ગર્ગસંહિતા · અધ્યાય 5.2

કૃષ્ણકૃતં કેશિવધમ્
શ્રી નારદ ઉવાચ -
અથ કેશી મહાદૈત્યો હયરૂપી મદોત્કટઃ ।
એત્ય વૃદાવનં રમ્યં જગર્જ્જ ઘનવદ્‌બલી

યસ્ય પાદપ્રતાડેન નિપેતુઃ શાખિનો દૃઢાઃ ।
પુચ્છઘાતેન ગગને ખંડં ખંડં યયુર્ઘનાઃ

તં વીક્ષ્ય દુઃસહજવં ગોપગોપીગણા ભૃશમ્ ।
ભયાતુરા મૈથિલેન્દ્ર શ્રીકૃષ્ણં શરણં યયુઃ

મા ભૈષ્ટેત્યભયં દત્વા ભગવાન્વૃજિનાર્દનઃ ।
કટૌ પીતાંબરં બદ્ધ્વા હંતું દૈત્યં પ્રચક્રમે

હરિં પશ્ચિમપાદાભ્યાં સંતતાડ મહાસુરઃ ।
ચાલયન્પૃથિવીં રાજન્નાદયન્ વ્યોમમંડલમ્

ગૃહીત્વા પાદયોર્દૈત્યં ભ્રામયિત્વા ભુજેન ખે ।
ચિક્ષેપ યોજનં કૃષ્ણો વાતઃ પદ્મમિવોદ્‍ધૃતમ્

પુનરાગતવાન્ સોઽપિ ક્રોધપૂરિતવિગ્રહઃ ।
પુચ્છેન શ્રીહરિં દેવં સંતતાડ વ્રજાંગણે

પુચ્છે ગૃહીત્વા તં કૃષ્ણો ભ્રામયિત્વા ભુજૌજસા ।
યોજનાનાં શતં રાજન્ ચિક્ષેપ ગગને બલાત્

આકાશાત્પતિતઃ સોઽપિ કિંચિદ્વ્યાયાકુલમાનસઃ ।
સમુત્થાય પુનર્દૈત્યો જગર્જ ઘનવદ્‌બલી

સટા વિધુન્વન્ રોમાણિ બાલં ખે ચાલયન્મુહુઃ ।
મહીં વિદારયન્પાદૈરુત્પપાત હરેઃ પુરઃ

તતાડ મુષ્ટિના તં વૈ ભગવાન્મધુસૂદનઃ ।
તસ્ય મુષ્ટિપ્રહારેણ મૂર્છિતો ઘટિકાદ્વયમ્

મસ્તકેન ગલોદ્દેશે સમુદ્ધૃત્ય હરિં હયઃ ।
ભૂમંડલાદુત્પપાત ગગને લક્ષયોજનમ્

તયોર્યુદ્ધમભૂત્ ઘોરં ગગને પ્રહરદ્વયમ્ ।
પદૈર્દદ્‌ભિઃ સટાભિશ્ચ પુચ્છતીક્ષ્ણખુરૈર્નૃપ

ગૃહીત્વા તં હરિર્દોર્ભ્યાં ભ્રામયિત્વા ત્વિતસ્તતઃ ।
આકશાત્પાતયામાસ કમંડલુમિવાર્ભકઃ

ભુજં પ્રવેશયામાસ તન્મુખે ભગવાન્ હરિઃ ।
તસ્યોદરે ગતો બાહુઃ વવૃધે રોગવદ્‌ભૃશમ્

તદા તુ લેંડં કૃતવાન્ રુદ્ધવાયુર્મહાસુરઃ ।
ખંડીભૂતોદરઃ સદ્યો મમાર હયરૂપધૃક્

દેહાદ્‌વિનિર્ગતઃ સદ્યો મુકુટી કુંડલાન્વિતઃ ।
દિવ્યરૂપધરં કૃષ્ણં પ્રાંજલિઃ પ્રણનામ હ

કુમુદ ઉવાચ -
શક્રસ્યાનુચરોઽહં વૈ કુમુદો નામ માધવ ।
તેજસ્વી રૂપવાન્ વીરો જિષ્ણુશ્છત્રભ્રમિં દધન્

વૃત્રાસુરવધે પૂર્વં બ્રહ્મહત્યાપ્રશાંતયે ।
યજ્ઞં ચક્રાર નાકેશો વાજિમેધં ક્રતૂત્તમમ્

અશ્વમેધહયં શુભ્રં શ્યામકર્ણં મનોજવમ્ ।
તમારુરુક્ષુર્દુષ્ટોઽહં ચોરયિત્વા તલં ગતઃ

તતો મરુદ્‌ગણૈર્નીતં પાશબદ્ધં મહાખલમ્ ।
શશાપ માં બલારાતિઃ ત્વં રક્ષો ભવ દુર્મતે

હયાકૃતિસ્તે સંભૂયાદ્‌ભૂમૌ મન્વંતરદ્વયમ્ ।
તચ્છાપાદદ્ય મુક્તોઽહં સદ્યસ્ત્વત્ સ્પર્શનાત્પ્રભો

કિંકરં કુરુ માં દેવ ત્વદંઘ્રૌ લગ્નમાનસમ્ ।
નમસ્તુભ્યં ભગવતે સર્વલોકૈકસાક્ષિણે

શ્રીનારદ ઉવાચ -
પ્રદક્ષિણીકૃત્ય હરિં પરેશ્વરં
વિમાનમારુહ્ય મહોજ્જ્વલં પરમ્ ।
વૈકુણ્ઠલોકં કુમુદો યયૌ ત્વરં
વિરાજયન્મૈથિલ મંડલં દિશામ્

ઇતિ શ્રીગર્ગસંહિતાયાં મથુરાખંડે શ્રીનારદબહુલાશ્વસંવાદે
કેશિવધો નામ દ્વિતીયોઽધ્યાયઃ