કૃષ્ણામૃતમહાર્ણવ · શ્લોક 141-160

શુદ્ધાપિ દ્વાદશી ગ્રાહ્યા પરતો દ્વાદશી યદિ
વિષં તુ દશમી જ્ઞેયા ઽમૃતં ચૈકાદશી તિથિઃ.
વિષપ્રધાના વર્જ્યા સા ઽમૃતા ગ્રાહ્યા પ્રધાનતઃ.

દ્વાદશ્યાં ભોજનં ચૈવ વિદ્ધાયાં હર્યુપોષણમ્
યઃ કુર્યાન્ મન્દબુદ્ધિત્વાન્ નિરયં સો ઽધિગચ્છતિ.

યાનિ કાનિ ચ વાક્યાનિ વિદ્ધોપાસ્યાપરાણિ તુ
ધનદાર્ચાપરાણિ સ્યુર્ વૈષ્ણવી ન દશાયુતા.

અથવા મોહનાર્થાય મોહિન્યા ભગવાન્ હરિઃ
અર્થિતઃ કારયામ્ આસ વ્યાસરૂપી જનાર્દનઃ.

ધનદાર્ચાવિવૃદ્ધ્યર્થં મહાવિત્તલયસ્ય ચ
અસુરાણાં મોહનાર્થં પાષણ્ડાનાં વિવૃદ્ધયે
આત્મસ્વરૂપાવિજ્ઞપ્ત્યૈ સ્વરૂપાપ્રાપ્તયે તથા.

એવં વિદ્ધાં પરિત્યજ્ય દ્વાદશ્યામ્ ઉપવાસને
કોટિજન્માર્જિતં પાપમ્ એકયૈવ વિનશ્યતિ
તતઃ કોટિગુણં વા ઽપિ નિષિદ્ધસ્યેતરૈર્ જનૈઃ.

યદ્ અનાદિકૃતં પાપં તદ્ ઊર્ધ્વં યત્ કરિષ્યતિ
તત્ સર્વં વિલયં યાતિ પરેષામ્ ઉપવાસનાત્
ન ચ તસ્માત્ પ્રિયતમઃ કેશવસ્ય મમાપિ વા.

એકાદશ્યા હ્ય્ અવેધે તુ દ્વાદશીં ન પરિત્યજેત્
પારણે મરણે ચૈવ તિથિસ્ તાત્કાલિકી સ્મૃતા.

બ્રહ્મચારી ગૃહસ્થો વા વાનપ્રસ્થો યતિસ્ તથા
બ્રાહ્મણઃ ક્ષત્રિયો વૈશ્યઃ શૂદ્રો ભર્તૃમતી તથા.

અભર્તૃકા તથા ઽન્યે વા સૂતવૈદેહિકાદયઃ
એકાદશ્યાં ન ભુઞ્જીત પક્ષયોર્ ઉભયોર્ અપિ.

એકાદશ્યાં તુ યો ભુઙ્ક્તે મોહેના ઽવૃતચેતનઃ
શુક્લાયામ્ અથ કૃષ્ણાયાં નિરયં યાતિ સ ધ્રુવમ્.

વિવેચયતિ યો મોહાચ્ છુક્લા કૃષ્ણેતિ પાપકૃત્
એકાદશીં સ વૈ યાતિ નિરયં નાત્ર સંશયઃ.

યથા ગૌર્ નૈવ હન્તવ્યા શુક્લા કૃષ્ણેતિ ભામિનિ
એકદાશ્યાં ન ભુઞ્જીત પક્ષયોર્ ઉભયોર્ અપિ.

યાનિ કાનિ ચ વાક્યાનિ કૃષ્ણૈકાદશિવર્જને
ભરણ્યાદિનિષેધે ઽપિ તાનિ કામ્યફલાર્થિનામ્.

કામિનો ઽપિ હિ નિત્યાર્થં કુર્યુર્ એવોપવાસનમ્
પ્રીણનાર્થં હરેર્ નિત્યં ન તુ કામવ્યપેક્ષયા.

તસ્માચ્ છુક્લામ્ અથો કૃષ્ણાં ભરણ્યાદિયુતામ્ અપિ
પ્રત્યવાયનિષેધાર્થમ્ ઉપવાસીત નિત્યશઃ
પ્રીણનાર્થં હરેશ્ વાપિ વિષ્ણુલોકસ્ય ચા ઽપ્તયે.

કલા વા ઘટિકા વા ઽપિ અપરે દ્વાદશી યદિ
દ્વાદશદ્વાદશીર્ હન્તિ પૂર્વેદ્યુઃ પારણે કૃતે.

અતિરિક્તા દ્વાદશી ચેત્ સ તાં નોપોષયેદ્ યદિ
દ્વાદશદ્વાદશીર્ હન્તિ દ્વાદશી ચાતિલઙ્ઘિતા.

દ્વાદશ્યામ્ અતિરિક્તાયાં યો ભુઙ્ક્તે પૂર્વવાસરે
દ્વાદશદ્વાદશીર્ હન્તિ દ્વાદશીં ન પરિત્યજેત્.

દ્વાદશીં શ્રવણોપેતાં યો નોપોષ્યાત્ સુમન્દધીઃ
પઞ્ચસંવત્સરકૃતં પુણ્યં તસ્ય વિનશ્યતિ.