કરતોયામાહાત્મ્ય · શ્લોક 21-40

વેદીમધ્યે ઽર્પિતો યૂપઃ સંશ્લેષાદ્ વર્ધતે નૃણામ્
ગોવિન્દમણ્ડપાત્ પૂર્વં કુણ્ડં કુણ્ડં વિષ્ણુવિનિર્મિતમ્ ॥

સ્કન્દમણ્ડપવાયવ્યે સભા રામસ્ય ચાદ્ભુતા
સપાદલક્ષં વિપ્રાણાં યત્રાસ્તે ઽદ્ભુતકર્મણામ્ ॥

પ્રભાવાત્ તપસો દેવિ મુનીન્દ્રસ્ય મહાત્મનઃ
તત્સભા વાયુકોણે ચ ગર્તમ્ ઈશ્વરનિર્મિતમ્ ॥

આદ્યં ભુવો ભવનં લક્ષસપાદવિપ્રૈઃ સ્કન્દાદિવિષ્ણુબલભદ્રશિવાદિદેવૈઃ
અધ્યાસિતં કરજલામ્બુવિધૂતપાપં શ્રીપૌણ્ડ્રવર્ધનપુરં શિરસા નમામિ ॥

કરજાપશ્ચિમે ભાગે સદા વહતિ જાહ્નવી
પૂર્વભાગે તુ કરજા પાદોના જાહ્નવી જલા ॥

કરતોયાપશ્ચિમે તીરે લોહિની યત્ર મૃત્તિકા
મુક્તિક્ષેત્રં સમાખ્યાતં મહાપાતકનાશનમ્ ॥

કરતોયાનદીં પ્રાપ્ય ત્રિરાત્રોપોષિતો નરઃ
અશ્વમેધમ્ અવાપ્નોતિ શક્રલોકં ચ ગચ્છતિ
અત્રૈવ જ્ઞાનમ્ આસાદ્ય હરિસાયુજ્યમ્ આપ્નુયાત્ ॥

કરતોયાં સમાસાદ્ય યે ત્યજન્તિ કલેવરમ્
તેષાં મુક્તિર્ ન સન્દેહો યાવદ્ ઇન્દ્રાશ્ ચતુર્દશ ॥

ન માનુષાસ્ તે તે દેવા નદીસ્ તિસ્રઃ પિબન્તિ યે
દેવિકાં કરતોયાં ચ વિપાશાં પાપનાશિનીમ્ ॥

સ્કન્દગોવિન્દયોર્ મધ્યે સોમવારે કુહૂતિથૌ
પ્રાતર્ મૌનેન યઃ સ્નાયાત્ કુલકોટીઃ સમુદ્ધરેત્ ॥

કિયન્તો રેણવઃ પૃથ્વ્યાં કિયાન્ આકાશસંભવઃ
માહાત્મ્યં કરતોયાયા વક્તું નૈવ હિ શક્યતે ॥

પુરુષોત્તમે મહાજ્યૈષ્ઠી સમયે દર્શનાત્ ફલમ્
કરતોયામ્ભસિ સ્નાત્વા યત્ તત્ ફલમ્ અવાપ્નુયાત્ ॥

કરતોયાજલં પ્રાપ્ય યદિ સોમયુતા કુહૂઃ
અરુણોદયવેલાયાં સૂર્યગ્રહશતૈઃ સમા ॥

શિલાદ્વીપં સમાસાદ્ય તચ્ ચ કોટિગુણં ભવેત્
તદ્ એવ કોટિગુણિતં પૌષાર્કે ચ યદૈવ સા ॥

વારાણસ્યાં કુરુક્ષેત્રે યત્ પુણ્યં રાહુદર્શને
શિલાદ્વીપં સમાસાદ્ય તચ્ ચ કોટિગુણં ભવેત્ ॥

પૌષે વા માઘમાસે વા યદિ સોમયુતા કુહૂઃ
વ્યતિપાતેન યોગેન કોટિકોટિગુણં ભવેત્ ॥

ચાપાર્કે મૂલસંયુક્તે યદિ સોમયુતા કુહૂઃ ।
નારાયણીતિ વિખ્યાતા ત્રિકોટિકુલમ્ ઉદ્ધરેત્ ॥

વારાણસ્યાં કૃતા પૂજા સંપૂર્ણફલદાયિની
તતો ઽપિ દ્વિગુણા પ્રોક્તા કરતોયાનદીજલે ॥

દ્વારાવત્યાં ચ ગણ્ડક્યાં પ્રયાગે પુષ્કરે તથા
બદર્યાખ્યે કુરુક્ષેત્રે યા પૂજા ફલદાયિની
તતશ્ ચતુર્ગુણા પ્રોક્તા કરતોયાનદીજલે ॥

કરતોયાજલે દેવિ વિષ્ણુપૂજા વિશેષતઃ
તતો ઽપિ ફલબાહુલ્યં શિવશક્ત્યોઃ પ્રપૂજનાત્ ॥