ગોરક્ષશતક (અન્ય આવૃત્તિ) · શ્લોક 42-61

હ-કારેણ બહિર્ યાતિ સ-કારેણ વિશેત્ પુનઃ
હંસ-હંસેત્ય્ અમું મન્ત્રં જીવો જપતિ સર્વદા ॥

ષટ્-શતાનિત્વહો-રાત્રે સહસ્રાણ્ય્ એક-વિંશતિઃ
એતત્ સઙ્ખ્યાન્વિતં મન્ત્ર જીવો જપતિ સર્વદા ॥

અજપા નામ ગાયત્રી યોગિનાં મોક્ષ-દાયિની
અસ્યાઃ સઙ્કલ્પ-માત્રેણ સર્વ-પાપૈઃ પ્રમુચ્યતે ॥

અનયા સદૃશી વિદ્યા અનયા સદૃશો જપઃ
અનયા સદૃશં જ્ઞાનં ન ભૂતં ન ભવિષ્યતિ ॥

કુન્દલિન્યાઃ સમુદ્ભૂતા ગાયત્રી પ્રાણ-ધારિણી
પ્રાણ-વિદ્યા મહા-વિદ્યા યસ્ તાં વેત્તિ સ યોગવિત્ ॥

કન્દોર્ધ્વં કુણ્ડલી શક્તિર્ અષ્ટધા કુણ્ડલાકૃતિ
બ્રહ્મ-દ્વાર-મુખં નિત્યં મુખેનાચ્છાદ્ય તિષ્ઠતિ ॥

યેન દ્વારેણ ગન્તવ્યં બ્રહ્મ-સ્થાનમ્ અનામયમ્
મુખેનાચ્છાદ્ય તદ્-દ્વારં પ્રસુપ્તા પરમેશ્વરી ॥

પ્રબુદ્ધા વહ્નિ-યોગેન મનસા મારુતા હતા
સૂચીવદ્ ગુણમ્ આદાય વ્રજત્ય્ ઊર્ધ્વં સુષુમ્ણયા ॥

પ્રસ્ફુરદ્-ભુજગાકારા પદ્મ-તન્તુ-નિભા શુભા
પ્રબુદ્ધા વહ્નિ-યોગેન વ્રત્ય ઊર્ધ્વં સુષુમ્ણયા ॥

ઉદ્ઘટયેત્ કપાતં તુ યથા કુઞ્ચિકયા હઠાત્
કુણ્ડલિન્યા તથા યોગી મોક્ષ-દ્વારં પ્રભેદયેત્ ॥

કૃત્વા સમ્પુટિતૌ કરૌ દૃઢતરં બદ્ધ્વા તુ પદ્માસનં ગાઢં વક્ષસિ સન્નિધાય ચિબુકં ધ્યાત્વા ચ તત્ પ્રેક્ષિતમ્
વારં વારમ્ અપાનમ્ ઊર્ધ્વમ્ અનિલં પ્રોચ્ચારયેત્ પૂરિતં મુઞ્ચન્ પ્રાણમ્ ઉપૈતિ બોધમ્ અતુલં શક્તિ-પ્રબોધાન્ નરઃ ॥

અઙ્ગાનાં મર્દનં કુર્યાચ્ છ્રમ-જાતેન વારિણા
કટ્વ્-અમ્લ-લવણ-ત્યાગી ક્ષીર-ભોજનમ્ આચરેત્ ॥

બ્રહ્મચારી મિતાહારી ત્યાગી યોગ-પરાયણઃ
અબ્દાદ્ ઊર્ધ્વં ભવેત્ સિદ્ધો નાત્ર કાર્યા વિચારણા ॥

સુસ્નિગ્ધં મધુરાહારં ચતુર્થાંશ-વિવર્જિતમ્
ભુજ્યતે સુર-સમ્પ્રીત્યૈ મિતાહારઃ સ ઉચ્યતે ॥

કન્દોર્ધ્વં કુણ્ડલી શક્તિર્ અષ્ટધા કુણ્ડલાકૃતિઃ
બન્ધનાય ચ મૂઢાનાં યોગિનાં મોક્ષદા સ્મૃતા ॥

મહામુદ્રાં નમો-મુદ્રામ્ ઉડ્ડિયાનં જલન્ધરમ્
મૂલ-બન્ધં ચ યો વેત્તિ સ યોગી સિદ્ધિ-ભાજનમ્ ॥

શોધનં નાડિ-જાલસ્ય ચાલનં ચન્દ્ર-સૂર્યયોઃ
રસાનાં શોષણં ચૈવ મહા-મુદ્રાભિધીયતે ॥

વક્ષો-ન્યસ્ત-હનુર્ નિપીડ્ય સુચિરં યોનિં ચ વામાઙ્ઘ્રિણા હસ્તાભ્યામ્ અવધારિતં પ્રસરિતં પાદં તથા દક્ષિણમ્
આપૂર્ય શ્વસનેન કુક્ષિ-યુગલં બદ્ધ્વા શનૈ રેચયેદ્ એષા પાતક-નાશિની સુમહતી મુદ્રા નૄણાં પ્રોચ્યતે ॥

ચન્દ્રાઙ્ગેન સમભ્યસ્ય સૂર્યાઙ્ગેનાભ્યસેત્ પુનઃ
યાવત્ તુલ્યા ભવેત્ સઙ્ખ્યા તતો મુદ્રાં વિસર્જયેત્ ॥

ન હિ પથ્યમ્ અપથ્યં વા રસાઃ સર્વેઽપિ નીરસાઃ
અપિ મુક્તં વિષં ઘોરં પીયૂષમ્ અપિ જીર્યતે ॥