ગરુડ પુરાણ · અધ્યાય 1.92

ઇતિ શ્રીગારુડે મહાપુરાણે પ્રથમાંશાખ્યે આચારકાણ્ડે હરિધ્યાનં નામૈકનવતિતમો ઽધ્યાયઃ
શ્રીગરુડમહાપુરાણમ્- 92
રુદ્રૌવાચ ।
વિષ્ણોર્ધ્યાનં પુનર્બ્રૂહિ શઙ્ખચક્રગદાધર ।
યેન વિજ્ઞાતમાત્રેણ કૃતકૃત્યો ભવેન્નરઃ

હરિરુવાચ ।
પ્રવક્ષ્યામિ હરેર્ધ્યાનં માયાતન્ત્રવિમર્દકમ્ ।
મૂર્તામૂર્તાદિભેદેન તદ્ધ્યાનં દ્વિવિધં હર

અમૂર્તં રુદ્ર કથિતં હન્ત મૂત્ત બ્રવીમ્યહમ્ ।
સૂર્યકોટિપ્રતીકાશો જિષ્ણુર્ભાજિષ્ણુરેકતઃ

કુન્દગોક્ષીરધવલો હરિર્ધ્યેયો મુમુક્ષુભિઃ ।
વિશાલેન સુસૌમ્યેન શઙ્ખેન ચ સમન્વિતઃ

સહસ્રાદિત્યતુલ્યેન જ્વાલામાલોગ્રરૂપિણા ।
ચક્રેણ ચાન્વિતઃ શાન્તો ગદાહસ્તઃ શુભાનનઃ

કિરીટેન મહાર્હેણ રત્નપ્રજ્વલિતેન ચ ।
સાયુધઃ સર્વગો દેવઃ સરોરુહધરસ્તથા

વનમાલાધરઃ શુભ્રઃ સમાંસો હેમભૂષણઃ ।
સુવસ્ત્રઃ શુદ્ધદેહશ્ચ સુકર્ણઃ પદ્મસંસ્થિતઃ

હિરણ્મયશરીરશ્ચ ચારુહારી શુભાઙ્ગદઃ ।
કેયૂરેણ સમાયુક્તો વનમાલાસમન્વિતઃ

શ્રીવત્સકૌસ્તુભયુતો લક્ષ્મીવન્દ્યેક્ષણાન્વિતઃ ।
અમિમાદિગુણૈર્યુક્તઃ સૃષ્ટિસંહારકારકઃ

મુનિધ્યેયો ઽસુરધ્યેયો દેવધ્યેયો ઽતિસુન્દરઃ ।
બ્રહ્માદિસ્તમ્બપર્યન્તભૂતજાતહૃદિસ્થિતઃ

સનાતનો ઽવ્યયો મેધ્યઃ સર્વાનુગ્રહકૃત્પ્રભુઃ ।
નારાયણો મહાદેવઃ સ્ફુરન્મકરકુણ્ડલઃ

સન્તાપનાશનો ઽભ્યર્ચ્યો મઙ્ગલ્યો દુષ્ટનાશનઃ ।
સર્વાત્મા સર્વરૂપશ્ચ સર્વગો ગ્રહનાશનઃ

ચાર્વઙ્ગુલીયસંયુક્તઃ સુદીપ્તનખ એવ ચ ।
શરણ્યઃ લસુખકારી ચ સૌમ્યરૂપો મહેશ્વરઃ

સર્વાલઙ્કારસંયુક્તશ્ચારુચન્દનચર્ચિતઃ ।
સર્વદેવસમાયુક્તઃ સર્વદેવપ્રિયઙ્કરઃ

સર્વલોકહિતૈષી ચ સર્વેશઃ સર્વભાવનઃ ।
આદિત્યમણ્ડલે સંસ્થો અગ્નિસ્થો વારિસંસ્થિતઃ

વાસુદેવો જગદ્ધાતા ધ્યેયો વિષ્ણુર્મુમુક્ષુભિઃ ।
વાસુદેવો ઽહમસ્મીતિ આત્મા ધ્યેયો હરિહરિઃ

ધ્યાયન્ત્યેવં ચ યે વિષ્ણું તે યાન્તિ પરમાં ગતિમ્ ।
યાજ્ઞવલ્ક્યઃ પુરા હ્યેવં ધ્યાત્વા વિષ્ણું સુરેશ્વરમ્

ધર્મોપદેશકર્તૃત્વં સંપ્રાપ્યાગાત્પરં પદમ્ ।
તસ્માત્ત્વમપિ દેવેશ ! વિષ્ણું ચિન્તય શઙ્કર !

વિષ્ણુધ્યાનં પઠેદ્યસ્તુ પ્રાપ્નોતિ પરમાં ગતિમ્