ઈશ્વરપ્રત્યભિજ્ઞાકારિકા · અધ્યાય 2.1

અત એવ યદ્ અપ્ય્ ઉક્તં ક્રિયા નૈકસ્ય સક્રમા
એકેત્યાદિ પ્રતિક્ષિપ્તં તદ્ એકસ્ય સમર્થનાત્ ॥

સક્રમત્વં ચ લૌકિક્યાઃ ક્રિયાયાઃ કાલશક્તિતઃ
ઘટતે ન તુ શાશ્વત્યાઃ પ્રાભવ્યાઃ સ્યાત્ પ્રભોર્ ઇવ ॥

કાલઃ સૂર્યાદિસંચારસ્ તત્તત્પુષ્પાદિજન્મ વા
શીતોષ્ણે વાથ તલ્લક્ષ્યઃ ક્રમ એવ સ તત્ત્વતઃ ॥

ક્રમો ભેદાશ્રયો ભેદો ઽપ્ય્ આભાસસદસત્ત્વતઃ
આભાસસદસત્ત્વે તુ ચિત્રાભાસકૃતઃ પ્રભોઃ ॥

મૂર્તિવૈચિત્ર્યતો દેશ ક્રમમ્ આભાસયત્ય્ અસૌ
ક્રિયાવૈચિત્ર્યનિર્ભાસાત્ કાલક્રમમ્ અપીશ્વરઃ ॥

સર્વત્રાભાસભેદો ઽપિ ભવેત્ કાલક્રમાકરઃ
વિચ્છિન્નભાસઃ શૂન્યાદેર્ માતુર્ ભાતસ્ય નો સકૃત્ ॥

દેશક્રમો ઽપિ ભાવેષુ ભાતિ માતુર્ મિતાત્મનઃ
સ્વાત્મેવ સ્વાત્મના પૂર્ણા ભાવા ભાન્ત્ય્ અમિતસ્ય તુ ॥

કિં તુ નિર્માણશક્તિઃ સાપ્ય્ એવં વિદુષ ઈશિતુઃ
તથા વિજ્ઞાતૃવિજ્ઞેય ભેદો યદ્ અવભાસ્યતે ॥