ગર્ગસંહિતા · અધ્યાય 4.21

કૃષ્ણ્કૃતં ગોપીગણાનાં દાવગ્નિ-મોક્ષં તથા વિપ્રપત્‍નીભ્યઃ અન્નભિક્ષા
શ્રીનારદ ઉવાચ -
અથ ક્રીડાપ્રસક્તેષુ ગોપેષુ સબલેષુ ચ ।
તૃણલોભેન વિવિશુર્ગાવઃ સર્વા મહદ્વનમ્

તા આનેતું ગોપબાલાઃ પ્રાપ્તા મુંજાટવીં પરામ્ ।
સંભૂતસ્તત્ર દાવાગ્નિઃ પ્રલયાગ્નિસમો મહાન્

ગોભિર્ગોપાઃ સમેતાસ્તે શ્રીકૃષ્ણં સબલં હરિમ્ ।
વદન્તઃ પાહિ પાહીતિ ભયાર્તાઃ શરણં ગતાઃ

વીક્ષ્ય વહ્નિભયં સ્વાનાં કૃષ્ણો યોગેશ્વરેશ્વરઃ ।
ન્યમીલયત મા ભૈષ્ટ લોચનાનીત્યભાષત

તથાભૂતેષુ ગોપેષુ તમગ્નિં ભયકારકમ્ ।
અપિબદ્‍ભગવાન્દેવો દેવાનાં પશ્યતાં નૃપ

એવં પીત્વા મહાવહ્નિં નીત્વા ગોપાલગોગણમ્ ।
પ્રાપ્તોઽભૂત્ યમુનાપારે શુભાશોકવને હરિઃ

તત્ર ક્ષુત્પીડિતા ગોપાઃ શ્રીકૃષ્ણં સબલં હરિમ્ ।
કૃતાંજલિપુટા ઊચુઃ ક્ષુધાર્તાઃ સ્મો વયં પ્રભો

તદા તાન્પ્રેષયામાસ યજ્ઞ આંગિરસે હરિઃ ।
તે ગત્વા તં યજ્ઞવરં નત્વોચુર્વિમલં વચ

ગોપા ઊચુઃ -
ગોપાલબાલૈઃ સબલઃ સમાગતો
ગાશ્ચારયન્ શ્રીવ્રજરાજનન્દનઃ ।
ક્ષુત્સંયુતોઽસ્મૈ સગણાય ભૂસુરાઃ
પ્રયચ્છતાશ્વન્નમનંગમોહિને

શ્રીનારદ ઉવાચ -
ન કિંચિદૂચુસ્તે સર્વે વચઃ શ્રુત્વા દ્વિજા નૃપ ।
ગોપા નિરાશા આગત્ય ઇત્યૂચુઃ સબલં હરિમ્

ગોપા ઊચુ -
ત્વમસ્યધીશો વ્રજમંડલે બલી
શ્રીગોકુલે નન્દપુરોઽગ્રદણ્ડધૃક્ ।
ન વર્તતે દણ્ડમલં મધોઃ પુરિ
પ્રચંડચંડાંશુમહસ્તવ સ્ફુરત્

શ્રીનારદ ઉવાચ -
પુનસ્તાન્ પ્રેષયામાસ તત્પત્‍નીભ્યો હરિઃ સ્વયમ્ ।
યજ્ઞવાટં પુનર્ગત્વા નત્વા વિપ્રપ્રિયાસ્તદા ।
કૃતાંજલિપુટા ઊચુર્ગોપાઃ કૃષ્ણપ્રણોદિતાઃ

ગોપા ઊચુઃ -
ગોપાલબાલૈઃ સબલઃ સમાગતો
ગાશ્ચારયન્ શ્રીવ્રજરાજનન્દનઃ ।
ક્ષુત્સંયુતોઽસ્મૈ સગણાય ચાંગનાઃ
પ્રયચ્છતાશ્વન્નમનંગમોહિને

શ્રીનારદ ઉવાચ -
કૃષ્ણં સમાગતં શ્રુત્વા કૃષ્ણદર્શનલાલસાઃ ।
ચક્રુસ્તથાઽન્નં પાત્રેષુ નીત્વા સર્વા દ્વિજાંગનાઃ

ત્યક્ત્વા સદ્યો લોકલજ્જાં કૃષ્ણપાર્શ્વં સમાયયુઃ ।
અશોકાનાં વને રમ્યે કૃષ્ણાતીરે મનોહરે

યથા શ્રુતં તથા દૃષ્ટં શ્રીહરેર્રૂપમદ્‌ભુતમ્ ।
પ્રાપ્યાનંદં ગતાઃ સર્વાસ્તુરીયં યોગિનો યથા

શ્રીભગવાનુવાચ -
ધન્યા યૂયં દશનાર્થમાગતા હે દ્વિજાંગનાઃ ।
પ્રતિયાત ગૃહાઞ્છીઘ્રં નિઃશંકા ભૂમિદેવતાઃ

યુષ્માકં તુ પ્રભાવેણ પતયો વો દ્વિજાતયઃ ।
સદ્યો યજ્ઞફલં પ્રાપ્ય યુષ્માભિઃ સહ નિર્મલાઃ

ગમિષ્યંતિ પરં ધામ ગોલોકં પ્રકૃતેઃ પરમ્ ।
અથ નત્વા હરિં સર્વા આજગ્મુર્યજ્ઞમણ્ડલે

શ્રીનારદ ઉવાચ -
તા દૃષ્ટ્વા બ્રાહ્મણાઃ સર્વે સ્વાત્માનં ધિક્ પ્રચક્રિરે ।
દિદૃક્ષવસ્તે શ્રીકૃષ્ણં કંસાદ્‌ભીતા ન ચાગતાઃ

ભુક્ત્વાઽન્નં સબલઃ કૃષ્ણો ગોપાલૈઃ સહ મૈથિલ ।
ગાઃ પાલયન્નાજગામ વૃન્દારણ્યં મનોહરમ્

ઇતિ શ્રીગર્ગસંહિતાયાં માધુર્યખણ્ડે શ્રીનારદબહુલાશ્વસંવાદે
દાવાગ્નિમોક્ષ વિપ્રપત્‍નીદર્શનં નામૈકવિંશોઽધ્યાયઃ

હરિઃ ૐ તત્સચ્છ્રીકૃષ્ણાર્પણમસ્તુ ॥
વર્ગઃ :ગર્ગ સંહિતા