ગર્ગસંહિતા · અધ્યાય 4.17

યમુના-સ્તવમ્
માંધાતોવાચ -
યમુનાયાઃ સ્તવં દિવ્યં સર્વસિદ્ધિકરં પરમ્ ।
સૌભરે મુનિશાર્દૂલ વદ માં કૃપયા ત્વરમ્

શ્રીસૌભરિરુવાચ -
માર્તંડકન્યકાયાસ્તુ સ્તવં શૃણુ મહામતે ।
સર્વસિદ્ધિકરં ભૂમૌ ચાતુર્વર્ગ્યફલપ્રદમ્

કૃષ્ણવામાંસભૂતાયૈ કૃષ્ણાયૈ સતતં નમઃ ।
નમઃ શ્રીકૃષ્ણરૂપિણ્યૈ કૃષ્ણે તુભ્યં નમો નમઃ

યઃ પાપપંકાંબુકલંકકુત્સિતઃ
કામી કુધીઃ સત્સુ કલિં કરોતિ હિ ।
વૃન્દાવનં ધામ દદાતિ તસ્મૈ
નદન્મિલિન્દાદિ કલિન્દનન્દિની

કૃષ્ણે સાક્ષાત્કૃષ્ણરૂપા ત્વમેવ
વેગાવર્તે વર્તસે મત્સ્યરૂપી ।
ઊર્માવૂર્મૌ કૂર્મરૂપી સદા તે
બિંદૌ બિંદૌ ભાતિ ગોવિન્દદેવઃ

વન્દે લીલાવતીં ત્વાં
સગનઘનનિભાં કૃષ્ણવામાંસભૂતાં ।
વેગં વૈ વૈરજાખ્યં
સકલજલચયં ખણ્ડયંતીં બલાત્સ્વાત્ ।
છિત્વા બ્રહ્માણ્ડમારાત્
સુરનગરનગાન્ ગણ્ડશૈલાદિદુર્ગાન્ ।
ભિત્વા ભૂખણ્ડમધ્યે
તટનિધૃતવતીમૂર્મિમાલાં પ્રયાન્તીમ્

દિવ્યં કૌ નામધેયં
શ્રુતમથ યમુને દણ્ડયત્યદ્રિતુલ્યં ।
પાપવ્યૂહં ત્વખણ્ડં
વસતુ મમ ગિરાં મણ્ડલે તુ ક્ષણં તત્ ।
દણ્ડ્યાંશ્ચાકાર્યદણ્ડ્યા
સકૃદપિ વચસા ખણ્ડિતં યદ્‍ગૃહીતં ।
ભ્રાતુર્માર્તંડસૂનો-
રટતિ પુરિ દૃઢઃ તે પ્રચણ્ડોઽતિદણ્ડઃ

રજ્જુર્વા વિષયાંધકૂપતરણે
પાપાખુદર્વીકરી ।
વેણ્યુષ્ણિક્ ચ વિરાજમૂર્તિશિરસો
માલાઽસ્તિ વા સુન્દરી ।
ધન્યં ભાગ્યમતઃ પરં ભુવિ નૃણાં
યત્રાદિકૃદ્વલ્લભા ।
ગોલોકેઽપ્યતિદુર્લભાઽતિશુભગા
ભાત્યદ્વિતીયા નદી

ગોપીગોકુલગોપકેલિકલિતે
કાલિન્દિ કૃષ્ણપ્રભે ।
ત્વત્કૂલે જલલોલગોલવિચલત્
કલ્લોલકોલાહલઃ ।
ત્વત્કાંતારકુતૂહલાલિકુલકૃત્
ઝંકારકેકાકુલઃ ।
કૂજત્કોકિલસંકુલો વ્રજલતા
લંકારભૃત્પાતુ મામ્

ભવંતિ જિહ્વાસ્તનુરોમતુલ્યા
ગિરો યદા ભૂસિકતા ઇવાશુ ।
તદપ્યલં યાન્તિ ન તે ગુણાંતં
સંતો મહાંતઃ કિલ શેષતુલ્યાઃ

કલિન્દગિરિનન્દિનીસ્તવ ઉષસ્યયં વાપરઃ
શ્રુતશ્ચ યદિ પાઠિતો ભુવિ તનોતિ સન્મંગલમ્ ।
જનોઽપિ યદિ ધારયેત્કિલ પઠેચ્ચ યો નિત્યશઃ
સ યાતિ પરમં પદં નિજનિકુઞ્જલીલાવૃતમ્

ઇતિ શ્રીગર્ગસંહિતાયાં માધુર્યખણ્ડે શ્રીનારદબહુલાશ્વસંવાદે
શ્રીસૌભરિમાંધાતૃસંવાદે શ્રીયમુનાસ્તવો નામ સપ્તદશોઽધ્યાયઃ

હરિઃ ૐ તત્સચ્છ્રીકૃષ્ણાર્પણમસ્તુ ॥
વર્ગઃ :ગર્ગ સંહિતા