ગર્ગસંહિતા · અધ્યાય 4.16

યમુના કવચમ્
માંધાતોવાચ -
યમુનાયાઃ કૃષ્ણરાજ્ઞ્યાઃ કવચં સર્વતોઽમલમ્ ।
દેહિ મહ્યં મહાભાગ ધારયિષ્યામ્યહં સદા

સૌભરિરુવાચ -
યમુનાયાશ્ચ કવચં સર્વરક્ષાકરં નૃણામ્ ।
ચતુષ્પદાર્થદં સાક્ષાચ્છૃણુ રાજન્મહામતે

કૃષ્ણાં ચતુર્ભુજાં શ્યામાં પુણ્ડરીકદલેક્ષણામ્ ।
રથસ્થાં સુન્દરીં ધ્યાત્વા ધારયેત્કવચં તતઃ

સ્નાતઃ પૂર્વમુખો મૌનિ કૃતસંધ્યઃ કુશાસને ।
કુશૈર્બદ્ધશિખો વિપ્રઃ પઠેદ્વૈ સ્વસ્તિકાસનઃ

યમુના મે શિરઃ પાતુ કૃષ્ણા નેત્રદ્વયં સદા ।
શ્યામા ભ્રૂભંગદેશં ચ નાસિકાં નાકવાસિની

કપોલૌ પાતુ મે સાક્ષાત્પરમાનન્દરૂપિણી ।
કૃષ્ણવામાંસસંભૂતા પાતુ કર્ણદ્વયં મમ

અધરૌ પાતુ કાલિન્દી ચિબુકં સૂર્યકન્યકા ।
યમસ્વસા કન્ધરાં ચ હૃદયં મે મહાનદી

કૃષ્ણપ્રિયા પાતુ પૃષ્ઠં તટિનિ મે ભુજદ્વયમ્ ।
શ્રોણીતટં ચ સુશ્રોણી કટિં મે ચારુદર્શના

ઊરુદ્વયં તુ રંભોરુર્જાનુની ત્વંઘ્રિભેદિની ।
ગુલ્ફૌ રાસેશ્વરી પાતુ પાદૌ પાપપ્રહારિણી

અંતર્બહિરધશ્ચોર્ધ્વં દિશાસુ વિદિશાસુ ચ ।
સમંતાત્પાતુ જગતઃ પરિપૂર્ણતમપ્રિયા

ઇદં શ્રીયમુનાશ્ચ કવચં પરમાદ્‌ભુતમ્ ।
દશવારં પઠેદ્‌ભક્ત્યા નિર્ધનો ધનવાન્ભવેત્

ત્રિભિર્માસૈઃ પઠેદ્ધીમાન્ બ્રહ્મચારી મિતાશનઃ ।
સર્વરાજ્યાધિપત્યઞ્ચ પ્રાપ્યતે નાત્ર સંશયઃ

દશોત્તરશતં નિત્યં ત્રિમાસાવધિ ભક્તિતઃ ।
યઃ પઠેત્પ્રયતો ભૂત્વા તસ્ય કિં કિં ન જાયતે

યઃ પઠેત્પ્રાતરુત્થાય સર્વતીર્થફલં લભેત્ ।
અંતે વ્રજેત્પરં ધામ ગોલોકં યોગિદુર્લભમ્

ઇતિ શ્રીગર્ગસંહિતાયાં માધુર્યખણ્ડે શ્રીનારદબહુલાશ્વસંવાદે
શ્રીસૌભરિમાંધાતૃસંવાદે શ્રીયમુનાકવચં નામ ષોડશોઽધ્યાયઃ

હરિઃ ૐ તત્સચ્છ્રીકૃષ્ણાર્પણમસ્તુ ॥
વર્ગઃ :ગર્ગ સંહિતા