હરિવંશ · અધ્યાય 114

જનમેજયસ્ય કે પુત્રાઃ પઠ્યન્તે લોમહર્ષણે
હરિવંશસ્ય શેષસ્ય કથાં પાપપ્રણાશનીમ્ ।
કસ્મિન્ પ્રતિષ્ઠિતો વંશઃ પાણ્ડવાનાં મહાત્મનામ્ ॥

પારિક્ષિતસ્ય કાશ્યાયાં દ્વૌ પુત્રૌ સંબભૂવતુઃ
ચન્દ્રાપીડશ્ ચ નૃપતિઃ સૂર્યાપીડશ્ ચ મોક્ષવિત્ ॥

ચન્દ્રાપીડસ્ય પુત્રાણાં શતમ્ ઉત્તમધન્વિનામ્
જનમેજય ઇત્ય્ એવ ક્ષત્રં ભુવિ પરિશ્રુતમ્ ॥

તેષાં જ્યેષ્ઠસ્ તુ રાજાસીત્ પુરે વારણસાહ્વયે
સત્યકર્ણો મહાબાહુર્ યજ્વા વિપુલદક્ષિણઃ ॥

સત્યકર્ણસ્ય દાયાદઃ શ્વેતકર્ણઃ પ્રતાપવાન્
અપુત્રઃ સ તુ ધર્માત્મા પ્રવિવેશ તપોવનમ્ ॥

તસ્માદ્ વનગતાદ્ ગર્ભં યાદવી પ્રત્યપદ્યત
સુચારોર્ દુહિતા સુભ્રૂર્ માલિની ભ્રાતૃમાલિનિ ॥

સ ત્વ્ અજન્મનિ ગર્ભસ્ય શ્વેતકર્ણઃ પ્રજેશ્વરઃ
અન્વગચ્છત તં પૂર્વૈર્ મહાપ્રસ્થાનમ્ અચ્યુતમ્ ॥

સા દૃષ્ટ્વા સંપ્રયાતં તં માલિની પૃષ્ઠતો ઽન્વગાત્
પથિ સા સુષુવે સુભ્રૂર્ વને રાજીવલોચનમ્ ॥

તમ્ અપાશ્ય ચ તત્રૈવ રાજાનં સાન્વગચ્છત
પતિવ્રતા મહાભાગા દ્રૌપદીવ પુરા પતીન્ ॥

સુકુમારઃ કુમારો ઽસૌ ગિરિકુઞ્જે રુરોદ હ
દયાર્થં તસ્ય મેઘાસ્ તુ પ્રાદુરાસન્ મહાત્મનઃ ॥

શ્રવિષ્ઠાયાશ્ ચ પુત્રૌ દ્વૌ પૈપ્પલાદૌ ચ તૌ દ્વિજૌ
દૃષ્ટ્વા કૃપાન્વિતૌ ગૃહ્ય તં પ્રક્ષાલયતાં જલે ॥

વિઘૃષ્ટે તસ્ય તે પાર્શ્વે ખેલેન રુધિરસ્રવે
અજશ્યામૌ ચ પાર્શ્વૌ તાવ્ ઉભાવ્ અપિ સમાહિતૌ ॥

તથૈવ ચ સમારૂઢાવ્ અજપાર્શ્વસ્ તતો ઽભવત્
આજશ્યામસ્ય તે પાર્શ્વે રૂઢે વૈ સંઅભૂવતુઃ ।
તં તથૈવ ચ તિષ્ઠન્તં અજપાર્શ્વે કુમારકમ્ ।
તતો ઽજપાર્શ્વ ઇતિ તૌ ચક્રાતે તસ્ય નામ હ ॥

સ તુ વેમકશાલાયાં ઉભાભ્યામ્ અભિવર્ધિતઃ ॥

વેમકસ્ય તુ ભાર્યા તમ્ ઉદ્વહત્ પુત્રકારણાત્
સેવકસ્ય તુ તાં ભાર્યામ્ ઊહતુસ્ તસ્ય કારણાત્ ।
વેમક્યાઃ સ તુ પુત્રો ઽભૂદ્ બ્રાહ્મણૌ સુચિવૌ ચ તૌ ॥

તેષાં પુત્રાશ્ ચ પૌત્રાશ્ ચ યુગપત્ તુલ્યજીવિનઃ
સ એષ પૌરવો વંશઃ પાણ્ડવાનાં પ્રતિષ્ઠિતઃ ॥

શ્લોકો ઽપિ ચાત્ર ગીતો ઽયં નાહુષેણ યયાતિના
જરાસંક્રમણે પૂર્વં તદા પ્રીતેન ધીમતા ॥

અચન્દ્રાર્કગ્રહા ભૂમિર્ ભવેદ્ અપિ ન સંશયઃ
અપૌરવા ન તુ મહી ભવિષ્યતિ કદાચન ॥