ગીતગોવિન્દ (અન્ય આવૃત્તિ) · અધ્યાય 9

નોતે: {વ્યપોલયતુ વઃ શ્રેયાંસિ ઇતિ નિ- પાઠઃ.}
ઇતિ શ્રી-શ્રી-ગીત-ગોવિન્દે મહા-કાવ્યે ખણ્ડિતા-વર્ણને
વિલક્ષ-લક્ષ્મીપતિર્ નામ
અષ્ટમઃ સર્ગઃ
॥8॥
(9)
નવમઃ સર્ગઃ
મુગ્ધ-મુકુન્દઃ
તામ્ અથ મન્મથ-ખિન્નાં રતિ-રસ-ભિન્નાં વિષાદ-સમ્પન્નામ્ ।
અનુચિન્તિત-હરિ-ચરિતાં કલહાન્તરિતામ્ ઉવાચ રહસિ સખી

॥ પ્રબન્ધઃ 18 ॥
ગુર્જરી-રાગ-યતિ-તાલાભ્યાં ગીયતે ।
હરિર્ અભિસરતિ વહતિ મધુ-પવને ।
કિમ્ અપરમ્ અધિક-સુખં સખિ ભવને

માધવે મા કુરુ માનિનિ માનમ્ અયે ॥ ધ્રુવ-પદમ્ ॥
તાલ-ફલાદ્ અપિ ગુરુમ્ અતિસરસમ્ ।
કિં વિફલી-કુરુષે કુચ-કલશમ્

કતિ ન કથિતમ્ ઇદમ્ અનુપદમ્ અચિરમ્ ।
મા પરિહર હરિમ્ અતીશય-રુચિરમ્

કિમ્ ઇતિ વિષીદસિ રોદિષિ વિકલા ।
વિહસતિ યુવતી-સભા તવ સકલા

સજલ-નલિની-દલ-શીલિત-શયને ।
નોતે: {શીતલ-}
હરિમ્ અવલોકય સફલય નયને

જનયસિ મનસિ કિમ્ ઇતિ ગુરુ-ખેદમ્ ।
શૃણુ મમ વચનમ્ અનીહિત-ભેદમ્

હરિર્ ઉપયાતુ વદતુ બહુ-મધુરમ્ ।
કિમ્ ઇતિ કરોષિ હૃદયમ્ અતિવિધુરમ્

શ્રી-જયદેવ-ભણિતમ્ અતિલલિતં ।
સુખયતુ રસિક-જનં હરિ-ચરિતં

* * * * *
સ્નિગ્ધે યત્ પરુષાસિ પ્રણમતિ સ્તબ્ધાસિ યદ્ રાગિણિ દ્વેષ-સ્થાસિ યદ્ ઉન્મુખે વિમુખતાં યાતાસિ તસ્મિન્ પ્રિયે ।
તદ્ યુક્તં વિપરીત-કારિણિ તવ શ્રીખણ્ડ-ચર્ચા વિષં શીતાંશુસ્ તપનો હિમં હુતવહઃ ક્રીડા-મુદો યાતનાઃ

સાન્દ્રાનન્દ-પુરન્દરાદિ-દિવિષદ્-વૃન્દૈર્ અમન્દાદરાદ્ આનમ્રૈર્ મુકુટેન્દ્ર-નીલ-મણિભિઃ સન્દર્શિતેન્દિન્દિરમ્ ।
સ્વચ્છન્દં મકરન્દ-સુન્દર-ગલન્-મન્દાકિની-મેદુરં શ્રી-ગોવિન્દ-પદારવિન્દમ્ અશુભ-સ્કન્દાય વન્દામહે