Kubjikamatatantra · અધ્યાય 17

ચતુષ્કં પઞ્ચકં નાથ ષટ્કં તુ પઞ્ચકં તથા
જ્ઞાતં વ્યાપ્તિભૃતં સર્વં ચતુષ્કં કીદૃશં પુનઃ ॥

પૃચ્છામિ ત્વાં ન શક્નોમિ સ્વત એવ પ્રસાદતઃ
વદ નાથ ગુણાનન્દં યેન જાનીમહે ઽખિલમ્ ॥

કુબ્જિકે ઽતિમહાપ્રાજ્ઞે કિં ન બુધ્યસિ મૂઢધીઃ
યદ્ય્ એવં લપિતં સર્વં કથયામ્ય્ અવશેષકમ્ ॥

સ્થિતિભોગલયાન્તસ્થં પૂજાવ્યાપ્તિપદં યથા
તથા તં નિખિલં સર્વમ્ ઉક્તાનુક્તં વદામિ તે ॥

દેવ્યાપીઠચતુષ્કં તુ સિદ્ધપિણ્ડચતુષ્ટયમ્
યુગૈશ્ ચતુર્ભિસ્ તદ્ વ્યાપ્તં પરાપરવિભાગશઃ ॥

અકુલેશ્વરદેવસ્ય યથા તિષ્ઠતિ વિગ્રહે
તથા શૃણુ મહેશાનિ નિરાચારપદં યથા ॥

ઓ-જા-પૂ-કા-ક્રમં મધ્યાદ્ વામદક્ષાગ્રતોર્ધ્વતઃ
વ્યાપ્તિભૂતં યજેત્ સર્વં નાભ્યધઃ સિદ્ધપૂર્વકમ્ ॥

ઓ-જા-પૂ-કા-ક્રમાદ્ ધૃત્સ્થં દક્ષાદૌ વામ નાભિગમ્
ઉપદેશેન જાનીયાદ્ ગુરુવક્ત્રાત્ તુ શામ્ભવમ્ ॥

એવં કર્ણમુખે નાસા નાસોર્ધ્વં પૂર્વવદ્ યજેત્
પૂર્વોક્તાર્ચિસમાયુક્તં સિદ્ધવૃન્દસપાલકૈઃ ॥

બલકૌમારવૃદ્ધસ્થં ત્રિશુદ્ધિસ્થં ત્રિતત્ત્વગમ્
વડવાનલયોગેન ગહ્વરાદ્ ઉપદેશતઃ ॥

કુલાકુલે પરે સ્થાને સર્વજ્ઞાં શામ્ભવં ક્રમમ્
સર્વવ્યાપ્તિસમોપેતમ્ આજ્ઞાપુષ્પૈઃ પ્રપૂજયેત્ ॥

રૂપાતીતાદિયોગેન મણ્ડલોદ્ભૃતવિગ્રહા
તત્રસ્થા પરમા દેવી મધ્યસ્થા પરરૂપિણી ॥

કાલમૂર્ધ્નિ સ્થિતા શાન્તા કલાતીતા કલાકલા
કાલહન્તા કલાતીતા કમ્બલીયં કુલેશ્વરી ॥

વડવાનલમ્ ઉત્તીર્ણા દેદીપ્યન્તગુણોજ્જ્વલા
સહસ્રાદિત્યસઙ્કાશા રૂપાતીતા કુલેશ્વરી ॥

રૂપં પીઠક્રમં દેવ્યા નીલમેઘાઞ્જનપ્રભા
ભુજૈર્ દ્વાદશકોપેતા ષડ્વક્ત્રા બર્બરાલકા ॥

બૃહોદરા ચ લમ્બોષ્ઠી સ્તબ્ધાક્ષી વિરલદ્વિજા
બાલક્રમસ્ય મધ્યસ્થા રૂપસ્થા નગ્નકુબ્જિકા ॥

વડવાનલસન્દીપ્તા અતિરૌદ્રા સુભીષણા
ગુરૂપદેશગમ્યા સા દિવ્યાજ્ઞાર્થપ્રદાયિકા ॥

કૌમારક્રમમધ્યસ્થા એકવક્ત્રા ચતુર્ભુજા
પુસ્તકમણ્ડલુધરા અક્ષસૂત્રવરપ્રદા ॥

વડવાનલમધ્યસ્થા સૌમ્યરૂપા સુલાલસા
મહાનન્દમહાવિષ્ટા આવેશન્તી જગત્ત્રયમ્ ॥

મહાસંસાર-મ્-અમ્ભોધેસ્ તારયન્તી વ્યવસ્થિતા
સા મહાન્તારિકાપ્ય્ અત્ર કૌમારે મહતાં ગતા ॥

પાશૌઘક્ષયકર્તા સા વિદ્યાશાસ્ત્રાવલમ્બિની
યસ્યોચ્ચારાત્ સ્ફુટન્ત્ય્ આશુ પર્વતાન્ વજ્રમૌસલાન્ ॥

પઞ્ચ પઞ્ચ ચ વિદ્યાસ્ત્રં મહાન્તારી સ એવ હિ
અક્ષરૌઘેન સિદ્ધા સા ઉચ્ચારાવેશિની પરા ॥

અભક્તં વા દ્વિષન્તં વા વાદસ્થં વા તથેતરમ્
કુપિતઃ પાતયેત્ સર્વં યસ્યૈષા હૃદિ શાલિની ॥

પદસ્થેન તુ યોગેન સિદ્ધા સા પરમેશ્વરી
પિણ્ડમ્ આવેશયેચ્ છીઘ્રં પિણ્ડસ્થાં શૃણુ કુબ્જિનિ ॥

વૃદ્ધક્રમસ્ય મધ્યસ્થાં લઘુરૂપાં સુતેજસામ્
દ્વિભુજૈકવદનાં તાં પિણ્ડસ્થાં પતિરૂપિણીમ્ ॥

પશુપ્રાણહરાં દેવીં પાશજાલનિકૃન્તનીમ્
દમનીં સર્વપાપાનાં વિજ્ઞાનકરણીં પરામ્ ॥

પૂર્વં વ્યાવર્ણિતં યચ્ ચ રૂપાન્તે ગુણશાલિનીમ્
વિદ્યાઙ્ગાભરણોપેતાં પિણ્ડસ્થાં તાં વિજાનથ ॥

દ્વાત્રિંશાક્ષરસંયુક્તાં ષડઙ્ગપરિવેષ્ટિતામ્
યદ્ ઉક્તં કર્મસન્તાનં તદ્ અત્ર ફલદં ક્રમાત્ ॥

મન્ત્રસિદ્ધિકરી દેવી પિણ્ડસિદ્ધિકરી પરા
વડવાનલયોગેન સર્વજ્ઞત્વં લભેત્ તુ સઃ ॥

વડવાનલકુબ્જસ્થા કૂજતે ઽનન્દરૂપધૃક્
તેન સા કુબ્જિકા નામ મણિરૂપા1પખઞ્જિકા ॥

અસ્યા દેવ્યાઃ પદં રૂપં રૂપાતીતં પ્રવર્તતે
પિણ્ડેશિની પરા માતા ચતુરાશીતિગુણોજ્જ્વલા ॥

સમ્પૂજ્ય માનસૈઃ પુષ્પૈર્ અલિફલ્ગ્વાદિભિઃ ક્રમાત્
ચતુઃસિદ્ધક્રમામ્નાયં સ્વામિપાદમ્ અનુક્રમાત્ ॥

પિણ્ડયોગસ્થિતાં ચાજ્ઞાં સંસ્મરેન્ મધ્યતિર્યગામ્
કુબ્જિનીકુલમ્ આરૂઢામ્ અભ્યસન્તઃ શ્રિયં લભેત્ ॥

શાન્તિપુષ્ટિવશાકૃષ્ટિ વાગ્વિલાસં જ્વરાપહમ્
મૃત્યુનાશં પુરક્ષોભં સૈન્યસ્તમ્ભામ્ભશોષણમ્ ॥

પશુપાશગ્રહસ્તોભં દન્તકાષ્ઠાઞ્જલીઘટમ્
નિર્બીજીકરણાદ્યં ચ વૃક્ષસ્ફોટં જલપ્લવમ્ ॥

મુદ્રાસ્ફોટં શિલાચ્છેદં વૃક્ષાણાં લભનં મહત્
નદીપ્રવર્તનસ્તમ્ભો નાવાદિશકટસ્ય ચ ॥

અનગ્નિજ્વલનં પાતઃ સૈન્યસ્તમ્ભોર્ધ્વરોપણમ્
જ્વાલાસ્તમ્ભં જલસ્તમ્ભં ઘટસસ્ત્રગિરાચલમ્ ॥

સ્તમ્ભયેદ્ વજ્રપાતં તુ અશન્યૌઘં નિવારયેત્
મારયેટ્ ટાલયેચ્ છૈલાન્ દારયેદ્ ધરણીતલમ્ ॥

હસ્તવૃદ્ધિર્ મનઃસિદ્ધિર્ દૂરાશ્રવણદર્શનમ્
વર્તમાનમ્ અતીતાર્થં ભવિષ્યં ચ લઘુત્વતા ॥

વાચાસિદ્ધિશ્ ચ માહેન્દ્રમ્ ઇન્દ્રજાલપ્રવર્તકમ્
કામરૂપાન્તરધ્યાનં જ્ઞાનં માતૃકુલસ્ય ચ ॥

જિહ્વાપ્રસારણં ચાન્યમ્ અઙ્ગૈકૈકવિવર્ધનમ્
સ્ફોટનં શુષ્કકાષ્ઠાનાં ત્રોટનં ફલપુષ્પયોઃ ॥

મૃતકોત્થાપનં શીઘ્રં દગ્ધસઞ્જીવનં મહત્
અકાલે વૃક્ષફલનં પુષ્પધાન્યાવરોહણમ્ ॥

પરકાયપ્રવેશં ચ અન્યજન્માવબોધનમ્
પરોક્ષમૃતકાનયનં દૃષ્ટિજ્વાલાપ્રસારણમ્ ॥

દન્તવૃદ્ધિકરં જ્ઞાનં જ્વાલાવિજ્ઞાનમ્ ઉત્તમમ્
શરીરે ફલપુષ્પાનિ પ્રતિમાજલ્પકર્ષણમ્ ॥

જલ્પાયનં કુમારીણામ્ અન્તર્ધાનોર્ધ્વદર્શનમ્
નિરાલમ્બોર્ધ્વરુહણં પરરૂપાપકર્ષણમ્ ॥

ચિત્રનૃત્યાપનં યુદ્ધં શત્રૂણાં ચ પરસ્પરમ્
હરણં શબ્દદૃષ્ટીનાં વર્ધતૈકૈકહેલયા ॥

પરસામર્થ્યહરણં પુંસ્ત્રિયોપકરણં પરમ્
અઙ્ગસઙ્કોચનાનયનં ભૂતાનાં ભૂતસાધનમ્ ॥

પિણ્ડક્રમસ્ય પૂજાયાં સ્વાધિષ્ઠાનફલં લભેત્
કુબ્જાનલેન યોગેન કુબ્જિપિણ્ડં ચતુર્વિધમ્ ॥

અશ્વત્થપત્ત્રવત્ કુબ્જં શુકચઞ્ચુનિભં પરમ્
મણિકુબ્જં પરં ચાન્યં રન્ધ્રકુબ્જં તતો ઽપરમ્ ॥

એતત્ તે સંસ્ફુટં સર્વં કુબ્જામ્બીનાં ચતુષ્ટયમ્
પિણ્ડો ઽથ પદ રૂપં ચ રૂપાતીતાદિતઃ ક્રમાત્ ॥

આદ્યં પિણ્ડસ્થિતા કુબ્જી કુબ્જેશીતિ કુલેશ્વરી
પદસ્થા કુબ્જિકા ચાન્યા મહાન્તારી મહદ્ભુતા ॥

રૂપસ્થા કુબ્જિની ચાન્યા બિન્દુસ્થા બર્બરા પરા
રૂપાતીતા તુ રન્ધ્રસ્થા કુબ્જિની કમલાનના ॥

વિજ્ઞાનાનેકવિશ્લિષ્ટા એકૈકા ફલદાયિની
પિણ્ડયોગક્રમેણૈતાઃ કુબ્જિદેહફલપ્રદાઃ ॥

મિત્રેશાનસમાયુક્તા કણ્ઠોષ્ઠાલિઙ્ગનાન્વિતા
ગોલાન્તપશ્ચિમાન્તસ્થા શઙ્ખભેદાદ્ વિનિર્ગતા ॥

વિદ્યુદન્યોન્યતારેભ્યો વિશત્ય્ એકા પુનર્ દ્વિધા
એવમ્ અભ્યસતે યાવત્ તાવત્ કામઃ સ્વયં ક્ષુભેત્ ॥

સ્વાધિષ્ઠાનગતે યોગે શાક્તે શક્તિં સમભ્યસેત્
અબ્દૈકેન જગત્ સર્વં ક્ષોભયેત્ ત્રિદશેશ્વરમ્ ॥

દુર્ભગાનામ્ અભાગ્યાનામ્ અબ્દાત્ સર્વં ભવિષ્યતિ
યઃ પુનઃ સર્વથા સિદ્ધઃ સ સિધ્યત્ય્ અચિરાત્ પ્રિયે ॥

સાત્ત્વિકેન તુ રૂપેણ ત્યક્તમાયાસુખોજ્ઝિતઃ
પાદપ્રક્ષાલનં જુષ્ટં યો ન દદ્યાત્ સ સિધ્યતિ ॥

એતત્ કુલાલિકામ્નાયે પિણ્ડકુબ્જિચતુષ્ટયમ્
અવિજ્ઞાય ન દાતવ્યં યાવન્ નાદેશિતઃ શિશુઃ ॥

અનાદિવિમલમાતઙ્ગી સર્વજ્ઞા ચ પુલિન્દિકા
યોગે ચ શબરી પ્રોક્તા સિદ્ધસંજ્ઞેતિ ચમ્પકા ॥

અધુના શૃણુ કુબ્જીશે પદગ્રન્થિવિભઞ્જકમ્
ક્રમં વક્ષ્યામિ દિવ્યૌઘં સામર્થ્યાદિનિરાકુલમ્ ॥

આજ્ઞામોઘપદં ખઞ્જિ દ્વિતીયં કુબ્જિનીપદમ્
શક્તિવિદ્યા તૃતીયં તુ ચતુર્થૌઘપદક્રમમ્ ॥

ચતુષ્પીઠવિભેદેન પુનઃ પીઠચતુષ્પદમ્
ષોડશૈવ પદાન્ય્ આહુર્ ગ્રન્થિભૂતાઃ પૃથક્ પૃથક્ ॥

કલન્તિ સકલં સર્વં સ્થૂલસૂક્ષ્મવિભાગતઃ
નદન્તિ કાલરૂપસ્થા[ઃ] સ્થૂલસૂક્ષ્માન્ તથાન્તિમાન્ ॥

તિથ્યાદ્યાન્તપદં યાન્તિ વામાન્તં દક્ષિણં પુનહ્
ચન્દ્રસૂર્યવિભાગેન જીવિતં મરણં પદમ્ ॥

પદૈઃ ષોડશભિઃ સર્વં ગ્રન્થિં બદ્ધ્વાધ્વરં ઽખિલમ્
કાલરૂપાસ્ તુ તાઃ કાલં હનન્ત્ય્ ઉચ્ચારયોગતઃ ॥

એવં જ્ઞાતે હનેત્ કાલમ્ ઉચ્ચરન્તો ઽનુપૂર્વશઃ ॥

અક્ષરે અક્ષરે ગ્રન્થિઃ પીઠં ગ્રન્થિચતુષ્ટયમ્
ચતુષ્પીઠમયા યોનિશ્ ચતુર્યોનિમયં ઽખિલમ્ ॥

પઞ્ચમી યા પરા યોનિસ્ તસ્યા ગ્રન્થિઃ પદે પદે
તયા વ્યાપ્તમ્ ઇદં સર્વં કારણાનલમધ્યગમ્ ॥

તત્ પદં પરમં પ્રોક્તં યત્ર સર્વે પદા ગતાઃ
ષોડશાક્ષરભેદેન તત્ પદં લભતે સ્ફુટમ્ ॥

પ્રથમાધારનન્તાખ્યા મધ્યમાઙ્ઘ્ર્યાઙ્ગુલીગતા
કાલગ્રન્થિસ્ તુ ગુલ્ફાધો રૌદ્રીગ્રન્થિર્ નલાન્તરે ॥

જ્યેષ્ઠાગ્રન્થિર્ નિતમ્બાધો વામે વામાધસંસ્થિતા
કામગ્રન્થિર્ ગુદાધારે પિઙ્ગગ્રન્થિસ્ તતોર્ધ્વતઃ ॥

અધોર્ધ્વરોમમધ્યે તુ બ્રહ્મગ્રન્થિર્ ઉદાહૃતા
સોમગ્રન્થિસ્ તતશ્ ચોર્ધ્વે સૂર્યગ્રન્થિસ્ તતોર્ધ્વતઃ ॥

પ્રાણગ્રન્થિઃ પુનશ્ ચોર્ધ્વે જીવગ્રન્થિસ્ તતોર્ધ્વતઃ
યેન જીવન્તિ ભૂતાનિ તદ્વિયોગાન્ મ્રિયન્તિ ચ ॥

વિષ્ણુગ્રન્થિસ્ તુ સા જ્ઞેયા કણ્ઠસ્થા તાલુકે ઽન્યથા
રુદ્રગ્રન્થિર્ મહારૌદ્રા ઈશગ્રન્થિસ્ તતોર્ધ્વતઃ ॥

સાદાખ્યસ્ તુ પરા ગ્રન્થિસ્ ત્રિકોટ્યોર્ધ્વવ્યવસ્થિતા
માયા શક્તિસ્ તતશ્ ચોર્ધ્વે ઇચ્છાનન્દામૃતાપ્લુતા ॥

ષોડશાવયવા દેવી ખેચરી તુ ખગેશ્વરી
પદ્મસ્થા પદ્મમધ્યસ્થા હંસસ્થા હંસવાહિની ॥

નિષ્કલા સકલા દેવી વજ્રદેહા મનોન્મની
પદક્રમસ્ય મધ્યસ્થા પદાઙ્ગાભરણોજ્જ્વલા ॥

ક્રમમન્ત્રપદાલબ્ધા હેલયા ચાણિમાષ્ટકમ્
સાધયેન્ મહતા દેવી ષોડશાક્ષરસમ્ભવા ॥

માલિની સિદ્ધદેહા સા ત્રિતત્ત્વાર્ચિઘનોજ્જ્વલા
અઘોર્યાષ્ટકસંયુક્તા દ્વાદશાઙ્ગપ્રપૂરિતા ॥

ષડઙ્ગાવયવોપેતા દિવ્યદેહા મહાબલા
અસિતાઙ્ગતનૂદ્ભૂતા મન્ત્રદેહા મહેશ્વરી ॥

માલિની શબ્દરાશિશ્ ચ ત્રિવિદ્યાઘોરિકાષ્ટકમ્
દ્વાદશાઙ્ગષડઙ્ગં ચ એતદ્ દેહં કુલાત્મકમ્ ॥

લલાટકણ્ઠવક્ષસ્થં ગુહ્યાઙ્ઘ્રૌ રત્નપઞ્ચકમ્
શ્લોકદ્વાદશભિર્ માલા પાદાદૌ ચૂલિકાવધિમ્ ॥

બ્રહ્મસૂત્રોજ્જ્વલા દેવ્યાઃ સ્કન્ધોભૌ તદ્ગ્રહાન્વિતૌ
પઞ્ચબીજૈર્ મુખકોષં પઞ્ચૌંકારૈઃ ખિલં ન્યસેત્ ॥

પરમં વદ કૌલેશ પદમન્ત્રા યથા સ્થિતાઃ
યત્ર સ્થાને નિયોક્તવ્યાઃ સ્ફુટૈકૈકં પૃથક્ પૃથક્ ॥

કથયામિ વરારોહે પદાર્થાર્થપદં યથા
સિદ્ધમન્ત્રોપદેશો ઽયં પ્રકટાર્થં વદામિ તે ॥

મૂર્ધ્નિ વક્ત્રાક્ષિણૌ કર્ણૌ નાસાગણ્ડૌ દ્વિજૌષ્ઠકૌ
ભારતીશઙ્ખિનીદ્વારે શ્રીકણ્ઠાત્ સેનકાવધિમ્ ॥

ક્રમેણ ષોડશૈવૈતાન્ દક્ષિણાદૌ પદા ન્યસેત્
દન્તૌષ્ઠાદિમ્ અધો ન્યસ્ય ભારતીશઙ્ખિકાવધિમ્ ॥

ક્રોધાદાવ્ એકરુદ્રાન્તં સ્કન્ધાદૌ ચાઙ્ગુલાવધિમ્
દક્ષિણે વામતો ઽપ્ય્ એવં કૂર્માદૌ શર્મકાવધિમ્ ॥

સોમેશ્વરાદ્યુમાકાન્તં સ્ફિચાદૌ ઽઙ્ઘ્ર્યાન્ત દક્ષિણમ્
વામતો ઽષાઢિમેષાન્તં પાર્શ્વૌ લોહિશિખાન્વિતૌ ॥

છગલણ્ડં તુ વંશસ્થં દ્વિરણ્ડં નાભિમણ્ડલે
હૃદયે તુ મહાકાલમ્ અષ્ટકં પુરતો ઽન્યથા ॥

વાલિભૌજઙ્ગપૈનાક ખડ્ગીશબકશ્વેતકાઃ
ભૃગુલાકુલસંવર્તાઃ કાલપ્રાણસશુક્રગાઃ ॥

મજ્જાસ્થિસ્નાયુમાંસસ્થા રક્તત્વગ્વાલિમાદિતઃ
અનુલોમવિલોમેન કાલવેલાદિતઃ ક્રમાત્ ॥

નાદિની તુ શિખાગ્રસ્થા નકારાક્ષરસમ્ભવા
ઋ-ૠ-ઌ-ૡ નિવૃત્ત્યાદ્યા માલિકા શિરસિ સ્થિતા ॥

થ શિરો ગ્રસની દેવી ધ નેત્રે પ્રિયદર્શના
ઈ ગુહ્યશક્તિ નાદસ્થા નાસાયાં નેત્રમધ્યતઃ ॥

વ્યાપયિત્વા સ્થિતા દેવી ચ તૃતીયં તુ લોચનમ્
ચામુણ્ડા પરમેશાની લલાટસ્થા વિરાજતે ॥

બકારં વદનં દેવ્યા વજ્રિણી શક્તિર્ અવ્યયા
કવર્ગે દશનાસ્ તીક્ષ્ણાઃ કઙ્કટા કાલિકા શિવા ॥

ઘોરઘોષા મુખીવીરા કવર્ગે દસના[ઃ ] શુભાઃ
માયાદેવી ઇ જિહ્વા તુ અ વાગ્ વાગેશ્વરી મતા ॥

નારાયણી ણ કર્ણૌ તુ તયોર્ ભૂષણમ્ ઈ-પરૌ
મોહની ચ તથા પ્રજ્ઞા વ કણ્ઠે શિખિવાહિની ॥

લામા વિનાયકી દેવી ડઢૌ બાહુદ્વયં મતમ્
પૌર્ણિમા હસ્તદેશસ્થા ઠકારાખ્યં વિભોર્ મતમ્ ॥

ઝઙ્કારી કુર્દની ચૈવ ઝઞૌ ચાઙ્ગુલયઃ ક્રમાત્
કપાલિની વામકરે ટકારઃ પરમેશ્વરી ॥

દીપની શૂલદણ્ડં ચ રેફઃ સમ્યગ્ ઉદાહૃતમ્
જયન્તી જ ભવેચ્ છૂલમ્ એવં દેવી વિરાજતે ॥

ભીષણા વાયુવેગા ચ સ્કન્ધયોર્ ઉભયોર્ અપિ
પાવની તુ પ હૃલ્લગ્ના ષોદરં લમ્બિકા સ્થિતા ॥

સંહારિકા ક્ષકારો ઽયં નાભિર્ દેવ્યા[શ્] ચ ભૈરવિ
છગલી પૂતના ચૈવ સ્તનૌ છલૌ પરિસ્થિતૌ ॥

આમોટી તદ્ગતં ક્ષીરમ્ આવર્ણઃ પરિકીર્તિતઃ
પરમાત્મા સકારો ઽયં હ પ્રાણે શક્તિર્ અમ્બિકા ॥

ઇચ્છાશક્તિર્ વિસર્ગાખ્યા વ્યાપ્યભાવેન સંસ્થિતા
મ નિતમ્બં મહાકાલી શ ગુહ્યં કુસુમાયુધા ॥

શુક્રા દેવી ત્વ્ અનુસ્વારં શુક્રં દેવ્યાસ્ તુ ભૈરવિ
તારા તકારમ્ ઊરુસ્થા એ ઐ જ્ઞાનીક્રિયાવ્ ઉભૌ ॥

જાનુની સંસ્થિતૌ દેવિ ભૈરવ્યાશ્ ચ મહાત્મનઃ
ગાયત્રી ચૈવ સાવિત્રી ઓ ઔ જઙ્ઘૌ પ્રકીર્તિતૌ ॥

દહની દક્ષપાદસ્થા વામે ફેત્કારિકા મતા
નાદિફાન્તા વરારોહે દેહં શક્તિમયં શુભમ્ ॥

સિદ્ધપઞ્ચાશકોપેતં માલિન્યાર્ધશતાન્વિતમ્
એવં શતં સમાખ્યાતં યોજ્યમાનં તનૌ ભૃતમ્ ॥

પદદ્વયં સમાખ્યાતં તત્ર હંસો વ્યવસ્થિતઃ
યાવચ્ ચરતિ તૌ દ્વૌ તુ તાવદ્ આત્મા સમાપ્યતે ॥

પદમાનમ્ અશેષં તુ અત્ર સર્વં સમાપ્યતે
આજ્ઞાતો ભુઞ્જતે કાલં પદં જ્ઞાત્વાજરામરમ્ ॥