હરિવંશ · અધ્યાય 80

કસ્ય ચિત્ ત્વ્ અથ કાલસ્ય રાજા રાજગૃહેશ્વરઃ
શુશ્રાવ નિહતં કંસં જરાસંધઃ પ્રતાપવાન્ ॥

આજગામ ષડઙ્ગેન બલેન મહતા વૃતઃ
કૃષ્ણસ્ય વધમ્ અન્વિચ્છન્ મધુરામ્ અન્વવર્તત ।
જિઘાંસુર્ હિ યદૂન્ ક્રુદ્ધઃ કંસસ્યાપચિતિં ચરન્ ॥

અસ્તિઃ પ્રાપ્તિશ્ ચ નામ્નાસ્ તાં માગધસ્ય સુતે નૃપ
તે દ્વે ચ કંસરાજાય દદૌ હૃષ્ટઃ સ માગધઃ ॥
તેન તે વિધવે સ્યાતામ્ ઉભે કૃષ્ણેન માગધે ।
જીવત્ય્ એવ તથા રાજન્ વીરે રાજ્ઞાં પુરોગમે ।
જરાસંધસ્ય કલ્યાન્યૌ પીનશ્રોણિપયોધરે
ઉભે કંસસ્ય તે ભાર્યે પ્રાદાદ્ બાર્હદ્રથો નૃપઃ ॥

સ તાભ્યાં મુમુદે રાજા બધ્વા પિતરમ્ આહુકમ્
સમાશ્રિત્ય જરાસંધમ્ અનાદૃત્ય ચ યાદવાન્
શૂરસેનેશ્વરો રાજા યથા તે બહુશો શ્રુતઃ ॥

જ્ઞાતિકાર્યાર્થસિદ્ધ્યર્થમ્ ઉગ્રસેનહિતે સ્થિતઃ
વસુદેવો ઽભવન્ નિત્યં કંસો ન મમૃષે ચ તમ્ ॥

રામકૃષ્ણૌ વ્યપાશ્રિત્ય હતે કંસે દુરાત્મનિ
ઉગ્રસેનો ઽભવદ્ રાજા ભોજવૃષ્ણ્યન્ધકૈર્ વૃતઃ ॥

દુહિતૃભ્યાં જરાસંધઃ પ્રિયાભ્યાં બલવાન્ નૃપઃ
પ્રિયાર્થં વીરપત્નીભ્યામ્ ઉપાયાન્ મથુરાં તતઃ
સ તદ્ અપ્રિયમ્ આકર્ણ્ય શોકામર્ષયુતો નૃપઃ ।
અયાદવીં મહીં કર્તું ચક્રે પરમમ્ ઉદ્યમમ્ ॥
અક્ષૌહિણીભિર્ વિંશત્યા તિસૃભિશ્ ચાપિ સંયુતઃ ।
યદુરાજધાનીં મથુરાં રોદ્ધુમ્ અભ્યાગતો નૃપઃ ।
કૃત્વા સર્વસમુદ્યોગં ક્રોધાદ્ અભિયયૌ યદૂન્ ॥

પ્રતાપાવનતા યે હિ જરાસંધસ્ય પાર્થિવાઃ
મિત્રાણિ જ્ઞાતયશ્ ચૈવ સંયુક્તાઃ સુહૃદસ્ તથા ॥

ત એનમ્ અન્વયુઃ સર્વે સૈન્યૈઃ સમુદિતૈર્ વૃતાઃ
યે નૃપાઃ પર્વતાત્ તસ્માદ્ ગોમન્તાદ્ વ્રીળિતા ગતાઃ ।
તે ચ સર્વે યદૂન્ હન્તું જરાસંધં સમન્વયુઃ ।
મહેષ્વાસા મહાવીર્યા જરાસંધપ્રિયૈષિણઃ ॥

કારૂષો દન્તવક્ત્રશ્ ચ ચેદિરાજશ્ ચ વીર્યવાન્
કલિઙ્ગાધિપતિશ્ ચૈવ પૌણ્ડ્રશ્ ચ બલિનાં વરઃ
આહ્વૃતિઃ કૌશિકશ્ ચૈવ ભીષ્મકશ્ ચ નરાધિપઃ ॥

પુત્રશ્ ચ ભીષ્મકસ્યાપિ રુક્મી મુખ્યો ધનુર્ભૃતામ્
વાસુદેવાર્જુનાભ્યાં યઃ સ્પર્ધતે સ્મ સદા બલે ॥

વેણુદારિઃ શ્રુતર્વા ચ ક્રાથશ્ ચૈવાંશુમાન્ અપિ
અઙ્ગરાજશ્ ચ બલવાન્ વઙ્ગાનામ્ અધિપસ્ તથા ॥

કૌસલ્યઃ કાશિરાજશ્ ચ દશાર્ણાધિપતિસ્ તથા
સુહ્મેશ્વરશ્ ચ વિક્રાન્તો વિદેહાધિપતિસ્ તથા ॥

મદ્રરાજશ્ ચ બલવાંસ્ ત્રિગર્તાનામ્ અથેશ્વરઃ
સાલ્વરાજશ્ ચ વિક્રાન્તો દરદશ્ ચ મહાબલઃ ॥

યવનાધિપતિશ્ ચૈવ ભગદત્તશ્ ચ વીર્યવાન્
સૌવીરરાજઃ શૈબ્યશ્ ચ પાણ્ડ્યશ્ ચ બલિનાં વરઃ
ગાન્ધારરાજઃ સુબલો નગ્નજિચ્ ચ મહાબલઃ ॥

એતે ચાન્યે ચ રાજાનો બલવન્તો મહારથાઃ
તમ્ અન્વયુર્ જરાસંધં વિદ્વિષન્તો જનાર્દનમ્ ॥

તે શૂરસેનાન્ આવિશ્ય પ્રભૂતયવસેન્ધનાન્
ઊષુઃ સંરુધ્ય મથુરાં પરિક્ષિપ્ય બલૈસ્ તદા ॥