હરિવંશ · અધ્યાય 95

તતઃ સંપૂજ્ય ગરુડં વાસુદેવો ઽનુમાન્ય ચ
સખિવચ્ ચોપગૃહ્યૈનમ્ અનુજજ્ઞે ગૃહં પ્રતિ ॥

સો ઽનુજ્ઞાતો હિ સત્કૃત્ય પ્રણમ્ય ચ જનાર્દનમ્
ઊર્ધ્વમ્ આચક્રમે પક્ષી યથેષ્ટં ગગનેચરઃ ॥

સ પક્ષવાતસંક્ષુબ્ધં સમુદ્રં મકરાલયમ્
કૃત્વા વેગેન મહતા યયૌ પૂર્વં મહોદધિમ્ ॥

કૃત્યકાલ ઉપસ્થાસ્ય ઇત્ય્ ઉક્ત્વા ગરુડે ગતે
કૃષ્ણો દદર્શ પિતરં વૃદ્ધમ્ આનકદુંદુભિમ્ ॥

ઉગ્રસેનં ચ રાજાનં બલદેવં ચ માધવઃ
કાશ્યં સાંદીપનિં ચૈવ બ્રહ્મગાર્ગ્યં તથૈવ ચ ॥

અન્યાંશ્ ચ વૃદ્ધાન્ વૃષ્ણીનાં તાંશ્ ચ ભોજાન્ધકાંસ્ તથા
રત્નપ્રવેકૈર્ દાશાર્હો વીર્યલબ્ધૈસ્ તદાર્ચયત્ ॥

હતા બ્રહ્મદ્વિશઃ સર્વે યજન્ત્ય્ અન્ધકવૃષ્ણયઃ
રણાત્ પ્રતિનિવૃત્તો ઽયમ્ અક્ષતો મધુસૂદનઃ ॥

ઇતિ ચત્વરરથ્યાસુ દ્વારવત્યાં સુપૂજિતઃ
ચાક્રિકો ઘોષયામ્ આસ પુરુષો મૃષ્ટકુણ્ડલઃ ॥

તતઃ સાંદીપનિં પૂર્વમ્ ઉપગમ્ય જનાર્દનઃ
વવન્દે વૃષ્ણિનૃપતિમ્ આહુકં વિનયાન્વિતઃ ॥

અથાશ્રુપરિપૂર્ણાક્ષમ્ આનન્દગતચેતસમ્
વવન્દે સહ રામેણ પિતરં વાસવાનુજઃ ॥

તતઃ શેષાન્ અભિક્રમ્ય સત્કૃત્ય ચ યથાર્હતઃ
સર્વેષાં નામ જગ્રાહ દાશાર્હાણામ્ અધોક્ષજઃ ॥

તતઃ સર્વાણિ દિવ્યાનિ સર્વરત્નમયાનિ ચ
આસનાગ્ર્યાણિ વિવિશુર્ ઉપેન્દ્રપ્રમુખાસ્ તદા ॥

તતસ્ તદ્ ધનમ્ અક્ષય્યં કિંકરૈર્ યત્ સમાહૃતમ્
સભાં સમાનયામ્ આસુઃ પુરુષાઃ કૃષ્ણશાસનાત્ ॥

તતઃ સ માનયામ્ આસ દાશાર્હાન્ યદુસત્તમાન્
સર્વાન્ દુંદુભિશબ્દેન પૂજયિષ્યઞ્ જનાર્દનઃ ॥

તામ્ આસનવતીં રમ્યાં મણિવિદ્રુમતોરણામ્
સુદાશાર્હીં સુદાશાર્હા વિવિશુઃ કૃષ્ણશાસનાત્ ॥

તતઃ પુરુષસિંહૈઃ સા યદુભિઃ સર્વતો વૃતા
સર્વાર્થગુણસંપન્ના સા સભા ભરતર્ષભ ।
શુશુભે ઽભ્યધિકં શુભ્રા સિંહૈર્ ગિરિગુહા યથા ॥

રામેણ સહ ગોવિન્દઃ કાઞ્ચનં મહદ્ આસનમ્
ઉગ્રસેનં પુરસ્કૃત્ય ભેજે વૃષ્ણિપુરસ્કૃતઃ ॥

તત્રોપવિષ્ટાંસ્ તાન્ વીરાન્ યથાપ્રીતિ યથાવયઃ
સમાભાષ્ય યદુશ્રેષ્ઠાન્ ઉવાચ મધુસૂદનઃ ॥