કાલિકાપુરાણમ્ · અધ્યાય 61

॥ઔર્વ્વ ઉવાચ॥
યથાહ ભગવાન્ દેવો ભૈરવાય મહાત્મને।
વેતાલાય નૃપશ્રેષ્ઠ તથા ત્વં પ્રસ્તુતં શૃણુ

॥શ્રીભગવાનુવાચ॥
ઉગ્રચણ્ડા ચ યા મૂર્તિરષ્ટાદશભુજાઽભવત્।
સા નવમ્યાં પુરા કૃષ્ણપક્ષે કન્યાં ગતે રવૌ

પ્રાદુર્ભૂતા મહામાયા યોગિનીકોટિભિઃ સહ।
આષાઢસ્ય તુ પૂર્ણાયાં સત્રં દ્વાદશવાર્ષિકમ્

દક્ષઃ કર્તું સમારેભે વૃતાઃ સર્વે દિવૌકસઃ।
તતોઽહં ન વૃતસ્તેન દક્ષેણ સુમહાત્મના

કપાલીતિ સતી ચાપિ તજ્જાયેતિ ચ નો વૃતા।
તતો રોષસમાયુક્તા પ્રાણાસ્તત્યાજ સા સતી

ત્યક્તદેહા સતી ચાપિ ચણ્ડમૂર્તિસ્તદાઽભવત્।
તતઃ પ્રવૃત્તે યજ્ઞેઽપિ તસ્મિન્ દ્વાદસવાર્ષિકે

નવમ્યાં કૃષ્ણપક્ષે તુ કન્યાયાં ચણ્ડમૂર્તિધૃક્।
યોગનિદ્રા મહામાયા યોગિનીકોટિભિઃ સહ

સતીરૂપં પરિત્યજ્ય યજ્ઞભઙ્ગમથાકરોત્।
શઙ્કરસ્ય ગણૈઃ સર્વૈઃ સહિતા શઙ્કરેણ ચ

સ્વયં બભભ઼ઞ્જ સા દેવી મહાસત્રં મહાત્મનઃ।
તતો દેવ્યા મહાક્રોધે વ્યતીતે ત્રિદિવૌકસઃ

પૂજયાઞ્ચક્રુરતુલાં દેવીં પૂર્વોદિતેન વૈ।
પૂર્વોદિતવિધાનેન પૂજામસ્યા દિવૌકસઃ

કૃત્વૈવ પરમામાપુર્નિવૃતિં દુઃખહાનયે।
એવમન્યૈરપિ સદા કાર્યં દેવ્યાઃ પ્રપૂજનમ્

વિભૂતિમતુલાં પ્રાપ્તં ચતુર્વર્ગપ્રદાયિકામ્।
યો મોહાદથવાઽઽલસ્યાદ્ દેવીં દુર્ગાં મહોત્સવે

ન પૂજયતિ દમ્ભાદ્ વા દ્વેષાદ્વાઽપ્યથ ભૈરવ।
ક્રુદ્ધા ભગવતી તસ્ય કામાનિષ્ટાન્નિહન્તિ વૈ

પરત્ર ચ મહામાયા-બલિર્ભૂત્વા પ્રજાયતે ।
અષ્ટમ્યાં રુધિરૈશ્ચૈવ મહામાંસૈઃ સુગન્ધિભિઃ

પૂજયેદ્‌બહુજાતીયૈર્બલિભિર્ભોજનૈઃ શિવામ્।
સિન્દૂરૈઃ પટ્‌ટવાસોભિર્નાનાવિધવિલેપનૈઃ

પુષ્પૈરનેકજાતીયૈઃ ફલૈર્બહુવિધૈરપિ।
ઉપવાસં મહાષ્ટમ્યાં પુત્રવાન્ ન સમાચરેત્

યથા તથૈવ પૂતાત્મા વ્રતી દેવીં પ્રપૂજયેત્।
પૂજયિત્વા મહાષ્ટમ્યાં નવમ્યાં બલિભિસ્તથા

વિસર્જયેદ્ દશમ્યાં તુ શ્રવણે સાવરોત્સવૈઃ।
અન્ત્યપાદો દિવાભાગે શ્રવણસ્ય યદા ભવેત્

તદા સમ્પ્રેષણં દેવ્યા દશમ્યાં કારયેદ્ બુધઃ।
સુવાસિની કુમારીભિર્વેશ્યાભિર્નર્તકૈસ્તથા

સઙ્ખતૂર્યનિનાદૈશ્ચ મૃદઙ્ગૈઃ પટહૈસ્તથા।
ધ્વજૈર્વસ્ત્રૈર્બહુવિધાર્લાજપુષ્પપ્રકીર્ણકૈઃ

ધૂલિકર્દમવિક્ષેપૈઃ ક્રીડાકૌતુકમઙ્ગલૈઃ।
ભગલિઙ્ગાભિધાનૈશ્ચ ભગલિઙ્ગપ્રગીતકૈઃ

ભગલિઙ્ગાદિશબ્દૈશ્ચ ક્રડયેયુરલં જનાઃ।
પરૈર્નાક્ષિપ્યતે યસ્તુ યઃ પરાન્નક્ષિપેદ્ યદિ

ક્રુદ્ધા ભગવતી તસ્ય શાપં દદ્યાત્ સુદારુણમ્।
આદિપાદો નિશાભાગે શ્રવણસ્ય યદા ભવેત્

તદા દેવ્યાઃ સમુત્થાનં નવમ્યાં ન પુનર્દિવા।
અન્ત્યપાદો નિશાભાગે શ્રવણસ્ય યદા ભવેત્

તદા દેવ્યાઃ સમુત્થાનં નવમ્યાં દિનભાગતઃ।
વિસર્જનમનેનૈવ મન્ત્રેણ વત્સ ભૈરવ

કર્તવ્યમમ્ભસિ સ્થાપ્ય વિસૃજ્ય ચ વિભૂતયે।
ઉત્તિષ્ઠ દેવિ ચણ્ડેશે સુભાં પૂજાં પ્રગૃહ્ય ચ

કુરુષ્વ મમ કલ્યાણમષ્ટભિઃ શક્તિભિઃ સહ।
ગચ્છ ગચ્છ પરં સ્થાનં સ્વસ્થાનં દેવિ ચણ્ડિકે

યત્ પૂજતિં મયા દેવિ પરિપૂર્ણં તદસ્તુ મે।
વ્રજ ત્વં સ્રોતસિ જલે તિષ્ઠ ગેહે ચ ભૂતયે

નિમજ્જામ્ભસિ સન્ત્યજ્ય પત્રિકાવજિતે જલે।
પુત્રાયુર્ધનવૃદ્ધ્યર્થં સ્થાપિતાસિ જલે મયા

ઇત્યનેન તુ મન્ત્રેણ દેવીં સંસ્થાપયેજ્જલે।
સર્વલોક-હિતાર્થાય સર્વલોકવિભૂતયે

દુર્ગા-તન્ત્રેણ મન્ત્રેણ પૂજિતવ્યે ઉભે અપિ।
ભદ્રકાલીમુગ્રચણ્ડાં મહામાયાં મહોત્સવે

નેત્રબીજં તુ સર્વાસાં પૂજને પરિકીર્તિતમ્।
યોગિનીનાં તુ સર્વાસાં મૂલમૂર્તેસ્તથૈવ ચ

મન્ત્રં તથોગ્રચણ્ડાયાઃ પૃથક્ ત્વં શૃણુ ભૈરવ।
આદ્યદ્વયં નેત્રબીજં મન્ત્રસ્યોપાન્તમન્તરે

વહ્નિનાઽન્તઃસ્વરેણેન્દુબિન્દુભ્યાં તન્ત્રમૌગ્રકમ્।
નેત્રબીજં દ્વિતીયં ત દ્વિધાવર્તિતમુચ્યતે

ભદ્રકાલ્યાસ્તુ મન્ત્રોઽયં ધર્મકામાર્થસિદ્ધયે।
યદા તુ વૈષ્ણવી દેવી મહામાયા જગન્મયી

પૂજ્યતે વૈષ્ણવી દેવી તન્ત્રોક્તા અષ્ટયોગિનીઃ।
તાઃ પ્રોક્તાઃ શૈલપુત્ર્યાશ્ચ પૂર્વકલ્પે ચ ભૈરવ

ઉગ્રચણ્ડાદયશ્ચાષ્ટૌ દુર્ગાતન્ત્રસ્ય કીર્તિતાઃ।
ભદ્રકાલ્યાસ્તુ મન્ત્રેણ ભદ્રકાલીં પ્રપૂજયેત્

પૂજયેદ્ ભૂતિવૃદ્ધ્યર્થમેતા એવાષ્ટયોગિનીઃ।
જયન્તીં મઙ્ગલાં કાલીં ભદ્રકાલીં કપાલિનીમ્

દુર્ગાં શિવાં ક્ષમાં દાત્રીં દલેષ્વષ્ટસુ પૂજયેત્।
યદોગ્રચણ્ડાતન્ત્રેણ સા દેવી તત્ર પૂજ્યતે

યોગિન્યસ્તત્ર પૂજ્યાઃ સ્યુરષ્ટાવન્યાશ્ચ ભૈરવ।
કૌશિકી શિવદૂતી ચ ઉમા હૈમવતીશ્વરી

શાકમ્ભરી ચ દુર્ગા ચ સપ્તમી ચ મહોદરી।
ઉમાયાઃ સૌમ્યમૂર્તેસ્તુ તન્ત્રં ત્વં શૃણુ ભૈરવ

પાદિઃ સમાપ્તિસહિતઃ ફડન્તો નાન્ત એવ ચ।
એકાક્ષરસ્ત્ર્યક્ષરશ્ય ઉમામન્ત્ર ઇતિ સ્મૃતઃ

સુવર્ણસદૃશીં ગૌરીં ભુજદ્વયસમન્વિતામ્।
નીલારવિન્દં વામેન પાણિના બિભ્રતીં સદા

શુક્લં તુ ચામરં ધૃત્વા ભર્ગસ્યાઙ્ગેઽથ દક્ષિણે।
વિન્યસ્ય દક્ષિણં હસ્તં તિષ્ઠન્તીં પરિચિન્તયેત્

વિનાપિ શમ્ભૂં રુદ્રાણીં ભક્તસ્તુ પરિચિન્તયેત્।
દ્વિભુજાં સ્વર્ણગૌરાઙ્ગીં પદ્મચામરધારિણીમ્

વ્યાઘ્રચર્મસ્થિતે પદ્મે પદ્માસનગતા સદા।
એતસ્યાઃ પૂજને પ્રોક્તા અષ્ટૌ વેતાલભૈરવ

યોગિન્યો નાયિકાશ્ચાપિ પૃથક્ત્વેન વ્યવસ્થિતાઃ।
જયા ચ વિજયા ચૈવ માતઙ્ગી લલિતા તથા

નારાયણ્યથ સાવિત્રી સ્વધા સ્વાહા તથાઽષ્ટમી।
પૂર્વં શુમ્ભો નિશુમ્ભશ્ચ દાનવૌ ભ્રાતરાવુભૌ

બભૂવતુર્મહાસત્ત્વૌ મહાકાયૌ મહાબલૌ।
અન્ધકસ્ય સુતૌ દ્વૌ તૌ દન્તિનાવિવ દુર્મદૌ

મયા વિનહતે તસ્મિન્નન્ધકાખ્યે મહાબલે।
સસૈન્યવાહનૌ તૌ તુ પાતાલતલમાશ્રિતૌ

તતસ્તપ્ત્વા તપસ્તોવ્રં બ્રહ્માણન્તૌ મહાસુરૌ।
સમ્યક્ તદાઽતોષયાતાં સ સુપ્રીતો વરં દદૌ

તૌ બ્રહ્મવરદૃપ્તૌ તુ સમાસાદ્ય જગત્ત્રયમ્।
ઇન્દ્રત્વમકરોચ્છુમ્ભશ્ચન્દ્રત્વં ચ નિશુમ્ભકઃ

સર્વેષામેવ દેવાનાં યજ્ઞભાગાનુપાહરત્।
સ્વયં શુમ્ભો નિશુમ્ભશ્ચ દિક્પાલત્વં ચ તૌ ગતૌ

સર્વે સુરગણાઃ સેન્દ્રાસ્તતો ગત્વા હિમાચલમ્।
ગઙ્ગાવતારનિકટે મહામાયાં પ્રતુષ્ટુવુઃ

અનકેશઃ સ્તુતા દેવી તદા સર્વામરોત્કરૈઃ।
માતઙ્ગવનિતામૂર્તિર્ભૂત્વા દેવાનપૃચ્છત

યુષ્માભિરમરૈરત્ર સ્તૂયતે કા ચ ભામિની।
કિમર્થમાગતા યૂયં માતઙ્ગસ્યાશ્રમં પ્રતિ

એવં બ્રુવન્ત્યા માતઙ્ગ્યાસ્તસ્યાસ્તુ કાયકોષતઃ।
સમુદ્‌ભૂતાઽબ્રવોદ્ દેવી માં સ્તુવન્તિ સુરા ઇતિ

શુમ્ભો નિશુમ્ભો હ્યસુરૌ બાધૈતે સકલાન્ સુરાન્।
તસ્માત્ તયોર્વધાયાહં સ્તૂયે તૈઃ સકલૈઃ સુરૈઃ

વિનિઃસૃતાયાં દેવ્યાં તુ માતઙ્ગ્યાઃ કાયકોષતઃ।
ભિન્નાઞ્જનનિભા કૃષ્ણા સાઽભૂદ્ ગૌરી ક્ષણાદપિ

કાલિકાખ્યાઽભવત્ સાપિ હિમાચલકૃતાશ્રયા।
તામુગ્રતારામૃષયો વદન્તીહ મનીષિણઃ

ઉગ્રાદપિ ભયાત્ત્રાતિ યસ્માદ્ ભક્તાન્ સદામ્બિકા।
એતસ્યાઃ પ્રથમં બીજં કથિતં ત્રયમેવ ચ

એષૈવૈકજટાખ્યા તુ યસ્માત્તસ્માજ્જટૈકિકા ।
શૃણુતં ચિન્તં ચાસ્યાઃ સમ્યગ્વેતાલભૈરવૌ

યથા ધ્યાત્વા મહાદેવીં ભક્તઃ પ્રાપ્નોત્યભીપ્સિતમ્।
ચતુર્ભુજાં કૃષ્ણવર્ણાં મુણ્ડમાલાવિભૂષિતામ્

ખડ્ગં દક્ષિણપાણિભ્યાં બિભ્રતીં ચામરં ત્વધઃ।
કર્ત્રીં ચ ખર્પરં ચૈવ ક્રમાદ્વામેન બિભ્રતીમ્

લિખન્તીં જટામેકાં બિભ્રતીં શિરસા સ્વયમ્।
મુણ્ડમાલાધરાં શીર્ષે ગ્રીવાયામપિ સર્વદા

વક્ષસા નાગહારં તુ બિભ્રતીં સક્તલોચનામ્।
કૃષ્ણવસ્ત્રધરાં કટ્યાં વ્યાઘ્રજિનસમન્વિતામ્

વામપાદં શવહૃદિ સંસ્થાપ્ય દક્ષિણં પદમ્।
વિન્યસ્ય સિંહપૃષ્ઠે તુ લેલિહાનાં શવં સ્વયમ્

સાટ્ટહાસાં મહાઘોરાં રાવયુક્તાતિભીષણામ્।
ચિન્ત્યાગ્રે તારા સતતં ભક્તિમદ્‌ભિઃ સુખેપ્સુભિઃ

એતસ્યાઃ સમ્પ્રવક્ષ્યામિ યા અષ્ટૌ યોગિનીઃ સ્મૃતાઃ।
મહાકાલ્યથ રુદ્રાણી ઉગ્રા ભીમા તથૈવ ચ

ઘોરા ચ ભ્રામરી ચૈવ મહારાત્રિશ્ચ સપ્તમી।
ભૈરવી ચાષ્ટમી પ્રોક્તા યોગિનીસ્તાઃ પ્રપૂજયેત્

યા કાયકોષાન્નિઃ સૃતા કાલિકાયાસ્તુ ભૈરવ।
સા કૌશિકીતિ વિખ્યાતા ચારુરૂપા મનોહરા

નિઃસૃતા હૃદયાદ્ દેવ્યા રસનાગ્રેણ ચણ્ડિકા।
નૈતસ્યાઃ સદૃશી મૂર્ત્યા ચારુરૂપેણ વિદ્યતે

ત્રિષુ લોકેષુ કાન્ત્યા વા નાસ્યાસ્તુલ્યા ભવિષ્યતિ।
યોગનિદ્રા મહામાયા યા મૂલપ્રકૃતિર્મતા

તસ્યાઃ પ્રાણસ્વરૂપેયં દેવી યા કૌશિકી સ્મૃતા।
નેત્રબીજં તથૈતસ્યા બીજં તુ પરિકીર્તિતમ્

મન્ત્રમસ્યાઃ પ્રવક્ષ્યામિ મૂર્તિરૂપં ચ ભૈરવ।
સમાપ્તિનાન્ત્યદન્ત્યસ્તુ ષડ્વર્ગાદિસબિન્દુભિઃ

ષષ્ઠસ્વરેણ સંસ્પૃષ્ઠો બિન્દુના સમલઙ્કૃતઃ।
કૌશિકીમન્ત્રતન્ત્રોઽયં સર્વકામાર્થદાયકઃ

તસ્યાસ્તુ સમ્પ્રવક્ષ્યામિ યા મૂર્તિરિહ ભૈરવ।
શૃણુષ્વૈકમના ભૂત્વા જગદાહ્લાદકારકમ્

ધમ્મિલ્લસંયતકચાં વિધોશ્ચાધોમુખીં કલામ્।
કેશાન્તે તિલકસ્યોર્ધ્વે દધતી સુમનોહરા

મણિકુણ્ડલસંઘૃષ્ટગણ્ડા મુકુટમણ્ડિતા।
સજ્જયોતિઃ કર્ણપૂરાભ્યાં કર્ણમાપૂર્ય સઙ્ગતા

સુવર્ણમણિમાણિક્યનાગહારવિરાજિતા।
સદા સુગન્ધિભિઃ પદ્‌મૈરમ્લાનૈરતિસુન્દરી

માલાં બિભર્તિ ગ્રીવાયાં રત્નકેયૂરધારિણી।
મૃણાલાયતવૃત્તૈસ્તુ બાહુભિઃ કોમલૈઃ શુભૈઃ

રાજન્તી કઞ્ચુકોપેત-પીનોન્નતપયોધરા।
ક્ષીણમધ્યા પીતવસ્ત્રા ત્રિવલીપ્રખ્યભૂષિતા

શૂલં વજ્રં ચ બાણં ચ ખડ્ગં શક્તિં તથૈવ ચ।
દક્ષિણૈઃ પાણિભિર્દેવી ગૃહીત્વા તુ વિરાજિતા

ગદાં ઘણ્ટાં ચ ચાપં ચ ચર્મ શઙ્ખં તથૈવ ચ।
ઊર્ધ્વાદિક્રમતો દેવી દધતી વામપાણિભિઃ

સિંહસ્યોપરિ તિષ્ઠન્તી વ્યાઘ્રચર્માણિ કૌશિકી।
બિભ્રતી રૂપમતુલં સસુરાસુરમોહનમ્

એતસ્યાઃ શૃણુ વત્સ ત્વં યાઃ પૂજ્યા અષ્ટયોગિનીઃ।
તાઃ પૂજિતાશ્ચ કુર્વન્તિ ચતુર્વર્ગં નૃણાં સદા

બ્રહ્માણી પ્રથમા પ્રોક્તા તતો માહેશ્વરી મતા।
કૌમારી ચૈવ વારાહી વૈષ્ણવી પઞ્ચમી તથા

નારસિંહો તથૈવૈન્દ્રી શિવદૂતી તથાઽષ્ટમી।
એતાઃ પૂજ્યા મહાભાગા યોગિન્યઃ કામદાયિકાઃ

દેવ્યા લલાટનિષ્ક્રાન્તા યા કાલીતિ ચ વિશ્રુતા।
તસ્યા મન્ત્રં પ્રવક્ષ્યામિ કામદ શૃણુ ભૈરવ

સમાપ્તિસહિતો દન્ત્યઃ પ્રાન્તસ્તસ્માત્ પુરઃ સરઃ।
ષષ્ઠસ્વરાગ્નિબિન્દ્વિન્દુસહિતઃ સાદિરેવ ચ

કાલીમન્ત્રમિતિ પ્રોક્તં ધર્મકામાર્થદાયકમ્।
એતન્મૂર્તિ પ્રવક્ષ્યામિ વત્સૈકાગ્રમનાઃ શૃણુ

નીલોત્પલદલશ્યામા ચતુર્બાહુસમન્વિતા।
ખટ્વાઙ્ગં ચન્દ્રહાસં ચ બિભ્રતી દક્ષિણે કરે

વામે ચર્મ ચ પાશં ચ ઊર્ધ્વાધોભાગતઃ પુનઃ।
દધતી મુણ્ડમાલાં ચ વ્યાઘ્રચર્મધરા વરામ્

કૃશાઙ્ગી દીર્ઘદંષ્ટ્રા ચ અતિદીર્ઘાતિભીષણા।
લોલજિહ્વા નિમ્નરક્તનયના નાદભૈરવા

કબન્ધવાહનાસીના વિસ્તારશ્રવણાનના।
એષા તારાહ્વયા દેવી ચામુણ્ડેતિ ચ ગીયતે

એતસ્યા યોગિનીશ્ચાષ્ટૌ પૂજયેચ્ચિન્તયેદ્ યદિ।
ત્રિપુરા ભીષણા ચણ્ડી કર્ત્રી હર્ત્રી વિધાયિની

કરાલા શૂલિની ચેતિ અષ્ટૌ તાઃ પરિકીર્તિતાઃ।
એષાઽતિકામદા દેવી જાડ્યહાનિકરી સદા

એતસ્યાઃ સદૃશી કાચિત્ કામદા ન હિ વિદ્યતે।
કૌશિક્યા હૃદયાદ્ દેવી નિઃસૃતા ધ્યાયતો હરેઃ

શિવદૂતીતિ સા ખ્યાતા યા ચ દેવશતૈર્વૃતા।
મન્ત્રમસ્યાઃ પ્રવક્ષ્યામિ ધર્મકામાર્થદાયકમ્

યચ્છ્રુત્વા સાધકો યાતિ દુર્લભં સિવમન્દિરમ્।
યામારાધ્ય મહાદેવીં શિવદૂતીં શિવાત્મિકામ્

નચિરાલ્લભતે કામાન્ નરઃ સર્વજયી ભવેત્।
અન્તઃ સમાપ્તિસહિતો બિન્દ્વિન્દુભ્યાં દશાવરઃ

સ્વરેણોપાન્તદન્ત્યેન સંસ્પૃષ્ટોઽન્તેન પૂર્વશઃ।
સ એવ બિન્દુયુગલપૂર્વસ્થોપાન્તપાવકઃ

ષષ્ઠસ્વરકલાશૂન્યૈઃ સહિતઃ પ્રથમસ્થિતઃ।
મન્ત્રોઽયં શિવદૂત્યાસ્તુ શિવદૂતીજયપ્રદઃ

રૂપમસ્યાઃ પ્રવક્ષ્યામિ શૃણુ વત્સૈકસમ્મતઃ।
ચતુર્ભુજં મહાકાયં સિન્દૂરસદૃશદ્યુતિ

રક્તદન્તં મુણ્ડમાલાજટાજૂટાર્ધચન્દ્રધૃક્।
નાગકુણ્ડલહારાભ્યાં શોભિતં નખરોજ્જવલમ્

વ્યાઘ્રચર્મપરિધાનં દક્ષિણે સૂલખડ્ગધૃક્।
વામે પાશં તથા ચર્મ બિભ્રદૂર્ધ્વાપરક્રમાત્

સ્થૂલવક્ત્રં ચ પીનોષ્ઠં તુઙ્ગમૂર્તિ ભયઙ્કરમ્।
નિક્ષિપ્ય દક્ષિણં પાદં સન્તિષ્ઠત્ કુણપોપરિ

વામપાદં શૃગાલસ્ય પૃષ્ઠે ફેરુશતૈર્વૃતમ્।
ઈદૃશીં શિવદૂત્યાસ્તુ મૂર્તિં ધ્યાયેદ્ વિભૂતયે

ધ્યાનમાત્રાદથૈતસ્યા નરઃ કલ્યાણમાપ્નુયાત્।
પૂજનાદચિરાદ્ દેવી સર્વાન્ કામાન્ દદાતિ ચ

યઃ શિવાવિરુતં શ્રુત્વા વિશદૂતીં શુભપ્રદામ્।
પ્રણમેત્ સાધકો ભક્ત્યા તસ્ય કામાઃ કરે સ્થિતાઃ

યદા જઘાન જગતાં રક્તબીજં હિતાય વૈ।
મહાદેવી મહામાયા તદાસ્યાઃ કાયતઃ સૃતાઃ

દૂતં પ્રસ્થાપયામાસ શિવં શુમ્ભાય સામ્બિકા।
સા શિવદૂતીતિ દેવૈઃ સર્વૈઃ પ્રગીયતે

ક્ષેમકારી ચ શાન્તા ચ વેદમાતા મહોદરી।
કરાલા કામદા દેવી ભગાસ્યા ભગમાલિની

ભગોદરી ભગારોહા ભગજિહ્વા ભગા તથા।
એતા દ્વાદશ યોગિન્યઃ પૂજને પરિકીર્તિતાઃ

એતા દ્વાદશ યોગિન્યઃ શિવદૂત્યાઃ સદૈવ હિ।
વિચરન્તી સ્વયં દેવી યત્ર તત્રૈવ ગચ્ચતિ

યોગિન્યો હ્યથ સખ્યઃ સ્યુર્યથાન્યાસાં તથા પુનઃ।
ચણ્ડિકાયાસ્તુ યોગિન્યઃ સખ્યોઽત્ર ચ પ્રકીર્તિતાઃ

ઇતિ તે ત્વઙ્ગમન્ત્રાણિ કથિતાનિ સમાસતઃ।
કામાખ્યાયાશ્ચ મહાત્મ્યં કલ્પમાત્રં વદામિ વામ્

ઇતિ શ્રીકાલિકાપુરાણે કામાખ્યામાહાત્મ્યે એકષષ્ટિતમોઽધ્યાયઃ॥