કાલિકાપુરાણમ્ · અધ્યાય 43

કાલિકાપુરાણમ્ ત્રિચત્વારિંશોઽધ્યાયઃ પાર્વતીતપવર્ણનમ્
અથ શ્રીકાલિકા પુરાણ અધ્યાય ૪૩
॥ માર્કણ્ડેય ઉવાચ ॥
અથ દેવમુનિર્યા હિમવન્મન્દિરં તદા ।
નિયોજિતો બલભિદા નારદઃ કામગઃ પરમ્

સ ગતઃ પૂજિતસ્તેન ધરેશેન મહાત્મના ।
તં સમુત્સૃજ્ય રહસિ કાલીં તામાસસાદ હ

આસાદ્ય કાલીં સ મુનિઃ સમ્બોધ્ય જ્ઞાનશાલિનીમ્ ।
ઉવાચેદં વચસ્તથ્યં સર્વેષાં જગતાં હિતમ્

॥ નારદ ઉવાચ ॥
શૃણુ કાલિ વચો મહ્યં સત્યં તદવધારય ।
સેવિત: સ મહાદેવસ્ત્વયેહ તપસા વિના

અનુરક્તોઽપિ તેન ત્વાં મહાદેવો વિસૃષ્ટવાન્ ।
ત્વામૃતે શઙ્કરો નાન્યાં દ્વિતીયાં સંગ્રહીષ્યતિ

ત્વં ચાપિ નાન્યં દયિતં ગ્રહીષ્યસિ વિનેશ્વરમ્ ।
તસ્માત્ ત્વં તપસા યુક્તા ચિરમારાધયેશ્વરમ્

તપસા સંસ્કૃતાં ત્વાં તુ સ દ્વિતીયાં કરિષ્યતિ ।
મન્ત્રોઽયં તસ્ય સુભગે શૃણુ ત્વં યેન સોઽચિરાત્

આરાધિતસ્તે પ્રત્યક્ષો ભવિષ્યતિ મહેશ્વરઃ ।
ૐ નમઃ શિવાયેતિ ચ સર્વદા શઙ્કરપ્રિયઃ

ચિન્તયન્તી તુ તદ્રૂપં નિયમસ્થા ષડક્ષરમ્ ।
મન્ત્રં જપ ત્વં ગિરિજે તેન તુષ્ટો ભવેદ્ધરઃ

એવમુક્તા તદા કાલી નારદેન મહાત્મના ।
કર્તવ્યમનુમેને સા હિતં તથ્યઞ્ચ તદ્વચઃ

અનુમાન્ય તપસ્તપ્તું તદા કાલીઞ્ચ નારદઃ ।
સ્વર્ગં જગામ તસ્યાશ્ચ નિશ્ચિતાભૂન્મતિવ્રતે

અથ યાતે દેવમુનૌ કાલી સાસાદ્ય મેનકામ્ ।
તપઃ શ્રદ્ધાં સમાચખ્યે ચાત્મનો હરસઙ્ગમે

॥ કાલ્યુવાચ ॥
તપસ્તપ્તું ગમિષ્યામિ માતઃ પ્રાપ્તું મહેશ્વરમ્ ।
અનુજાનીહિ માં ગન્તું તપસેઽદ્ય તપોવનમ્

તપઃ કરણયત્નં મે પિતુરાવેદય દ્રુતમ્ ।
યાવન્ન દહ્યે જનનિ ભૂતેશવિરહાગ્નિના

ઇતિ તસ્યા વચઃ શ્રુત્વા મેનકા શોકકર્શિતા ।
આલિંગ્ય સ્વસુતામૂચે મા તપઃ કુરુ વલ્લભે

મૃદુદેહાસિ પુત્રિ ત્વં મા તપો યાહિ કર્કશમ્ ।
તપઃ સોઢું મુનેર્ગાત્રં શક્તં તે ન કલેવરમ્ ॥ ૧૬ ।
વનવાસશ્ચ તે પુત્રિ નેષ્ટઃ શત્રુગણૈરપિ ।
તસ્માત્ ત્વં સમ્પરિત્યજ્ય વનવાસોદ્ભવં તપઃ ।
આત્મનો હ્યનુરૂપેણ તપસ્તત્ કુરુ યદ્ધિતમ્

॥ માર્કણ્ડેય ઉવાચ ॥
માતુઃ સા વચનં શ્રુત્વા ગિરિજા દીનમાનસા ।
ઇત્યૂચે ચ તંદા વાક્યં તપોયત્નપરા પ્રસૂમ્

મા નિષેધય માં યાસ્યે તપસેઽદ્ય તપોવનમ્ ।
પ્રચ્છન્નમપિ યાસ્યામિ નાનુજ્ઞાતાપ્યહં ત્વયા

॥ મેનકોવાચ ॥
ગૃહેષુ દેવાઃ સતતં બ્રહ્મવિષ્ણુશિવાદયઃ ।
તસ્માદ્ ગૃહે પુત્રિ દેવાનર્ચય ત્વં યથેપ્સિતાન્

સ્ત્રીણાં તપોવનગતિર્ન શ્રુતા સ્વામિના વિના ।
તસ્માન્ન યુજ્યતે પુત્રિ તપોયાત્રા વનં પ્રતિ ॥ ૨૧ । ।
યતો નિરસ્તા તપસે વનં ગન્તું ચ મેનયા ।
ઉમેતિ તેન સોમેતિ નામ પ્રાપ તદા સતી

અવજ્ઞાય તદા માતુર્વચનં હિમવત્સુતા ।
સખીભ્યાં જ્ઞાપયામાસ પિતરં તપસોદ્યમમ્

સ તુ જ્ઞાત્વા ગિરિપતિસ્તપસે ચરિતોદ્યમમ્ ।
દુહિતુશ્ચાનુમેને ચ નાતિહૃષ્ટમના ઇવ

સાનુજ્ઞાપ્ય તદા તાતં યત્ર દગ્ધો મનોભવઃ ।
શમ્ભુના પ્રયયૌ તત્ર ગઙ્ગાવતરણં પ્રતિ

ગઙ્ગાવતરણં નામ પ્રસ્થો હિમવતઃ સ ચ ।
હરશૂન્યોઽથ દદૃશે કાલ્યા તચ્ચિન્તયા તદા

યત્ર સ્થિત્વા પુરા શમ્ભુર્ધ્યાનવાનભવદ્ ભૃશમ્ ।
તત્ર ક્ષણં તુ સા સ્થિત્વા બભૂવ વિરહાર્દિતા

હા હરેતિ ક્ષણં તત્ર રોદમાના ગિરેઃ સુતા ।
વિલલાપાતિદુઃખાર્તા ચિન્તાશોકસમન્વિતા

ક્ષણં વિલપ્ય સા કાલી સ્મૃત્વા પૂર્વોદ્ભવં તદા ।
હાર્દં હરસ્ય સા મોહમવાપ કમલેક્ષણા

તતશ્ચિરેણ સા મોહં ધૈર્યાત્ સંસ્તભ્ય ભામિની ।
નિયમાયાભવત્તત્ર દીક્ષિતા હિમવત્- સુતા

પ્રથમં નિયમસ્તસ્યા બભૂવ ફલભોજનમ્ ।
ચર્યા પઞ્ચાતપા ચિન્તા શામ્ભવી શામ્ભવો જપઃ

યજ્ઞિયૈર્દારુભિઃ શુષ્કૈશ્ચતુર્દિક્ષુ ચતુષ્કૃતમ્ ।
વહ્નિસંસ્થાપનં ગ્રીષ્મે તીવ્રાંશુસ્તત્ર પઞ્ચમઃ ॥૩૨।
હસ્તાન્તરે ચતુર્વહ્નીન્ કૃત્વા વૈશ્વાનરેષ્ટિના ।
તન્મધ્યસ્થા સૂર્યવિમ્બં વીક્ષન્તી વલ્કલાંશુકા ।
ગ્રીષ્મં નિન્યે વહ્નિમધ્યે શિશિરે તોયવાસિની

પ્રથમં ફલભોગેન દ્વિતીયં તોયભોજનમ્ ।
તૃતીયં તુ સ્વયમ્પાતિ- વૃક્ષપલ્લવ- ભોજનમ્

ક્રમેણ તુ તદા પર્ણં નિરસ્ય હિમવત્ સુતા ।
નિરાહારવ્રતા ભૂત્વા તપશ્ચરણખિન્નિકા

આહારે ત્યક્તપર્ણાભૂદ્યસ્માદ્ધિમવતઃ સુતા ।
તેન દેવૈરપર્ણેતિ કથિતા પૃથિવીતલે

પઞ્ચાતપવ્રતેનૈવ તોયાનાઞ્ચ પ્રવેશનૈઃ

એકપાદસ્થિતા સા તુ વસન્તે હિમવત્સુતા ।
ષડક્ષરં જપન્તી સા ચિરં તેપે તપો મહત્

ચીરવલ્કલસંવીતા જટાસઙ્ઘાતધારિણી ।
કૃશાઙ્ગી ચિન્તને શક્તા જિગાય તપસા મુનીન્

તાં તપશ્ચરણે શક્તાં રરક્ષ શઙ્કરઃ સ્વયમ્ ।
આપ્યાયતિ સ્મ સ તદા ભયાદ્રક્ષતિ હર્ષિતઃ

એવં તસ્યાસ્તપસ્યન્ત્યાશ્ચિન્તયન્ત્યા મહેશ્વરમ્ ।
ત્રીણિ વર્ષસહસ્રાણિ જગ્મુઃ કાલ્યાસ્તપોવને

ષટ્ત્રિવર્ષસહસ્રાણિ સંસ્કૃતા વીક્ષણાત્ સ્વયમ્ ।
દૈવેન વિધિના દેવી હરયોગ્યા તથાભવત્

ષટ્ત્રિવર્ષસહસ્રાન્તે યત્ર તેપે તપો હરઃ ।
તત્ર ક્ષણમથોષિત્વા ચિન્તયામાસ ભામિની

નિયમસ્થાં મહાદેવઃ કિં માં જાનાતિ નાધુના ।
યેનાહં સુચિરં તેન નાનુજ્ઞાતા તપોરતા

લોકે નાસ્ત્યત્ર ગિરિશઃ કિં તત્ર મુનિભિઃ સ્તુતઃ ।
સર્વજ્ઞઃ સર્વગો દેવો હરો દેવૈર્નિગદ્યતે

સ સર્વગસ્તુ સર્વજ્ઞઃ સર્વાત્મા સર્વહૃદ્ગતઃ ।
સર્વભૂતિપ્રદો દેવઃ સર્વ ભાવનભાવનઃ

સતી ચ મેનકા માતા યદિ ચાહં વૃષધ્વજે ।
સાનુરક્તા નચાન્યસ્મિન્ સ પ્રસીદતુ શઙ્કરઃ

યદિ નારદવક્ત્રોત્થો મન્ત્રોઽયં સ્યાત્ષડક્ષરઃ ।
યદિ ભક્ત્યા મયા જપ્તં હરસ્તેન પ્રસીદતુ

સત્યં યદિ તપસ્તપ્તં સત્યં ચારાધિતો હરઃ ।
સત્યં ભવેદ્ યદિ તપો હરસ્તેન પ્રસીદતુ

॥ માર્કણ્ડેય ઉવાચ ॥
એવં વિચિન્તયન્તી સા વદાતિષ્ઠદ્ધરાશ્રમે ।
અધોમુખી દીનવેશા જટાવલ્કલમણ્ડિતા

તદૈવ બ્રાહ્મણઃ કશ્ચિદ્ બ્રહ્માચારી ધૃતવ્રતઃ ।
કૃષ્ણાજિનોત્તરીયેણ ધૃતદણ્ડકમણ્ડલુઃ

બ્રાહ્મશ્રિયા દીપ્યમાનઃ સ્વર્ણ ગૌરઃ સુશોભનઃ ।
જટાભિઃ પરિવીતાભિરુદ્રિક્તસ્તનુદેહભૂત્ ।
ઉપસ્થિતસ્તદા કાલીં શમ્ભુર્બ્રાહ્મણરૂપધૃક્

આસાદ્ય પ્રથમં કાલીં સમાભાષ્ય તદા દ્વિજઃ ।
જ્ઞાતું પ્રત્યક્ષતો રાગં શ્રોતુમિચ્છંશ્ચ તદ્વચઃ

વાગ્મી વિચિત્રવાક્યેન પપ્રચ્છ ગિરિજાં તદા

॥ બ્રાહ્મણ ઉવાચ ॥
કાં ત્વં કસ્યાસિ કલ્યાણિ કિમર્થં વિજને વને ।
તપશ્ચરસિ દુર્ધર્ષં મુનિભિઃ પ્રયતાત્મભિઃ

ન બાલા ત્વં નાપિ વૃદ્ધા તરુણી ચાતિશોભના ।
કથં પતિં વિનાભીક્ષ્ણં તપશ્ચરસિ સામ્પ્રતમ્

કિંવા તપસ્વિની ભદ્રે કસ્યચિત્ સહચારિણી ।
તપસ્વિનઃ સ પુષ્પાદિ સમાહર્તું ગતોઽન્યતઃ

એતન્મમ સમાચક્ષ્વ યદિ ગુહ્યં ભવેન્ન તે ।
યદિ તે હૃદયે મન્યુઃ કચ્ચિદ્વસતિ સમ્પ્રતિ ।
તદાચક્ષ્વ સમર્થોઽસ્મિ તમહં ચાપિ વારિતુમ્

ઇત્યુક્તા તેન વિપ્રેણ ગિરિજાથ નિજાં સખીમ્ ।
તસ્યોત્તરપ્રદાનાય કટાક્ષેણ ન્યયોજયત્

સા સખી વિજયા તસ્યા વચનાદ્ બ્રાહ્મણં તદા ।
પ્રોવાચેદં યથાતથ્યં વીક્ષન્તી ગિરિજામુખમ્

॥ વિજયોવાચ ॥
એતસ્ય ગિરિરાજસ્ય તનયેયં દ્વિજોત્તમ ।
ખ્યાતા ચ પાર્વતીનામ્ના કાલીતિ ચ સુશોભના । । ૬૧ ॥
ઊચે યન્ન ચ કેનાપિ શઙ્કરં વૃષભધ્વજમ્ ।
વાઞ્છન્તી દયિતં તીવ્રં તપશ્ચરતિ વૈ પતિમ્

ષટ્ત્રિ વર્ષસહસ્રાણિ તપસ્તપતિ ભામિની ।
ન શઙ્કરો ગિરિસુતામદ્યાપ્યભ્યુપપદ્યતે

શઙ્કરો ગિરિશો દેવઃ સર્વગઃ પરમેશ્વરઃ ।
ઇતિ સ્મ ગદ્યતે દેવૈર્મુનિભિશ્ચ તપોધનૈઃ

કિમેનાં સ ન જાનાતિ કિં સાનૌ નાસ્તિ વા ગિરેઃ ।
ઇતિ ચિન્તાવિષણ્ણેયમદ્ય નો લભતે સુખમ્

અપ્રાર્થિતસ્ત્વમનયા દયસે યદિ વા સુખમ્ ।
તદૈનાં શઙ્કરેણાદ્ય ત્વં સઙ્ગમય સુવ્રત

॥ માર્કણ્ડેય ઉવાચ ॥
ઇતિ તસ્યા વચઃ શ્રુત્વા બ્રહ્મચારી તદા દ્વિજઃ ।
સ્મયમાન ઇદં વાક્યં હેલયોવાચ પાર્વતીમ્

॥ બ્રાહ્મણ ઉવાચ ॥
અમોઘદર્શનશ્ચાસ્મિ હરં ચાનયિતું ક્ષમઃ ।
કિન્ત્વેકં નિગદામ્યદ્ય નિશ્ચિતં મન્મતં શૃણુ

જાનામ્યહં મહાદેવં તં વદામિ શૃણુષ્વ મે ।
વૃષધ્વજો મહાદેવો ભૂતિલેપી જટાધરઃ

વ્યાઘ્રચર્માંશુકશ્ચૈકઃ સંવીતો ગજકૃત્તિના ।
કપાલધારી સર્પૌઘૈઃ સર્વગાત્રેષુ વેષ્ટિતઃ

વિષદગ્ધગલસ્ત્રયક્ષો વિરૂપાક્ષો વિભીષણઃ ।
અવ્યક્તજન્મા સતતં ગૃહભોગ્યવિવર્જિતઃ

જ્ઞાતિભિર્બાન્ધવૈર્હીનો ભક્ષ્યભોજ્યવિવર્જિતઃ ।
શ્મશાનવાસી સતતં તત્સઙ્ગપરિવર્જિતઃ

ગર્જદ્ભિર્વિકટૈસ્તીક્ષ્ણૈર્ભૂતોઘૈઃ પરિવારિતઃ ।
શૃઙ્ગારરસહીનશ્ચ ભાર્યાપુત્રવિવર્જિતઃ

કેન વા કારણેન ત્વં ભર્તારં તં સમીહસે ।
પૂર્વં શ્રુતં મયા ચૈવ તસ્યાપરમિદં કૃતમ્

શૃણુ તે નિગદામ્યદ્ય યદિ તે ગૃહ્ણ રોચતે ।
દક્ષસ્ય દુહિતા સાધ્વી સતી વૃષભવાહનમ્

વવ્રે પતિં પુરા દૈવાત્ સમ્ભોગપરિવર્જિતમ્ ।
કપાલિજાયેતિ સતી દક્ષેણ પરિવર્જિતા

યજ્ઞભાગપ્રદાનાય શમ્ભુશ્ચાપિ વિવર્જિતઃ ।
સાથ તેનાપમાનેન ભૃશં શોકાકુલા સતી ।
તત્યાજ સ્વાન્ પ્રિયાન્ પ્રાણાંસ્તયા ત્યક્તશ્ચ શઙ્કરઃ

ત્વં સ્ત્રીરત્નં તવ પિતા રાજા નિખિલભૂભૃતામ્ ।
તથાવિધં પતિં કસ્માદુગ્રેણ તપસેહસે

દેવેન્દ્રો વા ધનેશો વા પવનો વાપ્યપાંપતિઃ

અગ્નિર્વાઽન્યઃ સુરો વાપિ સ્વર્વૈદ્યાવશ્વિનાવપિ ।
વિદ્યાધરો વા ગન્ધર્વો નાગો વા માનુષોઽથવા

રૂપયૌવનસમ્પન્નઃ સમસ્તગુણસંયુતઃ ।
સ તે યોગ્યઃ પતિઃ શ્રીમાનુદારકુલસમ્ભવઃ

યેન ત્વં બહુરત્નૌઘ- પૂરિતેઽનર્ઘવિસ્તૃતે ।
માલ્યપ્રવરસંયુક્તે ધૂપચૂર્ણૈ: સુવાસિતે

મૃદ્વાસ્તરણસંયુક્તે વિસ્તૃતે સુમનોહરે ।
ચારુપ્રાસાદગર્ભસ્થે જામ્બૂનદવિચિત્રિતે ।
શય્યાતલે સમાસાદ્ય સ યોગ્યસ્તે ભવેત્ પતિઃ

એવં જ્ઞાત્વાઽદ્ય સુભગે યદિ વાઞ્છસિ શઙ્કરમ્ ।
કિં તે તપોભિઃ સુતરામહં તં યોજયે ત્વયા

॥ માર્કણ્ડેય ઉવાચ ॥
ઇતિ શ્રુત્વા તદા કાલી બ્રાહ્મણસ્યોત્તરં તદા ।
મિતં તથ્યં જગાદૈનં બ્રાહ્મણં કોપસંયુતા

॥ કાલ્યુવાચ ॥
ન જાનાસિ હરં દેવં ત્વં જાનામીતિ ભાષસે ।
બહિર્યદ્ દૃશ્યતે તત્તે કથિતં દ્વિજનન્દન

યસ્ય ભાવં ન જાનન્તિ સેન્દ્રા બ્રહ્માદયઃ સુરાઃ ।
તસ્ય ત્વં વિપ્રતનય શિશુર્જ્ઞાસ્યસિ કિં ભવમ્

યચ્છુતં ભવતા નીચવદનાદ્ ભાષિતં લઘુ ।
ઇતસ્તતસ્તુ શ્રુત્વૈવ ભાષસે ત્વં ન દૃષ્ટવાન્

તસ્માત્ ત્વત્તો વરં નાહં વાઞ્છયે નાપિ વા પતિમ્ ।
અન્યદ્ વદ ન ચ ત્વત્તો વાઞ્છયે હરસઙ્ગમમ્

ઇત્યુક્ત્વા ગિરિજા વિપ્રમવલોક્ય સખીમુખમ્ ।
ઇદમાહ તદા કાલી સંશયારૂઢચેતના

મહતા ચિન્તનેનેહ તપસારાધિતો હરઃ ।
તન્મમાગ્રે વિપ્રસુતો નિન્દિતું વાક્યમુક્તવાન્ ।
તદહં ચાપનેષ્યામિ સ્તુતિવાક્યેન સામ્પ્રતમ્

મહાત્મનાં ચ યો નિન્દાં શૃણોતિ કુરુતેઽથવા

તયોરાગઃ સમં પૂર્વં મયા તાતમુખાચ્છ્રુતમ્ ।
તસ્માત્તદપનેષ્યેઽહં તન્નિષેધય વિપ્રકમ્

ઇત્યુક્ત્વા સા સખીં કાલી શમ્ભુસઙ્ગતમાનસા ।
અઘંસંમાર્જનાયાશુ હરં સ્તોતુમુપાક્રમત્

॥ કાલ્યુવાચ ॥
નમઃ શિવાય શાન્તાય કારણત્રયહેતવે ।
નિવેદયામિ ચાત્માનં ત્વં ગતિઃ પરમેશ્વર

વિજ્ઞાનસૌભાગ્યસુહૃદ્ગતાય તે પ્રપઞ્ચહીનાય હિરણ્યબાહવે ।
નમોઽસ્તુ નારાયણપદ્મસમ્ભવ- પ્રધાનબીજાય જગદ્ધિતાય તે । । ૯૬ ॥
ઇતિ સ્તુવન્તીં પુનરેવ સ દ્વિજસ્તદા વચઃ કિઞ્ચિદુદીરિતું પુનઃ ।
સમીક્ષ્ય કાલીમકરોત્ સયત્નકં બુદ્ધ્વા સમાચષ્ટ સખીં ગિરે: સુતા

અયં દ્વિજ: કિઞ્ચન વક્તુમિચ્છત્યુગ્રં હરં ચાપિ ન સંવિદાનઃ ।
નિન્દન્નહિ પ્રાણહરીં હરસ્ય નિન્દામહં શ્રોતુમિહ ક્ષમામિ

યાવદ્ ભૂરિવચોઽસ્યાહં ન શૃણોમ્યધુના સખિ ।
ગચ્છામિ તાવદ્ દૂરાય સમુત્તિષ્ઠામિ મત્પ્રિયે

ઇત્યુક્ત્વા સા તયા સખ્યા સહિતા હિમવત્સુતા ।
પ્રતસ્થેઽથ સમુત્થાય તમુત્સૃજ્ય દ્વિજં હઠાત્

અથ શમ્ભુનિજં રૂપમાસ્થાય હિમવત્સુતામ્ ।
તં સમુત્સૃજ્ય ગચ્છન્તીં હરઃ સ્મેરમુખોઽન્વયાત્

અહં હરો મહાદેવો માં સંસ્તૌષિ ન ચાધુના ।
સમ્મુખીભવ હે કાલિ સમાશ્વાસય શાઙ્કરિ

ઇત્યુક્ત્વા સ મહાદેવો ગચ્છન્ત્યાઃ પુરતો ગતઃ ।
પ્રસાર્ય હસ્તૌ કાલ્યાસ્તુ ગતિં તસ્યા વિરોધયન્

સા વીક્ષ્ય શમ્ભુવદનં તત્ક્ષણાદભવદ્ધઠાત્ ।
અધોમુખી તડિદ્વાતચકિતેવ ગિરે: સુતા

મન્દાક્ષં પ્રીતિલજ્જાભિઃ સા જડેવ તદાભવત્ ।
વક્તું ચ નાશકત્ કિઞ્ચિદ્વિવક્ષુરપિ ભામિની । । ૧૦૫ ॥
મનોરથાનાં સિદ્ધ્યા તુ સુધાભિરિવ પૂરિતમ્ ।
શરીરમભવત્તસ્યા મુદા પૂર્ણં દ્વિજોત્તમાઃ

ષટ્ત્રિવર્ષસહસ્રૈસ્તુ તપઃ ક્લેશમવિન્દત ।
યત્તં ક્ષણાત્ સમુત્સૃજ્ય સમ્મોદમુદિતાભવત્

તાં ચ વીક્ષ્ય તથાભૂતાં પ્રણયાદ્ વૃષભધ્વજઃ ।
કામેન ભસ્મરૂપેણ ગાત્રસ્થેન ચ મોહિતઃ

અથ તાં વિરહોદ્રિક્તઃ સમેત્ય વૃષભધ્વજઃ ।
સમ્બોધયન્નિદં ચાટુવચનં પ્રોક્તવાન્ મુદા

॥ શિવ ઉવાચ ॥
ન તુ સુન્દરિ માં વક્તું કિઞ્ચનાપિ ત્વમીહસે ।
તપઃ ક્લેશં સ્મરન્તી કિં મહ્યં કુપ્યસિ સામ્પ્રતમ્

અહં ચ પરિતપ્યામિ ત્વામૃતે સુભગે મમ ।
સમયાદ્ યત્ સમારબ્ધં તપસ્તપ્તું ત્વયા સમમ્ ॥ ૧૧૧ । ।
સાનુરક્તોઽથ સંસ્કૃત્ય ભવિષ્યામિ ત્વયા પ્રિયે ।
અધુના સમતીતો મે યઃ કૃતઃ સમયો મયા

તપસે ભવતી ચાપિ તપસૈવ સુસંસ્કૃતા ।
સંચિન્તનેન જપ્યેન તીવ્રેણ તપસા તદા ।
મૂલ્યેન મહતા ક્રીતો દાસોઽહં માં નિયોજય

ત્વદંગાનાં સંસ્કરણે જટાનાં ચ પ્રસાધને ।
પ્રમુચ્ય વલ્કલ ગાત્રાચ્ચાર્વંશુકનિવેશને । । ૧૧૪ ॥
હારનૂપુરકેયૂરકાચ્યાદિપરિધાપને ।
દ્રુતં નિયોજય શુભે યદિ સ્નેહોઽસ્તિ માદૃશિ

નિર્દગ્ધો યોમયા કામો ભસ્મરૂપેણ મત્તનૌ ।
સ્થિતો માં પ્રતિકૃત્યેવ ત્વદ દગ્ધુમિચ્છતિ

તસ્માદુદ્ધર માં કામાદગ્નેરિવ મનોહરે ।
ત્વદઙ્ગામૃત દાનેન પ્રસીદ દયિતે મમ

॥ ઇતિ શ્રીકાલિકાપુરાણે પાર્વતીતપોવર્ણને ત્રિચત્વારિંશોઽધ્યાયઃ

કાલિકા પુરાણ હિન્દી અનુવાદ પઢને કે લિએ દેખેં-[હ્ત્ત્પ્સ્:॥પ્ત્વૈસ્હ્નવિ.બ્લોગ્સ્પોત્.ચોમ્।2023।08।કલિક-પુરન્-અધ્યય્-43.હ્ત્મ્લ્ દ્પ્ કર્મકન્દ્]