ગર્ગસંહિતા · અધ્યાય 9.8

મહાપૂજાવિધિવર્ણનમ્
શ્રીવ્યાસ ઉવાચ -
અથ સ્નાત્વા ચ કૃત્વા ચ નિત્યનૈમિત્તિકીં ક્રિયામ્ ॥
પઞ્ચવર્ણસમાયુક્તં શુદ્ધે સ્થણ્ડિલમણ્ડલે

દ્વાત્રિંશદ્દલસંયુક્તં કાર્ણિકાકેસરોજ્જ્વલમ્ ॥
વિધાય કમલં સ્થાપ્ય વિધિવદ્વેદસૂક્તિભિઃ

કર્ણિકાયાં ન્યસેદ્‌રાજન્હરેઃ સિંહાસનં શુભમ્ ॥
તત્ર રાધાં રમાં સ્થાપ્ય ભૂદેવીં વિરજાં તથા

તન્મધ્યે સ્થાપયેત્સાક્ષાચ્છ્રીકૃષ્ણં પુરુષોત્તમમ્ ॥
તથાષ્ટદલમધ્યે તુ રાધિકાષ્ટસખીઃ શુભાઃ

તતોઽષ્ટદલમધ્યે તુ શ્રીકૃષ્ણસ્ય તથા સખીન્ ॥
તથા ષોડશપર્ણેષુ સખીનાં ચ દ્વયં દ્વયમ્

કમલસ્ય ચ પાર્શ્વેષુ શંખં ચક્રં ગદાં તથા ॥
પદ્મં ચ નંદકં શાર્ઙ્ગં બાણાંશ્ચ મુસલં હલમ્

કૌસ્તુભં વનમાલાં ચ શ્રીવત્સં નીલમંબરમ્ ॥
પીતાંબરં તથા વંશીં વેત્રં ચ સ્થાપયેદ્‍બુધઃ

તતઃ પાર્શ્વેષુ તાલાંકં ગરુડાંકં રથં તથા ॥
સુમતિં દારુકં સૂતં ગરુડં કુમુદં તથા

ચંડં ચૈવ પ્રચંડં ચ બલં ચૈવ મહાબલમ્ ॥
કુમુદાક્ષં બલં ચૈવ સ્થાપયેદ્યત્‍નતઃ સુધીઃ

તથા દિક્ષુ ચ દિક્પાલાન્સંસ્થાપ્ય ચ પૃથક્ પૃથક્ ॥
વિષ્વક્સેનં શિવં માં ચ વિધિં દુર્ગાં વિનાયકમ્

નવગ્રહાંશ્ચ વરુણં તથા ષોડશ માતૃકાઃ ॥
તત્પદ્માગ્રે વીતિહોત્રં સ્થંડિલે સ્થાપયેદ્‍બુધઃ

આવાહનમાસનં ચ પાદ્યમર્ઘ્યં વિશેષતઃ ॥
સ્નાનં ચ મધુપર્કં ચ ધૂપં દીપં તથૈવ ચ

યજ્ઞોપવીતં વસ્ત્રં ચ ભૂષણં ગંધમેવ ચ ॥
પુષ્પં તથાક્ષતાંશ્ચૈવ નૈવેદ્યં ચ મનોહરમ્

આચમનં પ્રદાતવ્યં તાંબૂલં દક્ષિણાં તથા ॥
પ્રદક્ષિણાં પ્રાર્થનાં ચ તથા નીરાજનં સ્મૃતમ્

નમસ્કારં તતઃ કુર્યાત્કર્મણા ચ પૃથક્ પૃથક્ ॥
આવાહને તુ પુષ્પાણિ આસને તુ કુશદ્વયમ્ ॥
પાદ્યે શ્યામાં ચ દૂર્વાં ચ વિષ્ણુક્રાંતાં તથૈવ ચ ॥
સૌગંધિકાનિ પુષ્પાણિ અર્ઘ્યે યોગ્યાનિ યાદવ

ચંદનોશીરકર્પૂરકુંકુમાગુરુમિશ્રિતમ્ ॥
એતાદૃશં જલં યોગ્યં સ્નાને રાજન્મહામતે

મધુપર્કે હ્યામલકમરવિંદં તથા મતમ્ ॥
ધૂપે ગંધાષ્ટકં દેયં દીપે કર્પૂરમેવ ચ

યજ્ઞોપવીતં પીતં ચ વસ્ત્રે પીતાંબરં મતમ્ ॥
ભૂષણે ચૈવ સૌવર્ણં ગંધે કુંકુમચન્દને

તુલસીમંજરી પુષ્પેઽક્ષતેષુ સ્યુસ્તુ તંડુલાઃ ॥
નૈવેદ્યે તુ રસાઃ ષટ્ ચ ભોગા નાનાવિધા મતાઃ

જલે ગંગાજલં યોગ્યં યમુનાજલમેવ ચ ॥
જાતીફલં ચ કંકોલમંતે ચાચમને નૃપ

તાંબૂલે ચોષણં ત્વેલા દક્ષિણાયાં તુ હાટકમ્ ॥
પ્રદક્ષિણાયાં ભ્રમણં ઘૃતં નીરાજને ગવામ્

પ્રાર્થનાયાં હરેર્ભક્તિઃ પ્રેમલક્ષણસંયુતા ॥
નમસ્કારે મહારાજ સાષ્ટાંગનતવિગ્રહઃ

દ્વાદશાક્ષરમંત્રેણ શિખાં બદ્ધ્વા શુચિઃ પુમાન્ ॥
ઉપચરાન્પુરસ્કૃત્ય શ્રીમુખે સંમુખો ભવેત્

ઇતિ શ્રીગર્ગસંહિતાયાં વિજ્ઞાનખંડે શ્રીવ્યાસોગ્રસેનસંવાદે
મહાપૂજાવિધિવર્ણનં નામાષ્ટમોઽધ્યાયઃ