ગરુડ પુરાણ · અધ્યાય 1.66

ઇતિ શ્રીગારુડે મહાપુરાણે પૂર્વખણ્ડે પ્રથમાંશાખ્યે આચારકાણ્ડે જ્યોતિઃ શાસ્ત્રે સામુદ્રિકે સ્ત્રીનરલક્ષણં નામ પઞ્ચષષ્ટિતમો ઽધ્યાયઃ
શ્રીગરુડમહાપુરાણમ્- 66
હરિરુવાચ ।
નિર્લક્ષણા શુભા સ્યાચ્ચ ચક્રાઙ્કિતશિલાર્ચનાત્ ।
આદૌ સુદર્શનો મૂર્તિર્લક્ષ્મીનારાયણઃ પરઃ

ત્રિચક્રો ઽસાવચ્યુતઃ સ્યાચ્ચતુશ્ચક્રશ્ચતુર્ભુજઃ ।
વાસુદેવશ્ચ પ્રદ્યુમ્નસ્તતઃ સઙ્કર્ષણઃ સ્મૃતઃ

પુરુષોત્તમશ્ચાષ્ટમઃ સ્યાન્નવ્યૂહો દશાત્મકઃ ।
એકાદશો ઽનિરુદ્ધઃ સ્યાદ્દ્વાદશો દ્વાદશાત્મકઃ

અત ઊર્ધ્વમનન્તઃ સ્યાચ્છક્રે રેકાદિકૈઃ ક્રમાત્ ।
સુદર્શના લક્ષિતાશ્ચ પૂજિતાઃ સર્વકામદાઃ

શાલગ્રામશિલા યત્ર દેવો દ્વારવતીભવઃ ।
ઉભયોઃ સંગમો યત્ર તત્ર મુક્તિર્ન સંશયઃ

શાલગ્રામો દ્વારકા ચ નૈમિષં પુષ્કરં ગયા ।
વારાણસી પ્રયાગશ્ચ કુરુક્ષેત્રં ચ સૂકરમ્

ગઙ્ગા ચ નર્મદા ચૈવ ચન્દ્રભાગા સરસ્વતી ।
પુરુષોત્તમો મહાકાલસ્તીર્થાન્યેતાનિ શઙ્કર

સર્વપાપહરાણ્યેવ ભુક્તમુક્તિપ્રદાનિ વૈ ।
પ્રભવો વિભવઃ શુક્લઃ પ્રમોદો ઽથ પ્રજાપતિઃ

અઙ્ગિરાઃ શ્રીમુખો ભાવઃ યુવા ધાતા તથૈવ ચ ।
ઈશ્વરો બહુધાન્યશ્ચ પ્રમાથી વિક્રમો વિષુઃ

ચિત્રભાનુઃ સ્વબાનુશ્ચ તારણઃ પાર્થિવો વ્યયઃ ।
સર્વજિત્સર્વધારી ચ વિરોધી વિકૃતિઃ ખરઃ

નન્દનો વિજયશ્ચૈવ જયો મન્મથદુર્મુખૌ ।
હેમલમ્બો વિલંબશ્ચ વિકારઃ શર્વરી પ્લવઃ

શુભકૃચ્છોભનઃ ક્રોધી વિશ્વાવમુપરાભવૌ ।
પ્લવઙ્ગઃ કીલકઃ સૌમ્યઃ સાધારણવિરોધકૃત્

પરિધાવી પ્રમાદી ચ આનન્દો રાક્ષસો નલઃ ।
પિઙ્ગલઃ કાલસિદ્ધાર્થૌ રૌદ્રિર્વૈ દુર્મતિસ્તથા

દુન્દુભી રુધિરોદ્ગારી રક્તાક્ષઃ ક્રોધનો ઽક્ષયઃ ।
અશોભનાઃ શોભનાશ્ચ નામ્નૈવૈતે હિ વત્સરાઃ

કાલં વક્ષ્યામિ સંસિદ્ધ્યૈ રુદ્ર પઞ્ચસ્વરોદયાત્ ।
રાજા સા(મા) જા ઉદાસા ચ પીડા મૃત્યુસ્તથૈવ ચ

આ ઈ ઊ ઐ ઔ સ્વરાંશ્ચ લિખેત્પઞ્ચાગ્નિકોષ્ઠકે ।
ઊર્ધ્વતિર્યગ્ગતૈ રેખૈઃ ષડ્વહ્નિક્રમમાગતૈઃ

તિથી એકા ગ્નિકોષ્ઠેષુ ત્રયો રાજાથ સા (મા) જયાઃ ।
ઉદાસામૃત્યુપીડાશ્ચ કુજઃ સોમસુતઃ ક્રમાત્

ગુરુશુક્રૌ ચ મન્દશ્ચ રવિચન્દ્રૌ યથોદિતમ્ ।
રેવત્યાદિમૃગાન્તાશ્ચ ઋક્ષાણિ પ્રથમા કલા

પઞ્ચપઞ્ચાન્યત્ર ભાનિ ચૈત્રાદ્ય ઉદયસ્તથા ।
દ્વાદશાહૈર્દ્વયોર્માસનામ્નોરાદ્યક્ષરં તથા

કલાલિઙ્ગા ચ યા તિષ્ઠેત્પઞ્ચમસ્તસ્ય વૈ મૃતિઃ ।
કલા તિથિસ્તથા વારો નક્ષત્રં માસમેવ ચ

નામોદયસ્ય પૂર્વં ચ તથા ભવતિ નાન્યથા ।
ઓં ક્ષૈં (ક્ષૌઃ) શિવાય નમઃ

ક્ષામાદ્યઙ્ગશિવામીક્ષા વિષગ્રહમતિર્હર ।
ત્રૈલોક્યમોહનં બીજં નૃસિંહસ્ય તુ પદ્મ(ન્ન)ગમ્

મૃત્યુઞ્જયો ગણો લક્ષ્મી રોચનાદ્યૈસ્તુ લેખિતઃ ।
ભૂર્જે તુ ધારિતાઃ કણ્ઠે બાહૌ ચેતિ જયાદિદાઃ