કૃષ્ણામૃતમહાર્ણવ · શ્લોક 101-120

ભક્ત્યા વા યદિ વા ઽભક્ત્યા ચક્રાઙ્કિતશિલામ્ પ્રતિ
દર્શનં સ્પર્શનં વા ઽપિ સર્વપાપપ્રણાશનમ્.

સાળગ્રામોદ્ભવો દેવો દેવો દ્વારવતીભવઃ
ઉભયોઃ સ્નાનતોયેન બ્રહ્મહત્યાં વ્યપોહતિ.

મ્લેચ્છદેશે ઽશુચૌ વા ઽપિ ચક્રાઙ્કો યત્ર તિષ્ઠતિ
યોજનાનિ તથા ત્રીણિ મમ ક્ષેત્રં વસુન્ધરે.

શાલગ્રામોદ્ભવો દેવો શૈલં ચક્રાઙ્કમણ્ડિતમ્
યત્રાપિ નીયતે તત્ર વારણસ્યા શતાધિકમ્.

સાળગ્રામોદ્ભવો દેવો દેવો દ્વારવતીભવઃ
ઉભયોઃ સંગમો યત્ર તત્ર મુક્તિર્ ન સંશયઃ.

હરિણા મુક્તિદાનીહ મુક્તિસ્થાનાનિ સર્વશઃ
સ યસ્ય સર્વભાવેષુ તસ્ય તૈઃ કિં પ્રયોજનમ્.

હરિર્ યાતિ હરિર્ યાતિ દસ્યુવ્યાજેન યો વદેત્
સો ઽપિ સદ્ગતિમ્ આપ્નોતિ ગતિં સુકૃતિનો યથા.

વાસુદેવં પરિત્યજ્ય યો ઽન્યં દેવમ્ ઉપાસતે
ત્યક્ત્વા ઽમૃતં સ મૂઢાત્મા ભુઙ્ક્તે હાલાહલં વિષમ્.

ત્યક્ત્વામૃતં યથા કશ્ચિદ્ અન્યપાનં પિબેન્ નરઃ
તથા હરિં પરિત્યજ્ય ચાન્યં દેવમ્ ઉપાસતે.

સ્વધર્મં તુ પરિત્યજ્ય પરધર્મં યથા ચરેત્
તથા હરિં પરિત્યજ્ય ચાન્યં દેવમ્ ઉપાસતે.

ગાં ચ ત્યક્ત્વા વિમૂઢાત્મા ગર્દભીં વન્દતે યથા
તથા હરિં પરિત્યજ્ય ચાન્યં દેવમ્ ઉપાસતે.

વાસુદેવં પરિત્યજ્ય યો ઽન્યં દેવમ્ ઉપાસતે
તૃષિતો જાહ્નવીતીરે કૂપં ખનતિ દુર્મતિઃ.

યથા ગઙ્ગોદકં ત્યક્ત્વા પિબેત્ કૂપોદકં નરઃ
તથા હરિં પરિત્યજ્ય યો ઽન્યં દેવમ્ ઉપાસતે.

સ્વમાતરં પરિત્યજ્ય શ્વપાકીં વન્દતે તથા
તથા હરિં પરિત્યજ્ય યો ઽન્યં દેવમ્ ઉપાસતે.

યાવત્ સ્વસ્થમ્ ઇદં પિણ્ડં નિરુજં કરણાન્વિતમ્
તાવત્ કુરુષ્વા ઽત્મહિતં પશ્ચાત્ તાપેન તપ્યસે.

યાવત્ સ્વાસ્થ્યં શરીરેષુ કરણેષુ ચ પાટવમ્
તાવદ્ અર્ચય ગોવિન્દમ્ આયુશ્યં સાર્થકં કુરુ.

સ્મર્યતાં તુ હૃષીકેશો હૃષીકેષુ દૃઢેષુ ચ
અદૃઢેષુ હૃષીકેષુ હૃષીકેશં સ્મરન્તિ કે.

યાવચ્ ચિન્તયતે જન્તુર્ વિષયાન્ વિષસન્નિભાન્
તાવચ્ ચેત્ સ્મરતે વિષ્ણું કો ન મુચ્યેત બન્ધનાત્.

યાવત્ પ્રલપતે જન્તુર્ વિષયાન્ વિષસન્નિભાન્
તાવચ્ ચેત્ સ્મરતે વિષ્ણું કો ન મુચ્યેત બન્ધનાત્.

સૂત ઉવાચ:
જ્ઞાત્વા વિપ્રાસ્ તિથિં સમ્યગ્ દૈવજ્ઞૈઃ સમુદીરિતામ્
કર્તવ્ય ઉપવાસશ્ ચ અન્યથા નરકં વ્રજેત્.