ઈશ્વરપ્રત્યભિજ્ઞાવિમર્શિની · અધ્યાય 1.7

અત એવ યથાભીષ્ટસમુલ્લેખાવભાસનાત્ ।
જ્ઞાનક્રિયે સ્ફુટે એવ સિદ્ધે સર્વસ્ય જીવતઃ ॥

તત્તદ્વિભિન્નસંવિત્તિમુખૈરેકપ્રમાતરિ ।
પ્રતિતિષ્ઠત્સુ ભાવેષુ જ્ઞાતેયમુપપદ્યતે ॥

દેશકાલક્રમજુષામર્થાનાં સ્વસમાપિનામ્ ।
સકૃદાભાસસાધ્યોઽસાવન્યથા કઃ સમન્વયઃ ॥

પ્રત્યક્ષાનુપલમ્ભાનાં તત્તદ્ભિન્નાંશપાતિનામ્ ।
કાર્યકારણતાસિદ્ધિહેતુતૈકપ્રમાતૃજા ॥

બાધ્યબાધકભાવોઽપિ સ્વાત્મનિષ્ઠાવિરોધિનામ્ ।
જ્ઞાનાનામુદિયાદેકપ્રમાતૃપરિનિષ્ઠિતેઃ ॥

વિવિક્તભૂતલજ્ઞાનં ઘટાભાવમતિર્યથા ।
તથા ચેચ્છુક્તિકાજ્ઞાનં રૂપ્યજ્ઞાનાપ્રમાત્વવિત્ ॥

નૈવં શુદ્ધસ્થલજ્ઞાનાત્સિદ્ધ્યેત્તસ્યાઘટાત્મના ।
ન તૂપલબ્ધિયોગ્યસ્યાપ્યત્રાભાવો ઘટાત્મનઃ ॥

વિવિક્તં ભૂતલં શશ્વદ્ ભાવાનાં સ્વાત્મનિષ્ઠિતેઃ ।
તત્કથં જાતુ તજ્જ્ઞાનં ભિન્નસ્યાભાવસાધનમ્ ॥

કિં ત્વાલોકચયોઽન્ધસ્ય સ્પર્શો વોષ્ણાદિકો મૃદુઃ ।
તત્રાસ્તિ સાધયેત્તસ્ય સ્વજ્ઞાનમઘટાત્મતામ્ ॥

પિશાચઃ સ્યાદનાલોકોઽપ્યાલોકાભ્યન્તરે યથા ।
અદૃશ્યો ભૂતલસ્યાન્તર્ન નિષેધ્યઃ સ સર્વથા ॥

એવં રૂપ્યવિદાભાવરૂપા શુક્તિમતિર્ ભવેત્ ।
ન ત્વાદ્યરજતજ્ઞપ્તેઃ સ્યાદપ્રામાણ્યવેદિકા ॥

ધર્મ્યસિદ્ધેરપિ ભવેદ્બાધા નૈવાનુમાનતઃ ।
સ્વસંવેદનસિદ્ધા તુ યુક્તા સૈકપ્રમાતૃજા ॥

ઇત્થમત્યર્થભિન્નાર્થાવભાસખચિતે વિભૌ ।
સમલો વિમલો વાપિ વ્યવહારોઽનુભૂયતે ॥