કલ્પદ્રુમાવદાનમાલા · શ્લોક 361-380

તેનૈવાભિદ્રુતાઃ સર્વે ગરુડાસ્ ત્રાસમ્ આગતાઃ
ઇતસ્ તતઃ સમુદ્ભ્રાન્તાઃ સુભૂતેઃ શરણં યયુઃ ॥

સુભૂતિના તથા ચૈવં સર્વે તે ગરુડા અપિ
સ્વર્દ્ધિબલપ્રભાવેણ સમાશ્વાસ્ય સુરક્ષિતાઃ ॥

એવમ્ ઋદ્ધિપ્રભાવાણિ સુભૂતેસ્ તસ્ય સદ્યતેઃ
દૃષ્ટ્વા સર્વે જનૌઘાસ્ તે સહર્ષાદ્ભુતમ્ આયયુઃ ॥

ધન્યો ઽયમ્ ઋદ્ધિમાન્ ભિક્ષુર્ અર્હન્ સંબુદ્ધસેવકઃ
યેનૈતે રક્ષિતાઃ સર્વે નાગાશ્ ચ ગરુડા અપિ ॥

ઇતિ સો ઽર્હન્ સુભૂતિસ્ તાન્ સર્વાન્ દૃષ્ટ્વા પ્રસન્નિતાન્*
સદ્ધર્મે વિનયાર્થેન મૈત્રીધર્મમ્ ઉપાદિશત્* ॥

શૃણુધ્વં મદ્વચઃ સર્વે નાગાશ્ ચ ગરુડાસ્ તથા
યદિ મે શરણં યાથ રમધ્વં મૈત્રમાનસાઃ ॥

યે એતે સુખિનો લોકે સર્વે તે મૈત્રચારિણઃ
યે એતે દુઃખિનો લોકે સર્વે તે ક્રોધિનો નરાઃ ॥

તસ્માત્ ક્રોધપ્રહાણાય ક્રિયતાં યત્નમ્ આદરાત્*
યાવચ્ ચિત્તે સ્થિતં ક્રોધં તાવન્ મૈત્રી ન ભાવ્યતે ॥

ન ચ દ્વેષસમં પાપં ન ચ મૈત્રીસમં તપઃ
તસ્માન્ મૈત્રી પ્રયત્નેન ભાવનીયા સદાદરાત્* ॥

મનઃ શમં ન ગૃહ્ણાતિ ન પ્રીતિસુખમ્ અશ્નુતે
ન નિદ્રાં ન ધૃતિં યાતિ દ્વેષશલ્યે હૃદિ સ્થિતે ॥

ન દ્વિષન્તઃ ક્ષયં યાન્તિ યાવજ્જીવમ્ અપિ ઘ્નતઃ
ક્રોધમ્ એકં તુ યો હન્યાત્ તેન સર્વે દ્વિષો હતાઃ ॥

વિકલ્પેન્ ધનદીપ્તેન જન્તુઃ ક્રોધહવિર્ ભુજા
દહત્ય્ આત્માનમ્ એવાદૌ પરાન્ ધક્ષ્યતિ વા ન વા ॥

જરા રૂપવતાં ક્રોધસ્ તમશ્ ચક્ષુષ્મતામ્ અપિ
બન્ધો ધર્માર્થકામાનાં તસ્માત્ ક્રોધો નિવાર્યતામ્* ॥

દિવ્યભોગાનુભોક્તા ચ પ્રાસાદે મણિમણ્ડિતે
સુપ્તો ઽપિ ન લભેન્ નિદ્રાં ક્રોધપર્યાકુલો નરઃ ॥

ઋષિભિર્ યોગિભિશ્ ચામ્બુ ફલમૂલાદિતોષિતૈઃ
દગ્ધા જનપદાશ્ ચાપિ ક્રોધાચ્ છાપહુતાશનૈઃ ॥

યચ્ છાંકરો મહારૌદ્રો નિર્ઘૃણો દૃક્પ્રભાનલૈઃ
દદાહ બ્રહ્મજં કામં તચ્ ચ ક્રોધપ્રભાવતઃ ॥

યદ્ રાજાનો વિરુદ્ધાશ્ ચ યુદ્ધં કૃત્વા પરસ્પરમ્*
મૃત્યું યાન્તિ જનૈઃ સાર્ધં તચ્ ચાપિ ક્રોધભાવતઃ ॥

સુહૃદો યત્ સહાયાંશ્ ચ સ્નેહવિશ્રમ્ભચારિણઃ
સત્યધર્માવ્ અનાદૃત્ય ઘ્નન્તિ ક્રોધાદ્ અનાર્યકાઃ ॥

સાધવો યે મહાત્માનઃ સંવૃત્તિધર્મચારિણઃ
તાન્ અપિ સંમુખં ઘ્નન્તિ દુર્વાગ્બાણૈ રુષા ખલાઃ ॥

માતરં જન્મદાત્રીં ચ ધાત્રીર્ વા સ્નેહપાલિનીઃ
સ્વાત્મજાન્ નિર્દયા ઘ્નન્તિ તચ્ ચ ક્રોધપ્રભાવતઃ ॥