ગરુડ પુરાણ · અધ્યાય 1.52

ઇતિ શ્રીગારુડે મહાપુરાણે પૂર્વખણ્ડે પ્રથમાંશાખ્યે આચારકાણ્ડે દાનધર્મનિરૂપણં નામૈકપઞ્ચાશત્તમો ઽધ્યાયઃ
શ્રીગરુડમહાપુરાણમ્- 52
બ્રહ્મોવાચ ।
અતઃ પરં પ્રવક્ષ્યામિ પ્રાયશ્ચિત્તવિધિં દ્વિજાઃ ।
બ્રહ્મહા ચ સુરાપશ્ચ સ્તેયી ચ ગુરુતલ્પગઃ

પઞ્ચ પાતકિનસ્ત્વેતે તત્સંયોગી ચ પઞ્ચમઃ ।
ઉપપાપાનિ ગોહત્યાપ્રભૃતીનિ સુરા જગુઃ

બ્રહ્મહા દ્વાદશાબ્દાનિ કુટીં કૃત્વા વને વસેત્ ।
કુર્યાદનશનં વાથ ભૃગોઃ પતનમેવ ચ

જ્વલન્તં વા વિશેદગ્નિં જલં વા પ્રવિશેત્સ્વયમ્ ।
બ્રાહ્મણાર્થે ગવાર્થે વા સમ્યક્ પ્રાણાન્પરિત્યજેત્

દત્ત્વા ચાન્નં ચ વિદુષે બ્રહ્મહત્યાં વ્યપોહતિ ।
અશ્વમેધાવભૃથકે સ્નાત્વા વા મુચ્યતે દ્વિજઃ

સર્વસ્વં વા વેદવિદે બ્રાહ્મણાય પ્રદાપયેત્ ।
સરસ્વત્યાસ્તરઙ્ગિણ્યાઃ સઙ્ગમે લોકવિશ્રુતે

શુદ્ધે ત્રિષવણસ્નાતસ્ત્રિરાત્રોપોષિતો દ્વિજઃ ।
સેતુબન્ધે નરઃ સ્નાત્વા મુચ્યતે બ્રહ્મહત્યયા

કપાલમોચને સ્નાત્વા વારાણસ્યાં તથૈવ ચ ।
સુરાપસ્તુ સુરાં પીત્વા અગ્નિવર્ણાં દ્વિજોત્તમઃ

પયો ઘૃતં વા ગોમૂત્રં તસ્માત્પાપાત્પ્રમુચ્યતે ।
સુવર્ણસ્તેયી મુક્તઃ સ્યાન્મુસલેન હતો નૃપૈઃ

ચીરવાસા દ્વિજો ઽરણ્યે ચરેદ્બ્રહ્મહણવ્રતમ્ ।
ગુરુભાર્યાં સમારુહ્ય બ્રાહ્મણઃ કામમોહિતઃ

અવગૂહેત્સ્ત્રિયં તપ્તાં દીપ્તાં કાર્ષ્ણાયસીં કૃતામ્ ।
ગુર્વઙ્ગનાગામિનશ્ચ ચરેયુર્બહ્મહવ્રતમ્

ચાન્દ્રાયણાનિ વા કુર્યાત્પઞ્ચ ચત્વારિ વા પુનઃ ।
પતિતેન ચ સંસર્ગં કુરુતે યસ્તુ વૈ દ્વિજઃ

સ તત્પાપાપનોદાર્થં તસ્યૈવ વ્રતમાચરેત્ ।
તપ્તકૃચ્છ્રં ચરેદ્વાથ સંવત્સરમતન્દ્રિતઃ

સર્વસ્વદાનં વિધિવત્સર્વપાપવિશોધનમ્ ।
ચાન્દ્રાયણં ચ વિધિના કૃતં ચૈવાતિકૃચ્છ્રકમ્

પુણ્યક્ષેત્રે ગયાદૌ ચ ગમનં પાપનાશનમ્ ।
અમાવસ્યાં તિથિં પ્રાપ્ય યઃ સમારાધયેદ્ભવમ્

બ્રાહ્મણાન્ ભોજયિત્વા તુ સર્વપાપૈઃ પ્રમુચ્યતે ।
ઉપોષિતશ્ચતુર્દશ્યાં કૃષ્ણપક્ષે સમાહિતઃ

યમાય ધર્મરાજાય મૃત્યવે ચાન્તકાય ચ ।
વૈવસ્વતાય કાલાય સર્વભૂતક્ષયાય ચ

પ્રત્યેકં તિલસંયુક્તાન્દદ્યાત્સપ્ત જલાઞ્જલીન્ ।
સ્નાત્વા નદ્યાં તુ પૂર્વાહ્ને મુચ્યતે સર્વપાતકૈઃ

બ્રહ્મચર્યમધઃ શય્યામુપવાસં દ્વિજાર્ચનમ્ ।
વ્રતેષ્વેતેષુ કુર્વીત શાન્તઃ સંયતમાનસઃ

પષ્ઠ્યામુપોષિતો દેવં શુક્લપક્ષે સમાહિતઃ ।
સપ્તમ્યામર્ચયેદ્ભાનું મુચ્યતે સર્વપાતકૈઃ

એકાદશ્યાં નિરાહારઃ સમભ્યર્ચ્ય જનાર્દનમ્ ।
દ્વાદશ્યાં શુક્લપક્ષસ્ય મહાપાપૈઃ પ્રમુચ્યતે

તપો જપસ્તીર્થસેવા દેવબ્રાહ્મણપૂજનમ્ ।
ગ્રહણાદિષુ કાલેષુ મહાપાતકનાશનમ્

યઃ સર્વપાપયુક્તો ઽપિ પુણ્યતીર્થેષુ માનવઃ ।
નિયમેન ત્યજેત્પ્રાણાન્મુચ્યતે સર્વપાતકૈઃ

બ્રહ્મઘ્નં વા કૃતઘ્નં વા મહાપાતકદૂષિતમ્ ।
ભર્તારમુદ્ધરેન્નારી પ્રવિષ્ટા સહ પાવકમ્

પતિવ્રતા તુ યા નારી ભર્તુઃ શુશ્રૂષણોત્સુકા ।
ન તસ્યા વિદ્યતે પાપમિહ લોકે પરત્ર ચ

તથા રામસ્ય સુભગા સીતા ત્રૈલોક્યવિશ્રુતા ।
પત્ની દાશરથેર્દેવી વિજિગ્યે રાક્ષસેશ્વરમ્

ફલ્ગુતીર્થાદિષુ સ્નાતઃ સર્વાચારફલં લભેત્ ।
ઇત્યાહ ભગવાન્વિષ્ણુઃ પુરા મમ યતવ્રતાઃ