ગર્ગસંહિતા · અધ્યાય 6.20

શ્રીનારદ ઉવાચ ॥
દ્વિતીયસ્યાપિ દુર્ગસ્ય પૂર્વદ્વારે વિદેહરાટ્ ॥
ઇન્દ્રતીર્થં મહાપુણ્યં કામદં સિદ્ધિદાયકમ્

તત્ર સ્નાત્વા નરો રાજન્નિંદ્રલોકં પ્રયાતિ હિ ॥
ઇહૈવ ચન્દ્ર સાદૃશ્યં વૈભવં પ્રાપ્યતે નરઃ

તથા વૈ દક્ષિણે દ્વારે સૂર્યકુણ્ડોભિધીયતે॥
યત્ર સત્રાજિતેનાપિ પૂજિતોભૂત્સ્યમંતકઃ

તત્ર સ્નાત્વા પદ્મરાગં યો દદાતિ નૃપેશ્વર ॥
સૂર્યપ્રભવિમાનેન સૂર્યલોકં પ્રયાતિ હિ

તથા વૈ પશ્ચિમે દ્વારે બ્રહ્મતીર્થં વિશિષ્યતે ॥
તત્ર સ્નાત્વા નરો રાજન્સ્વર્ણપાત્રે ચ પાયસમ્ ॥

યો દદાતિ મહબુદ્ધિસ્તસ્ય પુણ્યફલં શૃણુ ॥
બ્રહ્મહા પિતૃહા ગોઘ્નો માતૃહાચાર્યહાઘવાન્

ઇન્દ્રલોકે પદં ધૃત્વા બિભ્રદ્બ્રહ્મમયં વપુઃ ॥
ચન્દ્રાભેન વિમાનેન યાતિ બ્રહ્મપદં સ ચ

તથા વૈ ઉત્તરે દ્વારે ક્ષેત્રં સ્યાન્નૈલલોહિતમ્ ॥
યત્ર સાક્ષાન્મહાદેવો રાજતે નીલલોહિતઃ

દેવતા મુનયઃ સર્વે તથા સપ્તર્ષયઃ પરે ॥
વસંતિ યત્ર વૈદેહ તથા સર્વે મરુદ્ગણાઃ

નીલલોહિતલિંગં તુ યત્ર સંપૂજ્ય યત્નતઃ ॥
ઐશ્વર્યમતુલં લેભે રાવણો લોકરાવણઃ

કૈલાસસ્યાપિ યાત્રાયાં યત્ફલં લભતે નૃપ ॥
તસ્માચ્છતગુણં પુણ્યં નીલલોહિતદર્શનાત્

નીલલોહિતકુણ્ડે વૈ સ્નાતિ યસ્ત્રિદિનં નરઃ ॥
સ યાતિ શિવલોકાખ્યં પાપાયુતયુતોપિ હિ

સપ્તસામુદ્રકં નામ તીર્થં યત્ર વિરાજતે ॥
તત્ર સ્નાત્વા નરઃ પાપી પાપસંઘૈઃ પ્રમુચ્યતે

સમાનં ચ સમુદ્રાણાં સ્નાનપુણ્યં લભેત્ત્વરમ્ ॥
વિષ્ણુર્વિરિંચ્યો ગિરિશ ઇન્દ્રો વાયુર્યમો રવિઃ

પર્જન્યો ધનદઃ સોમઃ ક્ષિતિરગ્નિરપાંપતિઃ॥
તત્પાર્શ્વેષુ સદા હ્યેતે તિષ્ઠંતિ મનુજેશ્વર

સપ્તકોટીનિ તીર્થાનિ બ્રહ્માંડે યાનિ કાનિ ચ ॥
સર્વાણિ તત્ર તિષ્ઠંતિ સપ્તસામુદ્રકે નૃપ

તત્ર સ્નાત્વા નરઃ પશ્ચાત્કૃત્વા સર્વપરિક્રમમ્ ॥
પ્રાપ્નોતિ દ્વારકાયાશ્ચ યાત્રાયા સફલં ફલમ્

સપ્તસામુદ્રકમૃતેન યાત્રા ફલદા સ્મૃતા ॥
સપ્તસામુદ્રકતીર્થં વિષ્ણુ રૂપં વિદુઃ સુરાઃ

ઇતિશ્રીમદ્ગર્ગસંહિતાયાં શ્રીદ્વારકાખણ્ડે નારદબહુલાશ્વસંવાદે દ્વિતીયદુર્ગે ઇન્દ્રતીર્થ બ્રહ્મતીર્થ સૂર્યકુણ્ડ નૈલલોહિત સપ્તસમુદ્ર માહાત્મ્યંનામ વિંશોઽધ્યાયઃ