કાદમ્બરીકથાસાર · અધ્યાય 2

અથ સંધ્યાસમાધ્યન્તાઃ સમાપ્ય મુનયઃ ક્રિયાઃ ।
શુશ્રૂષવઃ સમાગમ્ય યથાસ્થાનમ્ ઉપાવિશન્ ॥

અહમ્ અપ્ય્ આત્મવૃત્તાન્તવિસ્તરશ્રવણોત્સુકઃ ।
સંહૃત્ય ચાપલં સર્વમ્ આસં સ્થિરમનાસ્ તદા ॥

અથ દુગ્ધાબ્ધિકલ્લોલધવલૈર્ અમૃતાઞ્ચિતૈઃ ।
સિઞ્ચન્ન્ ઇવ કરૈર્ ઇન્દુર્ ઉદગાદાશ્રમસ્થલીમ્ ॥

ભગવાનથ જાબાલિઃ સુખાસીનઃ સ્વવિષ્ટરે ।
વલ્કલાહિતપર્યઙ્કબન્ધો વક્તું પ્રચક્રમે ॥

સર્વે દત્તાવધાનાઃ સ્થ શૃણુતેમાં તપોધનાઃ ।
અમુષ્ય પૂર્વવૃત્તાન્તપ્રસ્તાવોપનતાં કથામ્ ॥

અસ્ત્ય્ અવન્તિષુ સંસારલક્ષ્મ્યાઃ પ્રસવભૂર્ ઇવ ।
નિધિર્ ઉજ્જયિની નામ નગરી ગુણસમ્પદામ્ ॥

લઙ્કાલકામરાવત્યો યેષાં વસતયઃ પ્રિયાઃ ।
તે ઽપિ યામ્ અભિપશ્યન્તઃ સુખં તાસુ ન શેરતે ॥

કિમ્ અન્યદ્ યત્ર કૈલાસનિવાસપ્રીતિમ્ ઉજ્ઝતા ।
મહાકાલાભિધાનેન રુદ્રેણ સ્વયમ્ આસ્યતે ॥

તસ્યાં ભરતમાન્ધાતૃભગીરથપૃથૂપમઃ ।
તારાપીડ ઇતિ શ્રીમાન્ બભૂવ પૃથિવીપતિઃ ॥

પરસ્પરવિરોધેન વિપ્રકીર્ણૈર્ ઇતસ્ તતઃ ।
વિસ્રબ્ધમ્ આસ્યતે યત્ર સમ્ભૂય સકલૈર્ ગુણૈઃ ॥

વિહસન્ બુદ્ધિવિભવૈર્ ભૃગૂદ્વહબૃહસ્પતી ।
અમાત્યઃ શુકનાસાખ્યો બ્રાહ્મણસ્ તસ્ય ચાભવત્ ॥

ત્રિવિક્રમપદાક્રમ્ય સ રાજા પૃથિવીમ્ ઇમામ્ ।
તસ્મિન્ મન્ત્રિણિ તદ્ભારં નિચિક્ષેપ ભરક્ષમે ॥

તથા ચ પાલયામાસ સ મન્ત્રી સકલાઃ પ્રજાઃ ।
યથા ત્રિવિધમ્ અપ્ય્ એતા ન દુઃખં કિઞ્ચિદ્ અસ્પૃશન્ ॥

યથા યથા ચ લોકો ઽસ્મિન્ પિતરીવાન્વરજ્યત ।
રાજા તથા તથાત્માનં કૃતકૃત્યમ્ અમન્યત ॥

અક્લેશમર્પિતં તેન સ્વભુજે જગદર્જનમ્ ।
સમ્ભોગવિઘ્નકારીતિ પાલનં મન્ત્રિસાત્કૃતમ્ ॥

કૃતકૃત્યતયા ચાસૌ કાર્યશેષમ્ અચિન્તયન્ ।
વિષયેષ્વાહિતપ્રીતિર્ આસાંચક્રે યથાસુખમ્ ॥

શોભા હિ કૃતકૃત્યસ્ય રાજ્ઞો ભોગવિભૂતયઃ ।
અસમાપ્તજિગીષસ્ય તા એવ તુ વિડમ્બનાઃ ॥

સ યુવા મધુરાકારસ્ તરુણીનયનોત્સવઃ ।
કલાસુ કુશલઃ કામી બુભુજે ભોગસમ્પદઃ ॥

ન તે ભોગા ન તાઃ ક્રીડા ન તા ગોષ્ઠ્યો ન તે રસાઃ ।
ન તે વિલાસા યેષ્વ્ અસ્ય પારગં નાભવન્ મનઃ ॥

સમગ્રસુખસમ્ભોગભૂમિજ્ઞો ઽપિ સ ભૂપતિઃ ।
સુખમ્ એકં તુ નાજ્ઞાસીદ્ અપત્યાલોકનોદ્ભવમ્ ॥

યથા યથાસ્ય કાલેન વ્યતીયાય નવં વયઃ ।
નિરપત્યતયા શોકો વર્ધતે સ્મ તથા તથા ॥

મુખ્યભૂતા ચ સર્વસ્મિન્ન્ અન્તઃપુરકદમ્બકે ।
રાજ્ઞી વિલાસવત્યાખ્યા તસ્ય પ્રાણસમાભવત્ ॥

સા રાજમહિષી ગૌરીમ્ અભ્યર્ચયિતુમ્ એકદા ।
દેવતાયતનં બાહ્યં યયૌ ભર્તુર્ અનુજ્ઞયા ॥

પુરાણે વાચ્યમાને ઽથ પ્રસઙ્ગપતિતાં શ્રુતિમ્ ।
અપુત્રસ્ય કુતો લોકા ઇતિ શુશ્રાવ તત્ર સા ॥

પ્રતપ્તલોહસૂચીવ સા શ્રુતિઃ શ્રવણાન્તરમ્ ।
વિવેશ દદતી તસ્યાઃ પરાં કામ્ અપિ વેદનામ્ ॥

તતઃ પ્રતિનિવૃત્તાથ પ્રવિશ્ય ભવનં નિજમ્ ।
વસ્ત્રાવૃતમુખી ભૂમાવુપવિશ્ય રુરોદ સા ॥

સખીભિઃ પ્રાર્થ્યમાનાપિ ન સ્વામ્ અભજત સ્થિતિમ્ ।
નોદસ્થાત્ કર્તુમ્ આહારં વિરરામ ન રોદનાત્ ॥

અથોપલભ્ય તત્પીડાવ્ આર્તાં પરિજનાન્ નૃપઃ ।
પ્રવિશ્યાન્તઃપુરં પ્રાહ સ્વૈરમ્ એનાં પ્રસાદયન્ ॥

પ્રિયે કિમ્ ઇદમ્ આરબ્ધં રુદ્યતે કિમ્ અકારણમ્ ।
ન ત્વયા મત્કૃતે મન્યુર્ અનુભૂતઃ કદાચન ॥

અન્યો ઽપિ મન્મુખપ્રેક્ષી મદધીનાત્મજીવિતઃ ।
કસ્ તવોત્પાદયેન્ મન્યું યસ્મૈ કુપ્યસિ સુન્દરિ ॥

ઇતિ પ્રસાદ્યમાના સા યદા નોવાચ કિઞ્ચન ।
તદા વિદિતવૃત્તાન્તસ્ તત્સખ્યા નૃપતિઃ કૃતઃ ॥

તેન વ્યતિકરેણાથ સો ઽપિ શોકપરાયણઃ ।
રુરોદ વક્ષસિ ન્યસ્તસબાષ્પદયિતામુખઃ ॥

ચિરં રુદિત્વા નિઃશબ્દં સ્વયમ્ ઉન્મૃજ્ય લોચને ।
જગાદ ગદ્ગદં રાજા મહિષીમ્ ઉપસાન્ત્વયન્ ॥

મમાપિ નન્વ્ ઇયં દેવિ ચિરાત્ પ્રભૃતિ દુઃસહા ।
દુનોતિ હૃદયં ચિન્તા નિષ્પ્રતીકારરોગવત્ ॥

વિફલં બત મે રાજ્યં વિફલા મમ સમ્પદઃ ।
વિફલા મમ સમ્ભોગા વિફલં મમ જીવિતમ્ ॥

કુતો ઽસ્માકમ્ અભવ્યાનામ્ ઇયત્યો ભાગ્યસમ્પદઃ ।
યદ્ દ્રક્ષ્યામસ્ તવોત્સઙ્ગં બાલકાલત્યમણ્ડિતમ્ ॥

વાઞ્છન્ ક્રીડનકં કિઞ્ચિત્ કદા મે પાપકર્મણઃ ।
આકૃષ્યતિ સુતઃ કૂર્ચં કિમ્ અપ્ય્ અવ્યક્તમ્ આલપન્ ॥

ઇત્યાદિ વિલપત્ય્ અસ્મિન્ બાષ્પાકુલિતલોચને ।
શુકનાસ ઇમાં વાર્તાં શ્રુત્વા સત્વરમાયયૌ ॥

નિરપત્યઃ કૃતઃ સો ઽપિ રાજેવ હતવેધસા ।
તસ્યાપ્ય્ અનેન શોકેન ગૃહે રોદિતિ ગેહિની ॥

સ તુ સ્વામિગતં દુઃખં દુઃખમ્ ઇત્ય્ અવધારયન્ ।
તદ્દુઃખાપનયોપાયપ્રવણો ધીરમ્ અભ્યધાત્ ॥

ક્વ ધીરપ્રકૃતિર્દેવઃ ક્વેયં વિલ્કવચિત્તતા ।
શોકો ઽવકાશં લભતે હૃદયે ન ભવાદૃશામ્ ॥

યદિ હિ સ્ત્રીસ્વભાવેન દેવી વિક્લવતાં ગતા ।
તત્ કિં પ્રલમ્બકૂર્ચસ્ય યુક્તં દેવસ્ય રોદિતુમ્ ॥

કો ઽયં હિતાહિતપ્રાપ્તિપારિહારક્રિયાક્રમઃ ।
યત્ કપોલતલન્યસ્તહસ્તં નિઃશ્વસ્યતે ચિરમ્ ॥

યદિ દુઃખાસિકા સત્યમનપત્યતયા તવ ।
બુદ્ધિરાધીયતાં ધર્મે ધર્મોત્સવમવાપ્યતે ॥

દીયતાં વસુ વિપ્રેભ્યઃ પૂજ્યન્તાં સર્વદેવતાઃ ।
પ્રવર્ત્યન્તાં પ્રપારામાઃ ખન્યન્તાં સલિલાશયાઃ ॥

નાસ્તિ નામ જગત્ય્ અસ્મિન્ પુરુષાર્થઃ સ કશ્ચન ।
યો ધર્મનિરતૈર્ ધીરૈસ્ ત્વાદૃશૈર્ નાધિગમ્યતે ॥

ઇત્યાદિ શુકનાસોક્તમ્ આકર્ણ્ય વિગતજ્વરૌ ।
ઉત્થાય સ્વસ્થવત્ સર્વા દમ્પતી ચક્રતુઃ ક્રિયાઃ ॥

તતઃ પ્રભૃતિ દાનાનિ યાગહોમતપાંસિ તૌ ।
ચિત્રાણ્ય્ અકુરુતાં સર્વા વ્યસ્મયન્ત તતઃ પ્રજાઃ ॥

કદાચિદ્ અથ ભૂપાલઃ સ્વપ્ને ઽપશ્યન્ નિશાકરમ્ ।
વિલાસવત્યા વદનં પ્રવિશન્તમ્ અખણ્ડિતમ્ ॥

તથા મનોરમા નામ શુકનાસસ્ય ગેહિની ।
સ્વપ્ને સપુણ્ડરીકાઙ્કા સાપિ તેન વ્યલોક્યત ॥

અન્યેદ્યુરુદયે ભાનોર્મઙ્ગલાચારપૂર્વકમ્ ।
તં સ્વપ્નં કથયામાસ શુકનાસાય ભૂપતિઃ ॥

સાનન્દં સો ઽભ્યધાદ્ એનં સમ્પન્નાસ્ તે મનોરથાઃ ।
અચિરાત્ સોષ્યતે દેવી પુત્રં પૂર્ણેન્દુસુન્દરમ્ ॥

દિનેષ્વ્ અથ વ્યતીતેષુ કેષુચિદ્ ગર્ભમ્ અગ્રહીત્ ।
મહિષી તત્સખીભ્યશ્ ચ તમ્ અજ્ઞાસીન્ નરેશ્વરઃ ॥

તાભ્યઃ પ્રાદાત્ સ વાસાંસિ ચિત્રાણ્ય્ આભરણાનિ ચ ।
ક્રમેણ ગર્ભલિઙ્ગેષુ વ્યક્તેષુ મુમુદેતરામ્ ॥

શુકનાસાય ચોવાચ પ્રહર્ષોત્ફુલ્લલોચનઃ ।
ચકાઙ્ક્ષ ચાતકો મેઘાન્ ઇવ પ્રસવવાસરાન્ ॥

સમ્પૂર્ણે દશમે માસિ દેવી સુતમ્ અસૂત સા ।
હર્ષેણ ચ જગત્ સર્વં પરિવૃત્તમ્ ઇવાભવત્ ॥

રાજા મહોત્સવાનન્દપૂર્ણપાત્રમ્ ઉપાહૃતમ્ ।
દૃષ્ટ્વા લોકેષુ માતિ સ્મ ન ત્રિવિક્રમવત્ ત્રિષુ ॥

શુકનાસસ્ તુ રાજાનં કણ્ઠે જગ્રાહ નિર્ભરમ્ ।
ઔત્સુક્યાત્ સૂતિકાવાસં તાવ્ ઉભાવ્ અપિ જગ્મતુઃ ॥

તતો દદૃશતુર્ વ્યક્તસકલાઙ્ગં કુમારકમ્ ।
ઇન્દોર્ ઉદયરાગાર્દ્રં નવં બિમ્બમ્ ઇવોદિતમ્ ॥

શુકનાસો નિરૂપ્યાઙ્ગમેકૈકં નિપુણં શિશોઃ ।
હસ્તે ભૂપાલમ્ આલમ્બ્ય હર્ષગર્ભમ્ અભાષત ॥

અયં શઙ્ખ ઇદં ચક્રમ્ ઇયમ્ ઊર્ણેદમ્ અમ્બુજમ્ ।
પશ્ય બાલસ્ય ચિહ્નાનિ દૃશ્યન્તે ચક્રવર્તિનામ્ ॥

યો ઽસૌ સ્વપ્ને ત્વયા દૃષ્ટશ્ ચન્દ્રો દેવીમુખં વિશન્ ।
સ એવાયમ્ ઇહોત્પન્ન ઇતિ મા સંશયં કૃથાઃ ॥

ઇતિ તદ્દર્શનાનન્દસુધાપ્લાવિતયોસ્ તયોઃ ।
શુકનાસસ્ય રાજ્ઞશ્ ચ હર્ષાબ્ધિર્ વવૃધેતરામ્ ॥

અત્રાન્તરે મન્ત્રિગૃહાદ્ આગત્ય દ્વારરક્ષકઃ ।
શુકનાસગૃહે પુત્રજન્મોત્સવમ્ અચીકથત્ ॥

શુકનાસમ્ અથાભીક્ષ્ણમ્ આલિલિઙ્ગ મહીપતિઃ ।
ઉત્તરીયં જહારાસ્ય પૂર્ણપાત્રમ્ ઇતિ સ્વયમ્ ॥

ઉવાચ ચૈનં પશ્યેદં સુખસ્યોપરિ નઃ સુખમ્ ।
ઇમે તે પતિતાઃ સત્યં તુહિને સોમરશ્મયઃ ॥

સાધ્વ્ ઇદં વેધસારબ્ધં ચિત્તાનુગુણમ્ આવયોઃ ।
સહૈવ પાત્રતાં નીતૌ યદ્ આવાં સુખદુઃખયોઃ ॥

તતસ્ તૂર્યરવૈર્ નૃત્યૈશ્ ચર્ચરીતાલનિઃસ્વનૈઃ ।
સિન્દૂરઘનસારાદિક્ષોદૈઃ કુઙ્કુમકર્દમૈઃ ॥

અનપેક્ષિતનીચોચ્ચવ્યવહારનિરર્ગલા ।
કેલિઃ પ્રવવૃતે તત્ર રાજગેહમહોત્સવે ॥

રાજા તુ સ્વગૃહે કેલિવિમર્દં વીક્ષ્ય તાદૃશમ્ ।
શુકનાસગૃહં ગત્વા દ્વિગુણં તમ્ અકારયત્ ॥

કૃતે ઽથ જાતકર્માદૌ વૃત્તે ષષ્ઠીપ્રજાગરે ।
વિલાસવત્યાં સ્નાતાયાં શુચૌ કાલ ઉપસ્થિતે ॥

પ્રશસ્તે ઽહનિ દૈવજ્ઞૈર્ અનુજ્ઞાતો મહીપતિઃ ।
સ્નાતઃ સુવર્ણલક્ષેણ પૂજયિત્વા દ્વિજોત્તમાન્ ॥

સ ભૂષણાનિ વાસાંસિ વર્ષન્ પરિજને શિશોઃ ।
ચન્દ્રાપીડ ઇતિ સ્વપ્નસદૃશં નામ નિર્મમે ॥

શુકનાસો ઽપિ સમ્પૂજ્ય વિપ્રાન્ વિપ્રજનોચિતમ્ ।
વૈશમ્પાયન ઇત્ય્ આત્મસૂનોર્ નામ પ્રણીતવાન્ ॥

ક્રમેણ વર્ધમાનો ઽથ કૃતચૂડાદિમઙ્ગલઃ ।
ચન્દ્રાપીડો ઽભવત્ પિત્રોઃ પરમ્ ઉત્સઙ્ગમણ્ડનમ્ ॥

આકારેણેન્દુકાન્તેન મધુરૈર્ બાલવલ્ગિતૈઃ ।
અવ્યક્તવર્ણૈર્ આલાપૈર્ અહરત્ સ તયોર્ મનઃ ॥

પ્રાપ્તે ઽથ સપ્તમે વર્ષે વિદ્યાગૃહમ્ અકારયત્ ।
ચન્દ્રાપીડસ્ય નગરાદ્બહિર્બહુગુણં નૃપઃ ॥

કૃતોપનયનં ચૈનમ્ કાલે ક્ષત્રજનોચિતે ।
તત્ર ન્યવેશયદ્રાજા વિદ્યાધિગમસિદ્ધયે ॥

તર્કવ્યાકરણાભિજ્ઞાન્ ધનુર્વેદવિશારદાન્ ।
દણ્ડનીત્યાદિનિપુણાન્ આચાર્યાન્ પર્યકલ્પયત્ ॥

શુકનાસો ઽપિ તં પુત્રમ્ ઉપનીય યથાવિધિ ।
રાજપુત્રાનુગં ચક્રે વિદ્યાગૃહનિવાસિનમ્ ॥

નૃપતિસ્ ત્વ્ અગમદ્ દ્રષ્ટું પુત્રં ગુરુકુલે સ્થિતમ્ ।
પ્રાર્થિતો ઽપિ સ તન્માત્રા નૈનમ્ આનાયયદ્ ગૃહમ્ ॥

પૂર્ણષોડશવર્ષો ઽથ રાજપુત્રઃ કુશાગ્રધીઃ ।
સકૃદધ્યાપિતો વિદ્યાઃ પૂર્વાભ્યસ્તા ઇવાગ્રહીત્ ॥

સર્વશાસ્ત્રાર્થતત્ત્વજ્ઞઃ સર્વભાષાસુ સત્કવિઃ ।
સર્વવાદેષુ વક્તાભૂત્સર્વશાસ્ત્રેષુ કોવિદઃ ॥

પ્રૌઢઃ કલાસુ સર્વાસુ દક્ષઃ સર્વેષુ કર્મસુ ।
સર્વેષુ વ્યવહારેષુ સો ઽભૂદ્ અસ્ખલિતક્રમઃ ॥

ક્રમેણ વર્ધમાનશ્ ચ સ વ્યાયામમ્ અસેવત ।
શુશુભે ચ તદભ્યાસપ્રાપ્તસર્વાઙ્ગસૌષ્ઠવઃ ॥

પ્રલમ્બબાહુઃ પીનાંસઃ પૃથુવક્ષાસ્ તનૂદરઃ ।
ગમ્ભીરબાહુર્ વૃત્તોરુસ્ તરુણઃ કરિસદ્ગતિઃ ॥

શુકનાસસુતસ્ તસ્ય પ્રતિબિમ્બ ઇવાભવત્ ।
ગુણૈર્ અશેષૈર્ અન્યત્ર શરીરપ્રાણગૌરવાત્ ॥

રાજા તુ તં સુતં બુદ્ધ્વા કૃતાર્થં ગુરુવેશ્મનઃ ।
શુકનાસગિરા ગેહમ્ આનેતુમ્ ઉપચક્રમે ॥

સ બલાહકનામાનમ્ આહૂય ધ્વજિનીપતિમ્ ।
પુણ્યે ઽહ્નિ પ્રાહિણોત્ પુત્રમ્ આનેતું કૃતમઙ્ગલઃ ॥

સહસ્રં રાજપુત્રાણાં વિનીતં બાહુશાલિનામ્ ।
વિસસર્જ ચ તેનૈવ સહ પુત્રાનુવર્તિનમ્ ॥

તથેન્દ્રાયુધનામાનં પ્રેષયામાસ વાજિનમ્ ।
જિતોચ્ચૈઃશ્રવસં તૈસ્ તૈર્ અનન્યસદૃશૈર્ ગુણૈઃ ॥

બલાહકસ્ તતો ગત્વા વિદ્યાગૃહનિવાસિનમ્ ।
અદ્રાક્ષીદ્રાજપુત્રં તં પ્રણનામ ચ સાદરમ્ ॥

આચચક્ષે ચ રાજાજ્ઞાં ગૃહમ્ આગમ્યતામ્ ઇતિ ।
સનામગ્રહણં ચાસ્મૈ રાજપુત્રાન્ ન્યવેદયત્ ॥

તતો બલાહકાખ્યાતશૌર્યાદિગુણગૌરવાઃ ।
રાજપુત્રાઃ પ્રણેમુસ્તં પુરન્દરમ્ ઇવામરાઃ ॥

પર્યાણરત્નજ્યોતિર્ભિર્ જનિતેન્દ્રાયુધપ્રભમ્ ।
ઇન્દ્રાયુધં પ્રવેશ્યાશ્વં પુનર્ આહ બલાહકઃ ॥

ઇમમ્ આરોહ સિન્ધૂત્થમ્ અશ્વરત્નમ્ અયોનિજમ્ ।
પારસીકાધિપતિના દેવસ્યોપાયનીકૃતમ્ ॥

ચન્દ્રાપીડસ્ તુ તં દૃષ્ટ્વા તુરઙ્ગમમ્ અનુત્તમમ્ ।
પરં વિસ્મયમ્ આપેદે ચિરં ચૈવમ્ અચિન્તયત્ ॥

હૃદયં મે બ્રવીત્ય્ એવં નૈષ સત્યં તુરઙ્ગમઃ ।
કો ઽપિ કેનાપિ શાપેન નૂનં તુરગતાં ગતઃ ॥

અયોનિજત્વવાર્તેયમ્ એતત્ સંકલ્પસાક્ષિણી ।
રમ્ભા કિલાપ્સરઃકન્યા શાપેન વડવાભવત્ ॥

ગરુત્મતીદમ્ ઉચ્ચત્વમ્ ઉચ્ચૈઃશ્રવસિ વા ભવેત્ ।
તેજસામ્ આકૃતેર્ વાપિ ન સામાન્યેષુ વાજિષુ ॥

ઇતિ બુદ્ધ્યા વિકલ્પ્યાથ બલાહકસમર્પિતૈઃ ।
કુસુમસ્રગલઙ્કારદુકૂલૈઃ કૃતમણ્ડનઃ ॥

ગુરૂન્ આમન્ત્ર્ય દત્તાશીર્બ્રાહ્મણૈર્ બન્દિભિઃ સ્તુતઃ ।
વૈશમ્પાયનમ્ આરૂઢમ્ આલોક્ય તુરગાન્તરમ્ ॥

યો ઽસિ સો ઽસિ નમસ્ તુભ્યમ્ આરોહાતિક્રમસ્ ત્વયા ।
મર્ષણીયો ઽયમ્ અસ્માકમ્ આરુરોહેતિ તં વદન્ ॥

સ ઇન્દ્રાયુધમ્ આરુહ્ય વૈનતેયમ્ ઇવાચ્યુતઃ ।
અપિ ત્રિજગતીં કૃત્સ્નાં મેને હસ્તગતામ્ ઇવ ॥

સવૈશમ્પાયનઃ સો ઽથ નિર્ગત્ય ભવનાત્ તતઃ ।
રાજપુત્રૈઃ પરિવૃતો વિવેશ નગરીં શનૈઃ ॥

તમ્ અથ પુરતરુણ્યો રાજમાર્ગેણ યાન્તં દદૃશુર્ અતુલકાન્તિં સૌધવાતાયનસ્થાઃ ।
વ્યપગતગુરુલજ્જાઃ સમ્ભ્રમોત્કમ્પિતાઙ્ગ્યઃ સ્મરજનિતવિકારૈર્ લોચનૈર્ અર્ચયન્ત્યઃ ॥