ગીતગોવિન્દ (અન્ય આવૃત્તિ) · અધ્યાય 2

નોતે: {સ્મૃત (?)}
॥ ઇતિ શ્રી-ગીત-ગોવિન્દે સામોદ-દામોદરો નામ પ્રથમઃ સર્ગઃ ॥
(2)
દ્વિતીયઃ સર્ગઃ
અક્લેશ-કેશવઃ
વિહરતિ વને રાધા સાધારણ-પ્રણયે હરૌ વિગલિત-નિજોત્કર્ષાદ્ ઈર્ષ્યા-વશેન ગતાઽન્યતઃ ।
ક્વચિદ્ અપિ લતા-કુઞ્જે ગુઞ્જન્-મધુ-વ્રત-મણ્ડલી મુખર-શિખરે લીન દીનાપ્ય્ ઉવાચ રહઃ સખીમ્

॥ પ્રબન્ધઃ 5 ॥
ગુર્જરી-રાગેણ યતિ-તાલેન ગીયતે ।
સઞ્ચરદ્-અધર-સુધા-મધુર-ધ્વનિ-મુખરિત-મોહન-વંશમ્ ।
ચલિત-દૃગ્-અઞ્ચલ-ચઞ્ચલ-મૌલિ-કપોલ-વિલોલ-વતંસમ્ ।
રાસે હરિમ્ ઇહ વિહિત-વિલાસં સ્મરતિ મનો મમ કૃત-પરિહાસમ્ ॥ ધ્રુ.

ચન્દ્રક-ચારુ-મયૂર-શિખણ્ડક-મણ્ડલ-વલયિત-કેશમ્ ।
પ્રચુર-પુરન્દર-ધનુર્-અનુરઞ્જિત-મેદુર-મુદિર-સુવેશમ્

ગોપ-કદમ્બ-નિતમ્બવતી-મુખ-ચુમ્બન-લમ્ભિત-લોભમ્ ।
બન્ધુજીવ-મધુરાધર-પલ્લવમ્ ઉલ્લસિત-સ્મિત-શોભમ્

વિપુલ-પુલક-ભુજ-પલ્લવ-વલયિત-બલ્લવ-યુવતિ-સહસ્રમ્ ।
કર-ચરણોરસિ મણિ-ગણ-ભૂષણ-કિરણ-વિભિન્ન-તમિસ્રમ્

જલદ-પટલ-ચલદ્-ઇન્દુ-વિનિન્દક-ચન્દન-તિલક-લલાટમ્ ।
પીન-પયોધર-પરિસર-મર્દન-નિર્દય-હૃદય-કપાટમ્

મણિ-મય-મકર-મનોહર-કુણ્ડલ-મણ્ડિત-ગણ્ડમ્ ઉદારમ્ ।
પીત-વસનમ્ અનુગત-મુનિ-મનુજ-સુરાસુર-વર-પરિવારમ્

વિશદ-કદમ્બ-તલે મિલિતં કલિ-કલુષ-ભયં શમયન્તમ્ ।
મામ્ અપિ કિમ્ અપિ તરલ-તરઙ્ગદ્-અનઙ્ગ-દૃશા મનસા રમયન્તમ્

શ્રી-જયદેવ-ભણિતમ્ અતિસુન્દર-મોહન-મધુ-રિપુ-રૂપમ્ ।
હરિ-ચરણ-સ્મરણં પ્રતિ સમ્પ્રતિ પુણ્યવતામ્ અનુરૂપમ્

* * * * *
ગણયતિ ગુણ-ગ્રામં ભામં ભ્રામાદ્ અપિ નેહતે વહતિ ચ પરિતોષં દોષં વિમુઞ્ચતિ દૂરતઃ ।
નોતે: {ભ્રામમ્}
યુવતિષુ વલત્-તૃષ્ણે કૃષ્ણે વિહારિણિ માં વિના પુનર્ અપિ મનો વામં કામં કરોતિ કરોમિ કિમ્

॥ પ્રબન્ધઃ 6 ॥
માલવ-ગૌડ-રાગેન એકતાલી-તાલેન ચ ગીયતે ।
નિભૃત-નિકુઞ્જ-ગૃહં ગતયા નિશિ રહસિ નિલીય વસન્તમ્ ।
ચકીત-વિલોકિત-સકલ-દિશા રતિ-રભસ-ભરેણ હસન્તમ્

સખિ હે કેશી-મથનમ્ ઉદારમ્
રમય મયા સહ મદન-મનોરથ-ભાવિતયા સ-વિકારમ્ ॥ધ્રુવમ્ ॥
પ્રથમ-સમાગમ-લજ્જિતયા પટુ-ચાટુ-શતૈર્ અનુકૂલમ્ ।
મૃદુ-મધુર-સ્મિત-ભાષિતયા શિથિલી-કૃત-જઘન-દુકૂલમ્

કીસલ-શયન-નિવેશિતયા ચિરમ્ ઉરસિ મમૈવ શયાનમ્ ।
કૃત-પરિરમ્ભણ-ચુમ્બનયા પરિરભ્ય કૃતાધર-પાનમ્

અલસ-નિમીલિત-લોચનયા પુલકાવલિ-લલિત-કપોલમ્ ।
શ્રમ-જલ-સકલ-કલેવરયા વર-મદન-મદાદ્ અતિલોલમ્

કોકિલ-કલ-રવ-કૂજિતયા જિત-મનસિજ-તન્ત્ર-વિચારમ્ ।
શ્લથ-કુસુમાકુલ-કુન્તલયા નખ-લિખિત-ઘન-સ્તન-ભારમ્

ચરણ-રણિત-મણિ-નૂપુરયા પરિપૂરિત-સુરત-વિતાનમ્ ।
મુખર-વિશૃઙ્ખલ-મેખલયા સ-કચ-ગ્રહ-ચુમ્બન-દાનમ્

રતિ-સુખ-સમય-રસાલસયા દર-મુકુલિત-નયન-સરોજમ્ ।
નિઃસહ-નિપતિત-તનુ-લતયા મધુસૂદનમ્ ઉદિત-મનોજમ્

શ્રી-જયદેવ-ભણિતમ્ ઇદમ્ અતિશય-મધુ-રિપુ-નિધુવન-શીલમ્ ।
સુખમ્ ઉત્કણ્ઠિત-ગોપ-વધૂ-કથિતં વિતનોતુ સલીલં

* * * * *
હસ્ત-સ્રસ્ત-વિલાસ-વંશમ્ અનૃજુ-ભ્રૂ-વલ્લિમદ્-બલ્લવી-વૃન્દોત્સારિ-દૃગન્ત-વીક્ષિતમ્ અતિસ્વેદાર્દ્ર-ગણ્ડ-સ્થલમ્ ।
મામ્ ઉદ્વીક્ષ્ય વિલજ્જિતં સ્મૃત-સુધા-મુગ્ધાનન-કાનને ગોવિન્દં વ્રજ-સુન્દરી-ગણ-વૃતં પશ્યામિ હૃષ્યામિ ચ

દુરાલોક-સ્તોક-સ્તવક-નવકાશોક-લતિકા-વિકાસઃ કાસારોપવન-પવનોઽપિ વ્યથયતિ ।
અપિ ભ્રામ્યદ્-ભૃઙ્ગી-રણિત-રમણીયા ન મુકુલ-પ્રસૂતિશ્ ચૂતાનાં સખિ શિખરિણીયં સુખયતિ

સકૂત-સ્મિતમ્ આકુલાકુલ-ગલદ્-ધમ્મિલ્લમ્ ઉલ્લાસિત-ભ્રૂ-વલ્લીકમ્ અલીક-દર્શિત-ભુજા-મૂલાર્ધ-હસ્ત-સ્તનમ્ ।
ગોપીનાં નિભૃતં નિરીક્ષ્ય ગમિતાકાઙ્ક્ષશ્ ચિરં ચિન્તયન્ન્ અન્તર્ મુગ્ધ-મનોહરં હરતુ વઃ ક્લેશં નવઃ કેશવઃ