હરિવંશ · અધ્યાય 94

એવમ્ આલોકયામ્ આસ દ્વારકાં વૃષભેક્ષણઃ
અપશ્યત્ સ્વગૃહં કૃષ્ણઃ પ્રાસાદશતશોભિતમ્ ॥

મણિસ્તમ્ભસહસ્રાણામ્ અયુતૈર્ વિધૃતં સિતમ્
તોરણૈર્ જ્વલનપ્રખ્યૈર્ મણિવિદ્રુમરાજતૈઃ
તત્ર તત્ર પ્રભાસદ્ભિશ્ ચિત્રકાઞ્ચનવેદિકૈઃ ॥

પ્રાસાદસ્ તત્ર સુમહાન્ કૃષ્ણોપસ્થાનિકો ઽભવત્
સ્ફાટિકસ્તમ્ભવિધૃતો વિસ્તીર્ણઃ સર્વકાઞ્ચનઃ ॥

પદ્માકુલજલોપેતા રક્તસૌગન્ધિકોત્પલાઃ
મણિહેમનિભાશ્ ચિત્રા રત્નસોપાનભૂષિતાઃ ॥

મત્તબર્હિણસંઘૈશ્ ચ કોકિલૈશ્ ચ સદામદૈઃ
બભૂવુઃ પરમોપેતા વાપ્યશ્ ચ વિકચોત્પલાઃ ॥

વિશ્વકર્મકૃતઃ શૈલઃ પ્રાકારસ્ તસ્ય વેશ્મનઃ
વ્યક્તકિષ્કુશતોત્સેધઃ પરિખાયૂથવેષ્ટિતઃ ॥

તદ્ ગૃહં વૃષ્ણિસિંહસ્ય નિર્મિતં વિશ્વકર્મણા
મહેન્દ્રવેશ્મપ્રતિમં સમન્તાદ્ અર્ધયોજનમ્ ॥

તતસ્ તં પાણ્ડુરં શૌરિર્ મૂર્ધ્નિ તિષ્ઠન્ ગરુત્મતઃ
પ્રીતઃ શઙ્ખમ્ ઉપાધ્માસીદ્ દ્વિષતાં લોમહર્ષણમ્ ॥

તસ્ય શઙ્ખસ્ય શબ્દેન સાગરશ્ ચુક્ષુભે ભૃશમ્
રરાસ ચ નભઃ કૃત્સ્નં તચ્ ચિત્રમ્ અભચત્ તદા ॥

પાઞ્ચજન્યસ્ય નિર્ઘોષં સંશ્રુત્ય કુકુરાન્ધકાઃ
વિશોકાઃ સમપદ્યન્ત ગરુડસ્ય ચ દર્શનાત્ ॥

શઙ્ખચક્રગદાપાણિં ગરુડસ્યોપરિ સ્થિતમ્
દૃષ્ટ્વા જહૃષિરે ભૌમા ભાસ્કરોપમતેજસમ્ ॥

તતસ્ તૂર્યપ્રણાદશ્ ચ ભેરીણાં ચ મહાસ્વનઃ
સિંહનાદશ્ ચ સંજજ્ઞે સર્વેષાં પુરવાસિનામ્ ॥

તતઃ સર્વે દશાર્હાશ્ ચ સર્વે ચ કુકુરાન્ધકાઃ
પ્રીયમાણાઃ સમાજગ્મુર્ આલોક્ય મધુસૂદનમ્ ॥

વસુદેવં પુરસ્કૃત્ય ભેરીશઙ્ખરવૈઃ સહ
ઉગ્રસેનો યયૌ રાજા વાસુદેવનિવેશનમ્ ॥

અનન્દિની પર્યચરત્ સ્વેષુ વેશ્મસુ દેવકી
રોહિણી ચ યથોદ્દેશમ્ આહુકસ્ય ચ યાઃ સ્ત્રિયઃ ॥

તતઃ કૃષ્ણઃ સુપર્ણેન સ્વં નિવેશનમ્ અભ્યયાત્
ચચાર ચ યથોદ્દેશમ્ ઈશ્વરાનુચરો હરિઃ ॥

અવતીર્ય ગૃહદ્વારિ કૃષ્ણસ્ તુ યદુનન્દનઃ
યથાર્હં પૂજયામ્ આસ યાદવાન્ યાદવર્ષભઃ ॥

રામાહુકગદાક્રૂર પ્રદ્યુમ્નાદિભિર્ અર્ચિતઃ
પ્રવિવેશ ગૃહં શૌરિર્ આદાય મણિપર્વતમ્ ॥

તં ચ શક્રસ્ય દયિતં પારિજાતં મહાદ્રુમમ્
પ્રવેશયામ્ આસ ગૃહં પ્રદ્યુમ્નો રુક્મિણીસુતઃ ॥

તે ઽન્યોન્યં દદૃશુર્ ભૌમા દેહબન્ધાન્ અમાનુષાન્
પારિજાતપ્રભાવેન તતો મુમુદિરે જનાઃ ॥

તૈઃ સ્તૂયમાનો ગોવિન્દઃ પ્રહૃષ્ટૈર્ યાદવેશ્વરૈઃ
પ્રવિવેશ ગૃહં શ્રીમાન્ વિહિતં વિશ્વકર્મણા ॥

તતો ઽન્તઃપુરમધ્યે તચ્ છિખરં મણિપર્વતમ્
ન્યવેશયદ્ અમેયાત્મા વૃષ્ણિભિઃ સહિતો ઽચ્યુતઃ ॥

તં ચ દિવ્યં દ્રુમશ્રેષ્ઠં પારિજાતમ્ અમિત્રજિત્
અર્ચ્યમ્ અર્ચિતમ્ અવ્યગ્રમ્ ઇષ્ટે દેશે ન્યવેશયત્ ॥

અનુજ્ઞાય તતો જ્ઞાતીન્ કેશવઃ પરવીરહા
તાઃ સ્ત્રિયઃ પૂજયામ્ આસ સંક્ષિપ્તા નરકેણ યાઃ ॥

વસ્ત્રૈર્ આભરણૈર્ ભોગૈર્ દાસીભિર્ ધનસંચયૈઃ
હારૈશ્ ચન્દ્રાંશુસંકાશૈર્ મણિભિશ્ ચ મહાપ્રભૈઃ ॥

પૂર્વમ્ અભ્યર્ચિતાશ્ ચૈવ વસુદેવેન તાઃ સ્ત્રિયઃ
વેદક્યા સહ રોહિણ્યા રેવત્યા ચાહુકેન ચ ॥

સત્યભામોત્તમા સ્ત્રીણાં સૌભાગ્યેનાભવત્ તદા
કુટુમ્બસ્યેશ્વરી ત્વ્ આસીદ્ રુક્મિણી ભીષ્મકાત્મજા ॥

તાસાં યથાર્હં હર્મ્યાણિ પ્રાસાદશિખરાણિ ચ
આદિદેશ ગૃહાન્ કૃષ્ણઃ પરિબર્હાંશ્ ચ પુષ્કલાન્ ॥