કૃષ્ણામૃતમહાર્ણવ · શ્લોક 21-40

ધર્માર્થકામમોક્ષાણાં નાન્યોપાયસ્ તુ વિદ્યતે
સત્યં બ્રવીમિ દેવેશ હૃષીકેશાર્ચનાહતે.

તસ્ય યજ્ઞવરાહસ્ય વિષ્ણોર્ અમિતતેજસઃ
પ્રણામં યે ઽપિ કુર્વન્તિ તેષામ્ અપિ નમો નમઃ.

મરીચિઃ:
અનારાધિતગોવિન્દૈર્ નરૈઃ સ્થાનં નૃપાત્મજ
ન હિ સમ્પ્રાપ્યતે શ્રેષ્ઠં તસ્માદ્ આરાધયાચ્યુતમ્.

અત્રિઃ:
પરઃ પરાણાં પુરુષસ્ તુષ્ટો યસ્ય જનાર્દનઃ
સ ચા ઽપ્નોત્ય્ અક્ષયં સ્થાનમ્ એતત્ સત્યં મયોદિતમ્.

અઙ્ગિરાઃ:
યસ્યાન્તઃ સર્વમ્ એવેદમ્ અચ્યુતસ્યાખ્યયાત્મનઃ
તમ્ આરાધય ગોવિન્દં સ્થાનમ્ અગ્ર્યં યદીચ્છસિ.

પુલહઃ:
પરં બ્રહ્મ પરં ધામ યો ઽસૌ બ્રહ્મ સનાતનમ્
તમ્ આરાધ્ય હરિં યાતિ મુક્તિમ્ અપ્ય્ અતિદુર્લભામ્.

ઐન્દ્રમ્ ઇન્દ્રઃ પરં સ્થાનં યમ્ આરાધ્ય જગત્પતિમ્
પ્રાપ યજ્ઞપતિં વિષ્ણું તમ્ આરાધય સુવ્રત.

પ્રાપ્નોત્ય્ આરાધિતે વિષ્ણૌ મનસા યદ્ યદ્ ઇચ્છતિ
ત્રૈલોક્યાન્તર્ગતં સ્થાનં કિમુ લોકોત્તરોત્તરાન્.

યે સ્મરન્તિ સદા વિષ્ણું શઙ્ખચક્રગદાધરમ્
સર્વપાપવિનિર્મુક્તાઃ પરં બ્રહ્મ વિશન્તિ તે.

તતો ઽનિરુદ્ધં દેવેશં પ્રદ્યુમ્નં ચ તતઃ પરમ્
તતઃ સંકર્ષણં દેવં વાસુદેવં પરાત્ પરમ્.

વાસુદેવાત્ પરં નાસ્તિ ઇતિ વેદાન્તનિશ્ચયઃ
વાસુદેવં પ્રવિષ્ટાનાં પુનર્ આવર્તનં કુતઃ.

આત્રેયઃ:
યો યાન્ ઇચ્છેન્ નરઃ કામાન્ નારી વા વરવર્ણિની
તાન્ સમાપ્નોતિ વિપુલાન્ સમારાધ્ય જનાર્ધનમ્.

પુલહ સગ્તે:
બ્રહ્મા:
બાહુભ્યાં સાગરં તર્તું ક ઇચ્છેત પુમાન્ ભુવિ
વાસુદેવમ્ અનારાધ્ય કો મોક્ષં ગન્તુમ્ ઇચ્છતિ.

શંકરઃ:
કૃતે પાપે ઽનુતાપો વૈ યસ્ય પુંસઃ પ્રજાયતે
પ્રાયશ્ચિત્તં તુ તસ્યોક્તં હરિસંસ્મરણં પરમ્.

ન હ્ય્ અપુણ્યવતાં લોકે મૂઢાનાં કુટિલાત્મનાં
ભક્તિર્ ભવતિ ગોવિન્દે સ્મરણં કીર્તનં તથા.

તદૈવ પુરુષો મુક્તો જન્મદુઃખજરાદિભિઃ
જિતેન્દ્રિયો વિશુદ્ધાત્મા યદૈવ સ્મરતે હરિમ્.

પ્રાપ્તે કલિયુગે ઘોરે ધર્મજ્ઞાનવિવર્જિતે
ન કશ્ચિત્ સ્મરતે દેવં કૃષ્ણં કલિમલાપહમ્.

ન કલૌ દેવદેવસ્ય જન્મદુઃખાપહારિણઃ
કરોતિ મર્ત્યો મૂઢાત્મા સ્મરણં કીર્તનં હરેઃ.

યે સ્મરન્તિ સદા વિષ્ણું વિશુદ્ધેનાન્તરાત્મના
તે પ્રયાન્તિ ભવં ત્યક્ત્વા વિષ્ણુલોકમ્ અનામયમ્.

ગર્ભજન્મજરારોગદુઃખ સંસારબન્ધનૈઃ
ન બાધ્યતે નરો નિત્યં વાસુદેવમ્ અનુસ્મરન્.