કૃષ્ણામૃતમહાર્ણવ · શ્લોક 1-20

કૃષ્ણામૃતમહાર્ણવઃ
ઓં.
અર્ચિતઃ સંસ્મૃતો ધ્યાતઃ કીર્તિતઃ કથિતઃ શ્રુતઃ
યો દદાત્ય્ અમૃતત્વં હિ સ માં રક્ષતુ કેશવઃ.

તાપત્રયેણ સંતપ્તં યદ્ એતદ્ અખિલં જગત્
વક્ષ્યામિ શાન્તયે હ્ય્ અસ્ય કૃષ્ણામૃતમહાર્ણવમ્.

તે નરાઃ પશવો લોકે કિં તેષાં જીવને ફલમ્
યૈર્ ન લબ્ધા હરેર્ દીક્ષા નાર્ચિતો વા જનાર્દનઃ.

સંસારે ઽસ્મિન્ મહાઘોરે જન્મરોગભયાકુલે
અયમ્ એકો મહાભાગઃ પૂજ્યતે યદ્ અધોક્ષજઃ.

સ નામ સુકૃતી લોકે કુલં તેન હ્ય્ અલંકૃતમ્
આધારઃ સર્વભૂતાનાં યેન વિષ્ણુઃ પ્રસાદિતઃ.

યજ્ઞાનાં તપસાં ચૈવ શુભાનાં ચૈવ કર્મણાં
તદ્વિશિષ્ટફલં નૃણાં સદૈવારાધનં હરેઃ.

કલૌ કલિમલધ્વંસિસર્વપાપહરં હરિમ્
યે ઽર્ચયન્તિ નરા નિત્યં તે ઽપિ વન્દ્યા યથા હરિઃ.

નાસ્તિ શ્રેયસ્કરં નૃણાં વિષ્ણોર્ આરાધનાન્ મુને
યુગે ઽસ્મિંસ્ તામસે લોકે સતતં પૂજ્યતે નૃભિઃ.

અર્ચિતે સર્વદેવેશે શઙ્કચક્રગદાધરે
અર્ચિતાઃ સર્વદેવાઃ સ્યુર્ યતઃ સર્વગતો હરિઃ.

સ્વર્ચિતે સર્વલોકેશે સુરાસુરનમસ્કૃતે
કેશવે કંસકેશિઘ્ને ન યાતિ નરકં નરઃ.

સકૃદ્ અભ્યર્ચ્ય ગોવિન્દં બિલ્વપત્રેણ માનવઃ
મુક્તિભાગી નિરાતઙ્કી વિષ્ણુલોકે ચિરં વસેત્.

સકૃદ્ અભ્યર્ચિતો યેન હેળયા ઽપિ નમસ્કૃતઃ
સ યાતિ પરમં સ્થાનં યત્ સુરૈર્ અપિ દુર્લભમ્.

નારદઃ:
સમસ્તલોકનાથસ્ય દેવદેવસ્ય શાર્ઙ્ગિણઃ
સાક્ષાદ્ ભગવતો વિષ્ણોઃ પૂજનં જન્મનઃ ફલમ્.

પુલસ્ત્યઃ:
ભક્ત્યા દૂર્વાઙ્કુરૈઃ પુમ્ભિઃ પૂજિતઃ પુરુષોત્તમઃ
હરિર્ દદાતિ હિ ફલં સર્વયજ્ઞૈશ્ ચ દુર્લભમ્.

વિધિના દેવદેવેશઃ શઙ્ખચક્રધરો હરિઃ
ફલં દદાતિ સુલભં સલિલેનાપિ પૂજિતઃ.

નરકે પચ્યમાનસ્ તુ યમેન પરિભાષિતઃ
કિં ત્વયા નાર્ચિતો દેવઃ કેશવઃ ક્લેશનાશનઃ.

ધર્મઃ:
નરસિંહો હૃષીકેશઃ પુણ્ડરીકનિભેક્ષણઃ
સ્મરણાન્ મુક્તિદો નૃણાં સ ત્વયા કિં ન પૂજિતઃ.

દ્રવ્યાણામ્ અપ્ય્ અભાવે તુ સલિલેનાપિ પૂજિતઃ
યો દદાતિ સ્વકં સ્થાનં સ ત્વયા કિં ન પૂજિતઃ.

ગર્ભસ્થિતામૃતા વા ઽપિ મુષિતાસ્તે સુદૂષિતાઃ
ન પ્રાપ્તા યૈર્ હરેર્ દીક્ષા સર્વદુઃખવિમોચની.

માર્કણ્ડેયઃ:
સકૃદ્ અભ્યર્ચિતો યેન દેવદેવો જનાર્દનઃ
યત્ કૃતં તત્કૃતં તેન સમ્પ્રાપ્તં પરમં પદમ્.