હરિવંશ · અધ્યાય 98

બહૂનાં સ્ત્રીસહસ્રાણામ્ અષ્ટૌ ભાર્યાઃ પ્રકીર્તિતાઃ
તાસામ્ અપત્યાન્ યષ્ટાનાં ભગવાન્ પ્રબ્રવીતુ મે ॥

અષ્ટૌ મહિષ્યઃ પુત્રિણ્ય ઇતિ પ્રાધાન્યતઃ સ્મૃતાઃ
સર્વા વીરપ્રજાયિન્યસ્ તાસ્વ્ અપત્યાનિ મે શૃણુ ॥

રુક્મિણી સત્યભામા ચ દેવી નગ્નજિતી તથા
સુદત્તા ચ તથા શૈબ્યા લક્ષ્મણા ચારુહાસિની ॥

મિત્રવિન્દા ચ કાલિન્દી જામ્બવત્ય્ અથ પૌરવી
સુભીમા ચ તથા માદ્રી રૌક્મિણેયાન્ ઇમાઞ્ શૃણુ ॥

પ્રદ્યુમ્નઃ પ્રથમો યજ્ઞે શમ્બરાન્તકરઃ સુતઃ
દ્વિતીયશ્ ચારુદેષ્ણશ્ ચ વૃષ્ણિસિંહો મહારથઃ ॥

ચારુભદ્રો ભદ્રચારુઃ સુદંષ્ટ્રો દ્રુમ એવ ચ
સુષેણશ્ ચારુગુપ્તશ્ ચ ચારુવિન્દશ્ ચ ચારુમાન્
ચારુબાહુઃ કનિષ્ઠશ્ ચ કન્યા ચારુમતી તથા ॥

જજ્ઞિરે સત્યભામાયાં ભાનુર્ ભિમરથઃ ક્ષુપઃ
રોહિતો દીપ્તિમાંશ્ ચૈવ તામ્રજાક્ષો જલાન્તકઃ
ચતસ્રો જજ્ઞિરે તેષાં સ્વસારો ગરુડધ્વજાત્ ॥

જામ્બવત્યાઃ સુતો જજ્ઞે સામ્બઃ સમિતિશોભનઃ
મિત્રબાહુર્ મિત્રધામા મિત્રસેનસ્ તથૈવ ચ ।
મિત્રવાન્ મિત્રવિન્દશ્ ચ મિત્રવત્ય્ અપિ ચાઙ્ગના ॥

મિત્રવાહઃ સુનીથશ્ ચ નગ્નજિત્યાઃ પ્રજાઃ શૃણુ
ભદ્રકારો ભદ્રવિન્દઃ કન્યા ભદ્રવતી તથા ॥

સુદત્તાયાસ્ તુ શૈબ્યાયાઃ સંગ્રામજિદ્ અજાયત
સત્યજિત્ સેનજિચ્ ચૈવ તથા શૂરઃ સપત્નજિત્ ॥

સુભીમાયાઃ સુતો માદ્ર્યા વૃકાશ્વો વૃકનિર્વૃતિઃ
કુમારો વૃકદીપ્તિશ્ ચ લક્ષ્મણાયાઃ પ્રજાઃ શૃણુ ॥

ગાત્રવાન્ ગાત્રગુપ્તશ્ ચ ગાત્રવિન્દશ્ ચ વીર્યવાન્
જજ્ઞિરે ગાત્રવન્ત્ય્ એતે ભગિન્યાનુજયા સહ ॥

અશ્રુતશ્ ચ સુતો જજ્ઞે કાલિન્દ્યાઃ શ્રુતસત્તમઃ
અશ્રુતં શ્રુતસેનાયૈ પ્રદદૌ મધુસૂદનઃ ॥

તં પ્રદાય હૃષીકેશસ્ તાં ભાર્યાં મુદિતો ઽબ્રવીત્
એષ વામ્ ઉભયોર્ અસ્તુ દાયાદઃ શાશ્વતીઃ સમાઃ ॥

બૃહત્યાં તુ ગદસ્યાહુઃ શૈબ્યાયામ્ અઙ્ગદં સુતમ્
ઉત્પન્નં કુમુદં ચૈવ શ્વેતં શ્વેતાં તથાઙ્ગનામ્ ॥

અગાવહઃ સુમિત્રશ્ ચ શુચિશ્ ચિત્રરથસ્ તથા
ચિત્રસેનઃ સુતે ચાસ્ય ચિત્રા ચિત્રવતી તથા ॥

વનુસ્તમ્બસ્ય જજ્ઞાતે સ્તમ્બઃ સ્તમ્બવનશ્ ચ હ
નિવાસનો વનસ્તમ્બઃ કન્યા સ્તમ્બવતી તથા ।
ઉપાસઙ્ગસ્ય તુ સુતૌ વજ્રઃ સુક્ષિપ્ર એવ ચ ॥

કૌશિક્યાં સુતસોમાયાં યૌધિષ્ઠિર્યાં યુધિષ્ઠિરૌ
કાપાલી ગરુડશ્ ચૈવ જજ્ઞાતે ચિત્રયોધિનૌ ॥

પ્રદ્યુમ્નસ્ય સુતો યસ્ તુ વૈદર્ભ્યાં રાજસત્તમઃ
અનિરુદ્ધો રણે યોદ્ધા જજ્ઞે સ મૃગકેતનઃ ॥

રેવત્યાં બલદેવસ્ય જજ્ઞાતે નિશઠોલ્મુકૌ
ભ્રાતરૌ દેવસંકાશાવ્ ઉભૌ પુરુષસત્તમૌ ॥

સુતનુશ્ ચ નરાચી ચ શૌરેર્ આસ્તાં પરિગ્રહઃ
પૌણ્ડ્રશ્ ચ કપિલશ્ ચૈવ વાસુદેવસ્ય તૌ સુતૌ ॥

નરાચ્યાં કપિલો જજ્ઞે પૌણ્ડ્રશ્ ચ સુતનોઃ સુતઃ
તયોર્ નૃપો ઽભવત્ પૌણ્ડ્રઃ કપિલશ્ ચ વનં યયૌ ॥

તુર્યાં સમભવદ્ વીરો વસુદેવાન્ મહાબલઃ
જરા નામ નિષાદાનાં પ્રભુઃ સર્વધનુષ્મતામ્ ॥

કાશ્યા સુપાર્શ્વં તનયં લેભે સામ્બાત્ તરસ્વિનમ્
અનિરુદ્ધસ્ય વૈદર્ભ્યા ભાર્યા રુક્મવતી શુભા ।
તસ્યાં વજ્રો ઽનિરુદ્ધસ્ય વજ્રસ્ય તનયં શૃણુ ।
સાનોર્ વજ્રો ઽનિરુદ્ધસ્ય વજ્રસ્ ત્વ્ આદાવ્ અજાયત ॥

વજ્રાજ્ જજ્ઞે પ્રતિવહઃ સુચારુસ્ તસ્ય ચાત્મજઃ
અનમિત્રાચ્ છિનિર્ જજ્ઞે કનિષ્ઠાદ્ વૃષ્ણિનન્દનાત્ ॥

શિનેસ્ તુ સત્યવાગ્ જજ્ઞે સત્યકશ્ ચ મહારથઃ
સત્યકસ્યાત્મજઃ શૂરો યુયુધાનસ્ ત્વ્ અજાયત ॥

અસઙ્ગો યુયુધાનસ્ય ભૂમિસ્ તસ્યાભવત્ સુતઃ
ભૂમેર્ યુગંધરઃ પુત્ર ઇતિ વંશઃ સમાપ્યતે ॥