કૃષ્ણામૃતમહાર્ણવ · શ્લોક 61-80

ક્ષીયતે તુ યદા ધર્મઃ પ્રાપ્તે ઘોરે કલૌ યુગે
તદા ન કીર્તયેત્ કશ્ચિન્ મુક્તિદં દેવમ્ અચ્યુતમ્.

અવશેનાપિ યન્નામ્નિ કીર્તિતે સર્વપાતકૈઃ
પુમાન્ વિમુચ્યતે સદ્યઃ સિંહત્રસ્તમૃગૈર્ ઇવ.

નારાયણેતિ મન્ત્રો ઽસ્તિ વાગ્ અસ્તિ વશવર્તિની
તથા ઽપિ નરકે ઘોરે મજ્જન્તીત્ય્ એતદ્ અદ્ભુતમ્.

આર્તા વિષણ્ણાઃ શિથિલાશ્ ચ ભીતા ઘોરેષુ ચ વ્યાધિષુ વર્તમાનાઃ
સંકીર્ત્ય નારાયઙશબ્દમાત્રં વિમુક્તદુઃખાઃ સુખિનો ભવન્તિ.

કૌશિકઃ:
સકૃદ્ ઉચ્ચારિતં યૈસ્ તુ કૃષ્ણેતિ ન વિશન્તિ તે
ગર્ભાગારં ગૃહં માતુર્ યમલોકં ચ દુસ્સહમ્.

ક્વ નાકપૃષ્ઠગમનં પુનરાવૃત્તિલક્ષણમ્
ક્વ જપો વાસુદેવેતિ મુક્તિબીજમ્ અનુત્તમમ્.

બુદ્ધ્યા બુદ્ધ્વા વદસ્વૈનં હરિર્ ઇત્ય્ અક્ષરદ્વયમ્
સ્મરણાદ્ એવ કૃષ્ણસ્ય ન પુનર્જાયતે ક્વચિત્.

હે જિહ્વે મમ નિસ્નેહે હરિં કિં નુન ભાષસે
હરિં વદસ્વ કલ્યાણિ સંસારોદધિનૌર્ હરિઃ.

અસારે ખલુ સંસારે સારાત્ સારતરો હરિઃ
પુણ્યહીના ન વિન્દન્તિ સારઙ્ગાશ્ ચ યથા જલમ્.

કુરુક્ષેત્રેણ કિં તસ્ય કિં કાશ્યા પુષ્કરેણ વા
જિહ્વાગ્રે વર્તતે તસ્ય હરિર્ ઇત્ય્ અક્ષરદ્વયમ્.

બ્રહ્મોવાચ:
અસારે ખલુ સંસારે સારમ્ એકં નિરૂપિતમ્
સમસ્તલોકનાથસ્ય સારમ્ આરાધનં હરેઃ.

સા જિહ્વા યા હરિં સ્તૌતિ તચ્ ચિત્તં યત્ તદર્પણમ્
તાવ્ એવ કેવલૌ શ્લાઘ્યૌ યૌ તત્પૂજાકરૌ કરૌ.

યસ્ તુ વિષ્ણુપરો નિત્યં દૃઢભક્તિર્ જિતેન્દ્રિયઃ
સ્વગૃહે ઽપિ વસન્ યાતિ તદ્ વિષ્ણોઃ પરમં પદમ્.

શઙ્કરઃ:
સાધુ સાધુ મહાભાગ સાધુ દાનવનાશન્
યન્ માં પૃચ્છસિ ધર્મજ્ઞ કેશવારાધનં પ્રતિ.

નિમિષં નિમિષાર્ધં વા મુહૂર્તમ્ અપિ ભાર્ગવ
નાદગ્ધાશેષપાપાનાં ભક્તિ ભવતિ કેશવે.

કિં તેન મનસા કાર્યં યન્ ન તિષ્ઠતિ કેશવે
મનો મુક્તિફલાવાપ્ત્યૌ કારણં સપ્રયોજનમ્.

રોગો નામ ન સા જિહ્વા યયા ન સ્તૂયતે હરિઃ
ગર્તૌ નામ ન તૌ કર્ણૌ યાભ્યાં તત્ કર્મ ન શ્રુતમ્.

નૂનં તત્ કણ્ઠશાલૂકમ્ અથવા ઽપ્ય્ ઉપજિહ્વિકા
રોગો નામ ન સા જિહ્વા યા ન વક્તિ હરેર્ ગુણાન્.

ભારભૂતૈઃ કાર્યમ્ એભિઃ કિં તસ્ય નૃપશોર્ દ્વિજ
ચરણૌ તૌ તુ સફલૌ કેશવાલયગામિનૌ
તે ચ નેત્રે મહાભાગ યાભ્યાં સન્દૃશ્યતે હરિઃ.

કિં તસ્ય ચરણૈઃ કાર્યં વૃથાસઞ્ચરણૈર્ દ્વિજ
યૈર્ હિ ન વ્રજતે જન્તુઃ કેશવાલયદર્શને.