્ લાકુલં તદનન્તરમ્ ॥

અર્ઘીશાસનસંસ્થં હિ બિન્દુના મસ્તકે હતમ્
લાકુલં પુનર્ ઉદ્ધૃત્ય ભુજઙ્ગાસનસંસ્થિતમ્ ॥

ત્રિમૂર્તિના ચ ચાક્રાન્તં શૂન્યમસ્તકભૂષિતમ્
શિખીશં વહ્નિસંયુક્તં ઝણ્ટીશેન સમન્વિતમ્ ॥

ક્રૂરાનન્દેન સમ્ભિન્નં લાકુલી તદનન્તરમ્
ભુજઙ્ગેન તુ સન્દીપ્તમ્ અર્ઘીશાસનસંસ્થિતમ્ ॥

તદ્ એવં લાકુલીશં તુ ભુજઙ્ગાધારમ્ ઈશ્વરમ્
ત્રિમૂર્તિના તુ ચાક્રાન્તં અં ક્રૂરં શિરસિ સ્થિતમ્ ॥

ભુજઙ્ગં તુ ચતુર્ધા વૈ કર્તવ્યં તુ કુલેશ્વરિ
કેવલં દ્વિતયં દેવિ અમરીશદ્વિતયાન્વિતમ્ ॥

લાકુલં તુ તતો દેયં ઝણ્ટીશેન તુ ભેદિતમ્
મહાસેનાહતં દેવિ લાકુલીશં સમુદ્ધરેત્ ॥

ખડ્ગીશં કેવલં ગૃહ્ય લોહિતં તદનન્તરમ્
સૂક્ષ્માનન્દેન સમ્ભિન્નં મહાકાલં તુ કેવલમ્ ॥

ખડ્ગીશં કેવલં પશ્ચાદ્ ઉમાકાન્તં તતઃ પુનઃ
ઝણ્ટાનન્દેન સમ્ભિન્નં શ્વેતાનન્દં કુલાધિપે ॥

કેવલં તુ સ્મૃતં ભદ્રે દ્વિરણ્ડં તદનન્તરમ્
ત્રિમૂર્તિના તુ ચાક્રાન્તં મહાકાલં તતઃ પુનઃ ॥

દ્વિરણ્ડં તુ પુનર્ દેવિ ત્રિમૂર્ત્યાલઙ્કૃતં કુરુ
સૂક્ષ્માનન્દેન સમ્ભિન્નં ચણ્ડાનન્દં યશસ્વિનિ ॥

મહાકાલં પુનઃ પશ્ચાદ્ અમરીશાસનસ્થિતમ્
ભુજઙ્ગં કેવલં દેવિ શિવેશં સદ્યસંયુતમ્ ॥

લાકુલી ભૃગુસંયુક્તં નુગ્રહીશાન્વિતં પ્રિયે
ક્રૂરદેવં શિરસ્થં હિ લોહિતં ઝણ્ટિનાહતમ્ ॥

રક્તં ચૈવાર્ઘિના યુક્તં ભુજઙ્ગં કેવલં પુનઃ
શિવાનન્દં તુ દેવેશિ સદ્યોજાતેન ભેદિતમ્ ॥

લાકુલમ્ અર્ઘિના યુક્તં શૂન્યમસ્તકભૂષિતમ્
ભુજઙ્ગં ઝણ્ટિદેવેન ભેદિતં કુરુ પાર્વતિ ॥

શિવોત્તમં તતઃ પશ્ચાત્ સદ્યોજાતેન ભૂષિતમ્
કેવલં તુ મહાકાલં ભુજઙ્ગં કેવલં પુનઃ ॥

લોહિતં તુ પુનઃ પશ્ચાન્ મહાસેનં તતઃ પુનઃ
આસનસ્થં ભૃગોર્ દેવિ લાકુલીશં સમુદ્ધરેત્ ॥

લાકુલીશં પુનર્ ભદ્રે ભુજઙ્ગાસનસંસ્થિતમ્
ત્રિમૂર્તિના તુ ચાક્રાન્તં ક્રૂરાનન્દસમન્વિતમ્ ॥

ઝણ્ટિના ભેદિતં દેવિ ભુજઙ્ગં કારયેત્ તતઃ
શિવાનન્દં તતોદ્ધૃત્ય સદ્યાનન્દાન્વિતં કુરુ ॥

શ્રીકણ્ઠં કેવલં પશ્ચાદ્ ભૌક્તિકં બિન્દુના યુતમ્
એષા પરાપરા દેવી ઉદ્ધૃતા તુ વિલોમતઃ ॥

ચત્વારિંશદ્દ્વયો વર્ણા અર્ધવર્ણાન્વિતા પ્રિયે
એષા વિદ્યા તથા પ્રોક્તા વિદ્યાતત્ત્વે નિવેશયેત્ ॥

દેવ્યા ચૈવાત્મતત્ત્વસ્થા ક્રિયાશક્ત્યાપરા પુનઃ
અર્ધસપ્તાક્ષરા દેવી વિલોમેન તતઃ શૃણુ ॥

પતિતમ્ ઈશ સોમં હિ શિખીશં કેવલં તતઃ
લાકુલમ્ અર્ઘિના યુક્તં શિખીશં ભુજગાન્વિતમ્ ॥

ઝણ્ટીશેન સમાયુક્તં લાકુલં રક્તસંસ્થિતમ્
દ્વિધા ભૂતં તુ કર્તવ્યં ભેદં ચાત્ર વદામિ તે ॥

અર્ઘિના પૂર્વ સમ્ભિન્નમ્ અપરં તુ ત્રિમૂર્તિના
ભૌક્તિકં કેવલં દેવિ ઉદ્ધૃતં પરમાક્ષરમ્ ॥

બિન્દુનાદાન્વિતાઃ પઞ્ચ કર્તવ્યાસ્ તુ યશસ્વિનિ
અપરેયમ્ ઇમા વિદ્યા સર્વસ્વં યોગિનીકુલે ॥

પરાં દેવીં તતો વક્ષ્યે શિવતત્ત્વાનુસારિણીમ્
લાકુલં ભૃગુસંસ્થં હિ ભુજઙ્ગેન સમન્વિતમ્ ॥

અર્ઘીશાસનમ્ આરૂઢં ઽનુગ્રહીશેન ભેદિતમ્
બિન્દુનાદકલાક્રાન્તમ્ ઉદ્ધૃતં પરમં પ્રિયે ॥

પ્રણવોચ્ચારસંયુક્તા વિદ્યા તત્ત્વત્રયાત્મિકા
શબ્દમાલિનિમૂર્તિસ્થા વિદ્યાદેહગુણોજ્જ્વલા ॥

પુર્યાષ્ટકમ્ અઘોરિસ્થં યથાવસ્થાં વદામિ તે ॥

એતત્ પુર્યાષ્ટકં દેવ્યા અઘોર્યાષ્ટકસંયુતમ્
ન્યસેદ્ અષ્ટવિધાઙ્ગં તુ અષ્ટપત્ત્રેષુ સાધકઃ ॥

અતોર્ધ્વં દ્વાદશાઙ્ગં તુ દેહનિષ્પત્તિકારણમ્
પાદાદૌ શિરસો યાવન્ ન્યસેદ્ અઙ્ગે યથોદિતમ્ ॥

સિદ્ધાઈતિ સહં પદ્ભ્યાં ઋદ્ધાઈ જાનુની સહાં
વિદ્યુતાયૈ સહિમ્ ઊરુભ્યાં સહીં લક્ષ્મીતિ ગુહ્યગા ॥

દીપ્તાઇકા સહું નાભૌ સહૂં નાલાઇકા હૃદિ
સહેં શિવાઇકા કણ્ઠે સહૈં વસુમુખી મુખે ॥

સહોં નાસા વમન્યાયૈ કર્ણે નન્દિનિકા સહૌં
હરિકેશા સહં ત્ર્યક્ષી મહામુખ્યૈ સહઃ શિરે ॥

અનેન દૃઢિતો હ્ય્ આત્મા જીવભૂતઃ સ્થિરીકૃતઃ
ષડઙ્ગન્યાસયોગેન વ્યક્તત્વં ભજતે તુ સઃ ॥

ષડઙ્ગન્યાસયોગેન પરાદેહં પરાધ્વરમ્
એવમ્ નિષ્પન્નદેહસ્ય સ્લોકદ્વાદશમેખલા ॥

તદ્ગ્રહેણ તુ યોગેન બ્રહ્મસૂત્રં વિલમ્બયેત્
શિરઃપ્રભૃતિ પાદાન્તં પઞ્ચરત્નવિભૂષિતમ્ ॥

અજચક્રેશ્વરી રેખા દ્વિતીયા કાદિભાન્તગા
માદિસાન્તા તૃતીયા તુ ત્રિભિ રેખૈઃ સ્વરેશ્વરી ॥

અમ્બિકા શૂલદણ્ડસ્થા ગુહ્યશક્ત્યા વિભૂષિતા
બિન્દુનાદસમાયુક્તા ઉદ્ધૃતં પરમાક્ષરમ્ ॥

શ્રીકણ્ઠ અમ્બિકા ચૈવ દ્વિધારૂપા તુ કારયેત્
પુનર્ અમ્બા ચ ફેત્કારી દીપન્યાસનસંસ્થિતા ॥

પ્રજ્ઞાભૂષિતમ્ એકં હિ જ્ઞાનદેવ્યા દ્વિતીયકમ્
બિન્દુનાદયુતે દ્વે તુ સંહાર્યા ઇચ્છયાન્વિતા ॥

શ્રીકણ્ઠાદિભૃગોઽન્તા વૈ સંસ્થિતા કુલપદ્ધતિઃ
અનેન વિધિના દેવિ ભિન્ના તુ કુલપદ્ધતિઃ ॥

પરામૃતપદં હ્ય્ એતત્ શ્લોકાનાં દશકં દ્વિકમ્
એતસ્મિન્ પઠિતે દેવિ ક્ષુભ્યન્તે માતરઃ સદા ॥

સદ્યાવેશઃ પ્રજાયેત કવિત્વં તસ્ય જાયતે
આજ્ઞાવેધાદિકા સિદ્ધિઃ પઠિતે ઽ સ્મિન્ પ્રજાયતે ॥

ત્વયા ન કથ્યમ્ અભક્તેષ્વ્ ઇત્ય્ આજ્ઞા પારમેશ્વરી
શ્લોકદ્વાદશકં હ્ય્ એતદ્ વટમાલાવિભૂષિતમ્ ॥

વડવાનલ મન્તવ્યં પાદાદૌ મસ્તકાવધિમ્
મેખલેયં ન્યસેદ્ દેવિ વિલોમેનોપદેશતઃ ॥

ઉચ્ચારં તસ્ય ચાવેશં સ્થાને સ્થાને પ્રવર્તતે
ગોપનીયં પ્રયત્નેન ન દેયં યસ્ય કસ્યચિત્ ॥

જીવસ્ય રક્ષણં હ્ય્ એતદ્ અન્યથા હાનિકૃદ્ ભવેત્
તદ્ગ્રહોઽન્યં ન્યસેદ્ દેવિ બ્રહ્મસૂત્રવિભૂષણમ્ ॥

દેદીપ્યન્તં પ્રચણ્ડોગ્રં યથાવસ્થં તથા શૃણુ ॥

રુદ્રશક્તિત્રયં હ્ય્ એતદ્ આનન્દપદસંસ્થિતમ્
અન્યોન્યવલયાકારં પઞ્ચાશત્પદભૂષિતમ્ ॥

વામરૌદ્રાન્તદક્ષસ્થં દક્ષરૌદ્રાન્તવામગમ્
રૌદ્રારૌદ્રસમાયુક્તં ત્રિરૌદ્રં તદ્ગ્રહો ઽપ્ય્ અય્ અમ્ ॥

વાગેશ્વરી તથા માયા મોહની ચ તૃતીયકા
જ્ઞાનદેવી ચ ગાયત્રી રત્નાઃ પઞ્ચ ઇમે સ્મૃતાઃ ॥

ન્યાસમાત્રેણ ચાવેશમ્ ઉચ્ચારાદ્ ભવતે સ્ફુટમ્
પિણ્ડસ્ય બન્ધનં હ્ય્ એતદ્ દુષ્ટસિંહવિનાશનમ્ ॥

તદ્ગ્રહાબદ્ધમૂલં તુ પઞ્ચરત્નોપશોભિતમ્
રત્નાઙ્ગી રત્નદેહા તુ રત્નાનાં નિર્ણયં શૃણુ ॥

રત્નાન્ય્ અમૃતમ્ ઇત્ય્ ઉક્તં પઞ્ચધા ત્વ્ અમૃતં પ્રિયે
પિણ્ડબન્ધં વિના તેન જીવિતં તુ ન વિદ્યતે ॥

ગગનામૃતરત્નં તુ સ્વર્ગરત્નામૃતં તથા
પાતાલમર્ત્યરત્નં ચ નારકં રત્નપઞ્ચકમ્ ॥

દેવીદેહાત્ સમુદ્ભૂતં દેવીદેહાદ્ વિનિર્ગતમ્
જ્ઞાનવીર્યઃ સવીર્યસ્ તુ અજ્ઞાતે વીર્યહાનિકૃત્ ॥

તૃતીયં દશનં દેવ્યા આત્મહૃત્સ્થં નિતમ્બગમ્
શિખાન્તસહિતં હ્ય્ એતત્ સ્તનવામોપરિસ્થિતમ્ ॥

કર્ણભૂષણવામસ્થં બીજેનાહતમસ્તકમ્
પઞ્ચરત્નાદિયોગસ્ય પદોદ્ધારઃ પ્રકીર્તિતઃ ॥

પ્રાણં વહ્નિસમારૂઢં ગુહ્યશક્ત્યા વિભૂષિતમ્
બિન્દુમસ્તક ચાક્રાન્તં પઞ્ચરત્નવિભેદકમ્ ॥

એકૈકં રક્ષિતં રત્નં યોગિનીભિર્ યથા યથા
તત્ તથા શૃણુ કલ્યાણિ વ્યાપ્તિભેદો યથા સ્થિતઃ ॥

ચતુઃષષ્ટિગણં વ્યોમ્નિ દ્વાત્રિંસત્ સ્વર્ગચારિણઃ
પાતાલં ષોડશૈર્ વ્યાપ્તં મર્ત્યં ચૈવાષ્ટકાન્વિતમ્ ॥

નિરયસ્થાસ્ તુ ચત્વારિ રત્નાનામ્ અધિદેવતાઃ
તદ્દીપ્તિભાસકા જ્ઞાતા અજ્ઞાતા દીપ્તિહારિકાઃ ॥

રત્નપ્રભાવમ્ અતુલં દેદીપ્યાર્ચિસમુજ્જ્વલમ્
તત્પ્રભાવાદ્ વરારોહે યોગિન્યો બલવત્તરાઃ ॥

અતોઽર્થં ગોપયન્ત્ય્ એતાસ્ તદ્વીર્યગુણવત્તરાઃ
રક્ષન્તિ સ્વામિનોદ્દિષ્ટા અનાદિષ્ટં હરન્તિ તાઃ ॥

અમીષાં દર્શનાત્ સ્પર્શાત્ પદાર્થપદયોગતઃ
દિવ્યદેહત્વમ્ આપ્નોતિ ઉચ્ચારાત્ ક્ષોભકૃદ્ ભવેત્ ॥

ષોડશાવયવં પિણ્ડં ષોઢાન્યાસસુયન્ત્રિતમ્
શ્લોકમાલાન્વિતં દિવ્યં તદ્ગ્રહાવલિભૂષિતમ્ ॥

પઞ્ચરત્નકૃતાટોપં પરાસ્યમ્ અકુલાન્વિતમ્
એવં કૃત્વા શરીરસ્થં ન્યાસમણ્ડલભૃત્તનુમ્ ॥

દેવ્યા દેહં પરં હ્ય્ એતચ્ છામ્ભવં પદપૂર્વકમ્
વડવાનલયોગસ્થં પદદેહં પદોદ્ભવમ્ ॥

પદદેહોપદેશેન યોગીન્યાસપરાયણઃ
કૃત્વા ન્યાસમ્ અશેષં તુ યસ્ તિષ્ઠતિ સુભાવિતઃ ॥

તસ્ય દુષ્ટાન્ય્ અનેકાનિ વિઘ્નાનિ પ્રભવન્તિ ન
શાકિનીભૂતવેતાલાઃ પિશાચોરગરાક્ષસાઃ ॥

સિંહવ્યાઘ્રગજા ઋક્ષા દુષ્ટચિત્તાન્ય્ અનેકધા
યે હિંસન્તિ યદાલબ્ધં તેષાં પ્રત્યઙ્ગિરા ભવેત્ ॥

આપદો રક્ષયેત્ સર્વા આત્મનશ્ ચ પરસ્ય ચ
પ્રચણ્ડયોગિનીઘ્રાતો નીતો વા યમશાસનમ્ ॥

ન્યસ્ત્વા ષોડશવારેયં સત્યેદં ન મ્રિયેત્ તુ સઃ
સકૃન્ન્યાસે કૃતે દેવિ બ્રહ્મહત્યાદિપાતકૈઃ ॥

સમ્પર્કે ઽપિ ન લિપ્યો ઽસૌ સાધયેદ્ ઇતરાંસ્ તુ સઃ
સત્યં સત્યં પુનઃ સત્યં પ્રત્યક્ષેદં પરાધ્વરમ્ ॥

કૃતન્યાસઃ પતેત્ પદ્ભ્યાં યસ્યાસૌ મ્રિયતે ધ્રુવમ્
ગુરોસ્ તુ ન પતેત્ પાદે યાવેદં દેહસંસ્થિતમ્ ॥

વ્યાધિદુઃખં ભવેત્ તસ્ય યદ્ય્ આક્રોશેન્ મ્રિયેત્ તુ સઃ
જ્ઞાતે સતિ ન કર્તવ્યં યાવદ્ ગુરુકુલે વસેત્ ॥

ગુરુહાનિકૃતે શિષ્યો ન નન્દત્ય્ અવશં પ્રિયે
આજ્ઞાનિષ્ઠો ગુણશ્રેષ્ઠઃ ક્રમજ્ઞૌઘવિશારદઃ ॥

સ્વાધિકારી તુ નાન્યો વૈ વાચાજ્યેષ્ઠો ઽભિવાદયેત્
પૂર્વસિદ્ધેષુ લિઙ્ગેષુ સુસિદ્ધપ્રતિમાસુ ચ ॥

કૃતન્યાસઃ પતેત્ પાદૌ સ્ફુટત્ય્ આશુ ન સંશયઃ
સદા પ્રવર્તતે યસ્ તુ ન્યાસં દેહસ્ય ભાવિનિ ॥

અનુષ્ઠાનાદ્ ઋતે તસ્ય ઊર્ધ્વેનોત્ક્રમણં ભવેત્
ત્રિકાલન્યાસયોગેન અર્ધરાત્રે તથા પુનઃ ॥

અનેન વિધિના કાલં ક્ષપયન્તિ મહામ્બિકે
અન્યં ચ પરમં દેવિ ગ્રન્થિભેદં સુદુર્લભમ્ ॥

હંસભેદપ્રયોગેન ન્યાસં વક્ષ્યામિ દુર્લભમ્
ઓ-જા-પૂ-કામ-મધ્યસ્થં હૃન્નાભૌ લિઙ્ગમધ્યગમ્ ॥

પીઠં વા પદસંયુક્તમ્ આદ્યગ્રન્થિચતુષ્ટયમ્
ઓઘાનન્દં જયાનન્દં પુરાનન્દં તૃતીયકમ્ ॥

કમલાનન્દસંયુક્તમ્ આદ્યભેદચતુષ્ટયમ્
ડિક્કરિયાણ લમ્પાર્ણં મહાનન્દપુરં તથા ॥

કર્ણૌ મુખે તુ નાસાદ્યં પીઠં વા પદસંયુતમ્
દ્વિતીયં પદગ્રન્થીનાં ન્યાસો ઽયં પરિકીર્તિતઃ ॥

અષ્ટકોટિસુવિસ્તીર્ણં ત્રિકોટ્યર્ધમ્ અતઃ શૃણુ
આમર્દકં ધરાપીઠં ગિરાઙ્કં રૂપિણીપુરમ્ ॥

દ્વૌ શઙ્ખાવ્ ઊર્ધ્વમાયાન્તં મધ્યકોટિગતં ન્યસેત્
પીઠં વા પદસંયુક્તં ત્રિસ્થં ગ્રન્થિચતુષ્ટયમ્ ॥

માયાનિરોધિમધ્યસ્થમ્ અન્યગ્રન્થિચતુષ્ટયમ્
જ્ઞાનશૃઙ્ગં રમાશૃઙ્ગમ્ ઋષિશૃઙ્ગં તૃતીયકમ્ ॥

પૂર્ણશૃઙ્ગસમાયુક્તં પીઠં વા પદસંયુતમ્
સિદ્ધક્રમસમાયુક્તં ગુરુપઙ્ક્તિસમન્વિતમ્ ॥

જ્ઞાનદૃષ્ટ્યા ન્યસેત્ તં તુ ચતુષ્કેદં કુલાકુલમ્
એતત્ કુલાકુલં દિવ્યં સર્વસાધારણં પરમ્ ॥

પદભુક્તિમતાનાં ચ પદેદં પરિકીર્તિતમ્
અન્યત્ પરતરો દેહઃ કોટિદ્વાદશમ્ આશ્રિતઃ ॥

અકુલીનપદાધ્વાનં નિરાધારં ખગાલયમ્
અકુલવ્યાપ્તિર્ ઇત્ય્ એષા ક્ષેત્રપીઠસમાકુલા ॥

સાચારકુલયોગીનાં ષણ્નવત્યાપદાનુગા
ચતુરાશીતિપદૈર્ વ્યાપ્તિઃ સા ચાન્યત્ર પ્રકાશિતા ॥

યેષાં તે તુ પુનસ્ તત્ર વ્યાવૃતન્તે પુનઃ પુનઃ
ષણ્નવતિપદો હંસઃ સ ચામ્નાયવિદાં વિદુઃ ॥

સિદ્ધકૌલાભિપન્નાનામ્ ઇતરેષાં ન દર્શિતઃ
તત્ર દિવ્યક્રમઃ પૂજ્યઃ પદચારેણ યોગિના ॥

યેન ગચ્છેન્ નિરાચારં તત્ પદં પરમં શૃણુ
દ્વાદશાધારમૂર્ધ્નિસ્થં ચતુષ્પીઠસમુચ્છ્રિતમ્ ॥

ક્ષેત્રાષ્ટકં તતો ઽધસ્તાત્ સન્દોહાનિ તતો ઽપ્ય્ અધઃ
ષોડશૈવ પ્રમાણેન ચતુર્દ્વારં તતસ્ ત્વ્ અધઃ ॥

ઉપશબ્દસમોપેતમ્ ઉપદ્વારવિવર્જિતમ્
અકુલીનશરીરેદં ચતુઃષષ્ટિપદાન્વિતમ્ ॥

તસ્માત્ સઞ્જાયતે સર્વં સર્વં તત્રૈવ લીયતે
તત્ર ધ્યાનં જપં યોગં તત્ર પૂજાક્રિયાધ્વરમ્ ॥

અત્ર સ્થિતો ન કેનાપિ વસ્તુના બાધ્યતે તુ સઃ
પરો હ્ય્ આત્મા પરા વિદ્યા પરઃ શૈવઃ સનાતનઃ ॥

અકુલીનતનુર્ બદ્ધઃ પરતત્ત્વત્રયેણ તુ
આત્મતત્ત્વગતં પિણ્ડં સતતં યોગમ્ અભ્યસેત્ ॥

વિદ્યાતત્ત્વગતા મન્ત્રાઃ પદયોગસમન્વિતાઃ
શિવતત્ત્વગતો યોગં રૂપાભ્યાસં સમભ્યસેત્ ॥

શિવતત્ત્વગતો યોગં રૂપાતીતં તુ તત્ર વૈ
પિણ્ડં કુણ્ડલિની શક્તિઃ પદં હંસઃ પ્રકીર્તિતઃ ॥

રૂપં બિન્દુઃ સમાખ્યાતં રૂપાતીતમ્ અનામયમ્
કુલદેહં પરિત્યજ્ય અકુલીનવપુઃસ્થિતઃ ॥

સ ચ વૈ સકલઃ પિણ્ડઃ કૌલિકાનાં કુજીમતે
અપરં પાશવં સર્વં ત્રિતત્ત્વગુણલક્ષણમ્ ॥

શૈવમાર્ગવિહીનાનાં શૈવાનામ્ અન્યધર્મિણામ્
પ્રસિદ્ધેન તુ માર્ગેણ પ્રસિદ્ધ્યર્થં ભજન્તિ તે ॥

અપ્રસિદ્ધોજ્ઝિતે સિદ્ધા ન પશ્યન્ત્ય્ અકુલાં તનુમ્
અકુલેન વિના સિદ્ધિર્ ઐહિકા પાત્રિકા ન હિ ॥

પ્રસિદ્ધવિહિતે માર્ગે મોક્ષશ્ ચાત્ર ન સંશયઃ
અપ્રસિદ્ધગતા ઋજ્વી ષોડશાન્તામૃતાહ્રદમ્ ॥

આપૂર્ય પૂરયેત્ સર્વં જીવાન્તં જીવરૂપિણી
સુપ્રસિદ્ધાક્ષભૂતા તુ કાલસઙ્ખ્યાકરી તુ સા ॥

સંસારે તુ ગતિસ્ તસ્યા મોક્ષમાર્ગનિયામિકા
વિંશત્યેકસહસ્રાણિ ષટ્શતૈશ્ ચ સમન્વિતા ॥

સંસારી કુરુતે સઙ્ખ્યા હ્ય્ અહોરાત્રોપદેશતઃ
અપરેણ તુ માર્ગેણ સંસારપથલક્ષણમ્ ॥

અહોરાત્રેણ લક્ષૈકં કાલસઙ્ખ્યાં કરોતિ સઃ
સપ્તાદશાનિ લક્ષાણિ કોટિર્ એકા ત્વ્ અહમિશિ ॥

ચતુરાશીતિ પદેત્ય્ એવં કાલઃ કલતિ સર્વથા
પદમાર્ગવિદાનાં તુ સકલાદ્ અજરામરઃ ॥

શિવમાર્ગવિદાનાં તુ સિદ્ધમાર્ગે ઽન્યથા શૃણુ
કોટિદ્વાદશકોપેતં કોટિલક્ષચતુષ્ટયમ્ ॥

અહોરાત્રાક્ષસૂત્રસ્ય સઙ્ખ્યેયં હ્ય્ અકુલે તનૌ
અકુલેશતનું યાવત્ સાચારં કુલયોગિનામ્ ॥

તચ્છરીરભૃતાનન્દો નિરાચારપદં વ્રજેત્
કુલાધ્વરપદં હૃત્સ્થં તત્રસ્થં પરમં ક્રમમ્ ॥

પૂજયેદ્ ધૃત્સ્તનૌ નાભિં સિદ્ધાવ્વાપીઠપાદુકૌ
શ્રીમદ્બર્બરમ્ ઓડ્ડીશં પદસ્થૌઘમહાર્ણવમ્ ॥

પૂજયિત્વા સ્મરેત્ તસ્થામ્ અબ્દેનોક્તફલં લભેત્
દ્વિભિસ્ તુ અધમા સિદ્ધિસ્ ત્રિભિર્ મધ્યમતાં વ્રજેત્ ॥

ષડ્ભિર્ દ્વાદશકાબ્દેન ખેચર મધ્યમોત્તમઃ
અધમં ભૂચરં કર્મ મધ્યમં બિલસાધનમ્ ॥

ઉત્તમોત્તમસિદ્ધીભિઃ ખેચરઃ ખેચરોર્ધ્વગઃ
એવં દેવિ સમસ્તેદં પદયોગક્રિયાધ્વરમ્ ॥

કથિતં સરહસ્યં તુ પદમાર્ગં સુદુર્લભમ્
પદસ્યાપિ હિ રૂપો ઽસ્તિ રૂપાતીતં તુ સઙ્ક્રમઃ ॥

હંસજ્ઞાનપદં પ્રોક્તં રૂપસ્થં શૃણુ સામ્પ્રતમ્ ॥