ગોરક્ષશતક (અન્ય આવૃત્તિ) · શ્લોક 62-81

ક્ષય-કુષ્ઠ-ગુદાવર્ત ગુલ્માજીર્ણ-પુરોગમાઃ
તસ્ય દોષાઃ ક્ષયં યાન્તિ મહામુદ્રાં તુ યોઽભ્યસેત્ ॥

કથિતેયં મહામુદ્રા મહા-સિદ્ધિ-કરા નૄણામ્
ગોપનીયા પ્રયત્નેન ન દેયા યસ્ય કસ્યચિત્ ॥

કપાલ-કુહરે જિહ્વા પ્રવિષ્ટા વિપરીતગા
ભ્રુવોર્ અન્તર્ગતા દૃષ્ટિર્ મુદ્રા ભવતિ ખેચરી ॥

ન રોગો મરણં તન્દ્રા ન નિદ્રા ન ક્ષુધા તૃષા
ન ચ મૂર્ચ્છા ભવેત્ તસ્ય યો મુદ્રાં વેત્તિ ખેચરીમ્ ॥

પીડ્યતે ન સ રોગેણ લિપ્યતે ન ચ કર્મણા
બાધ્યતે ન સ કાલેન યો મુદ્રાં વેત્તિ ખેચરીમ્ ॥

ચિત્તં ચરતિ ખે યસ્માજ્ જિહ્વા ચરતિ ખે ગતા
તેનૈષા ખેચરી નામ મુદ્રા સિદ્ધૈર્ નિરૂપિતા ॥

બિન્દુ-મૂલં શરીરં તુ શિરાસ્ તત્ર પ્રતિષ્ઠિતાઃ
ભાવયન્તિ શરીરં યા આપાદ-તલ-મસ્તકમ્ ॥

ખેચર્યા મુદ્રિતં યેન વિવરં લમ્બિકોર્ધ્વતઃ
ન તસ્ય ક્ષરતે બિન્દુઃ કામિન્યાલિઙ્ગિતસ્ય ચ ॥

યાવદ્ બિન્દુઃ સ્થિતો દેહે તાવત્ કાલ-ભયં કુતઃ
યાવદ્ બદ્ધા નભો-મુદ્રા તાવદ્ બિન્દુર્ ન ગચ્છતિ ॥

ચલિતોઽપિ યદા બિન્દુઃ સમ્પ્રાપ્તશ્ ચ હુતાશનમ્
વ્રજત્ય્ ઊર્ધ્વં હૃતઃ શક્ત્યા નિરુદ્ધો યોનિ-મુદ્રયા ॥

સ પુનર્ દ્વિવિધો બિન્દુઃ પણ્ડુરો લોહિતસ્ તથા
પાણ્ડુરં શુક્રમ્ ઇત્ય્ આહુર્ લોહિતં તુ મહારાજઃ ॥

સિન્દૂર-દ્રવ-સઙ્કાશં રવિ-સ્થાને સ્થિતં રજઃ
શશિ-સ્થાને સ્થિતો બિન્દુસ્ તયોર્ ઐક્યં સુદુર્લભમ્ ॥

બિન્દુઃ શિવો રજઃ શક્તિર્ બિન્દુમ્ ઇન્દૂ રજો રવિઃ
ઉભયોઃ સઙ્ગમાદ્ એવ પ્રાપ્યતે પરમં પદમ્ ॥

વાયુના શક્તિ-ચારેણ પ્રેરિતં તુ મહા-રજઃ
બિન્દુનૈતિ સહૈકત્વં ભવેદ્ દિવ્યં વપુસ્ તદા ॥

શુક્રં ચન્દ્રેણ સંયુક્તં રજઃ સૂર્યેણ સંયુતમ્
તયોઃ સમરસૈકત્વં યોજાનાતિ સ યોગવિત્ ॥

ઉડ્ડીનં કુરુતે યસ્માદ્ અવિશ્રાન્તં મહા-ખગઃ
ઉડ્ડીયાનં તદ્ એવ સ્યાત્ તવ બન્ધોઽભિધીયતે ॥

ઉદરાત્ પશ્ચિમે ભાગે હ્ય્ અધો નાભેર્ નિગદ્યતે
ઉડ્ડીયનસ્ય બન્ધોઽયં તત્ર બન્ધો વિધીયતે ॥

બધ્નાતિ હિ સિરાજાલમ્ અધો-ગામિ શિરો-જલમ્
તતો જાલન્ધરો બન્ધઃ કણ્ઠ-દુઃખૌઘ-નાશનઃ ॥

જાલન્ધરે કૃતે બન્ધે કણ્ઠ-સંકોચ-લક્ષણે
પીયૂષં ન પતત્ય્ અગ્નૌ ન ચ વાયુઃ પ્રકુપ્યતિ ॥

પાર્ષ્ણિ-ભાગેન સમ્પીડ્ય યોનિમ્ આકુઞ્ચયેદ્ ગુદમ્
અપાનમ્ ઊર્ધ્વમ્ આકૃષ્ય મૂલ-બન્ધોઽભિધીયતે ॥