ગૌરગઓવિન્દાર્ચનસ્મરણપદ્ધતિ · શ્લોક 261-280

અસૌ ચન્દન-સેવાઢ્યા વામ-મધ્યા ભવેત્ પુનઃ ।
ગૃહમ્ અસ્યા યાવટે તુ વયોમાનં ભવેત્ પુનઃ

સાર્ધ-વેદ-દિનૈર્ યુક્તં દ્વિ-માસં મનુ-હાયનમ્ (14-2-4 1।2) ।
માતા શ્રી-કરુણા પ્રોક્તા પિતા શ્રી-રઙ્ગસાગરઃ

પતિર્ વક્રેક્ષણઃ પ્રોક્તો હ્ય્ અસૌ ગૌર-રસે પુનઃ ।
ગોવિન્દાનન્દ-ઘોષાખ્યામ્ આપન્ના હિ કલૌ યુગે

ઉત્કણ્ઠિતા-લક્ષણં યથા (ઉન્ 5.79-80)--
અનાગસિ પ્રિયતમે ચિરયત્ય્ ઉત્સુકા તુ યા ।
વિરહોત્કણ્ઠિતા ભાવ-વેદિભિઃ સા સમીરિતા

અસ્યાસ્ તુ ચેષ્ટા હૃત્-તાપો વેપથુર્ હેતુ-તર્કણમ્ ।
અરતિર્ વાષ્પ-મોક્ષણ્ ચ સ્વાવસ્થા-કથનાદયઃ

ઉદાહરણં યથા (ઉન્ 5.81)--
સખિ કિમ્ અભવદ્ બદ્ધો રાધા-કટાક્ષ-ગુણૈર્ અયં
સમરમ્ અથવા કિં પ્રારબ્ધં સુરારિભિર્ ઉદ્ધુરૈઃ ।
અહહ બહુલાષ્ટમ્યાં પ્રાચી-મુખે ઽપ્ય્ ઉદિતે વિધૌ
વિધુ-મુખિ! ન યન્ માં સસ્માર વ્રજેશ્વર-નન્દનઃ

વામ-મધ્યા-લક્ષણોદાહરણે તૂક્તે; અસ્યા યૂથો યથા (શ્રી-કૃષ્ણ-ગણોદ્દેશે 1.248)
કલકણ્ઠી શશિકલા કમલા પ્રેમ-મઞ્જરી ।
માધવી મધુરા કામ-લતા કન્દર્પ-સુન્દરી

અસ્યા મન્ત્રોદ્ધારો યથા કિશોરી-તન્ત્રે--
લક્ષ્મીર્ અગ્નિ-રઙ્ગદેવી ઙે ઽન્તા વહ્નિ-પ્રિયા તતઃ ।
રઙ્ગદેવ્યાસ્ તુ મન્ત્રો ઽયમ્ અષ્ટાર્ણો રાગ-ભક્તિ-દઃ

મન્ત્રો યથા--શ્રીં રાં રઙ્ગદેવ્યૈ સ્વાહા ।
અસ્યા ધ્યાનં ચ તત્રૈવ--
રાજીવ-કિઞ્જલ્ક-સમાન-વર્ણાં
જબા-પ્રસૂનોપમ-વાસસ્-આઢ્યામ્ ।
શ્રીખણ્ડ-સેવા-સહિતાં વ્રજેન્દ્ર-
સૂનોર્ ભજે રાસ-ગ-રઙ્ગદેવીમ્

કુઞ્જો ઽસ્તિ પશ્ચિમે દલે ઽરુણ-વર્ણઃ સુશોભનઃ ।
તુઙ્ગવિદ્યાનન્દદો નામ્નેતિ વિખ્યાતિમ્ આગતઃ

નિત્યં તિષ્ઠતિ તત્રૈવ તુઙ્ગવિદ્યા સમુત્સુકા ।
વિપ્રલબ્ધાત્વમ્ આપન્ના શ્રી-કૃષ્ણે રતિ-યુક્ સદા

ચન્દ્ર-ચન્દન-ભૂયિષ્ઠ-કુઙ્કુમ-દ્યુતિ-શાલિની ।
પાણ્ડુ-મણ્ડન-વસ્ત્રેયં દક્ષિણ-પ્રખરોદિતા

મેધાયાં પૌષ્કરાજાતા પતિર્ અસ્યાસ્ તુ બાલિશઃ ।
નૃત્ય-ગીતાદિ-સેવાઢ્યા ગૃહમ્ અસ્યાસ્ તુ યાવટે

દ્વાવિંશતિ-દિનૈર્ યુક્તા દ્વિ-માસ-મનુ-હાયનાઃ (14-2-22)

અસ્યા વયઃ-પ્રમાણં સ્યાદ્ અસૌ ગૌર-રસે પુનઃ ।
વક્રેશ્વર ઇતિ ખ્યાતિમ્ આપન્ના હિ કલૌ યુગે

વિપ્રલબ્ધા-લક્ષણં યથા (ઉન્ 5.83-84)--
કૃત્વા સઙ્કેતમ્ અપ્રાપ્તે દૈવાજ્ જીવિત-વલ્લભે ।
વ્યથમાનાન્તરા પ્રોક્તા વિપ્રલબ્ધા મનીષિભિઃ ।
નિર્વેદ-ચિન્તા-ખેદાશ્રુ-મૂર્છા-નિઃશ્વસિતાદિ-ભાક્

ઉદાહરણં યથા--
વિન્દતિ સ્મ દિવમ્ ઇન્દુર્ ઇન્દિરા-*
નાયકેન સખિ વઞ્છિતા વયમ્ ।
કુર્મહે કિમ્ ઇહ શાધિ સાદરં
દ્રાગ્ ઇતિ ક્લમમગાન્ મૃગેક્ષણા

દક્ષિણા-લક્ષણં યથા (ઉન્ 8.38, 42)--
અસહા માન-નિર્બન્ધે નાયકે યુક્ત-વાદિની ।
સામભિસ્ તેન ભેદ્યા ચ દક્ષિણા પરિકીર્તિતા

તુઙ્ગવિદ્યાદિકા ચાત્ર દક્ષિણ-પ્રખરા ભવેત્

ઉદાહરણં યથા (શ્રી-ગીત-ગોવિન્દે 9.10)--
સ્નિગ્ધે યત્ પરુષાસિ યત્ પ્રણમતિ સ્તબ્ધાસિ યદ્ રાગિણિ
દ્વેષં યાસિ યદ્ ઉન્મુખે વિમુખતાં યાતાસિ તસ્મિન્ પ્રિયે ।
તદ્ યુક્તં વિપરીત-કારિણિ! તવ શ્રીખણ્ડ-ચર્ચા વિષં
શીતાંશુસ્ તપનો હિમં હુતવહઃ ક્રીડા-મુદો યાતનાઃ