કલ્પદ્રુમાવદાનમાલા · શ્લોક 61-80

યસ્ય પ્રજ્ઞા જગલ્લોક હિતાનુશાસનોજ્જ્વલા
સૈવ દ્વિજવરો વિજ્ઞો વેદધર્માસ્થિતો દ્વિજઃ ॥

યેનૈવ નિર્જિતાઃ ક્લેશાશ્ ચતુર્બ્રહ્મવિહારિણા
સ્વચિત્તે ભાવિતં બ્રહ્મ સ એવ બ્રાહ્મણોત્તમઃ ॥

તસ્માત્ પુત્ર મયા પ્રોક્તં શ્રુત્વા લોકહિતોત્સુકઃ
સર્વક્લેશાન્ વિનિર્જિત્ય સદ્ધર્માભિરતો ભવ ॥

ઇતિ પિતુર્ વચઃ શ્રુત્વા સુભૂતિઃ સો ઽનુમોદિતઃ
કૃતાઞ્જલિસ્ તથા નત્વા પિતરમ્ ઇત્ય્ અભાષત ॥

તથા સત્યં મનસ્ તાત રોચતે તપસે મમ
તદ્ આજ્ઞાં દેહિ મે તાત ચરિષ્યે બ્રહ્મસદ્વ્રતમ્* ॥

તેનૈવં પ્રાર્થ્યમાનો ઽસૌ સુભૂતિના પિતા તતઃ
પરિષ્વજ્યાત્મજં પુત્રં પુનર્ અપ્ય્ અબ્રવીન્ મુદા ॥

એવં ચેત્ તવ વાઞ્છાસ્તિ પુત્ર બ્રહ્મસુસાધનૈઃ
ચર બ્રહ્મવ્રતં સમ્યગ્ ધીરચિત્તસમાહિતઃ ॥

આદૌ ક્રોધરિપું જિત્વા દુષ્ટભારાન્ વિનિર્જય
યાવત્ ક્રોધમ્ અનિર્જિત્ય દુષ્ટાઞ્જેતું ન શક્નુયાઃ ॥

યાવદ્ દુષ્ટાન્ અનિર્જિત્ય ધર્મે સ્થાતું ન શક્નુયાઃ
અસુસંસ્થિતધર્માણં હન્યુર્ મારા હિ સર્વથા ॥

તસ્માદ્ વાઞ્છતિ યો બ્રહ્મ તેનાદૌ ચિત્તકોટરાત્*
વિનિઃકૃષ્ય પ્રયત્નેન હન્તવ્યઃ ક્રોધપન્નગઃ ॥

ક્રોધો હિ વસતે યસ્ય ચિત્તે માનમદાકુલે
તાવત્ સદ્ગુણયુક્તો ઽપિ સેવ્યતે નૈવ સજ્જનૈઃ ॥

તસ્માત્ સર્વપ્રયત્નેન ક્રોધજિષ્ણુઃ સમાહિતઃ
પ્રવ્રજ્યાં સમુપાસિશ્રિત્ય ચર બ્રાહ્મણ્યમ્ આદરાત્* ॥

તથેત્ય્ અસૌ પ્રતિશ્રુત્ય સુભૂતિઃ સંપ્રમોદિતઃ
સહસા પિતરૌ નત્વા મુનીનામ્ આશ્રમં યયૌ ॥

તત્ર પ્રાપ્તો મુનીન્ નત્વા કૃતાઞ્જલિપુટો મુદા
બ્રાહ્મણ્યસંવરં પ્રાપ્તું પ્રવ્રજ્યાં સમયાચત ॥

ગુરો બ્રહ્મવિદાં શ્રેષ્ઠ કલ્યાણવર્ત્મદેશક
પ્રવ્રજ્યાં દેહિ મે સત્યં ચરેયં ભવમુક્તયે ॥

ઇતિ તસ્ય વચઃ શ્રુત્વા ગુરુર્ બ્રહ્મવિદાં વરઃ
એહિ વત્સ ચર બ્રહ્મ ચર્યં જિત્વા ષડ્ ઇન્દ્રિયમ્* ॥

ઇત્ય્ ઉક્તો ગુરુણા સો ઽભૂત્ સુભૂતિર્ મુનિવેષભૃત્*
બ્રહ્મવિહારસંપન્નો વિનીતઃ શ્રદ્ધયાન્વિતઃ ॥

તથાપિ દૈવસામર્થ્યાત્ ક્રોધસંરક્તમાનસઃ
કિંચિન્ નિમિત્તમાત્રે ઽપિ વિગ્રહવાન્ અસંયતઃ ॥

વેદસિદ્ધાન્તશાસ્ત્રેષુ વિવાદી ક્રોધબાહુલઃ
અતીવ રોષસંક્રુષ્ટો વિચિક્ષેપ યતીન્ અપિ ॥

ધર્માર્થકામમોક્ષેષુ નિરપેક્ષઃ સુતીક્ષ્ણવાક્*
સર્વત્ર મુનિભિશ્ ચાપિ વિજગ્રાહાસમાહિતઃ ॥