ગરુડ પુરાણ · અધ્યાય 1.75

ઇતિ શ્રીગારુડે મહાપુરાણે પૂર્વખણ્ડે પ્રથમાંશાખ્યે આચારકાણ્ડે પુષ્પરાગપરીક્ષણં નામ ચતુઃ સપ્તતિતમો ઽધ્યાયઃ
શ્રીગરુડમહાપુરાણમ્- 75
સૂત ઉવાચ ।
વાયુર્નખાન્દૈત્યપતેર્ગૃહીત્વા ચિક્ષેપ સત્પદ્મવનેષુ હૃષ્ટઃ ।
તતઃ પ્રસૂતં પવનોપપન્નં કર્કેતનં પૂજયતમં પૃથિવ્યામ્

વર્ણેન તદ્રુધિરસોમમધુપ્રકાશમાતામ્રપીતદહનોજ્જ્વલિતં વિભાતિ ।
નીલં પુનઃ ખલુ સિતં પરુષં વિભિન્નં વ્યાધ્યાદિદોષકરણેન ચ તદ્વિભાતિ

સ્નિગ્ધા વિશુદ્ધાઃ સમરાગિણશ્ચ આપીતવર્ણા ગુરવો વિચિત્રાઃ ।
ત્રાસવ્રણવ્યાલવિવર્જિતાશ્ચ કર્કેતનાસ્તે પરમં પવિત્રાઃ

પત્રેણ કાઞ્ચનમયેન તુ વેષ્ટયિત્વા તપ્તં યદા હુતવહે ભવતિ પ્રકાશમ્ ।
રોગપ્રણાશનકરં કલિનાશનં તદાયુષ્કરં કુલકરં ચ સુખપ્રદં ચ

એવંવિધં બહુગુણં મણિમાવહન્તિ કર્કેતનં શુભલઙ્કૃતયે નરા યે ।
તે પૂજિતા બહુધના બહુબાન્ધવાશ્ચ નિત્યોજ્જ્વલાઃ પ્રમુદિતા અપિતે ભવન્તિ

એકે ઽપનહ્ય વિકૃતાકુલનીલભાસઃ પ્રમ્લાનરાગલુલિતાઃ કલુષા વિરૂપાઃ ।
તેજો ઽતિદીપ્તિ કુલપુષ્ટિવિહીનવર્ણાઃ કર્કેતનસ્ય સદૃશં વપુરુદ્વહન્તિ

કર્કેતનં યદિ પરીક્ષિતવર્ણરૂપં પ્રત્યગ્રભાસ્વરદિવાકરસુપ્રકાશમ્ ।
તસ્યોત્તમસ્ય મણિ શાસ્ત્રવિદાં મહિમ્ના તુલ્યં તુ મૂલ્યમુદિતં તુલિતસ્ય કાર્યમ્