હરિવંશ · અધ્યાય 25

પૌરવી રોહિણી નામ બાહ્લિકસ્યાત્મજા નૃપ
જ્યેષ્ઠા પત્ની મહારાજ દયિતાનકદુન્દુભેઃ ॥

લેભે જ્યેષ્ઠં સુતં રામં શારણં શઠમ્ એવ ચ
દુર્દમં દમનં શ્વભ્રં પિણ્ડારકકુશીનરૌ ॥

ચિત્રાં નામ કુમારીં ચ રોહિણીતનયા નવ
ચિત્રા સુભદ્રેતિ પુનર્ વિખ્યાતા કુરુનન્દન ॥

વસુદેવાચ્ ચ દેવક્યાં જજ્ઞે શૌરિર્ મહાયશાઃ
કીર્તિમન્તં સુષેણં ચ ભદ્રસેનમ્ ઉદારધી ।
મૃત્યું સમર્દનં ભદ્રં સંકર્ષણમ્ અહીશ્વરમ્ ।
વિપુલં તેષ્વ્ અષ્ટતમો સ્વયમ્ એવ હરિઃ કિલ ।
રામાચ્ ચ નિશઠો જજ્ઞે રેવત્યાં દયિતઃ સુતઃ ॥

સુભદ્રાયાં રથી પાર્થાદ્ અભિમન્યુર્ અજાયત
અક્રૂરાત્ કાશિકન્યાયાં સત્યકેતુર્ અજાયત ॥

વસુદેવસ્ય ભાર્યાસુ મહાભાગાસુ સપ્તસુ
યે પુત્રા જજ્ઞિરે શૂરા નમતસ્ તાન્ નિબોધત ॥

ભોજશ્ ચ વિજયશ્ ચૈવ શાન્તિદેવાસુતાવ્ ઉભૌ
ઉપાસઙ્ગં વરં લેભે તનયંદેવરક્ષિતા ।
વૃકદેવઃ સુનામાયાં ગદશ્ ચાસ્યાઃ સુતાવ્ ઉભૌ
અગાવહં મહાત્માનં વૃકદેવી વ્યજાયત ॥

કન્યા ત્રિગર્તરાજસ્ય ભર્તા વૈ શિશિરાયણઃ
જિજ્ઞાસાં પૌરુષે ચક્રે ન ચસ્કન્દે ઽથ પૌરુષમ્ ॥

કૃષ્ણાયસસમપ્રખ્યો વર્ષે દ્વાદશમે તદા
મિથ્યાભિશપ્તો ગાર્ગ્યસ્ તુ મન્યુનાભિસમીરિતઃ
ઘોષકન્યામ્ ઉપાદાય મૈથુનાયોપચક્રમે ॥

ગોપાલી ત્વ્ અપ્સરાસ્ તસ્ય ગોપસ્ત્રીવેષધારિણી
ધારયામ્ આસ ગાર્ગ્યસ્ય ગર્ભં દુર્ધરમ્ અચ્યુતમ્ ॥

માનુષ્યાં ગર્ગ્યભાર્યાયાં નિયોગાચ્ છૂલપાણિનઃ
સ કાલયવનો નામ જજ્ઞે રાજા મહાબલઃ
વૃષપૂર્વાર્ધકાયાસ્ તમ્ અવહન્ વાજિનો રણે ॥

અપુત્રસ્ય સ રાજ્ઞસ્ તુ વવૃધે ઽન્તઃપુરે શિશુઃ
યવનસ્ય મહારાજ સ કાલયવનો ઽભવત્ ॥

સ યુદ્ધકામો નૃપતિઃ પર્યપૃચ્છદ્ દ્વિજોત્તમાન્
વૃષ્ણ્યન્ધકકુલં તસ્ય નારદો ઽકથયદ્ વિભુઃ ॥

અક્ષૌહિણ્યા તુ સૈન્યસ્ય મથુરામ્ અભ્યયાત્ તદા
દૂતં ચ પ્રેષયામ્ આસ વૃષ્ણ્યન્ધકનિવેશને ॥

તતો વૃષ્ણ્યન્ધકાઃ કૃષ્ણં પુરસ્કૃત્ય મહામતિમ્
સમેતા મન્ત્રયામ્ આસુર્ જરાસંધભયેન ચ ॥

કૃત્વા ચ નિશ્ચયં સર્વે પલાયનમ્ અરોચયન્
ત્યક્ત્વા ગૃહાન્ ધનં સર્વે પલાયન્ત મનોરથમ્ ।
વિહાય મથુરાં રમ્યાં માનયન્તઃ પિનાકિનમ્
કુશસ્થલીં દ્વારવતીં નિવેશયિતુમ્ ઈપ્સવઃ ॥

ઇતિ કૃષ્ણસ્ય જન્મેદં યઃ શુચિર્ નિયતેન્દ્રિયઃ
પર્વસુ શ્રાવયેદ્ વિદ્વાન્ નિરૃણઃ સ સુખી ભવેત્ ॥