કૃષ્ણામૃતમહાર્ણવ · શ્લોક 121-140

ક્ષયે વા ઽપ્ય્ અથવા વૃદ્ધૌ સમ્પ્રાપ્તે વા દિનક્ષયે
ઉપોષ્યા દ્વાદશી પુણ્યા પૂર્વવિદ્ધાં પરિત્યજેત્.

પૂર્વવિદ્ધાં પ્રકુર્વાણો નરો ધર્માન્ નિકૃન્તતિ
સંતતેસ્ તુ વિનાશાય સમ્પદો હરણાય ચ.

કલાવેધે તુ વિપ્રેન્દ્રા દશમ્યૈકાદશીં ત્યજેત્
સુરાયા બિન્દુના સ્પૃષ્ટં ગઙ્ગામ્ભ ઇવ સન્ત્યજેત્.

શ્વદૃતૌ પઞ્ચગવ્યં ચ દશમ્યા દૂષિતાં ત્યજેત્
એકાદશીં દ્વિજશ્રેષ્ઠાઃ પક્ષયોર્ ઉભયોર્ અપિ.

તસ્માદ્ વિપ્રા ન વિદ્ધા હિ કર્તવ્યૈકાદસી ક્વચિત્
વિદ્ધા હન્તિ પુરાપુણ્યં શ્રાદ્ધં ચ વૃષલીપતિઃ.

જપ્તં દત્તં હુતં સ્નાતં તથા પૂજા કૃતા હરેઃ
તત્ સર્વં વિલયં યાતિ તમઃ સૂર્યોદયે યથા.

એકાદશ્યાં યદા બ્રહ્મન્ દિનક્ષયતિથિર્ ભવેત્
ઉપોષ્યા દ્વાદશી તત્ર ત્રયોદશ્યાં તુ પારણમ્.

પ્રતિપત્પ્રભૃતયઃ સર્વા ઉદયાદ્ ઉદયાદ્ રવેઃ
સમ્પૂર્ણા ઇતિ વિજ્ઞેયા હરિવાસરવર્જિતાઃ.

અરુણોદયકાલે તુ દશમી યદિ દૃશ્યતે
પાપમૂલં તદા જ્ઞેયમ્ એકાદશ્યુપવાસનમ્.

અરુણોદયકાલે તુ દશમી યદિ દૃશ્યતે
ન તત્રૈકાદશી કાર્યા ધર્મકામાર્થનાશિની.

ચતસ્ત્રો ઘટિકાઃ પ્રાતર્ અરુણોદય ઉચ્યતે
યતીનાં સ્નાનકાલો ઽયં ગઙ્ગામ્ભઃસદૃશઃ સ્મૃતઃ.

ઉદયાત્ પ્રાગ્ યદા વિપ્રા મુહૂર્તદ્વયસંયુતા
સમ્પૂર્ણૈકાદશી નામ તત્રૈવોપવસેદ્ વ્રતી.

ઉદયાત્ પ્રાક્ ત્રિઘટિકા વ્યાપિન્ય્ એકાદશી યદા
સન્દિગ્ધૈકાદશી નામ વર્જ્યા ધર્માર્થનાશિની.

પુત્રપૌત્રવિવૃદ્ધ્યર્થં દ્વાદશ્યામ્ ઉપવાસયેત્
તત્ર ક્રતુશતં પુણ્યં ત્રયોદશ્યાં તુ પારણં.

ઉદયાત્ પ્રાગ્ દ્વિઘટિકાવ્યાપિન્યેકાદશી યદા
સઙ્કીર્ણૈકાદશી નામ વર્જ્યા ધર્માર્થકાઙ્ક્ષિભિઃ.

પુત્રરાજ્યવિવૃદ્ધ્યર્થં દ્વાદશ્યામ્ ઉપવાસનમ્
તત્ર ક્રતુશતં પુણ્યં ત્રયોદશ્યાં તુ પારણમ્.

દશમીશેષસંયુક્તા ગાન્ધાર્યા સમુપોષિતા
તસ્યાઃ પુત્રશતં નષ્ટં તસ્માત્ તાં પરિવર્જયેત્.

બહ્વાગમવિરોધેષુ બ્રાહ્મણેષુ વિવાદિષુ
ઉપોષ્યા દ્વાદશી પુણ્યા ત્રયોદશ્યાં તુ પારઙમ્.

એકાદશ્યાં તુ વિદ્ધાયાં સમ્પ્રાપ્તે શ્રવણે તથા
ઉપોષ્યા દ્વાદશી પુણ્યા પક્ષયોર્ ઉભયોર્ અપિ.

ઉપરાગસહસ્રાણિ વ્યતીપાતાયુતાનિ ચ
અમાલક્ષં તુ દ્વાદશ્યાઃ કલાં નાર્હન્તિ ષોડશીમ્.