જાતકમાલા · અધ્યાય 7

તદ્ એવં તિર્યગ્ગતાનામ્ અપિ મહાસત્ત્વાનાં શક્ત્યનુરૂપા દાનપ્રવૃત્તિર્ દૃષ્ટા । કેન નામ મનુષ્યભૂતેન ન દાતવ્યં સ્યાત્ ॥
તથા તિર્યગ્ગતા અપિ ગુણવાત્સલ્યાત્ સંપૂજ્યન્તે સદ્ભિર્ ઇતિ ગુણેષ્વ્ આદરઃ કાર્ય ઇત્ય્ એવમ્ અપ્ય્ ઉપનેયમ્ ॥
શશજાતકં ષષ્ઠમ્ ॥
7. અગસ્ત્યજાતકમ્
તપોવનસ્થાનામ્ અપ્ય્ અલંકારસ્ ત્યાગશૌર્યં પ્રાગ્ એવ ગૃહસ્થાનામ્ ॥
તદ્યથાનુશ્રૂયતે । બોધિસત્ત્વભૂતઃ કિલાયં ભગવાંલ્ લોકહિતાર્થં સંસારાધ્વનિ વર્તમાનશ્ ચારિત્રગુણવિશુદ્ધ્યભિલક્ષિતં ક્ષિતિતલતિલકભૂતમ્ અન્યતમં મહદ્ બ્રાહ્મણકુલં ગગનતલમ્ ઇવ શરદમલપરિપૂર્ણમણ્ડલશ્ ચન્દ્રમાઃ સમુદ્યન્ન્ એવાભ્યલંચકાર । સ યથાક્રમં શ્રુતિસ્મૃતિવિહિતાન્ અવાપ્ય જાતકર્માદીન્ સંસ્કારાન્ અધીત્ય સાઙ્ગાન્ વેદાન્ કૃત્સ્નં વ્યાપ્ય વિદ્વદ્યશસા મનુષ્યલોકં ગુણપ્રિયૈર્ દાતૃભિર્ અભ્યર્થ્ય પ્રતિગ્રાહ્યમાણવિભવત્વાત્ પરાં ધનસમૃદ્ધિમ્ અધિજગામ ।
સ બન્ધુમિત્રાશ્રિતદીનવર્ગં સંમાનનીયાન્ અતિથીન્ ગુરૂંશ્ ચ ।
પ્રહ્લાદયામ્ આસ તયા સમૃદ્ધ્યા દેશાન્ મહામેઘ ઇવાભિવર્ષન્

વિદ્વત્તયા તસ્ય યશઃ પ્રકાશં તત્ ત્યાગશૌર્યાદ્ અધિકં ચકાશે ।
નિશાકરસ્યેવ શરદ્વિશુદ્ધં સમગ્રભાવાદ્ અધિકાન્તિ બિમ્બમ્

અથ સ મહાત્મા કુકાર્યવ્યાસઙ્ગદોષસંબાધં પ્રમાદાસ્પદભૂતં ધનાર્જનરક્ષણપ્રસઙ્ગવ્યાકુલમ્ ઉપશમવિરોધિ વ્યસનશરશતલક્ષ્યભૂતમ્ અપર્યન્તકર્માન્તાનુષ્ઠાનપરિશ્રમમ્ અતૃપ્તિજનકં કૃશાસ્વાદં ગાર્હસ્થ્યમ્ અવેત્ય તદ્દોષવિવિક્તસુખાં ચ ધર્મપ્રતિપત્ત્યનુકૂલાં મોક્ષધર્મારમ્ભાધિષ્ઠાનભૂતાં પ્રવ્રજ્યામ્ અનુપશ્યન્ મહતીમ્ અપિ તાં ધનસમૃદ્ધિમ્ અપરિક્લેશાધિગતાં લોકસંનતિમનોહરાં તૃણવદ્ અપાસ્ય તાપસપ્રવ્રજ્યાવિનયનિયમપરો બભૂવ । પ્રવ્રજિતમ્ અપિ તં મહાસત્ત્વં યશઃપ્રકાશત્વાત્ પૂર્વસંસ્તવાનુસ્મરણાત્ સંભાવિતગુણત્વાત્ પ્રશમાભિલક્ષિતત્વાચ્ ચ શ્રેયોઽર્થી જનસ્ તદ્ગુણગણાવર્જિતમતિસ્ તથૈવાભિજગામ । સ તં ગૃહિજનસંસર્ગં પ્રવિવેકસુખપ્રમાથિનં વ્યાસઙ્ગવિક્ષેપાન્તરાયકરમ્ અબહુમન્યમાનઃ પ્રવિવેકાભિરામતયા દક્ષિણસમુદ્રમધ્યાવગાઢમ્ ઇન્દ્રનીલભેદાભિનીલવર્ણૈર્ અનિલબલાકલિતૈર્ ઊર્મિમાલાવિલાસૈર્ આચ્છુરિતપર્યન્તં સિતસિકતાસ્તીર્ણભૂમિભાગં પુષ્પફલપલ્લવાલંકૃતવિટપૈર્ નાનાતરુભિર્ ઉપશોભિતં વિમલસલિલાશયપ્રતીરં કારાદ્વીપમ્ અધ્યાસનાદ્ આશ્રમપદશ્રિયા સંયોજયામ્ આસ ।
સુતનુસ્ તપસા તત્ર સ રેજે તપસાતનુઃ ।
નવશ્ ચન્દ્ર ઇવ વ્યોમ્નિ કાન્તત્વેનાકૃશઃ કૃશઃ

પ્રશમનિભૃતચેષ્ટિતેન્દ્રિયો વ્રતનિયમૈકરસો વને વસન્ ।
મુનિર્ ઇતિ તનુબુદ્ધિશક્તિભિર્ મૃગવિહગૈર્ અપિ સો ઽન્વગમ્યત

અથ સ મહાત્મા પ્રદાનોચિતત્વાત્ તપોવને ઽપિ નિવસન્ કાલોપનતમ્ અતિથિજનં યથાસંનિહિતેન મૂલફલેન શુચિના સલિલેન હૃદ્યાભિશ્ ચ સ્વાગતાશીર્વાદપેશલાભિસ્ તપસ્વિજનયોગ્યાભિર્ વાગ્ભિઃ સંપૂજયતિ સ્મ । અતિથિજનોપયુક્તશેષેણ ચ યાત્રામાત્રાર્થમ્ અભ્યવહૃતેન વન્યેનાહારેણ વર્તયામ્ આસ ॥ તસ્ય તપઃપ્રકર્ષાત્ પ્રવિસૃતેન યશસા સમાવર્જિતહૃદયઃ શક્રો દેવાનામ્ ઇન્દ્રઃ સ્થૈર્યજિજ્ઞાસયા તસ્ય મહાસત્ત્વસ્ય તસ્મિન્ન્ અરણ્યાયતને તાપસજનોપભોગયોગ્યં મૂલફલમ્ અનુપૂર્વેણ સર્વમ્ અન્તર્ધાપયામ્ આસ । બોધિસત્ત્વો ઽપિ ધ્યાનપ્રસૃતમાનસતયા સંતોષપરિચયાદ્ અનધિમૂર્છિતત્વાદ્ આહારે શરીરે ચાનભિષ્વઙ્ગાન્ ન તદન્તર્ધાનહેતું મનસિ ચકાર । સ તરુણાનિ તરુપલ્લવાન્ય્ અધિશ્રાય તૈર્ આહારપ્રયોજનમ્ અભિનિષ્પાદ્યાપરિતૃષ્યમાણ આહારવિશેષાનુત્સુકઃ સ્વસ્થમતિસ્ તથૈવ વિજહાર ।
ન ક્વ ચિદ્ દુર્લભા વૃત્તિઃ સંતોષનિયતાત્મનામ્ ।
કુત્ર નામ ન વિદ્યન્તે તૃણપર્ણજલાશયાઃ

વિસ્મિતતરમનાસ્ તુ શક્રો દેવેન્દ્રસ્ તસ્ય તેનાવસ્થાનેન સ્થિરતરગુણસંભાવનસ્ તત્પરીક્ષાનિમિત્તં તસ્મિન્ન્ અરણ્યવનપ્રદેશે નિદાઘકાલાનિલ ઇવ સમગ્રં વીરુત્તૃણતરુગણં પર્ણસમૃદ્ધ્યા વિયોજયામ્ આસ ॥ અથ બોધિસત્ત્વઃ પ્રત્યાર્દ્રતરાણિ શીર્ણપર્ણાનિ સમાહૃત્ય તૈર્ ઉદકસ્વિન્નૈર્ અનુત્કણ્ઠિતમતિર્ વર્તયમાનો ધ્યાનસુખપ્રીણિતમનાસ્ તત્રામૃતતૃપ્ત ઇવ વિજહાર ।
અવિસ્મયઃ શ્રુતવતાં સમૃદ્ધાનામ્ અમત્સરઃ ।
સંતોષશ્ ચ વનસ્થાનાં ગુણશોભાવિધિઃ પરઃ

અથ શક્રસ્ તેન તસ્યાદ્ભુતરૂપેણ સંતોષસ્થૈર્યેણ સમભિવૃદ્ધવિસ્મયઃ સામર્ષ ઇવ તસ્ય મહાસત્ત્વસ્ય વ્રતકાલે હુતાગ્નિહોત્રસ્ય પરિસમાપ્તજપસ્યાતિથિજનદિદૃક્ષયા દિશો વ્યવલોકયતો બ્રાહ્મણરૂપમ્ આસ્થાયાતિથિર્ ઇવ નામ પુરસ્તાત્ પ્રાદુરભૂત્ । પ્રીતમનાઃ સમભિગમ્ય ચૈનં બોધિસત્ત્વઃ સ્વાગતાદિપ્રિયવચનપુરઃસરેણાહારકાલનિવેદનેનોપનિમન્ત્રયામ્ આસ । તૂષ્ણીંભાવાત્ તુ તસ્યાનુમતમ્ ઉપનિમન્ત્રણમ્ અવેત્ય સ મહાત્મા
દિત્સાપ્રકર્ષવિકસન્નયનાસ્યશોભઃ સ્નિગ્ધૈર્ મનઃશ્રુતિહરૈર્ અભિનન્દ્ય વાક્યૈઃ ।
કૃચ્છ્રોપલબ્ધમ્ અપિ તચ્ છ્રપણં સમસ્તં તસ્મૈ દદૌ સ્વયમ્ અભૂચ્ ચ મુદૈવ તૃપ્તઃ

સ તથૈવ પ્રવિશ્ય ધ્યાનાગારં તેનૈવ પ્રીતિપ્રામોદ્યેન તદ્ અહોરાત્રમ્ અતિનામયામ્ આસ ॥ અથ શક્રસ્ તસ્ય દ્વિતીયે તૃતીયે ચાહનિ તથૈવ વ્રતકાલે પુરતઃ પ્રાદુરભૂત્ । સો ઽપિ ચૈનં પ્રમુદિતતરમનાસ્ તથૈવ પ્રતિપૂજયામ્ આસ।
દાનાભિલાષઃ સાધૂનાં કૃપાભ્યાસવિવર્ધિતઃ ।
નૈતિ સંકોચદીનત્વં દુઃખૈઃ પ્રાણાન્તિકૈર્ અપિ

અથ શક્રઃ પરમવિસ્મયાવિષ્ટહૃદયસ્ તપઃપ્રકર્ષાદ્ અસ્ય પ્રાર્થનામાત્રાપેક્ષં ત્રિદશપતિલક્ષ્મીસંપર્કમ્ અવગમ્ય સમુત્પતિતભયાશઙ્કઃ સ્વમ્ એવ વપુર્ દિવ્યાદ્ભુતશોભમ્ અભિપ્રપદ્ય તપઃપ્રયોજનમ્ એનં પર્યપૃચ્છત્ ।
બન્ધૂન્ પ્રિયાન્ અશ્રુમુખાન્ વિહાય પરિગ્રહાન્ સૌખ્યપરિગ્રહાંશ્ ચ ।
આશાઙ્કુશં નુ વ્યવસૃજ્ય કુત્ર તપઃપરિક્લેશમ્ ઇમં શ્રિતો ઽસિ

સુખોપપન્નાન્ પરિભૂય ભોગાઞ્ છોકાતુરં બન્ધુજનં ચ કૃત્વા ।
ન હેતુનાલ્પેન હિ યાન્તિ ધીરાઃ સુખોપરોધીનિ તપોવનાનિ

વક્તવ્યમ્ એતન્ મયિ મન્યસે ચેત્ કૌતૂહલં નો ઽર્હસિ તદ્ વિનેતુમ્ ।
કિં નામ તદ્ યસ્ય ગુણશ્રવેણ વશીકૃતૈવં ભવતો ઽપિ બુદ્ધિઃ

બોધિસત્ત્વ ઉવાચ । શ્રૂયતાં માર્ષ યન્નિમિત્તો ઽયં મમ પ્રયત્નઃ ।
પુનઃપુનર્જાતિર્ અતીવ દુઃખં જરા વિપદ્ વ્યાધિવિરૂપતા ચ ।
મર્તવ્યમ્ ઇત્ય્ આકુલતા ચ બુદ્ધેર્ લોકાન્ અતસ્ ત્રાતુમ્ ઇહ સ્થિતો ઽસ્મિ

અથ શક્રો નાયમ્ અસ્મદ્ગતાં શ્રિયં કામયત ઇતિ સમાશ્વાસિતહૃદયઃ સુભાષિતેન તેન ચાભિપ્રસાદિતમતિર્ યુક્તમ્ ઇત્ય્ અભિપૂજ્ય તદ્ અસ્ય વચનં વરપ્રદાનેન બોધિસત્ત્વમ્ ઉપનિમન્ત્રયામ્ આસ ।
અત્ર તે તાપસજનપ્રતિરૂપે સુભાષિતે ।
દદામિ કાશ્યપ વરં તદ્ વૃણીષ્વ યદ્ ઇચ્છસિ

અથ બોધિસત્ત્વો ભવસુખેષ્વ્ અનાસ્થઃ પ્રાર્થનામ્ એવ દુઃખમ્ અવગચ્છન્ સાત્મીભૂતસંતોષઃ શક્રમ્ ઉવાચ ।
દાતુમ્ ઇચ્છસિ ચેન્ મહ્યમ્ અનુગ્રહકરં વરમ્ ।
વૃણે તસ્માદ્ અહમ્ ઇમં દેવાનાં પ્રવરં વરમ્

દારાન્ મનોઽભિલષિતાંસ્ તનયાન્ પ્રભુત્વમ્ અર્થાન્ અભીપ્સિતવિશાલતરાંશ્ ચ લબ્ધ્વા ।
યેનાભિતપ્તમતિર્ એતિ ન જાતુ તૃપ્તિં લોભાનલઃ સ હૃદયં મમ નાભ્યુપેયાત્

અથ શક્રસ્ તસ્ય તયા સંતોષપ્રવણમાનસતયા સુભાષિતાભિવ્યઞ્જિતયા ભૂયસ્યા માત્રયા સંપ્રસાદિતમતિઃ પુનર્ બોધિસત્ત્વં સાધુ સાધ્વ્ ઇતિ પ્રશસ્ય વરેણોપચ્છન્દયામ્ આસ ।
અત્રાપિ તે મુનિજનપ્રતિરૂપે સુભાષિતે ।
પ્રતિપ્રાભૃતવત્ પ્રીત્યા પ્રયચ્છામ્ય્ અપરં વરમ્

અથ બોધિસત્ત્વઃ ક્લેશવિયોગસ્યૈવ દુર્લભતામ્ અસ્ય પ્રદર્શયન્ વરયાચ્ઞાપદેશેન પુનર્ અપ્ય્ અસ્મૈ ધર્મં દેશયામ્ આસ ।
દદાસિ મે યદિ વરં સદ્ગુણાવાસ વાસવ ।
વૃણે તેનેદમ્ અપરં દેવેન્દ્રાનવરં વરમ્

અર્થાદ્ અપિ ભ્રંશમ્ અવાપ્નુવન્તિ વર્ણપ્રસાદાદ્ યશસઃ સુખાચ્ ચ ।
યેનાભિભૂતા દ્વિષતેવ સત્ત્વાઃ સ દ્વેષવહ્નિર્ મમ દૂરતઃ સ્યાત્

તચ્ છ્રુત્વા શક્રો દેવાનામ્ અધિપતિર્ વિસ્મયવશાત્ સાધ્વ્ ઇત્ય્ એનં સબહુમાનમ્ અભિપ્રશસ્ય પુનર્ ઉવાચ ।
સ્થાને પ્રવ્રજિતાન્ કીર્તિર્ અનુરક્તેવ સેવતે ।
તદ્ વરં પ્રતિગૃહ્ણીષ્વ મદ્ અત્રાપિ સુભાષિતે

અથ બોધિસત્ત્વઃ ક્લેશપ્રાતિકૂલ્યાત્ ક્લિષ્ટસત્ત્વસંપર્કવિગર્હાં વરસંપ્રતિગ્રહાપદેશેન કુર્વન્ન્ ઇત્ય્ ઉવાચ ।
શૃણુયામ્ અપિ નૈવ જાતુ બાલં ન ચ વીક્ષેય ન ચૈનમ્ આલપેયમ્ ।
ન ચ તેન નિવાસખેદદુઃખં સમુપેયાં વરમ્ ઇત્ય્ અહં વૃણે ત્વામ્

શક્ર ઉવાચ ।
અનુકમ્પ્યો વિશેષેણ સતામ્ આપદ્ગતો નનુ ।
આપદાં મૂલભૂતત્વાદ્ બાલ્યં ચાધમમ્ ઇષ્યતે

કરુણાશ્રયભૂતસ્ય બાલસ્યાસ્ય વિશેષતઃ ।
કૃપાલુર્ અપિ સન્ કસ્માન્ ન દર્શનમ્ અપીચ્છસિ

બોધિસત્ત્વ ઉવાચ । અગત્યા માર્ષ । પશ્યત્વ્ અત્રભવાન્ ।
કથં ચિદ્ અપિ શક્યેત યદિ બાલશ્ ચિકિત્સિતુમ્ ।
તદ્ધિતોદ્યોગનિર્યત્નઃ કથં સ્યાદ્ ઇતિ મદ્વિધઃ

ઇત્થં ચૈષ ચિકિત્સાપ્રયોગસ્યાપાત્રમ્ ઇતિ ગૃહ્યતામ્ ।
સુનયવદ્ અનયં નયત્ય્ અયં પરમ્ અપિ ચાત્ર નિયોક્તુમ્ ઇચ્છતિ ।
અનુચિતવિનયાર્જવક્રમો હિતમ્ અપિ ચાભિહિતઃ પ્રકુપ્યતિ

ઇતિ પણ્ડિતમાનમોહદગ્ધે હિતવાદિષ્વ્ અપિ રોષરૂક્ષભાવે ।
રભસે વિનયાભિયોગમાન્દ્યાદ્ વદ કસ્ તત્ર હિતાર્પણાભ્યુપાયઃ

ઇત્ય્ અગત્યા સુરશ્રેષ્ઠ કરુણાપ્રવણૈર્ અપિ ।
બાલ્યાદ્ અદ્રવ્યભૂતસ્ય ન દર્શનમ્ અપીષ્યતે

તચ્ છ્રુત્વા શક્રઃ સાધુ સાધ્વ્ ઇત્ય્ એનમ્ અભિનન્દ્ય સુભાષિતપરિતોષિતમતિઃ પુનર્ ઉવાચ ।
ન સુભાષિતરત્નાનામ્ અર્ઘઃ કશ્ ચ ન વિદ્યતે ।
કુસુમાઞ્જલિવત્ પ્રીત્યા દદામ્ય્ અત્ર તુ તે વરમ્

અથ બોધિસત્ત્વઃ સર્વાવસ્થસુખતાં સજ્જનસ્ય પ્રદર્શયઞ્ છક્રમ્ ઉવાચ।
વીક્ષેય ધીરં શૃણુયાં ચ ધીરં સ્યાન્ મે નિવાસઃ સહ તેન શક્ર ।
સંભાષણં તેન સહૈવ ભૂયાદ્ એતદ્ વરં દેવવર પ્રયચ્છ

શક્ર ઉવાચ । અતિપક્ષપાત ઇવ ખલુ તે ધીરં પ્રતિ । તદ્ ઉચ્યતામ્ ।
કિં નુ ધીરસ્ તવાકાર્ષીદ્ વદ કાશ્યપ કારણમ્ ।
અધીર ઇવ યેનાસિ ધીરદર્શનલાલસઃ

અથ બોધિસત્ત્વઃ સજ્જનમાહાત્મ્યમ્ અસ્ય પ્રદર્શયન્ન્ ઉવાચ । શ્રૂયતાં માર્ષ યેન મે ધીરદર્શનમ્ એવાભિલષતિ મતિઃ ।
વ્રજતિ ગુણપથેન ચ સ્વયં નયતિ પરાન્ અપિ તેન વર્ત્મના ।
વચનમ્ અપિ ન રૂક્ષમ્ અક્ષમાં જનયતિ તસ્ય હિતોપસંહિતમ્

અશઠવિનયભૂષણઃ સદા હિતમ્ ઇતિ લમ્ભયિતું સ શક્યતે ।
ઇતિ મમ ગુણપક્ષપાતિની નમતિ મતિર્ ગુણપક્ષપાતિનિ

અથૈનં શક્રઃ સાધૂપપન્નરૂપમ્ ઇદમ્ ઇતિ ચાભિનન્દ્ય સમભિવૃદ્ધપ્રસાદઃ પુનર્ વરેણોપનિમન્ત્રયામ્ આસ ।
કામં સંતોષસાત્મત્વાત્ સર્વત્ર કૃતમ્ એવ તે ।
મદનુગ્રહબુદ્ધ્યા તુ ગ્રહીતું વરમ્ અર્હસિ

ઉપકારાશયા ભક્ત્યા શક્ત્યા ચૈવ સમસ્તયા ।
પ્રયુક્તસ્યાતિદુઃખો હિ પ્રણયસ્યાપ્રતિગ્રહઃ

અથ તસ્ય પરામ્ ઉપકર્તુકામતામ્ અવેત્ય બોધિસત્ત્વસ્ તત્પ્રિયહિતકામ્યયા પ્રદાનાનુતર્ષપ્રાબલ્યમ્ અસ્મૈ પ્રકાશયન્ન્ ઉવાચ ।
ત્વદીયમ્ અન્નં ક્ષયદોષવર્જિતં મનશ્ ચ દિત્સાપરિતોષપેશલમ્ ।
વિશુદ્ધશીલાભરણાશ્ ચ યાચકા મમ સ્યુર્ એતાં વરસંપદં વૃણે

શક્ર ઉવાચ । સુભાષિતરત્નાકરઃ ખલ્વ્ અત્રભવાન્ । અપિ ચ ।
યદ્ અભિપ્રાર્થિતં સર્વં તત્ તથૈવ ભવિષ્યતિ ।
દદામિ ચ પુનસ્ તુભ્યં વરમ્ અસ્મિન્ સુભાષિતે

બોધિસત્ત્વ ઉવાચ ।
વરં મમાનુગ્રહસંપદાકરં દદાસિ ચેત્ સર્વદિવૌકસાં વર ।
ન માભ્યુપેયાઃ પુનર્ ઇત્ય્ અભિજ્વલન્ન્ ઇમં વરં દૈત્યનિસૂદનં વૃણે

અથ શક્રઃ સામર્ષવદ્ એનમ્ અતિવિસ્મયમાન ઉવાચ । મા તાવદ્ ભોઃ ।
જપવ્રતેજ્યાવિધિના તપઃશ્રમૈર્ જનો ઽયમ્ અન્વિચ્છતિ દર્શનં મમ ।
ભવાન્ પુનર્ નેચ્છતિ કેન હેતુના વરપ્રદિત્સાભિગતસ્ય મે સતઃ

બોધિસત્ત્વ ઉવાચ । અલં તે મન્યુપ્રણયેન । સમનુનેષ્યામ્ય્ અહમ્ અત્રભવન્તં દેવરાજમ્ । ન હ્ય્ અસાવ્ અદાક્ષિણ્યાનુવૃત્તિર્ નાપ્ય્ અબહુમાનવિચેષ્ટિતમ્ અસમવધાનકામ્યતા વા ભવતઃ । કિં તુ
નિરીક્ષ્ય તે રૂપમ્ અમાનુષાદ્ભુતં પ્રસન્નકાન્તિ જ્વલિતં ચ તેજસા ।
ભવેત્ પ્રમાદસ્ તપસીતિ મે ભયં પ્રસાદસૌમ્યાદ્ અપિ દર્શનાત્ તવ

અથ શક્રઃ પ્રણમ્ય પ્રદક્ષિણીકૃત્ય ચૈનં તત્રૈવાન્તર્દધે । પ્રભાતાયાં ચ રજન્યાં બોધિસત્ત્વઃ શક્રપ્રભાવોપહૃતં પ્રભૂતં દિવ્યમ્ અન્નપાનં દદર્શ । શક્રોપનિમન્ત્રણાહૂતાનિ ચાનેકાનિ પ્રત્યેકબુદ્ધશતાનિ વ્યાયતાબદ્ધપરિકરાંશ્ ચ પરિવેષણસજ્જાન્ અનેકાન્ દેવકુમારાન્ ।
તેનાન્નપાનવિધિના સ મુનિર્ મહર્ષીન્ સંતર્પયન્ મુદમ્ ઉદારતમામ્ અવાપ ।
વૃત્ત્યા ચ તાપસજનોચિતયાભિરેમે ધ્યાનાપ્રમાણનિયમેન શમેન ચૈવ