હરિવંશ · અધ્યાય 14

આસન્ પૂર્વયુગે તાત ભરદ્વાજાત્મજા દ્વિજાઃ
યોગધર્મમ્ અનુપ્રાપ્ય ભ્રષ્ટા દુશ્ચરિતેન વૈ ॥

અપભ્રંશમ્ અનુપ્રાપ્તા યોગધર્માપચારિણઃ
મહતસ્ તમસઃ પારે માનસસ્ય વિસંજ્ઞિતાઃ ॥

તમ્ એવાર્થમ્ અનુધ્યાન્તો નષ્ટમ્ અપ્સ્વ્ ઇવ મોહિતાઃ
અપ્રાપ્ય યોગં તે સર્વે સંયુક્તાઃ કાલધર્મણા ॥

તતસ્ તે યોગવિભ્રષ્ટા દેવેષુ સુચિરોષિતાઃ
જાતાઃ કૌશિકદાયાદાઃ કુરુક્ષેત્રે નરર્ષભ ॥

હિંસયા વિચરિષ્યન્તો ધર્મં પિતૃકૃતેન વૈ
તતસ્ તે પુનર્ આજાતિં ભ્રષ્ટાઃ પ્રાપ્સ્યન્તિ કુત્સિતાં ॥

તેષાં પિતૃપ્રસાદેન પૂર્વજાતિકૃતેન ચ
સ્મૃતિર્ ઉત્પત્સ્યતે પ્રાપ્ય તાં તાં જાતિં જુગુપ્સિતામ્ ॥

તે ધર્મચારિણો નિત્યં ભવિષ્યન્તિ સમાહિતાઃ
બ્રાહ્મણ્યં પ્રતિલપ્સ્યન્તિ તતો ભૂયઃ સ્વકર્મણા ॥

તતશ્ ચ યોગં પ્રાપ્સ્યન્તિ પૂર્વજાતિકૃતં પુનઃ
ભૂયઃ સિદ્ધિમ્ અનુપ્રાપ્તાઃ સ્થાનં પ્રાપ્સ્યન્તિ શાશ્વતમ્ ॥

એવં ધર્મે ચ તે બુદ્ધિર્ ભવિષ્યતિ પુનઃ પુનઃ
યોગધર્મે ચ નિરતઃ પ્રાપ્સ્યસે સિદ્ધિમ્ ઉત્તમામ્ ॥

યોગધર્માદ્ ધિ ધર્મજ્ઞ ન ધર્મો ઽસ્તિ વિશેષવાન્
વરિષ્ઠં સર્વધર્માણાં તં સમાચર ભાર્ગવ ॥

કાલસ્ય પરિણામેન લઘ્વાહારો જિતેન્દ્રિયઃ
તત્પરઃ પ્રયતઃ શ્રાદ્ધી યોગધર્મમ્ અવાપ્સ્યસિ
ઇત્ય્ ઉક્ત્વા ભગવાન્ દેવસ્ તત્રૈવાન્તરધીયત ॥

અષ્ટાદશાનાં વર્ષાણામ્ એકાહમ્ ઇતિ મે મતિઃ
ઉપાસતશ્ ચ દેવેશં વર્ષાણ્ય્ અષ્ટાદશૈવ મે ॥

પ્રસાદાત્ તસ્ય દેવસ્ય ન ગ્લાનિર્ અભવત્ તદા
ન ક્ષુત્પિપાસે કાલં વા જાનામિ સ્મ તદાનઘ
પશ્ચાચ્ છિષ્યસકાશાત્ તુ કાલઃ સંવિદિતો મમ ॥