ગર્ગસંહિતા · અધ્યાય 4.3

માધુર્યખણ્ડઃ - તૃતીયોઽધ્યાયઃ
મૈથિલી ગોપીગણાનાં ઉપાખ્યાનમ્ -
શ્રીનારદ ઉવાચ -
મૈથિલીનાં ગોપિકાનામાખ્યાનં શૃણુ મૈથિલ ।
દશાશ્વમેધતીર્થસ્ય ફલદં ભક્તિવર્ધનમ્

શ્રીરામસ્ય વરાજ્જાતાઃ નવનન્દગૃહેષુ યાઃ ।
કમનીયં નન્દસૂનું દૃષ્ટ્વા તા મોહમાસ્થિતાઃ

માર્ગશીર્ષે શુભે માસિ ચક્રુઃ કાત્યાયનીવ્રતમ્ ।
ઉપચારૈઃ ષોડશભિઃ કૃત્વા દેવીં મહીમયીમ્

અરુણોદયવેલાયાં સ્નાતાઃ શ્રીયમુનાજલે ।
નિત્યં સમેતા આજગ્મુર્ગાયન્ત્યો ભગવદ્‌ગુણાન્

એકદા તાઃ સ્વવસ્ત્રાણિ તીરે ન્યસ્ય વ્રજાંગનાઃ ।
વિજર્હ્રુર્યમુનાતોયે કરાભ્યાં સિંચતીર્મિથઃ

તાસાં વાસાંસિ સંનીય ભગવાન્ પ્રાતરાગતઃ ।
ત્વરં કદંબમારુહ્ય ચૌરવન્મૌનમાસ્થિતઃ

તા ન વીક્ષ્ય સ્વવાસાંસિ વિસ્મિતા ગોપકન્યકાઃ ।
નીપસ્થિતં વિલોક્યાથ સલજ્જા જહસુર્નૃપ

પ્રતીચ્છન્તુ સ્વવાસાંસિ સર્વા આગત્ય ચાત્ર વૈ ।
અન્યથા ન હિ દાસ્યામિ વૃક્ષાત્કૃષ્ણ ઉવાચ હ

રાજંત્યસ્તાઃ શીતજલે હસંત્યઃ પ્રાહુરાનતાઃ

ગોપ્ય ઊચુઃ -
હે નન્દનન્દન મનોહર ગોપરત્‍ન
ગોપાલવંશનવહંસ મહાર્તિહારિન્ ।
શ્રીશ્યામસુન્દર તવોદિતમદ્ય વાક્યં
કુર્મઃ કથં વિવસનાઃ કિલ તેઽપિ દાસ્યઃ

ગોપાઙ્ગનાવસનમુણ્નવનીતહારી
જાતો વ્રજેઽતિરસિકઃ કિલ નિર્ભયોઽસિ ।
વાસાંસિ દેહિ ન ચેન્મથથુરાધિપાય
વક્ષ્યામહેઽનયમતીવ કૃતં ત્વયાઽ‍ત્ર

શ્રીભગવાનુવાચ -
દાસ્યો મમૈવ યદિ સુન્દરમન્દહાસા
ઇચ્છન્તુ વૈત્ય કિલ ચાત્ર કદંબમૂલે ।
નોચેત્સમસ્તવસનાનિ નયામિ ગેહાં-
સ્તસ્માત્કરિષ્યથ મમૈવ વચોઽવિલમ્બાત્

શ્રીનારદ ઉવાચ - તદા તા નિર્ગતાઃ સર્વા જલાદ્‌ગોપ્યોઽતિવેપિતાઃ ।
આનતા યોનિમાચ્છાદ્ય પાણિભ્યાં શીતકર્શિતાઃ

કૃષ્ણદત્તાનિ વાસાંસિ દદુઃ સર્વા વ્રજજાંગનાઃ ।
મોહિતાશ્ચ સ્થિતાસ્તત્ર કૃષ્ણે લજ્જાયિતેક્ષણાઃ

જ્ઞાત્વા તાસામભિપ્રાયં પરમપ્રેમલક્ષણમ્ ।
આહ મન્દસ્મિતઃ કૃષ્ણઃ સમન્તાદ્‌વીક્ષ્ય તા વચઃ

શ્રીભગવાનુવાચ -
ભવતીભિર્માર્ગશીર્ષે કૃતં કાત્યાયનીવ્રતમ્ ।
મદર્થં તચ્ચ સફલં ભવિષ્યતિ ન સંશયઃ

પરશ્વોઽહનિ ચાટવ્યાં કૃષ્ણાતીરે મનોહરે ।
યુષ્માભિશ્ચ કરિષ્યામિ રાસં પૂર્ણમનોરથમ્

ઇત્યુક્ત્વાઽથ ગતે કૃષ્ણે પરિપૂર્ણતમે હરૌ ।
પ્રાપ્તાનન્દા મંદહાસા ગોપ્યઃ સર્વા ગૃહાન્ યયુઃ

ઇતિ શ્રીગર્ગસંહિતાયાં માધુર્યખણ્ડે શ્રીનારદબહુલાશ્વસંવાદે
મૈથિલ્યુપાખ્યાનં નામ તૃતીયોઽધ્યાયઃ

હરિઃ ૐ તત્સચ્છ્રીકૃષ્ણાર્પણમસ્તુ ॥
વર્ગઃ :ગર્ગ સંહિતા