ગર્ગસંહિતા · અધ્યાય 4.22

માધુર્યખણ્ડઃ - દ્વાવિંશોઽધ્યાયઃ
નન્દાદીનાં વૈકુણ્ઠદર્શનમ્ -
શ્રીનારદ ઉવાચ -
એકદા નંદરાજોઽસૌ કૃત્વા ચૈકાદશીવ્રતમ્ ।
દ્વાદશ્યાં યમુનાં સ્નાતું ગોપાલૈર્જલમાવિશત્

તં ગૃહીત્વા પાશિભૃત્યઃ પાશિલોકં જગામ હ ।
તદા કોલાહલે જાતે ગોપાનાં મૈથિલેશ્વર

આશ્વાસ્ય સર્વાન્ ભગવાન્ ગતવાન્ વારુણીં પુરીમ્ ।
ભસ્મીચકાર સહસા પુરીદુર્ગં હરિઃ સ્વયમ્

કોટિમાર્તંડસંકાશં દૃષ્ટ્વા પ્રકુપિતં હરિમ્ ।
નત્વા કૃતાંજલિઃ પાશી પરિક્રમ્યાહ ધર્ષિતઃ

વરુણ ઉવાચ -
નમઃ શ્રીકૃષ્ણચંદ્રાય પરિપૂર્ણતમાય ચ ।
અસંખ્યબ્રહ્માંડભૃતે ગોલોકપતયે નમઃ

ચતુર્વ્યૂહાય મહસે નમસ્તે સર્વતેજસે ।
નમસ્તે સર્વભાવાય પરસ્મૈ બ્રહ્મણે નમઃ

કેનાપિ મૂઢેન મમાનુગેન
કૃતં પરં હેલનમદ્ય એવ ।
તત્ક્ષમ્યતાં ભોઃ શરણં ગતં માં
પરેશ ભૂમન્ પરિપાહિ પાહિ

શ્રીનારદ ઉવાચ -
ઇતિ પ્રસન્નો ભગવાન્ નંદં નીત્વા સુજીવિતમ્ ।
સૌખ્યં પ્રકાશયન્બંધૂન્ વ્રજમંડલમાયયૌ

નન્દરાજમુખાચ્છ્રુત્વા પ્રભાવં શ્રીહરેસ્તુ તમ્ ।
ગોપીગોપગણા ઊચુઃ શ્રીકૃષ્ણં નન્દનંદનમ્

યદિ ત્વં ભગવાન્સાક્ષાલ્લોકપાલૈઃ સુપૂજિતઃ ।
દર્શયાશુ પરં લોકં વૈકુણ્ઠં તર્હિ નઃ પ્રભો

નીત્વા સર્વાન્ તતઃ કૃષ્ણ એત્ય વૈકુણ્ઠમંદિરમ્ ।
દર્શયામાસ રૂપં સ્વં જ્યોતિર્મંડલમધ્યગમ્

સહસ્રભૂજસંયુક્તં કિરીટકટકોજ્જ્વલમ્ ।
શંખચક્રગદાપદ્મવનમાલાવિરાજિતમ્

અસંખ્યકોટિમાર્તંડ સંકાશં શેષસંસ્થિતમ્ ।
ચામરાંદોલદિવ્યાભં બ્રહ્માદ્યૈઃ પરિસેવિતમ્

તદૈવ તાન્ ગોપગણાન્ પાર્ષદાસ્તે ગદાધરાઃ ।
ઋજું કૃત્વા નતિં ધૃત્વા દૂરે સ્થાપ્ય પ્રયત્‍નતઃ

ચકિતાનિવ તાન્વીક્ષ્ય પ્રોચુસ્તે પાર્ષદા ગિરા ।
રે રે તૂષ્ણીં પ્રભવત મા વક્તવ્યં વનેચરાઃ

ભાષણં મા પ્રકુરુત ન દૃષ્ટ્વા કિં સભા હરેઃ ।
વેદા વદંતિ ચાત્રૈવ સાક્ષાદ્દેવે સ્થિતે પ્રભૌ

ઇતિ શિક્ષાં ગતા ગોપા હર્ષિતા મૌનમાસ્થિતાઃ ।
મનસ્યૂચુરયં કૃષ્ણ ઉચ્ચસિંહાસને સ્થિતઃ

અસ્માન્ દૂરાદધઃકૃત્વા ઽસ્માભિર્વક્તિ ન કર્હિચિત્ ।
તસ્માદ્વ્રજાદ્વરં નાસ્તિ કોપિ લોકો ન સૌખ્યદઃ

યત્રાનેન સ્વભ્રાત્રાપિ વાર્તા સ્યાદ્ધિ પરસ્પરમ્ ।
ઇતિપ્રવદતસ્તાન્વૈ નીત્વા શ્રીભગવાન્ હરિઃ ।
વ્રજમાગતવાન્ રાજન્ પરિપૂર્ણતમઃ પ્રભુઃ

ઇતિ શ્રીગર્ગસંહિતાયાં માધુર્યખણ્ડે શ્રીનારદ બહુલાશ્વ સંવાદે
નન્દાદિવૈકુણ્ઠદર્શનં નામ દ્વાવિંશોઽધ્યાયઃ

હરિઃ ૐ તત્સચ્છ્રીકૃષ્ણાર્પણમસ્તુ ॥
વર્ગઃ :ગર્ગ સંહિતા