કૃષ્ણામૃતમહાર્ણવ · શ્લોક 221-229

જીવિતં વિષ્ણુભક્તસ્ય વરં પઞ્ચદિનાન્ય્ અપિ
ન તુ કલ્પસહસ્રૈસ્ તુ ભક્તિહીનસ્ય કેશવે.

કિં તેન જાતમાત્રેણ ભૂભારેણાન્નશત્રુણા
યો જાતો નાર્ચયેદ્ વિષ્ણું ન સ્મરેન્ નાપિ કીર્તયેત્.

યો દદાતિ દ્વિજાતિભ્યશ્ ચન્દનં ગોપિમર્દિતમ્
અપિ સર્ષપમાત્રેણ પુનાત્ય્ આસપ્તમં કુલમ્.

જ્ઞાની ચ કર્માણિ સદો ઽદિતાનિ
કુર્યાદ્ અકામઃ સતતં ભવેત્.

અતીતાનાગતજ્ઞાની ત્રૈલોક્યોદ્વરણક્ષમઃ
એતાદૃશો ઽપિ ના ઽચારં શ્રૌતં સ્માર્તં પરિત્યજેત્.

યદ્ એવ વિદ્યયા કરોતિ શ્રદ્ધયોપનિષદા
સદ્ એવ વીર્યવત્તરં ભવતિ.

કુર્વન્ એવેહ કર્માણિ જિજીવિષેચ્ છતં સમાઃ
એવં ત્વયિ નાન્યથેતો ઽસ્તિ ન કર્મ લિપ્યતે નરે.

આચારશ્ ચૈવ સાધૂનામ્ આત્મનસ્ તુષ્ટિર્ એવ ચ
વેદપ્રણિહિતો ધર્મો હ્ય્ અધર્મસ્ તદ્વિપર્યયઃ.

નિષ્કામં જ્ઞાનપૂર્વં તુ નિવૃત્તમ્ ઇહ ચોચ્યતે
નિવૃત્તં સેવમાનસ્ તુ બ્રહ્માભ્યેતિ સનાતનમ્.