ગર્ગસંહિતા · અધ્યાય 4.18

યમુનાપૂજાપદ્ધતિઃ
માંધાતોવાચ -
કૃષ્ણાયાઃ પટલં પુણ્યં કામદં પદ્ધતિં તથા ।
વદ માં મુનિશાર્દૂલ ત્વં સાક્ષાત્ જ્ઞાનશેવધિઃ

સૌભરિરુવાચ -
પટલં પદ્ધતિં વક્ષ્યે યમુનાયા મહામતે ।
કૃત્વા શ્રુત્વાઽથ જપ્ત્વા વા જીવન્મુક્તો ભવેન્નરઃ

પ્રણવં પૂર્વમુદ્‍ધૃત્ય માયાબીજં તતઃ પરમ્ ।
રમાબીજં તતઃ કૃત્વા કામબીજં વિધાનતઃ

કાલિન્દીતિ ચતુર્થ્યંતે દેવીપદમતઃ પરમ્ ।
નમઃ પશ્ચાત્સંવિધાર્ય જપેન્મન્ત્રમિમં નરઃ

જપ્ત્વૈકાદશલક્ષાણિ મંત્રસિદ્ધિર્ભવેદ્‌ભુવિ ।
જનૈઃ પ્રાર્થ્યાશ્ચ યે કામાઃ સર્વે પ્રાપ્યાઃ સ્વતશ્ચ તે

વિધાય ષોડશદલં પદ્મં સિંહાસને શુભે ।
કર્ણિકાયાં ચ કાલિંદીં ન્યસેચ્છ્રીકૃષ્ણસંયુતામ્

જાહ્નવીં વિરજાં કૃષ્ણાં ચન્દ્રભાગાં સરસ્વતીમ્ ।
ગોમતીં કૌશિકીં વેણીં સિંધું ગોદાવરીં તથા

વેદસ્મૃતિં વેત્રવતીં શતદ્રું સરયૂં તથા ।
પૂજયેન્ માનવશ્રેષ્ઠ ઋષિકુલ્યાં કકુદ્મિનીમ્

પૃથક્પૃથક્ તદ્દલેષુ નામોચ્ચાર્ય વિધાનતઃ ।
વૃન્દાવનં ગોવર્દ્ધનં વૃન્દાં ચ તુલસીં તથા ।
ચતુર્દિક્ષુ વિધાયાશુ પૂજયેન્નામભિઃ પૃથક્

ૐનમો ભગવત્યૈ કલિન્દનન્દિન્યૈ સૂર્યકન્યકાયૈ
યમભગિન્યૈ શ્રીકૃષ્ણપ્રિયાયૈ યૂથીભૂતાયૈ સ્વાહા ।
અનેન મંત્રેણ આવાહનાદિ ષોડશોપચારાન્ સમાહિત ઉપાહરેત્

ઇત્યેવ પટલં વિદ્ધિ તુભ્યં વક્ષ્યામિ પદ્ધતિમ્ ।
યાવત્સંપૂર્ણતાં યાતિ પુરશ્ચરણમેવ હિ

તાવદ્‌ ભવેદ્ બ્રહ્મચારી જપેન્મૌનવ્રતી દ્વિજઃ ।
યવભોજી ભૂમિશાયી પત્રભુગ્ જિતમાનસઃ

કામં ક્રોધં તથા લોભં મોહં દ્વેષં વિસૃજ્ય સઃ ।
ભક્ત્યા પરમયા રાજન્ વર્તમાનસ્તુ દેશકઃ

બ્રાહ્મે મુહૂર્તે ઉત્થાય ધ્યાત્વા દેવીં કલિંદજામ્ ।
અરુણોદયવેલાયાં નદ્યાં સ્નાનં સમાચરેત્

માધ્યાહ્ને ચાપિ સંધ્યાયાં સંધ્યાવન્દનતત્પરઃ ।
સપ્તમે નિયમે રાજન્ કાલિન્દીતીરમાસ્થિતઃ

દશલક્ષં બ્રાહ્મણાનાં સપુત્રાણાં મહાત્મનામ્ ।
પૂજયિત્વા ગન્ધપુષ્પૈર્દત્વા તેભ્યઃ સુભોજનમ્

વસ્ત્રભૂષણસૌવર્ણપાત્રાણિ પ્રસ્ફુરંતિ ચ ।
દક્ષિણાશ્ચ શુભા દદ્યાત્તતઃ સિદ્ધિર્ભવેત્ ખલુ

ઇતિ તે પદ્ધતિઃ પ્રોક્તા મયા રાજન્ મહમતે ।
કુરુ ત્વં નિયમં સર્વં કિં ભૂયઃ શ્રોતુમિચ્છસિ

ઇતિ શ્રીગર્ગસંહિતાયાં માધુર્યખણ્ડે શ્રીનારદબહુલાશ્વસંવાદે
શ્રીસૌભરિમાંધાતૃસંવાદે પટલપદ્ધતિવર્ણનં નામાષ્ટાદશોઽધ્યાયઃ

હરિઃ ૐ તત્સચ્છ્રીકૃષ્ણાર્પણમસ્તુ ॥
વર્ગઃ :ગર્ગ સંહિતા