કૃષ્ણામૃતમહાર્ણવ · શ્લોક 81-100

વેદવેદાઙ્ગવિદુષાં મુનીનાં ભાવિતાત્મનામ્
ઋષિત્વમ્ અપિ ધર્મજ્ઞ વિજ્ઞેયં તત્પ્રસાદજમ્.

વિચિત્રરત્નપર્યઙ્કે મહાભોગેન ભોગિનઃ
રમન્તે નાકનારીભિઃ કેશવસ્મરણાત્ ફલમ્.

અશ્વમેધસહસ્રાણાં યઃ સહસ્રં સમાચરેત્
નાસૌ તત્ ફલમ્ આપ્નોતિ તદ્ભક્તૈર્ યદ્ અવાપ્યતે.

રે રે મનુષ્યાઃ પુરુષોત્તમસ્ય કરૌ ન કસ્માન્ મુકુલીકુરુધ્વે
ક્રિયાજુષાં કો ભવતાં પ્રયાસઃ ફલં હિ યત્ પદમ્ અચ્યુતસ્ય.

વિષ્ણોર્ વિમાનં યઃ કુર્યાત્ સકૃદ્ ભક્ત્યા પ્રદક્ષિણમ્
અશ્વમેધસહસ્રસ્ય ફલમ્ આપ્નોતિ માનવઃ.

પ્રદક્ષિણં તુ યઃ કુર્યાદ્ હરિભક્ત્યા સમન્વિતઃ
હંસયુક્તિવિમાનેન વિષ્ણુલોકં સ ગચ્છતિ.

તીર્થકોટિસહસ્રાણિ વ્રતકોટિશતાનિ ચ
નારાયણપ્રણામસ્ય કલાં નાર્હન્તિ ષોડશીમ્.

ઉરસા શિરસા દૃષ્ટ્યા મનસા વચસા તથા
પદ્ભ્યાં કરાભ્યાં જાનુભ્યાં પ્રણામો ઽષ્ટાઙ્ગ ઈરિતઃ.

શાઠ્યેનાપિ નમસ્કારં કુર્વતઃ શાર્ઙ્ગપાણયે
શાતજન્માર્જિતં પાપં નશ્યત્ય્ એવ ન સંશયઃ.

સંસારાર્ણવમ્ અગ્રાનાં નરાણાં પાપકર્મણામ્
નાન્યો ધર્ત્તા જગન્નાથં મુક્ત્વા નારાયણં પરમ્.

રેણુકુણ્ઠિગાત્રસ્ય કણા યાવન્તિ ભારત
તાવદ્ વર્ષસહસ્રાણિ વિષ્ણુલોકે મહીયતે.

પાવનં વિષ્ણુનૈવેદ્યં સુભોજ્યમ્ ઋષિભિઃ સ્મૃતમ્
અન્યદેવસ્ય નૈવેદ્યં ભુક્ત્વા ચાન્દ્રાયણં ચરેત્.

કોટ્યૈન્દવસહસ્રૈસ્ તુ માસોપોષણકોટિભિઃ
યત્ ફલં લભ્યતે પુમ્ભિર્ વિષ્ણોર્ નૈવેદ્ય ભક્ષણાત્.

ત્રિરાત્રફલદા નદ્યો યાઃ કાશ્ચિદ્ અસમુદ્રગાઃ
સમુદ્રગાસ્ તુ પક્ષસ્ય માસસ્ય સરિતાં પતિઃ.

ષણ્માસફલદા ગોદા વત્સરસ્ય તુ જાહ્નવી
વિષ્ણુપાદોદકસ્યૈતે કલાં નાર્હન્તિ ષોડસીમ્.

ગણ્ગાપ્રયાગગયપુષ્કરનૈમિશાનિ સંસેવિતાનિ બહુશઃ કુરુજાઙ્ગલાનિ
કાલેન તીર્થસલિલાનિ પુનન્તિ પાપં પાદોદકં ભગવતઃ પ્રપુનાતિ સદ્યઃ.

યાનિ કાનિ ચ તીર્થાનિ બ્રહ્માણ્ડાન્તર્ગતાનિ વૈ
વિષ્ણુપાદોદકસ્યૈતે કલાં નાર્હન્તિ ષોડશીમ્.

સ્નાનં પાદોદકં વિષ્ણોઃ પિબન્ શિરસિ ધારયન્
સર્વ પાપવિનિર્મુક્તો વૈષ્ણવીં સિદ્ધિમ્ આપ્નુયાત્.

યથા પાદોદકં પુણ્યં નિર્માલ્યં ચાનુલેપનમ્
નૈવેદ્યં ધૂપશેષં ચ આરાર્ત્તિશ્ ચ તથા હરેઃ.

તુલસ્યાસ્ તુ રજોજુષ્ટં નૈવેદ્યસ્ય ચ ભક્ષણમ્
નિર્માલ્યં શિરસા ધાર્યં મહાપાતકનાશનમ્.