ઈશ્વરપ્રત્યભિજ્ઞાકારિકા · અધ્યાય 1.8

તાત્કાલિકાક્ષસામક્ષ્ય સાપેક્ષાઃ કેવલં ક્વ ચિત્
આભાસા અન્યથાન્યત્ર ત્વ્ અન્ધાન્ધતમસાદિષુ ॥

વિશેષો ઽર્થાવભાસસ્ય સત્તાયાં ન પુનઃ ક્વ ચિત્
વિકલ્પેષુ ભવેદ્ ભાવિ ભવદ્ભૂતાર્થગામિષુ ॥

સુખાદિષુ ચ સૌખ્યાદિ હેતુષ્વ્ અપિ ચ વસ્તુષુ
અવભાસસ્ય સદ્ભાવે ઽપ્ય્ અતીતત્વાત્ તથા સ્થિતિઃ ॥

ગાઢમ્ ઉલ્લિખ્યમાને તુ વિકલ્પેન સુખાદિકે
તથા સ્થિતિસ્ તથૈવ સ્યાત્ સ્ફુટમ્ અસ્યોપલક્ષણાત્ ॥

ભાવાભાવાવભાસાનાં બાહ્યતોપાધિર્ ઇષ્યતે
નાત્મા સત્તા તતસ્ તેષામ્ આન્તરાણાં સતાં સદા ॥

આન્તરત્વાત્ પ્રમાત્રૈક્યે નૈષાં ભેદનિબન્ધના
અર્થક્રિયાપિ બાહ્યત્વે સા ભિન્નાભાસભેદતઃ ॥

ચિન્મયત્વે ઽવભાસાનામ્ અન્ત એવ સ્થિતિઃ સદા
માયયા ભાસમાનાનાં બાહ્યત્વાદ્ બહિર્ અપ્ય્ અસૌ ॥

વિકલ્પે યો ઽયમ્ ઉલ્લેખઃ સો ઽપિ બાહ્યઃ પૃથક્પ્રથઃ
પ્રમાત્રૈકાત્મ્યમ્ આન્તર્યં તતો ભેદો હિ બાહ્યતા ॥

ઉલ્લેખસ્ય સુખાદેશ્ ચ પ્રકાશો બહિર્ આત્મના
ઇચ્છાતો ભર્તુર્ અધ્યક્ષ રૂપો ઽક્ષાદિભુવાં યથા ॥

તદૈક્યેન વિના ન સ્યાત્ સંવિદાં લોકપદ્ધતિઃ
પ્રકાશૈક્યાત્ તદ્ એકત્વં માતૈકઃ સ ઇતિ સ્થિતમ્ ॥

સ એવ વિમૃશત્ત્વેન નિયતેન મહેશ્વરઃ
વિમર્શ એવ દેવસ્ય શુદ્ધે જ્ઞાનક્રિયે યતઃ ॥