ગીતગોવિન્દ (અન્ય આવૃત્તિ) · અધ્યાય 10

(10)
દશમઃ સર્ગઃ
ચતુર-ચતુર્-ભુજઃ
અત્રાન્તરેઽમસૃણ-રોષ-વશામ્ અપાર-નિઃશ્વાસ-નિઃસહ-મુખીં સુમુખીમ્ ઉપેત્ય ।
સવ્રીડમ્ ઈક્ષિત-સખી-વદનાં દિનાન્તે સાનન્દ-ગદ્ગદ-પદં હરિર્ ઇત્ય્ ઉવચ

॥ પ્રબન્ધઃ 19 ॥
દેશવરાડિ-રાગાષ્ટાતાલી-તાલાભ્યાં ગીયતે ।
વદસિ યદિ કિઞ્ચિદ્ અપિ દન્ત-રુચિ-કૌમુદી હરતિ દર-તિમિરમ્ અતિઘોરમ્ ।
સ્ફુરદ્-અધર-સીધવે તવ વદન-ચન્દ્રમા રોચયતુ લોચન-ચકોરં

પ્રિયે ચારુ-શીલે મુઞ્ચ મયિ માનમ્ અનિદાનં ।
સપદિ મદનાનલો દહતિ મમ માનસમ્
દેહિ મુખ-કમલ-મધુ-પાનં ॥ધ્રુવ-પદં ॥
સત્યમ્ એવાસિ યદિ સુદતિ મયિ કોપિની દેહિ ખર-નખર-શર-ઘાતમ્ ।
ઘટય ભુજ-બન્ધનં જનય રદ-ખણ્ડનં યેન વા ભવતિ સુખ-જાતં

ત્વમ્ અસિ મમ ભૂષણં ત્વમ્ અસિ મમ જીવનં ત્વમ્ અસિ મમ ભવ-જલધિ-રત્નમ્ ।
ભવતુ ભવતીહ મયિ સતતમ્ અનુરોધિની તત્ર મમ હૃદયમ્ અતિયત્નં

નીલ-નલિનાભમ્ અપિ તન્વિ તવ લોચનં ધારયતિ કોકનદ-રૂપં ।
કુસુમ-શર-બાણ-ભાવેન યદિ રઞ્જયસિ કૃષ્ણમ્ ઇદમ્ એતદ્-અનુરૂપમ્

સ્ફુરતુ કુચ-કુમ્ભયોર્ ઉપરિ મણિ-મઞ્જરી રઞ્જયતુ તવ હૃદય-દેશમ્ ।
રસતુ રશનાપિ તવ ઘન-જઘન-મણ્ડલે ઘોષયતુ મન્મથ-નિદેશમ્

સ્થલ-કમલ-ગઞ્જનં મમ હૃદય-રઞ્જનં જનિત-રતિ-રઙ્ગ-પરભાગમ્ ।
ભણ મસૃણ-વાણિ કરવાણિ ચરણ-દ્વયં સરસ-લસદ્-અલક્તક-રાગમ્

સ્મર-ગરલ-ખણ્ડનં મમ શિરસિ મણ્ડનં દેહિ પદ-પલ્લવમ્ ઉદારમ્ ।
નોતે: {ધેહિ ઇતિ નિ- પાઠઃ.}
જ્વલતિ મયિ દારુણો મદન-કદનારુણો હરતુ તદ્-ઉપાહિત-વિકારમ્

ઇતિ ચટુલ-ચાટુ-પટુ-ચારુ મુર-વૈરિણો રાધિકામ્ અધિ વચન-જાતમ્ ।
જયતુ જયદેવ-કવિ-ભારતી-ભૂષિતં માનિની-જન-જનિત-શાતમ્

નોતે: {જયતિ ઇતિ પાત્ઃઅઃ.}
નોતે: {જયતિ પદ્માવતી-રમણ-જયદેવ-કવિ-ભારતી-ભણિતમ્ અતિશાતમ્ ઇતિ ટીકા-ધૃત-પાઠાન્તરઃ.}
* * * * *
પરિહર કૃતાતઙ્કે શઙ્કાં ત્વયા સતતં ઘન-સ્તન-જઘનયાક્રાન્તે સ્વાન્તે પરાનવકાશિની ।
વિશતિ વિતનોર્ અન્યો ધન્યો ન કોઽપિ મમાન્તરં પ્રણયિનિ પરીરમ્ભારમ્ભે વિધેહિ વિધેયતામ્

મુગ્ધે વિધેહિ મયિ નિર્દય-દન્ત-દંશ-દોર્-વલ્લિ-બન્ધ-નિવિડ-સ્તન-પીડનાનિ ।
ચણ્ડિ ત્વમ્ એવ મુદમ્ ઉદ્વહ પઞ્ચ-બાણ-ચાણ્ડાલ-કાણ્ડ-દલનાદ્ અસવઃ પ્રયાન્તુ

નોતે: {પ્રયાન્તિ}
શશિ-મુખિ તવ ભાતિ ભઙ્ગુર-ભ્રૂર્ યુવ-જન-મોહ-કરાલ-કાલ-સર્પી ।
તદ્-ઉદિત-ભય-ભઞ્જનાય યૂનાં ત્વદ્-અધર-સીધુ-સુધૈવ સિદ્ધ-મન્ત્રઃ

વ્યથયતિ વૃથા મૌનં તન્વિ પ્રપઞ્ચય પઞ્ચમં તરુણિ મધુરાલાપૈસ્ તાપં વિનોદય દૃષ્ટિભિઃ ।
સુમુખિ વિમુખી-ભાવં તાવદ્ વિમુઞ્ચ ન મુઞ્ચ માં સ્વયમ્ અતિશય-સ્નિગ્ધો મુગ્ધે પ્રિયોઽયમ્ ઉપસ્થિતઃ

બન્ધૂક-દ્યુતિ-બાન્ધવોઽયમ્ અધરઃ સ્નિગ્ધો મધૂક-ચ્છવિર્ ગણ્ડશ્ ચણ્ડિ ચકાસ્તિ નીલ-નલિન-શ્રી-મોચનં લોચનમ્ ।
નાસાભ્યેતિ તિલ-પ્રસૂન-પદવીં કુન્દાભ-દન્તિ પ્રિયે પ્રાયસ્ ત્વન્-મુખ-સેવયા વિજયતે વિશ્વં સ પુષ્પાયુધઃ

નોતે: {સેનયેતિ ટીકા-ધૃત-પાઠાન્તરઃ.}
દૃશૌ તવ મદાલસે વદનમ્ ઇન્દુ-સન્દીપનં ગતિર્ જન-મનોરમા વિજિત-રમ્ભં ઊરુ-દ્વયમ્ ।
નોતે: {વિધુત- ઇતિ હરિદાસ-સંસ્કરણે.}
રતિસ્ તવ કલાવતી રુચિર-ચિત્ર-લેખે ભ્રુવાવ્ અહો વિબુધ-યૌવતં વહસિ તન્વિ પૃથ્વી-ગતા

સ પ્રીતિં તનુતાં હરિઃ કુવલયાપીડેન સાર્ધં રણે રાધા-પીન-પયોધર-સ્મરણ-કૃત્-કુમ્ભેન સમ્ભેદવાન્ ।
નોતે: {પ્રીતિં વસ્ તનુતાં ઇતિ હરિદાસ-સંસ્કરણે.}
યત્ર સ્વિદ્યતિ મીલતિ ક્ષણમ્ અપિ ક્ષિપ્રં તદ્-આલોકન-વ્યામોહેન જિતં જિતં જિતમ્ અભૂત્ કંસસ્ય કોલાહલઃ