કૃષ્ણામૃતમહાર્ણવ · શ્લોક 41-60

યમમાર્ગાં મહાઘોરં નરકાણિ યમં તથા
સ્વપ્ને ઽપિ ચ ન પશ્યેત યઃ સ્મરેદ્ ગરુડધ્વજમ્.

હૃદિ રૂપં મુખે નામ નૈવેદ્યમ્ ઉદરે હરેઃ
પાદોદકં ચ નિર્માલ્યં મસ્તકે યસ્ય સો ઽચ્યુતઃ.

ગોવિન્દસ્મરણં પુંસાં પાપરાશિમહાચલમ્
અસંશયં દહત્ય્ આશુ તૂલરાશિમ્ ઇવાનલઃ.

અગસ્ત્યઃ:
સ્મરણાદ્ એવ કૃષ્ણસ્ય પાપસઙ્ઘાતપઞ્જરમ્
શતધા ભેદમ્ આયાતિ ગિરિર્ વજ્રહતો તથા.

કૃષ્ણે રતાઃ કૃષ્ણમ્ અનુસ્મરન્તઃ તદ્ ભાવિતાસ્ તદ્ ગતમાનસાશ્ ચ.
તે ભિન્નદેહાઃ પ્રવિશન્તિ વિષ્ણું હવિર્ યથા મન્ત્રહુતં હુતાશે.

સા હાનિસ્ તન્ મહત્ છિદ્રં સા ચાન્ધજડમૂકતા
યન્ મુહૂર્તં ક્ષણં વા ઽપિ વાસુદેવો ન ચિન્ત્યતે.

નારાયણો નામ નરો નરાણાં પ્રસંહ્ય ચોરઃ કથિતઃ પૃથિવ્યામ્
અનેકજન્માર્જિતપાપસઞ્ચયં દહત્ય્ અશેષં સ્મૃતમાત્રયૈવ.

યસ્ય સંસ્મરણાદ્ એવ વાસુદેવસ્ય શાર્ઙ્ગિણઃ
કોટિજન્માર્જિતં પાપં તક્ષણાદ્ એવ નશ્યતિ.

કિં તસ્ય બહુભિસ્ તીર્થૈઃ કિં તપોભિઃ કિમ્ અધ્વરૈઃ
યો નિત્યં ધ્યાયતે દેવં નારાયણમ્ અનન્યધીઃ.

યે માનવા વિગતરાગપરાવરજ્ઞા નારાયણં સુરગુરું સતતં સ્મરન્તિ
ધ્યાનેન તેન હતકિલ્બિષચેતનાસ્તે માતુઃ પયોધરરસં ન પુનઃ પિબન્તિ.

હે ચિત્ત ચિન્તય સ્વેહ વાસુદેવમ્ અહર્નિશમ્
નૂનં યશ્ ચિન્તિતઃ પુંસાં હન્તિ સંસારબન્ધનમ્.

આલોડ્ય સર્વશાસ્ત્રાણિ વિચાર્ય ચ પુનઃ પુનઃ
ઇદમ્ એકં સુનિષ્પન્નં ધ્યેયો નારાયણઃ સદા.

સ્મૃતે સકલકલ્યાણભાજનં યત્ર જાયતે
પુરુષસ્ તમ્ અજં નિત્યં વ્રજામિ શરણં હરિમ્.

વેદેષુ યજ્ઞેષુ તપસુ ચૈવ દાનેષુ તીર્થેષુ વ્રતેષુ ચૈવ
ઇષ્ટેષુ પૂર્તેષુ ચ યત્ પ્રદિષ્ટં પુણ્યં સ્મૃતે તત્ ખલુ વાસુદેવે.

ઔર્વઃ:
આરાધયૈવ નરો વિષ્ણું મનસો યદ્ યદ્ ઇચ્છતિ
ફલં પ્રાપ્નોત્ય્ અવિકલં ભૂરિ સ્વલ્પમ્ અથાપિ વા.

યન્ નામકીર્તનં ભક્ત્યા વિલાયનમ્ અનુત્તમમ્
મૈત્રેયાશેષપાપાનાં ધાતૂનામ્ ઇવ પાવકઃ.

કલિકલ્મષમ્ અત્યુગ્રં નરકાર્તિપ્રદં નૃણામ્
પ્રયાતિ વિલયં સદ્યઃ સકૃત્ સંકીર્તિતે ઽચ્યુતે.

અનાયાસેન ચા ઽયાન્તિ મુક્તિં કેશવમ્ આસ્રિતાઃ
તદ્વિઘાતાય જાયન્તે શક્રાદ્યાઃ પરિપન્થિનઃ.

ચતુસ્સાગરમ્ આસાદ્ય જમ્બૂદ્વીપોત્તમે ક્વચિત્
ન પુમાન્ કેશવાદ્ અન્યઃ સર્વપાપચિકિત્સકઃ.

યદ્ અભ્યર્ચ્ય હરિં ભક્ત્યા કૃતે વર્ષશતૈર્ અપિ
ફલં પ્રાપ્નોત્ય્ અવિકલં કલૌ સંકીર્ત્ય કેશવમ્.